1 Fun 18 - Fanawbuid tagsibaliwas Fakayabian

Elyas ay Baal at ngay Taglong

¹ Ay nu tulu wak banwa nu yud karak, Yawi nalong sas Elyas te, “Namablang o Akab, aroro namarak kwan.”

² Ay Elyas nanamablang Akab. Ginanya maksvn at fanlunus sis Samarya,

³ nu katanya, Akab nafauro Ubadyas, tagfangguna sit bale. Ubadyas gfaning fia Yawi.

⁴ Gina Esebel gfabul Yawi at ngay taglong, Ubadyas nafasuksuan sadik sandank taglong sis duak luib, limak safulu galay sik luib, ay nafon sa anya fagayu fakonun ay fanginum.

⁵ Ay Akab nalong sas Ubadyas te, “Nanrvbvy wata ngay bulbug, ay ngay datag sa tam talun, bangaran ro e nalag tua ta makmak fagnamafangonan tam ngay kabayu ay tam ngay mola, laman ban wa tam gfabul.”

⁶ Ay duama nasaruayan ay nalao sat mesa faglaoan.

⁷ Ay kaduge Ubadyas glao, Elyas nafablang anya. Ay Ubadyas nu natoglag anya, narungan gfababaun ay glong te, “O o wan ku fagtainan Elyas?”

⁸ Ay Elyas gbalus te, “Sabv. Katsi nanlong o sam tagfayafun te, ‘Andasug au.’ ”

⁹ Ay Ubadyas nainto te, “Nataw ku asalanan am fagnamafauriananun angku sa ku tagfayafun laman kanya namabul angku?

¹⁰ Gfatuyanan au sas Yawi, am tagleleg fag Dius te, ku tagfayafun nasugu wan sas fagayu talun ay fagfagtainanan laman nanrvbvy emu. Ay fagayu talun ay fagfagtainanan nu dway nalag, Akab gfabulun sa anya fagayu te, fatuyanani sa anya te, we lagan emu.

¹¹ Ay katsi gsugu o angku te, nanlong au sa ku tagfayafun te, ste o.

¹² Ay tain ro nu nalao au, ay ginanya ro Yawi at Falad nu nabuba wa emu sa ku yud fagsafulun fag talun? Ku tagfayafun ro Akab nu ndasug, nu dway ro e lagan ya emu, gfabul ro angku. Fagtainan, siginan nu masisian au gfaning ktua gugat Yawi.

¹³ O wo nadungug ku nafakamulun gina Esebel gfabul Yawi at ngay taglong? Nafasuksuan au sadik sandank taw, Yawi at taglong, sis duak luib, limak safulu galay sik luib, ay nafon au sa anya fagayu fakonun ay fanginum.

¹⁴ Ay katsi gsugu o angku te, nanlong au sa ku tagfayafun te, ste o. Kanya ro namabul angku.”

¹⁵ Ay Elyas nabalus te, “Gfatuyanan au sas Yawi, tagleleg fag Dius ku fagfaningun te, katsi fag menit namablang au Akab.”

¹⁶ Nu katanya, Ubadyas nalao sat tagfayafun ay nalong anya te, “Sanya Elyas.” Ay Akab nalao laman namablang anya.

¹⁷ Ay Akab nu nalag Elyas nainto te, “O o wan at nafae fagidapun sis talun Israel?”

¹⁸ Ay Elyas gbalus te, “Bunwa au at nafae fagidapun sis Israel nu bunway o way ay am mama at talananan, aroro natalyuyan am Yawi at ngay suguan ay nafauseganan am Baal fag fagsegan.

¹⁹ Katsi, fafuli sa angku fagayu taw Israel sas buksul Karmel. Ay fasanyai yangay Baal at ngay taglong fag ufatk sandan limak safulu, ay Asera at taglong fag ufatk sandan, Esebel at fagfafangonun gugat.”

²⁰ Nu katanya, Akab nafaful fagayu taw Israel ay at nafaful fag ngay taglong sas buksul Karmel.

²¹ Ay Elyas ankakbang sa sangay taw ay nalong te, “Seduge ya ban nu gaduanun am te, Yawi wan Dius? Nu Yawi wan at matuyan fag Dius, faningi anya, ay nu Baal wan at matuyan fag Dius, faningi wa anya.” Ay kafag ngay taw wa gbalus ya.

²² Ay Elyas gdog yay nalong sa sangay taw te, “Au way lang at sawad Yawi at taglong, ay sas Baal at taglong ufat yak sandan limak safulu.

²³ Katsi, fastiei duak baka tama. Ay Baal ro at ngay taglong gfili at sadi laman at fagfilasun ay namasa ro at ba tungud famaygang ay lag ro gfae afuy. Ay namasa kyangay ro ku ba famaygang at tungud at sadi fag baka ay kwa yangay ro gfae afuy.

²⁴ Sanya ginan, darangini sa ay fagsegan, ay nandarangin kyangay ro sas Yawi. Nu sinu ro at nabalus siginan sik afuy, kanya wan at matuyan fag Dius.” Ay ngay taw naylat.

