1 Fun 20 - Fanawbuid tagsibaliwas Fakayabian

Ben-Adad Nanamawayan Furuan Samarya

¹ Ben-Adad, Sirya at fun, nafaful fagayu at ngay tagfawayan laman namawayan gadgaloan tuluk safulu e duak fun ke ngay kabayu ay at ke ngay faguyudan. Ay kanya fagayu nalao laman nanligung ay namawayan furuan Samarya.

² Ay Ben-Adad nasugu sik ngay tagfosuk longan sanya fag furuan, sas Akab, Israel at fun.

³ Kanya glong sa anya te, “Ben-Adad glong te, ‘Foni angku am ngay salapi ay am ngay gintu, ay foni yangay angku anggan am ngay mangena ay am ngay sisian tiba tungud nu masine.’ ”

⁴ Ay Israel at fun nabalus te, “Mesug fag fun, kata am longan, o wan tagagbilug angku ay fagayu ku fagagbilugun.”

⁵ Ay ngay tagfosuk longan anfoli sas Akab ay nalong te, “Ben-Adad glong te, ‘Nalong kwan sa emu te, foni angku am salapi, am gintu, ay am ngay mangena ay am ngay sisian.

⁶ Ay dewa katanya, balabag ban, kata katsi fag buknga, namasanya kban ku ngay fagsuguan laman nanrvbvy sam bale ay sam ngay fagsuguan at ngay bale fagayu ay ramraman am fakamanagsagun gugat.’ ”

⁷ Ay Israel at fun nafauro Israel at ngay fagtainan fagayu, ay nalong te, “Ben-Adad grvbvy balyawvtan laman namarasras antam. Naylat kwan nu get ku ngay mangena, ku ngay sisian ay ku ngay salapi ay gintu.”

⁸ Ay fagayu fagtainan ay anggan ngay taw nabalus te, “Lag gfon at fagetun.”

⁹ Nu katanya, Akab nalong sas Ben-Adad at ngay tagfosuk longan te, “Nanlong am sa ku mesug fag fun te, gfon au anya taguna at fagetun, ay dewa katanya, kwa mafon at fadua at fagetun.” Ay kafag ngay tagfosuk longan noli wan ay nalong sas Ben-Adad Akab at famalus.

¹⁰ Ay Ben-Adad nasugu yay fia kafag ngay taw sas Akab te, “Ngay fagsegan nangus gfaurianan angku, kway ro nafarasras Samarya. Gtuyan au te, nusdi sik lukbu we kasawad ku ngay tagfawayan at galumutan.”

¹¹ Ay Israel at fun nabalus te, “Longi anya te, ‘Sik tagfawayan tagfalganan namawayan kanya nangus ya kamatungudun kata sik tagfawayan at kintabu wan gfawayan.’ ”

¹² Ay Ben-Adad nadungug Akab at famalus kaduge kanya ay at ufud fag ngay fun ginuman sit ngay bale ramit. Ay nalong wa vtv sat ngay fagsuguan te, “Falganani, namawayan watam Samarya.” Ay kanya fagayu nanamalganan wan.

Akab Nababo Ben-Adad

¹³ Sanya ginan, sik taglong andasug sas Akab ay nalong te, “Katatuy Yawi at longan: ‘Nalag wo Ben-Adad at ngay tagfawayan ngayu, dewa katanya, katsi fag menit namababawan au anya sa emu, ay sumaful o te, au wan Yawi.’ ”

¹⁴ Ay Akab nainto te, “Ay sinu at namafasludan takatanya?” Ay kafag taglong nabalus te, “At mabaguama fag ngay fun tagfawayan, tagfaning ngay afud talun at ngay fun.” Ay Akab nainto yay te, “Sinu taguna namawayan?” Ay kafag taglong nabalus te, “Am.”

¹⁵ Ay Akab nafaful kafag ngay fun tagfawayan ay ngay afud talun at ngay fun, nu fagayu wan, duak sandan tuluk safulu e dua. Ay kanya nafaful yangay tibak taw Israel, at nafaful, fituk libu.

¹⁶ Ay gina swabilug menit kanya fagayu nu gduksun siginans furuan laman namawayan, Ben-Adad ay at ngay ufud fag tuluk safulu e duak fun ginum fanlangu sit ngay bale ramit.

¹⁷ Taguna at nanamawayan at mabaguama fag ngay tagfawayan. Ay Ben-Adad at nasugu fag ngay taw at nanginsaful nalong anya te, “E ngay tagfawayan siginans Samarya.”

¹⁸ Ay Ben-Adad nalong te, “Gamati anya fagayu dewa nusnga setaw at algan, namawayan man ay duan.”

¹⁹ Ay at mabaguama fag ngay tagfawayan nafangguna Israel at ngay tagfawayan.

²⁰ Galay at sadi nafabul at fawayan. Ay Aram at ngay tagfawayan nalagyu ay ngay taw Israel nafafalo. Ay Ben-Adad, Sirya at fun, ay tiba tagalo anya nalagyu, gsakayan sit mesa kabayu.

²¹ Katanya Israel at fun nu gbabo ngay taw Aram at ngay tagsakay sat ngay kabayu ay at ngay faguyudan, ay ngayu at nafabul.

²² Sanya ginan, kafag taglong ankakbang sas Israel at fun, ay nalong te, “Falganani ay amatangani at masine am fagnamakamulunun, aroro Aram at fun gdog yay ban namawayan emu fadogan fag banwa.”

