1 Kurintu 14 - Fanawbuid tagsibaliwas Fakayabian

Foyungan sabaliwa at Masine fag Falad at ngay Nafon

¹ Nu katanya, ugatani fasii ayu fakesugun, ay ugatani yangay laman mabul am at Masine fag Falad at ngay fon, kaugat wan sabaliwa nu kamoyung am Dius at longan.

² Sik taw tagsaful garingang sat yud katogdungug fag fangaringang, at fagfakamatoanun bunwa taw nu bunway Dius tua, aroro nusnga sinu wa togdungug at longan. Ay at Masine fag Falad ggubuk anya laman kanya glong nusnga setaw at madulo.

³ Sik taw tagfoyung Dius at longan, gfoyung sa sangay taw laman gfaksvn at ngay fagafanudun, ay gfabitsug at ngay amatanganan.

⁴ Tagaringang at yud katogdungug fag fangaringang, at fagfaksvnun at sadili way, ay dewa katanya, takamoyung Dius at longan, kanya gfaksvn tua ngay tagafanud.

⁵ Kaylat au fagayu am nu saful am garingang at yud katogdungug fag fangaringang. Ay maksvn nu kaylat au nu kamoyung am Dius at longan. Aroro takamoyung Dius at longan, amafanud yap tua tagaringang at yud katogdungug fag fangaringang, kanya nu dway gfayamag at longan at masuad, laman gfaksvn ngay tagafanud.

⁶ Ku ngay faduksay, nu ndasug kban sanya, nu garingang au sa ayu nu ay fagyudun way togdungug fag fangaringang, o ku longan ro e tungkul sa ayu? Duan. Ay laman ro e tungkul tua sa ayu, ku fagnamoyungun sa ayu sa tua baliwa Dius at longan, ay fagsafulun, foyungan, ay famasaful.

⁷ Sik fagfawangun yud e leleg, kata tulali ay fagfawangun ke ngay bakyang, nu dway nafabadbalian at mesa awang, tain ro nu kasaful at ruri?

⁸ Sik tagbudyung nu dway mayamag nu gbudyung, o ngay tagfawayan ro gfalganan laman namawayan?

⁹ Katanya yangay, tain ro ngay taw nu kayamag am longan, am aringang nu at yud way katogdungug fag fangaringang? Nu katanya, kata way nu tagmara am fagfakamatoanun.

¹⁰ Sas fagdaul daga ngayuk fangaringang, ay galay sik fangaringang mesa e masuad.

¹¹ Nu dakway gtogdungug sik taw tagfakamatoan angku, ay kanya way gtogdungug angku, we masuad dewa ami gkamatoan.

¹² Maksvn nu gyabulun am at Masine fag Falad at ngay famonun, nu katanya, ugatani laman mul wam fia kafag ngay famonun tagfaksvn ayu fag ngay tagafanud.

¹³ Nu katanya, sik taw tagsaful garingang at yud katogdungug fag fangaringang, kanya darangini tua, laman Dius gfon anya fagsafulun gfayamag at ngay aringang.

¹⁴ Ay nu gdarangin au sa sik fangaringang at yud katogdungug, ku falad gdarangin, dewa katanya ku ngay aringang wa mayamag sa ku amatanganan.

¹⁵ Nu katanya, nataw at masine ku fakamulun? Gdarangin au ay galubad siginan ku falad, ay siginan yangay ku amatanganan.

¹⁶ Nu guseganan o sas Dius nu siginan way lang am falad, tain ro tagdungugan emu fag taw nu malong te, “Anud,” kanya fagayu nu dway togdungug am ngay longan?

¹⁷ Matuyan guseganan o sas Dius, dewa katanya wo nafaksvn tagdungugan emu fag ngay taw.

¹⁸ Guseganan au sa tam Dius te, gtungud yay ayu fagayu nu garingang au at yud katogdungug fag fangaringang.

¹⁹ Ay nu si au sa ngay tagafanud at fagmafulan, amasine yap ku fagfoyungun nu lima yakmank longan nu mayamag tua ngap fia, dewa ngap safuluk libuk longan nu at yud way katogdungug fag fangaringang.

²⁰ Ku ngay faduksay, dangay kata sik sisian ay amatanganan. Ay nu sabaliwas fagmauriun, ay amatanganan fakatai way sik sisian at bagu kasalug, ay nu sabaliwa fagmatogdungugun ay amatanganan fakatai tua sik mafagtainan at amatanganan.

