1 Fun 19 - Fanawbuid tagsibaliwas Fakayabian

Elyas Nalagyu sas Buksul Kureb

¹ Akab nalong sat mangena Esebel, Elyas at nafakamulun fagayu, ay nu setain nu gfabul fagayu Baal at taglong.

² Nu katanya, Esebel nafadasug sik longan sas Elyas te, “Ngay fagsegan ban nangus gfaurianan angku, kway ban nafabul emu balabag kata katsi fag buknga, kata am nafakamulun sas Baal at ngay taglong.”

³ Elyas anlimu, ay nalagyu sas Beerseba, sis talun Uda, ay naubun sanya at fagsuguan.

⁴ Ay kanya nu glao sas talun at yud e taw sadik menit. Kanya natungkud ay namalunggung si sik daga fun kayu, ay nadarangin laman kabul wan. Kanya nalong te, “Yawi, maksvn wan nu gidapan au! Buli wa ku leleg. Kwa ngap e fagsamanun ku ngay mangaguyang.”

⁵ Ay nu ntabu gdarangin, kanya nataygilidan ay natiug. Ay tagbarita andasug masakit ay natigtig anya ay nalong te, “Afuloi wan ay fangoni.”

⁶ Ay kanya nu nfulo, nalag fakonun sit day alfuyu, at mafataman sat masugba fag gang ay mamam at masuadan si sik fagsuadan. Kanya nafangon ay nainum, ay nadog nataygilidan.

⁷ Yawi at tagbarita anfoli ay gdog yay natigtig Elyas ay nalong te, “Afuloi wan ay fangoni, aroro ngayayu yay am fagnanlaoun.”

⁸ Ay Elyas anfulo, ay nafangon ay nainum. Ay anfoli at fagmabitsugun, ay nalao kaduge ufatk safuluk menit ay ufatk safuluk yabi, ay andasug sas Kureb, Dius at nafili fag buksul.

⁹ Ay nu katanya wan, kanya nasakbo sa sik luib ay sanya wan nu gtiug ginanya fag yabi. Yawi nalong anya te, “Elyas, wain am fagstaeun?”

Yawi Gfakamatoan Elyas

¹⁰ Ay Elyas nabalus te, “Yawi, Dius at mabalyanan, matuyan tua nu gfakamulun au sa emu. Dewa katanya, ngay taw Israel natalyuyan way at fagmasadiun sa emu, ay kanya fagayu narasras at ngay fagnangirugan fanggalangun laman sa emu, ay nafabul am ngay taglong. Au way lang at sawad, nustua gyafabulun yangay angku.”

¹¹ Ay Yawi nalong te, “Duksuni ay nanmalindug o sa ku daga salubangan sas tungud buksul, aroro gdalan au.” Ay e nadalan sik maksvn fag tagmara at kaksvnan nabaltak ngay buksul ay narufa ngay gang sis Yawi at daga salubangan. Dewa katanya, Yawi wa sanya fag tagmara. Ay sanya ginan, anke faleleg, dewa katanya, Yawi wa yangay sanya.

¹² Ay sanya ginan, afuy andasug, dewa katanya, wa yangay sanya Yawi. Ay sanya ginan, andungug sik inasan.

¹³ Elyas nu nadungug, kanya nabul at ramit ay natabun at kamatan ay namalindug sis luib at sakbawan. Ay e naringang sa anya te, “Elyas, wain am fagstaeun?”

¹⁴ Ay Elyas nabalus te, “Yawi, Dius at mabalyanan, matuyan tua nu gfakamulun au sa emu. Dewa katanya, ngay taw Israel natalyuyan way at fagmasadiun sa emu, ay kanya fagayu narasras at ngay fagnangirugan fanggalangun laman sa emu, ay nafabul am ngay taglong. Au way lang at sawad, nustua gyafabulun yangay angku.”

¹⁵ Ay Yawi nalong anya te, “Afolii sam dalan ay loi sat yud e taw fag talun tagsis Damasku. Ay nu ndasug o sanya, rarusi langis sas Kasael laman fagtoglagan te, kanya wan talun Aram at fun.

¹⁶ Ay rarusi yangay langis sas Yeu, Nimsi at baguama, laman fagtoglagan te, kanya wan Israel at fun, ay anggan sas Elisyu, Safat at baguama, fag taw Abel-Mekula, fantubus emu laman sik taglong.

¹⁷ Kasael namabul fagayu tagseg Baal, ay Yeu namabul fagayu at nalagyu Kasael, ay Elisyu namabul fagayu at nalagyu Yeu.

¹⁸ Dewa katanya, nafasaman au fituk libuk taw Israel at yud natudan ay at yud nayuk Baal at aninu.”

Nu Guro Elisyu

¹⁹ Sanya ginan, Elyas nalao ay nalag Elisyu, Safat at baguama, gina gfalganan at fagtanuman. Kanya e labi duak tama baka tagguyud fangali, ay Elisyu gguyan at falabi duak baka. Elyas ankakbang anya ay naukas at lanbung sas Elisyu.

²⁰ Ay Elisyu naubun at ngay baka ay nanamafalo Elyas, ay nalong te, “Nangayuk kyay ku mama ay ku mina laman ku famasaful te, nangalo au emu.” Ay Elyas nabalus te, “Kin, dewa katanya, lag o kalyam ku nafakamulun sa emu.”

²¹ Ay Elisyu anfoli ay nafilas at ngay baka. Ay kanya natungu at fangali laman famatama baka at yamas. Ay nu nafatama wan, kanya nafon kafag ngay yamas sat ngay ufud takali ay kanya fagayu nafangon. Ay Elisyu masakit nanangguyan Elyas laman at fagsuguan.