1 Kurintu 1 - Fanawbuid tagsibaliwas Fakayabian

¹ Au, Pablu, Dius at nauro, gfaning at fakaylatun, laman tam Fun Isus at nasugu. Ay tam faduksay Sustenes magamut si angku.

² Griruk ami sa ayu, Dius at ngay taw sis Kurintu, am at nafili siginan nu nsadi am sa tam Fun Isus. Ay Dius nauro ayu laman sik ngay yud tuam e malong, gasfuan fagayu nusnga nday at natoglag tam Fun Isus, fagayu tagafanud at Fun.

³ Sumawa nangus fia ayu Dius tam Mama ay tam Fun Isus at fagmagalangun ay at fagmanabayanun.

Fagusegananun sas Dius

⁴ Kabavn guseganan au sas Dius sabaliwa ayu aroro nafon tua sa ayu at fagmagalangun siginan tam Fun Isus,

⁵ aroro siginan nu masadi sa anya ankaksvn tuam sas nusnge wain, dewa ay longan ay ay fagsafulun,

⁶ aroro nafanud tuam fia em foyungan sabaliwa tam Fun Isus.

⁷ Nu katanya, diam e kurang fagayu at Masine fag Falad at nafon, kaduge am gfanya tam Fun Isus nu kafoli.

⁸ Kanya yangay tagbakvd ayu sitsigons fakatabuan, laman ban diam e malong gina ban tam Fun Isus kafoli fag menit.

⁹ Matuyan tam Dius at nauro ayu laman masadi am sat Baguama, Isus tam Fun.

Tagafanud nu Gbadbaboan

¹⁰ Ku ngay faduksay, maksvn nu glong au sa ayu sa tam Fun Isus at ngayan te, diuganani tua, ay dangay am ginkafudan, nu bunway masadii tua ay amatanganan ay ay algan.

¹¹ Ku ngay faduksay, siginan Klue at fagyafunan e nafadungug angku te, si ayu e gbadbaboan.

¹² Katatuy ku longan at masuad: am tiba glong am te, “Au, gfaning au Pablu.” Ay at sadi glong te, “Au gfaning au Apulus.” Ay tibak taw glong yangay te, “Au gfaning au Pedru.” Ay tiba glong te, “Au gfaning au tam Fun Isus.”

¹³ O nunda tam Fun Isus ankafud? O Pablu wan at kinrabing sas fasulungan kayu laman sa ayu? Ay o nsurung am sas Pablu at ngayan?

¹⁴ Guseganan au sas Dius te, kwe nafasurung si ayu, sas day Krispu ay Gayu,

¹⁵ laman we glong te, ansurung am sa ku ngayan.

¹⁶ Ay namatang kyay mangaro te, nafasurung kyangay Estefanas fag bale. Sas day kanya, kwe namatang ya ku nafasurung.

¹⁷ Aroro tam Fun Isus at fagnauroun angku, bunwa au sik tagfasurung nu bunway namoyung kway at Masine fag Barita. Ay ku foyungan bunwa siginan at masine fag ngay longan ay taw at fagsafulun, laman ban wa myud e tungkul tam Fun Isus at nabulanan sas fasulungan kayu.

Dius at Fagmabalyananun ay at Fagsafulun tam Fun Isus wan

¹⁸ Sa tagafaurianan fag ngay taw we tungkul em foyungan sabaliwa tam Fun Isus at nabulanan sas fasulungan kayu. Ay sa antam, at ngay kinlangfe, kanya wan Dius at fagmabalyananun.

¹⁹ Aroro e Rirukan te, “Gfamin kban at mamatanganan fag ngay taw at fagmamatanganun; gfalyam kban at ke fagsafulun at fagsafulun.”

²⁰ We tungkul ya at ke fagsafulun, ay tagfoyung Muisis at Faugali, ay at kinnanad kamabadbaboan katsi fag buknga. Dius nafasaful te, we tungkul ste swa daga fag fagmamatanganun.

²¹ Aroro Dius mamatanganan, kanya wa naylat taw nu gtoglag anya nu siginan way ste swa daga fag fagmamatanganun. Nu bunway, Dius kaylat gfalangfe nusnga sinu tagafanud sa em foyungan fag Masine fag Barita, tibak taw at nafayud e tungkul.

²² Ngay taw Udyu get te, fasurei sik madulo, ay ngay taw Gresya at fagrvbvyun sik fagmamatanganun.

²³ Ay dewa katanya, em foyungan sabaliwa tam Fun Isus at natuktukan sas fasulungan kayu, kata way sik fakataidan sa sangay taw Udyu, ay we tungkul sas yud Udyu fag ngay taw.

²⁴ Ay dewa katanya, nu sas Dius at ngay nafili fag ngay taw Udyu ay fag ngay taw Gresya, tam Fun Isus wan Dius at fagmabalyananun ay at fagmamatanganun.

²⁵ Ngay taw nu glong we tungkul Dius at algan nu gfalangfe ngay taw. Dewa katanya kanya fag algan gtungud tua ngay taw at fagmamatanganun. Ay ngay taw nu glong Dius mamomuy aroro Isus anbul; takatanya fag amatanganan gtungud tua ngay taw at fagmabitsugun.

²⁶ Ku ngay faduksay, amatangani ay kayaunanan gina Dius guro ayu. Wa ngayu si ayu at mamatanganan, kata ste swa daga fag fagmamatanganun, ay wa ngayu si ayu at mabalyanan ay takadungug fag gaban taw.

²⁷ Dewa katanya, Dius nafili ngay taw at natuyan te, at yud mamatanganan, laman gfaplan at ngay mamatanganan, ay nafili yangay ngay taw at natuyan te, at mamomuy, laman gfaplan at mabitsug fag ngay taw.

²⁸ Ngay taw at natuyan te, wa mafanud, ay we tungkul, ay tagafalingunan ste swa daga, kata kanya fag ngay taw Dius at nafili, laman namayud e tungkul ngay taw at natuyan te, tiba tungud ste swa daga.

²⁹ Dius at fagnafakamulunun takatanya laman nusnga sinu we kamatungudun sit daga salubangan.

³⁰ Ay siginan anya ansadi tua tam sa tam Fun Isus. Ay sa antam, kanya wan Dius at fagmamatanganun, siginan anya, Dius nafalangfe antam ay natap antam te, matuyan, ay kata nu yud tam e asalanan.

³¹ Nu katanya, faningi at Rirukan te, “Nusnga sinu takaylat kamatungudun, at fakamatungudunun sai tua baliwa tam Fun.”