²³ Ay Aram at fun at ngay fagsuguan nalong anya te, “Israel at Dius, ngay buksul way at dius. Kanya wan at fagbaboun. Ay nu si tua ro sad datag nu gfawayan tam anya fagayu, gbabo wa ro tam fia.

²⁴ Nu katanya, fakatatuyi am fakamulun. Aiyani wan kafag tuluk safulu e duak fun siginan at fagmafunanun, ay faungbusi ngay tagfangguna tagfawayan.

²⁵ Ay fafuli ngay tagfawayan ay ngay fagsakayan ay faguyudan tagsud ebi at nalyam. Namawayan tam ngay taw Israel sasad datag ay gbabo wa ro tam fia anya fagayu.” Ay Ben-Adad kaylat at longan, ay nafaning.

²⁶ Ay fadogan fag banwa, Ben-Adad nafaful ngay taw Aram ay kanya fagayu nasas furuan Afek laman namawayan ngay taw Israel.

²⁷ Ngay taw Israel anful yangay, ay nafalganan at ngay fagayudanun, ay naduksun laman namawayan ngay taw Aram, ay anful sat salubangan. Ay taw Israel at kayuan kata way duak fulan kambing nu maful, ay ngay taw Aram mafagdaul tua datag.

²⁸ Ay Dius at fagsuguan nasas Israel at fun ay nalong te, “Katatuy Yawi at longan: ‘Ngay taw Aram nu glong ngay buksul kway at Dius ay bunwa au datag at Dius. Nu katanya, namababawan au sa emu at ngay tagfawayan, laman sumaful am te, au wan Yawi.’ ”

²⁹ Kafag duak gaban tagfawayan maful gsalubangan kaduge fituk menit. Ay sfafituk menit nawayan wan, ay sadik menit, taw Israel at nafabul sik sandank libuk tagfawayan fag ngay taw Aram.

³⁰ At sawad fag duak safulu e fituk libu nalagyu sas furuan Afek, ay natalfian furuan at dingding. Ay Ben-Adad natarung sas furuan ay nasuksuan sa sik masuksuk fag suluk.

³¹ Ben-Adad at ngay fagsuguan nalong anya te, “Nadungug ami te, Israel at ngay fun mafangafanyu. Nu katanya, nanlag ami Israel at fun laman nanfamababaun siginan nu gsulun saku ay siginan yangay nu gsiuk em alfuyu lubyang. Bangaran ro ya gfabul emu.”

³² Nu katanya, kanya fagayu nasulun saku ay nasiuk at ngay alfuyu lubyang ay nalao sas Israel at fun, ay nalong te, “Am fagsuguan Ben-Adad get sa emu te, lag nangus gfabul anya.” Ay Akab nabalus te, “O gleleg yay mangaro? Ku faduksay kanya.”

³³ Ngay fagsuguan natogdungug Akab at longan te, sik masine fag fagtoglagan, ay gbalus wa vtv te, “Sabv, Ben-Adad am faduksay tua.” Ay Akab glong te, “Tabani sa angku kanya.” Ay Ben-Adad nu ndasug, Akab nafasakay anya sat faguyudan.

³⁴ Ay Ben-Adad glong te, “Gfafoli kwa sa emu ku mama at nafangago fag ngay furuan siginan am mama. Ay masine wo nangawat ngay bale am fagfalaoan ngay famaloun sas Damasku, kata ku mama at nafakamulun sis Samarya.” Ay Akab gbalus te, “Siginan takatatuy fag nasadian, namalfas au emu.” Ay nawat sa anya sik nasadian ay nafalfas anya.

Sik Taglong Gfauri Akab

³⁵ E sik taw kataip sas Dius at ngay taglong, ay Yawi nasugu anya laman glong sat usama te, “Agvd, basingi wa angku.” Ay at fadgaloan wa kaylat gbasing anya.

³⁶ Ay kafag taglong nalong anya te, “Aroro wo nafaning Yawi at longan, liun ro gfabul emu nu nalao wo ste ginan.” Ay kafag taw nu nalao, liun nalag anya ay nafabul.

³⁷ Kafag taglong e nalag yangay sik taw ay nalong te, “Agvd, basingi wa angku!” Ay kafag taw nabasing anya.

³⁸ Ay sanya ginan, kafag taglong nalao ay namalindug sis dalan laman namanya Israel at fun nu gdalan. Natabun at mata laman wa katoglag.

³⁹ Ay fun nu nadalan, kafag taglong nauro anya te, “Fagtainan, nanangalo au sas fagawayanan, ay sik taw nataban sa angku at nagamat ay nalong te, ‘Uliti tuy fag taw. Ay nu nalfas way, am leleg famangsi sat leleg, ay mannga gbayad ro wo tuluk safulu e limak fabudbungguan salapi.’

⁴⁰ Ay nasalagan au sa tibak fakamulun ay kafag taw nalfas.” Ay Israel at fun nalong te, “Matuyan wan, gafaurianan o kata am longan.”

⁴¹ Ay kafag taglong nabul wa vtv at fantabun at mata, ay Israel at fun natoglag anya te, sik taglong.

⁴² Ay kafag taglong nalong anya te, “Katatuy Yawi at longan: ‘Aroro nafalfas o kafag taw ku nalong emu te, fabuli, katsi, o wan at fagnamabulun ay anggan am ngay taw laman famangsi anya.’ ”

⁴³ Ay sanya ginan, Israel at fun noli wan sat bale daul sas Samarya ginbaluan kadotama.