1 Fun 22 - Fanawbuid tagsibaliwas Fakayabian

Mikaya Nafararang Akab

¹ Aram ay Israel wa nke awayan ya kaduge tuluk banwa.

² Ay gina sis fatuluk banwa, Eusafat, Uda at fun, nanangablang Akab, Israel at fun.

³ Israel at fun nalong sat ngay fagsuguan te, “O nasaful am te, furuan Ramut-Gilyad tam fagagbilugun yay? Wain way tam gbalyawvtan laman gago siginans Aram at fun?”

⁴ Ay Akab nainto sas Eusafat te, “O nangalo o angku laman namawayan Ramut-Gilyad?” Ay Eusafat nabalus sas Israel at fun te, “Sabv, mafalganan au nangalo emu, ay mafalganan kyangay gfaalo sa emu ku ngay tagfawayan ay anggan ku ngay kabayu.”

⁵ Ay Eusafat nalong yangay fia sa anya te, “Taguna nanginsafuli yap Yawi at longan.”

⁶ Ay Israel at fun nafaful ufatk sandank taglong ay nainto te, “O namawayan au Ramut-Gilyad ay o mannga duan?” Ay kanya fagayu nabalus te, “Kin, loi wan, aroro tam Fun Dius ro gfababo emu.”

⁷ Ay Eusafat nainto te, “O we ste ya Yawi at taglong tam fagnangintoan?”

⁸ Ay Israel at fun nabalus Eusafat te, “Sabv, e sik taw yay tam fagnangintoan Yawi at fakaylatun. Dewa katanya, kauri au anya, aroro we longan ya sa angku at masine nu bunway at mauri way lang. At ngayan Mikaya, Imla at baguama.” Ay Eusafat nalong te, “Lag glong takatanya.”

⁹ Ay Israel at fun nalong te, “Fastiei wa vtv Mikaya, Imla at baguama.”

¹⁰ Sanya ginan, Akab talun Israel at fun ay Eusafat talun Uda at fun nasulun at mesa lanbung laman sik fun ay anlunggung sit mesa faglunggungan sis salubangan fagruyusan tagsibaliwas furuan Samarya at sakbawan, ay gdungugan ngay taglong at ngay longan.

¹¹ Ay Sedekya fag taglong, Kenaana at baguama, nawat duak sunge at fangawat sanbung. Ay kanya nalong te, “Yawi glong te, ‘Fun Akab, namawayan o ngay taw Aram siginan tuy fag duak sunge, ay gfamin ban o anya fagayu.’ ”

¹² Katanya yay fagayu taglong at longan. Kanya fagayu nalong te, “Namawayan o Ramut-Gilyad ay gbabo ro wo anya fagayu, aroro Yawi ro ggubuk emu.”

¹³ Ay fun Akab at nasugu nalong sas Mikaya te, “Fagayu taglong ansadi glong te, fun ro gbabo, ay anggan o fakatanyai yangay am longan.”

¹⁴ Ay Mikaya nalong te, “Gfatuyanan au sas Yawi, tagleleg fag Dius te, at ngay longan tua ban ku fagnanlongun.”

¹⁵ Ay Mikaya nu ndasug sas fun Akab, fun nainto anya te, “O namawayan ami Ramut-Gilyad, ay o mannga duan?” Ay Mikaya nabalus te, “Namawayan wam ay gbabo ro am, aroro Yawi gfababo ro ayu sanya fag ngay taw.”

¹⁶ Ay fun Akab nalong sas Mikaya te, “Seyu ginan wan nu glong au emu te, fatuyanani sas Yawi at ngayan laman glong o sa angku at matuyan?”

