1 Fun 9 - Fanawbuid tagsibaliwas Fakayabian

Yawi Gdog Ansure sas Sulumun

¹ Ay Sulumun nafatabu wan nu gfawat at bale ay anggan Yawi at bale, ay nafatabu wan kata at algan at fagnamawatun.

² Ay Yawi gdog ansure sa anya kata nu kasure sa anya ebi sis Gibyun.

³ Ay Yawi nalong sa anya te, “Nadungug au am darangin ay nu get o sa angku gubuk. Nafasaman au tuy fag bale laman ku fagbanwanan ban kabavn.

⁴ Ay nu matuyan tua ban o gfaning angku kata am mama Dabid, ay nu gfakamulun tua ban o fagayu ku suguan emu, ay gfafasludan ku ngay foyungan ay ku fon emu fag ngay fagaloan,

⁵ siginan tua ban gugat am kasugfunanan tagfunan ngay taw Israel kabavn. Nafatuyanan au takatanya sa am mama Dabid, gina au glong sa anya te, ‘Di ban kamin am kasugfunanan laman at nanfunan sa sangay taw Israel.’

⁶ “Dewa katanya, o ay am ngay kasugfunanan ban nu gtalyuyan way am angku, ay way ban am gfaning ku ngay foyungan ay ku nafon ayu fag ngay suguan, ay nu nafaning way ban am ay naseg tibak fagsegan,

⁷ gaiyan kban ngay taw Israel siginan ku nafon anya fag talun, ay gfayud kban e masuad tuy fag bale ku nafasaman laman ay fagnamauseganan angku. Ay fagayu ban taw kase gfalingun ayu fag ngay taw Israel.

⁸ Ay dewa ku bale masine ay kadungug, giklas kban. Ay fagayu ban at nadalan sanya kalipsik ay kadulo ay glong te, ‘Wain Yawi at fagnafakamulunun takatatuy ste fag talun ay sat bale?’

⁹ Tibak taw ban gbalus te, ‘Aroro ste fag ngay taw nafamabo at ngay mangaguyang at Dius, Yawi, at nafaduksun anya fagayu siginans talun Igiptu, ay kanya fagayu nafaning ay naseg tibak fagsegan. Kanya wan Yawi at fagnafadasugun takatanya fag ngay fagidapun.’ ”

Fun Sulumun at Nafawat Tiba

¹⁰ Kaduge duak safuluk banwa, Sulumun nafawat at bale ay anggan Yawi at bale. Nu ntabu wan,

¹¹ Sulumun nafon sas Kiram, Tiru at fun, duak safuluk furuan sis Galilea fag talun, aroro Kiram nafon sas Sulumun ngay kayu sidru ay sipres ay ngayuk gintu, nu seyu at fakaylatun.

¹² Kiram nu nalao siginans furuan Tiru laman nanlabgaban kafag ngay furuan Sulumun at nafon anya, kanya wa naylat.

¹³ Ay nainto te, “Sama, wain fakataun way tuy am nafon sa angku fag ngay furuan?” Kiram nafangayan kafag talun te, Yud e Tungkul. Ay dasug katsi, kanya yay gugat at ngayan.

¹⁴ Ginanya Kiram nafon wan sas fun Sulumun ufatk libuk fabudbungguan gintu.

¹⁵ Kata tuy fun Sulumun nu gfabulun gfafakamulun ngay takawat Yawi at bale, ay at sadili bale, ay nafasaksak daga sis fakamenitan fag afud furuan Erusalem, ay Erusalem at alad, ay furuan Kasur, furuan Megidu ay furuan Geser.

¹⁶ (Ebi ataw, Faraun, Igiptu at fun nanamawayan furuan Geser ay kanya nagbilug. Sanya ginan nairug fagdaul furuan ay nafabul tagbanwan sanya fag ngay taw Kanaan ay nafon kafag furuan sat baguina at nafangindugan Sulumun.)

¹⁷ Ay Sulumun nafaogat furuan Geser ay Bet-Kurun,

¹⁸ ay Baalat, ay Tadmur tagsis talun at yud e taw,

¹⁹ ay fagayu at furuan fagfungsuan gutluan, ay at fagfasarirungan ngay kabayu ay faguyudan fag sakayan gina namawayan. Sulumun nafawat yangay nusnga setaw at fakaylatun sis Erusalem ay sis Lebanun ay sis fagdaul at fagfunanan fag talun.

^20-21 Ay e sawad yay sanya fag talun at yud taw Israel fag ngay gaban, ngay taw Israel at yud nafabul gina gagbilug Kanaan fag talun. Kanya fag ngay taw sik ngay taw Amur, ngay taw Ket, ngay taw Peres, ngay taw Kib ay ngay taw Ebus. Sulumun nafagsuguan anya fagayu ay nafabulun gfafakamulun, ay kanya fagayu sik ngay fagsuguan dasug katsi.

²² Ay Sulumun wa nafagsuguan nusnga sinu fag taw Israel. Sarokta, kanya nafili kanya fagayu laman at ngay tagfawayan, tagfangguna at ngay tagfawayan, ay ngay tagfangguna at ngay tagsaful gsakay sis faguyudan, ay sis kabayu.

²³ Ay fun Sulumun nafili limak sandan limak safuluk taw, laman tagfangguna at ngay tagfakamulun.

²⁴ Nu ntabu wan Sulumun at nafawat fag bale laman sat bubay, Igiptu at fun at baguina, kanya nafalin anya sanya fag bale siginans Dabid at furuan. Sanya ginan, kanya nafasaksak ngay datag sanya fag furuan.

²⁵ Kayu banwa tulu ginan Sulumun nu gfon fagirugun fag ngay fanggalangun ay fanggalangun laman sas fagmanabayanun, sas fagirugan fanggalangun at nafawat laman sas Yawi. Ay gfasfuan girug famaebebanglu fag lune sis Yawi at daga salubangan. Nu katanya, Sulumun nafatabu wan nu gfawat Yawi at bale.

²⁶ Fun Sulumun nafawat yangay sik ngay sakayan lino sis Esyun-Geber, munakbang sis furuan Elat tagsis tigyangan Dagat Maraska, sis talun Edum.

²⁷ Ay fun Kiram nafasanya ngay sakayan lino ay tibak taw tagsaful gfalao kanya fag ngay sakayan, laman ggubuk Sulumun at ngay taw.

²⁸ Ay kanya fagayu gfalao kafag ngay sakayan lino sas talun Ufir ay nabuba sanya ginan labi ufatk libuk fabudbungguan gintu ay nafadasug sas fun Sulumun.