²¹ Katatuy Muisis at Faugali: “Tam Fun nalong te, Namaaringang kban sanya fag ngay taw tagsiginans ngay talun tagsadsamanan at ngay fangaringang, ay siginan tangayayu fag talun at taw, laman namoyung au sa anya fagayu, ay dewa katanya kafag ngay taw wa ban kaylat gdungugan angku.”

²² Nu katanya, ngay fangaringang at yud katogdungug, sik fakatoglagan way sat yud gafanud, bunwa sa sangay tagafanud. Ay nu gfayamag Dius at longan, sik fakatoglagan sa sangay tagafanud, bunwa sat yud gafanud.

²³ Nu katanya, gina am maful, ay fagayu am nu garingang am nu sa way at yud katogdungug fag ngay fangaringang, ay nu e ndasug ro sanya sik taw at yud e fagsafulun ay at yud gafanud, o kanya ro wa gamatangan te, sik ngay tagfansaful am?

²⁴ Sik taw at yud gafanud ay at yud e fagsafulun nu nasakbo sa ay fagmafulan, ay ginanya fagayu am gfayamag am Dius at longan, kanya ro gamatangan sat sadili te, sik tagasalanan.

²⁵ Ay kafag taw sumaful at masuksukan sit amatanganan. Ay kanya umlub, ay sumeg tam Dius te, “Anud, Dius gufud ayu.”

Nu Gseg Dius

²⁶ Ku ngay faduksay, katatuy at masine ay fakamulun gina am maful: tiba si ayu tagalubad, ay tiba tagfoyung, ay tiba tagfayamag Dius at longan, ay tiba tagaringang sa sangay fangaringang at yud katogdungug, ay tiba gfayamag kafag ngay fangaringang at masuad. Fakamuluni takatanya fagayu laman gfaksvn ayu fag ngay tagafanud.

²⁷ Ay nu e gfoyung sa sik fangaringang at yud katogdungug, balikam duak taw ay tuluk taw gungbusan, ay e gfayamagi tua at ngay longan,

²⁸ ay nu dway e gfayamag, at masine nu maragangani way lang, ay sa yakman lang at amatanganan nu gfakamatoan Dius.

²⁹ Ay kaduge duak taw ay tuluk taw gfayamag Dius at longan, tibak taw dungugani ay amatangani fia te, o at foyungan matuyan.

³⁰ Ay at sadi at malunggung sanya, Dius nu nafon tua sa anya fagmayamagun sa baliwa at longan, at masine tagfayamag ginanya aragangi yap.

³¹ Aroro fagayu at ke fagmakatuun gfayamag Dius at longan masine nu gungbusan tua, laman fagayu tagafanud umke fagsafulun ay umkaksvn at fagafanudun.

³² Sik tagsaful gfayamag Dius at longan, saful tua gfaragang at sadili laman gfon buknga sa tibak taw tagsaful yangay gfayamag,

³³ aroro tam Dius wa kaylat nu e fagbadbaboanun nu bunway fagmasadiun tua. Ay katanyai yangay fagayu tagafanud at ugali.

³⁴ Ay fagayu mangena masine nu maragangan gina am maful, aroro mangena wa masine garingang, nu bunway faningi tua at mangama kata at kinriruk sis Muisis at Faugali.

³⁵ Ay sik mangena nu e fagyasafulun, gina yaro noli sat bale nu ginto sat mangama, aroro mapla way sik mangena nu garingang sis bale daranginan.

³⁶ Gamatangan am manga te, siginan ayu Dius at longan, ay mannga sa way lang ayu nu kadasug.

³⁷ Ay nusnga sinu fag taw tagamatangan te, kanya sik tagfayamag Dius at longan ay e fagmakatuun siginan at Masine fag Falad, masine kanya nu gsaful yangay te, ku rirukan sa ayu tam Fun at suguan.

³⁸ Ay nusnga sinu fag taw nu dway gfaning takatanya, lag am gtoglag ya te, ay faduksay.

³⁹ Nu katanya, ku ngay faduksay, ugatani tua nu gfayamag am Dius at longan, ay lag am gsalag tagaringang sa sik fangaringang at yud katogdungug.

⁴⁰ Ay baliwan nusnge wain ay fakamulun, fakamuluni at kasakan ay sat masine fag balyawvtan.