1 Fun 21 - Fanawbuid tagsibaliwas Fakayabian

Nabut at Tanuman Wat Ubas

¹ E sik taw tagsiginans Esreel at ngayan Nabut. Kanya e tanuman wat ubas sis Esreel sis fun Akab at day bale daul sis Samarya.

² Sik menit, Akab nalong sas Nabut te, “Aroro am tanuman wat ubas munakbang si ku day bale daul, foni wa sa angku laman ku fagtanuman gulay. Ay ku famangsi sa emu amasine yap tua, ay mannga gbayad kway lang kasakan.”

^3-4 Ay Nabut nabalus te, “Yawi wa kaylat nu gfon au sa emu ku mangaguyang at nafatigwanan sa angku.” Ay Akab noli wan ginbaluan kadotama aroro siginan Nabut at famalus anya. Kanya nataygilidan gsalubang sas dingding ay wa gfangon.

⁵ Ay at mangena Esebel nananlag anya ay nainto te, “Wain am fakabaluun? Ay wain am fagyudun gfangon?”

⁶ Akab nabalus te, “Nalong au sas Nabut te, gbayad au at tanuman wat ubas, ay kanya nu kaylat di, gbangsi au amasine yap kafag tanuman, ay kanya wa naylat.”

⁷ Ay Esebel nalong yangay te, “O nunda bunwa o Israel at fun? Malunggungi ay fangoni. Useganani aroro namon au sa emu Nabut at tanuman.”

⁸ Ay Esebel nariruk sas Akab at ngayan, ay kanya nadafut fun at famatoglag, ay nafabuba sa sangay fagtainan ay sa tiba yak takamangguna sas furuan daul Nabut at fagbanwanan.

⁹ Katatuy at rirukan at bilug: “Fafuli am ngay fagsuguan laman nandarangin yud gfangon ay falunggungi Nabut sis fagunan ngay taw.

¹⁰ Ay famalunggungi duak taw mauri sat salubangan, tagfatuyan sabaliwa anya te, ‘Kanya nalong at mauri sas Dius ay sa tam fun.’ Ay sanya ginan tabani anya sas day furuan daul ay fanai anya gang yakmay anbul.”

¹¹ Ay kafag ngay takamangguna ay tibak fun sirut nafakamulun kata Esebel at nariruk.

¹² Nafaful at ngay taw laman e buknga nu yud gfangon laman gdarangin, ay nafalunggung Nabut sis fagunan ngay taw.

¹³ Ay duak taw mauri andasug ay namalunggung sis Nabut at salubangan. Nalong te, “Nabut nafauri Dius ay tam fun.” Nu katanya, kanya fagayu nataban Nabut sas day furuan daul ay nafana gang yakmay anbul.

¹⁴ Ay kafag ngay taw nabarita sas Esebel te, “Nafana wami Nabut sik gang ay anbul wan.”

¹⁵ Ay Esebel nu nadungug kafag barita, kanya nalong sas Akab te, “Nabut anbul wan. Nu katanya, nangagbilug wo at tanuman ebi at nayud nafon emu.”

¹⁶ Ay Akab nalo wa vtv laman nangagbilug Nabut at tanuman.

¹⁷ Yawi nalong sas Elyas fag taw Tisbe te,

¹⁸ “Agvd, loi wan ay nanlag o Israel at fun Akab tagbanwan sis Samarya. Kanya sis Nabut at tanuman aroro nangagbilug.

¹⁹ Nanlong o sa anya te, ‘Katatuy Yawi at longan: O nunda nafabul o sik taw ay nabul o at ramraman? Katatuy Yawi at longan: Nu inda ngay idu nu gsupsup Nabut at taguk, sanya yangay ban ngay idu nu gsupsup am taguk.’ ”

²⁰ Akab nu nalag Elyas, kanya gagras glong te, “O nablangan yay ta ngaro gayvd!” Ay Elyas nabalus te, “Sabv, nastie au aroro nasaful au te, nafakamulun o at mauri sas Yawi at daga salubangan.

²¹ Yawi glong te, ‘Namadasug au faurianan sa emu. Namamin au fagayu am kalongan mangama, dewa sik fagsuguan ay yud fagsuguan.

²² Am kasugfunanan umkata Erubuam, Nebat at baguama, ay Baasa, Akya at baguama, aroro nafadotama o angku ay nafae asalanan o Israel.’

²³ “Ay katatuy Yawi at longan sabaliwas Esebel: ‘Ngay idu ban nangon anya sas day dingding alad furuan Esreel.’

²⁴ Ay takatap sam kalongan takabul sisad furuan daul, ngay idu nangon, ay takabul sis talun, manuk tungud nangon.”

²⁵ We taw takaksvn Akab at nafakamulun nu mauri sis Yawi at daga salubangan aroro at mangena Esebel nafaylatan anya.

²⁶ At kaksvnan nu mauri naseg at yud e tungkul fag ngay fagsegan, kata ngay taw Amur at nafakamulun, Yawi at naiyan siginan ngay taw Israel at akbang.

²⁷ Akab nu nadungug Elyas at nalong, kanya narasras at lanbung ay nasulun saku, ay wa gfangon laman gdarangin ay ginbaluanan glao.

²⁸ Ay Yawi nalong sas Elyas fag taw Tisbe te,

²⁹ “O nalag o Akab nu gfababaun sa angku? Aroro nafamababaun tua, kwa gfaurianan anya kaduge gleleg, nu bunway sa way ban at baguama, gina gfunan fag buknga.”