¹⁷ Ay Mikaya nalong te, “Nataginfan au ay nalag ngay taw Israel nu gfanaruayan sa sangay buksul kata ngay tupa yud e gulit ya. Ay Yawi nalong te, ‘We gfangguna ya kanya fag ngay taw. Faulii wan manabayan kanya fagayu.’ ”

¹⁸ Ay fun Akab nalong sas Eusafat te, “O nunda kya nalong emu te, kanya wa batang e nalong at matuyan sabaliwa angku, nu bunway fagmauriun way lang?”

¹⁹ Ay Mikaya nalong yangay te, “Dungugani Yawi at longan! Nalag au Yawi nu malunggung sit faglunggungan, ay at ngay tagbarita nu malindug gsumbalian sit dua tigyangan.

²⁰ Ay Yawi glong sa sangay awatan tagsis banwa te, ‘Sinu at nandaya Akab laman namaylatan anya namawayan Ramut-Gilyad laman kanya nangabul?’ Saman wa saman at ngay famalus.

²¹ Ay sanya ginan sik falad ankakbang sas Yawi ay nalong te, ‘Au wa ro at nandaya anya.’ Ay Yawi nainto te, ‘Setain ro?’

²² Ay kafag falad nabalus te, ‘Nanlao au ay namasik takamuagan au kanya fag ngay taglong.’ Nu katanya, Yawi nalong anya te, ‘Loi wan ay namakamulun o takatanya.’

²³ “Nu katanya, Yawi nanamasa am ngay taglong at ngay bibig sik takamuag fag falad, aroro Yawi kaylat nu gababawan o.”

²⁴ Ay Sedekya, Kenaana at baguama, ankakbang sas Mikaya ay nafalang sit fingi ay nalong te, “Setain nu malong o te, Yawi at falad nalao siginan angku, ay nanamakamatoan emu?”

²⁵ Ay Mikaya nabalus te, “Sumaful ban o, gina ban o nababawan, ay nananuksuan sam bale at masuksuk fag suluk.”

²⁶ Ay Akab, Israel at fun masakit nu gsugu te, “Gamati Mikaya ay tabanani fafolii sas Amun tagfangguna sis furuan daul, ay sa ku baguama Uas.

²⁷ Longi te, ‘Katatuy fun Akab at suguan: Ubungi tuy fag taw. Tinapay yakman lang ay mamam ay fagfonun, yakmay kban anfoli manabayan siginans fagawayanan.’ ”

²⁸ Ay Mikaya nalong te, “Nu nfoli tua ban o manabayan, Yawi wa naringang siginan angku.” Ay nalong yangay sa sangay taw tagsanya te, “Amatangi ku nalong.”

Akab Anbul

²⁹ Akab, Israel at fun ay Eusafat, Uda at fun, nanamawayan Ramut-Gilyad.

³⁰ Ay Akab, Israel at fun, nalong sas Eusafat te, “Gsulun au sik lanbung laman we gtoglag angku, dewa katanya, suluni am lanbung tagfatoglag te, sik fun o.” Nu katanya, Israel at fun nasulun sik lanbung laman wa katoglag, ay nalao sas fagawayanan.

³¹ Ay Aram at fun nasugu sat ngay fun tagfawayan fag tuluk safulu e duak tagsakay sit faguyudan te, “Lag am namafalo nusnga sinu fag tagfawayan, sangay Israel at fun.”

³² Ay kafag ngay fun tagfawayan tagsakay sit faguyudan nu nalag Eusafat, gamatangan te, “Anud, kanya wan Israel at fun.” Ay kanya fagayu anbiling laman gfawayan anya. Ay Eusafat nu nauro,

³³ kafag ngay fun tagfawayan nasaful te, kanya bunwa Israel at fun, ay anragang nu gfafalo anya.

³⁴ Ay sik taw Aram fag tagfawayan kaduge gfana ngay taw Israel at ngay tagfawayan, kanya nafana Israel at fun sit buknga famalabag ay natayuk sit dubdub. Ay fun Akab nalong sat tagfalao at kabayu te, “Fayayui angku siginans fagawayanan, aroro nafanan au.”

