1 Fun 17 - Fanawbuid tagsibaliwas Fakayabian

Ngay Ugak Gbuba Fakonun sas Elyas

¹ Elyas sik taglong tagbanwan sis Tisbe, sis Gilyad fag afud talun. Kanya nalong sas fun Akab te, “Gfatuyanan au sas Yawi, tagleleg fag Dius ku fagfaningun te, wa ban e damug ay e arak nu seyuk banwa, kway ban gsugu.”

² Ay Yawi nalong sas Elyas te,

³ “Loi wan ste ginan, ay nangulitan o tagsas fakamenitan fag dalan, ay nanuksuan o sas Kerit fag familuganan mamam at munakbang sis Liskung Urdan.

⁴ Nu ginum o, sii was liskung. Ay nasugu au sa sangay ugak te, fosuki sa emu fakonun.”

⁵ Ay Elyas nafaning Yawi at longan, ay nanamanwan sas Kerit fag familuganan mamam munakbang sis Liskung Urdan.

⁶ Ngay ugak nafosuk sa anya fakonun ay yamas galay balabag ay fafun, ay nu ginum, siwas liskung.

Sik Fagbubayun sis Sarefat

⁷ Ay abandi, liskung anlanggang aroro wa karak ya.

⁸ Ay Yawi nalong sas Elyas te,

⁹ “Saos furuan Sarefat tagsis Sidun, ay namanwan o sanya. Nasugu au sa sik fagbubayun tagbanwan sanya laman gfayafun emu.”

¹⁰ Ay Elyas anlindug ay nalao sas Sarefat. Ay gina gsakbo sas furuan at sakbawan, kanya nalag sik fagbubayun gfansarab. Ay Elyas nalong anya te, “O wo gayvd mafon sa angku sik mamam fanginum.”

¹¹ Ay gina kanya fag fagbubayun glao laman namul mamam, Elyas nalong anya te, “Agvd, bubai yangay sik tinapay.”

¹² Ay kanya fag fagbubayun nabalus te, “Gfatuyanan au sas Yawi, am tagleleg fag Dius te, namin wan em tinapay, at sawad si em fagsuadan sik galumut way lang fangawat tinapay, ay sik langis sirut si em tikung. Katsi ngani gfansarab au laman ku famatama em fakonun. Ay nu naon wa ro mi kafag tinapay nangabul waban mi sas lunus.”

¹³ Ay Elyas nalong anya te, “Lag o gafanawa. Loi wan ay namakamulun o kata am algan. Dewa katanya, namatama yap o sik tinapay ay bubai sa angku. Ay fatamai yangay laman sa ayu talanak.

¹⁴ Aroro Yawi, Israel at Dius, nalong te, ‘Wa ban kamin fangawat tinapay sim fagsuadan, ay wa ban kamin langis sim tikung, yakmay kban nafadasug arak.’ ”

¹⁵ Ay kafag fagbubayun nafaning Elyas at longan. Nu katanya, kasakan tua gugat fakonun sas Elyas ay sa kafag talanak.

¹⁶ Fagsuadan fangawat tinapay, ay tikung fagsuadan langis e bilug tua gugat, kata Yawi at longan sas Elyas.

¹⁷ Ay abandi, kafag fagbubayun at sisian anke fakasaitun, ay ankaksvn at fakasaitun ay anbul wan.

¹⁸ Ay kanya fag fagbubayun nalong sas Elyas te, “Dius at fagsuguan, nataw am nadotaman angku? O nastae o laman namabul ku munama aroro sa ku ngay asalanan?”

¹⁹ Ay Elyas nalong anya te, “Urugani stae am munama.” Ay sanya ginan, Elyas naurugan yangay kafag sisian sat tungud fag salug sat fagtiugan, ay nafatukan.

²⁰ Ay nadarangin sas Yawi te, “Yawi, ku Dius, o gfaurianan o tuy fag fagbubayun at nafasakbo angku siginan nu gfabul o at munama?”

²¹ Ay Elyas namalub tulu ginan sanya fag sisian ay nadarangin sas Yawi te, “Yawi, ku Dius, fae lelegi tuy fag munama.”

²² Ay Yawi nabalus Elyas at darangin, ay kafag munama gleleg wan.

²³ Ay Elyas nabuba anya sat daga ay nafon sat mina, ay glong te, “Damai, am munama gleleg wan!”

²⁴ Kafag mangena gbalus Elyas te, “Katsi nasaful au te, Dius o at fagsuguan, ay matuyan am ngay longan siginans Yawi.”