²⁵ Ay Elyas glong sas Baal at ngay taglong te, “Am taguna, aroro ngayu am. Filii sik baka tama ay falganani. Darangini sa ay fagsegan, dewa katanya, lag gfae afuy ay ba famaygang.”

²⁶ Ay Baal at ngay taglong nabul at sadi fag baka tama ay nafalganan. Sanya ginan, gdarangin sas Baal siginans balabag anggan sitsigons wabilug menit. Guro te, “Baal, balusi emi!” Kanya fagayu gfalelegan at ngay afud bilug sit day fagirugan, dewa katanya, Baal wa gbalus.

²⁷ Ay gina sis wabilug menit, Elyas gfalingun anya fagayu, glong te, “Dalagvn, faksvni yap nu guro am, aroro kanya sik fagsegan yangay, tibaginan gamatangan yay, ay gfiangalay yay, ay gfanloan, ay malgau gtiug yay, namulo yap am anya.”

²⁸ Ay kanya fagayu nafaksvn yay nu guro, ay kata at kaugalian nafefakarukan at ngay bilug siginan at ngay fiso ay at ngay tulag ke ngay taresan, nu dyakmay sanya fagdaul natagukun.

²⁹ Ay dewa nlangfe wan swabilug menit, kanya fagayu gfataglayun yay guro dewa anlangfe wan nu gfon fanggalangun sfafun, ay dewa katanya we nabalus ya anya fagayu.

³⁰ Ay Elyas nalong sa sangay taw te, “Akbangi sa angku.” Ay kafag ngay taw ankakbang sa anya. Ay Elyas nafasine at kinrasras fag fagirugan fanggalangun sas Yawi.

³¹ Ay kanya nabul labi duak gang kata Akub at ngay baguama at ngay gaban, Yawi at nafangayan yangay te, Israel.

³² Siginan kanya fag ngay gang, Elyas nawat sik fagirugan laman sas Yawi, ay naali nafaligung fagirugan kayu tuluk baringan nu gbilug mamam.

³³ Ay kanya nafasine yangay famaygang sit tungud fagirugan, ay nafataygilidan baka tama sis tungud famaygang. Ay nalong sanya fag ngay taw te, “Ugwagi ufatk baringan mamam sas fanggalangun ay famaygang.”

³⁴ Kanya fag ngay taw nu naugwag wan, Elyas nalong te, “Ugwagi yap gayvd.” Ay nadog yay naugwag. Ay Elyas nalong yay fia te, “Ugwagi yap gayvd at fatulu ginan.” Ay kanya fag ngay taw nafaning at longan.

³⁵ Ay mamam nafamilugan sis tigyangan fagirugan, ay ankapnu at alian.

³⁶ Ay nu ndasug wan buknga famonan fanggalangun, Yawi at taglong Elyas ankakbang sas fagirugan ay nadarangin sas Yawi te, “Yawi, o wan Abrayam, Isak, ay Akub at Dius; katsi fag menit fasafuli te, o wan Israel at Dius, ay au am fagsuguan at nafakamulun kata am suguan.

³⁷ Yawi, dungugani angku, laman ste fag ngay taw sumaful te, o wan Yawi, at matuyan fag Dius, ay gfafoli o anya fagayu sa emu.”

³⁸ Ay ginanya yay, afuy andasug siginans banwa, ay nairug fanggalangun, famaygang, gang, ay lutuk, ay nafalanggang tagsis alian fag mamam.

³⁹ Ay fagayu taw nu nalag, namalub ay glong te, “Yawi wan Dius! Yawi wan Dius!”

⁴⁰ Ay Elyas masakit nu nasugu sa sangay taw te, “Gamati Baal at ngay taglong. Ay nusdi sadi lag gfabayan nu e kalangfe.” Ay nagamat Baal at ngay taglong fagayu, ay Elyas natabanan anya fagayu sas Liskung Kisun ay sanya wan nu gfabul.

⁴¹ Ay Elyas nalong sas Akab te, “Loi wan, nanfangon wo ay nanginum, aroro gakadasugun wan at maksvn fag arak.”

⁴² Ay Akab nalao wa fia laman nanfangon ay nanginum, ay Elyas naundaud sas buksul Karmel ay gtudan grungan.

⁴³ Ay Elyas nalong sat fagsuguan te, “Loi wan ay banawani sas dagat.” Ay at fagsuguan nafaning. Ay nu nfoli, nalong te, “Kwe lagan.” Fitu ginan Elyas glong te, “Afolii ay banawani.”

⁴⁴ Gina sis fafitu ginan, at fagsuguan glong te, “E nalag au sik linyabu malayung sirut, kadaul sik taw at daluap, sis tungud fagngabasadan.” Ay Elyas glong te, “Loi wan ay longi sas Akab te, ‘Sakayi wan sam faguyudan ay ulii laman ro di o nadasugan arak.’ ”

⁴⁵ Ay arodi vtv, banwa andulum aroro siginan at madamvl fag linyabu. Ay maksvn nu gtagmara ay nu karak, ay Akab nasakay sat faguyudan ay nalao sas Esreel.

⁴⁶ Sanya ginan, Yawi nafabitsug Elyas, ay Elyas nafabat at lanbung sat famutus fagwan ay natarung ay naguna yay Akab sas Esreel.