³⁵ Maksvn tua at awayan ginanya fagngabak menit, Israel at fun masararean sit faguyudan gsalubang Aram at ngay tagfawayan. At taguk nataringtingan sat faguyudan, ay gina menit mafalyuan, kanya anbul wan.

³⁶ Ay menit nu kafalyu wan, e nauro sa sangay tagfawayan te, “Galay am at sadi ulii wan sa ay mesa furuan.”

³⁷ Nu katanya, Israel at fun anbul ay at bilug nabuba sas Samarya ay sanya nu gfoli anya.

³⁸ Ay nafegus at faguyudan sis Samarya at fagigusan, si sangay mangena takamatugtug at fagigusan. Ngay idu nasupsup Israel at fun at taguk, kata Yawi at longan.

³⁹ Ay tiba ya at kinfasludan kaduge Akab gfunan ay fagayu at nafakamulun, anggan wa at nafakamulun ay nu gfalindug at masine fun at bale ay nu gfaksvn furuan ayu daul, anriruk sis fafil fagrirukan sabaliwas Israel at ngay fun.

⁴⁰ Akab nu nbul, at baguama Aasya natubus anya laman sik fun.

Eusafat nu Gfunan Talun Uda

⁴¹ Gina sis faufatk banwa Akab nu gfunan sis Israel, Asa at baguama Eusafat gfasigad gfunan sis Uda.

⁴² Eusafat at banwa tuluk safulu e lima gina gfasigad gfunan. Kanya gbanwan sis Erusalem, ay nu gfunan duak safulu e limak banwa. At mina Asuba, Silki at baguina.

⁴³ Eusafat nafaning tua at mama Asa at ugali ay matuyan at nafakamulun. Nafakamulun at masine sis Yawi at daga salubangan. Dewa katanya, kanya wa naiklas ngay bale fagnansegan si tangabat fag ngay buknga, nu katanya, ngay taw gfataglayun nu gfon fanggalangun ay nu girug at famaebebanglu fag lune.

⁴⁴ Eusafat e fagmasadiun tua sas Israel at fun.

⁴⁵ Ay tiba ya at kinfasludan kaduge Eusafat gfunan, anggan wa nu gfawayan, anriruk sis fafil fagrirukan sabaliwas Uda at ngay Fun.

⁴⁶ Kanya naiyan siginans talun at sawad fag ngay mangama tagfaebayad at sadili sa sangay bale fagnansegan, at mama Asa at yud naiyan.

⁴⁷ Ginanya fag buknga, we fun sis Edum, nu katanya, Eusafat nafili sik tagfangguna.

⁴⁸ Eusafat e nafawat sik ngay sakayan lino laman gfioan sas Ufir laman namul gintu. Dewa katanya, kanya wa mafioan ya aroro ankiklas sis Esyun-Geber.

⁴⁹ Ginanya fag buknga Aasya, Akab at baguama, nalong sas Eusafat te, “Faloi ku ngay fagsuguan sam ngay fagsuguan gina am gsakay sis sakayan lino.” Dewa katanya, Eusafat wa naylat.

⁵⁰ Ay Eusafat nu nbul wan, nanamoli anya sat ngay mangaguyang at fagfolian, sis Dabid at furuan. Ay at baguama Euram at natubus anya laman sik fun.

Aasya nu Gfunan Talun Israel

⁵¹ Aasya ansik fun yangay gina sis falabi fituk banwa Eusafat nu gfunan. Aasya nabanwan sis Samarya, ay kanya nafunan sis Israel kaduge duak banwa.

⁵² Kanya nafakamulun at mauri sis Yawi at daga salubangan kata at mama ay at mina. Kanya wan at nafae asalanan ngay taw Israel, kata Erubuam, Nebat at baguama at nafakamulun.

⁵³ Kanya nafauseganan sas Baal, ay nafadotama Yawi, Israel at Dius, kata at mama at nafakamulun.