1 Kurintu 11 - Fanawbuid tagsibaliwas Fakayabian

¹ Faningi angku kata nu gfaning au tam Fun Isus.

Suguan sabaliwa nu Gseg

² Guseganan au ayu, aroro gamatang tuam angku ay gfaning tuam ku ngay foyungan.

³ Ay kaylat au nu nasaful am te, tam Fun Isus wan mangama at fun. Ay mangama, kanya wan mangena at fun, ay tam Dius wan tam Fun Isus at fun.

⁴ Fagayu mangama nu gdarangin ay nu gfasaful Dius at Longan nu gtabun way at alfuyu, kanya gfauri way at alfuyu, at masuad te, tam Fun Isus.

⁵ Ay fagayu mangena nu gdarangin ay nu gfasaful Dius at Longan nu dway e fantabun at alfuyu kanya gfauri way at alfuyu, at masuad te, at mangama. Kanya kata way nu naufo at buk laman gfae fakaplaun anya.

⁶ Ay sik mangena nu dway kaylat gtabun at alfuyu, faufoi wan at buk. Ay aroro mapla way sik mangena nu naufo at buk, masine kanya nu gtabun at alfuyu.

⁷ Ngay mangama wa masine gtabun at alfuyu aroro kanya wan Dius at aninu ay at fagusegananun. Ay sik mangena, kanya wan at mangama at fagusegananun.

⁸ Aroro mangama wa nkawat siginans mangena nu bunway mangena at kinkawat siginans mangama.

⁹ Ay mangama wa nkawat laman sas mangena nu bunway mangena laman sas mangama.

¹⁰ Ay nu katanya at masine mangena nu gtabun at alfuyu laman anggan ngay tagbarita saful te, mangena mafamaning.

¹¹ Dewa katanya sa tam fagmasadiun sa tam Fun, mangama gayudan sik mangena, ay mangena gayudan yangay sik mangama.

¹² Aroro mangena dewa nkawat siginans mangama, katsi mangama ansalug siginans mangena, ay fagayu siginans Dius.

¹³ Amatangani, o sik mangena masine way gdarangin deyud e fantabun at alfuyu?

¹⁴ O nunda wam nasaful te, wa maugali sik mangama tagfaba at buk, ay takatanya mapla way?

¹⁵ Ay dewa katanya, ngay mangena nu ngaba tua at buk, takatanya sik famauseganan anya, aroro Dius nafon anya at buk laman fantabun at alfuyu.

¹⁶ Ay nu e gfabadbaboan way sabaliwa takatanya, kwe fagmalongun ya sabaliwa takatanya, aroro wami e ugali tagsaman takatatuy, ay katanya yangay Dius at ngay taw at ugali nusnga nday.

Tam Fun at Yafun

¹⁷ Katsi ku fagnanlongun sa way baliwa nu yud au guseganan ayu. Aroro nu maful am, gfae fagmauriun way am ayu, abat ngate gfae fagmasineun ayu.

¹⁸ Taguna ku nadungug, am fag furuan, nu maful am, gawayan way am ay wa masadi ay amatanganan. Ay gafanud au bangan te, matuyan kanya fag barita.

¹⁹ Nasaful au te, matuyan wam gdiuganan laman umsaful te, sinu am at ke fagafanudun.

²⁰ Gina am maful, ay fakonun bunwa tam Fun at Yafun.

²¹ Aroro gina am kon ay buba fag fakonun, am tiba wam gfanya ya ay iba. Nu katanya, tiba si ayu kalunus wan ay tiba galangu.

²² O nunda wam e bale? Sanyai way nu gfangon am ay nu ginum am. Gfalingun am Dius at ngay taw ay gfapla am at yud e fakonun. Nataw ku longan sa ayu katsi? O guseganan au ayu? Duan.

²³ Gfoyung au sa ayu ku nadungug siginan tam Fun te, tam Fun Isus nabul sik tinapay gina fag yabi nu e namoyung anya sat mauri fag ngay taw.

²⁴ Ay kanya naseg Dius ay nalungud kafag tinapay ay nalong te, “Tuy ku bilug laman sa ayu. Fakamuluni ban takatatuy laman gamatang am angku.”

²⁵ Ay katanya yangay, nu ntabu wan at yafun, Isus nabul sik taya ay nalong te, “Tuy fag taya tam bagu fag nasadian sa ku taguk. Galay am ginum tuy, fakamuluni gugat takatatuy laman gamatang am angku.”

²⁶ Aroro galay am kon ay ginum gfoyung am tam Fun at nabulanan yakmay ban sia umdasug.

²⁷ Ay nusnga sinu ban takon tuy fag tinapay ay taginum tuy fag mamam nu dway matuyan at fakamulun, kanya e asalanan sa tam Fun at bilug ay sat taguk.

²⁸ Nu katanya, galay am at sadi gina am ganangonun ay gananginumun amatangani ay sadili.

²⁹ Aroro nusnga sinu ban takon ay taginum nu dyay fia nafae masuad sa anya tam Fun at bilug, kanya kon ay ginum faurianan sat sadili.

³⁰ Kanya wan tiba si ayu fagmamomuyun at bilug, ay tiba at fage fakasaitunun, ay tiba at faginbulun wan.

³¹ Ay baliwan nu gamatangan tua tam tam sadili, di ban tam gafaurianan.

³² Ay nu tam Fun wan taginsaful tam asalanan, kanya gatul antam laman ban di tam kadasug sas faurianan magamut fagayu taw ste swa daga.

³³ Nu katanya, ku ngay faduksay, nu maful am laman kon tam Fun at Yafun, fadfanyani tua.

³⁴ Ay sik taw nu kalunus way, fangoni yap sit bale laman diam gafaurianan gina am maful. Ay gina kban andasug sanya, namasine au tiba ay mamalong.