1 Fun 16 - Fanawbuid tagsibaliwas Fakayabian

¹ Yeu, Kanani at baguama, nafoyung sik longan siginans Yawi sabaliwas Baasa.

² Kanya glong te, “Nafasik fun au emu sas Israel, dewa o sik yud e kwa. Dewa katanya, nafaning way o Erubuam at ugali ay nafae asalanan o ngay taw Israel. Ay at ngay asalanan nafadotama angku.

³ Nu katanya, namamin au emu ay am ngay kalongan, ay am ngay kalongan ban umkata Erubuam, Nebat at baguama, at ngay kalongan.

⁴ Ngay idu ban nangon am ngay kalongan at kinbul sis furuan, ay manuk tungud nangon at kinbul sis talun.”

⁵ Ay tiba ya at kinfasludan kaduge Baasa gfunan ay fagayu at nafakamulun anriruk sis fafil fagrirukan sabaliwas Israel at ngay fun.

⁶ Ay Baasa anbul ay nanamoli anya sas Tirsa. Ay at baguama Ela natubus anya laman sik fun.

⁷ Ay sanya ginan, Yeu fag taglong, Kanani at baguama, nafoyung sik longan siginans Yawi sabaliwas Baasa ay at kalongan aroro siginans Baasa at ngay nafakamulun mauri sis Yawi at daga salubangan. Yawi andotama Baasa at ngay nafakamulun, ay anggan nu gfabul Erubuam at ngay kalongan fagayu. Nu katanya, Baasa at ngay kalongan ankamin yangay kata Erubuam at kalongan.

Ela nu Gfunan Talun Israel

⁸ Gina sis faduak safulu e unumk banwa Asa nu gfunan sis Uda, Ela, Baasa at baguama, gfasigad gfunan sis Israel. Kanya nafunan sis Tirsa kaduge duak banwa.

⁹ Ela at fagsuguan Simri, tagfangguna sik wabilug ngay tagsaful gsakay sis faguyudan fangawayan, anke algan namabul anya. Ginanya, Ela gmamam fanlangu sis Arsa at bale. Arsa sik tagulit fun at bale daul sis Tirsa.

¹⁰ Simri nasakbo ay nafabul anya, ay kanya natubus anya laman sik fun. Anfasludan takatanya gina sis faduak safulu e fituk banwa Asa nu gfunan sis Uda.

¹¹ Gina Simri gfasigad gfunan, kanya nafabul Baasa at kalongan fagayu, anggan fagayu at ngay kaiban ay at fagadgalangan. Ay we nafasawad nusdi sadik mangama.

¹² Simri nafamin Baasa at kalongan fagayu, kata Yawi at longan sas Baasa siginan at taglong Yeu.

¹³ Anfasludan takatanya fagayu aroro siginans Baasa ay Ela talame at ngay asalanan at nafae asalanan yangay ngay taw Israel. Talame nafadotama Yawi, Israel at Dius, siginan nu gseg at yud e masuad fag ngay fagsegan.

¹⁴ Ay tiba ya at kinfasludan kaduge Ela gfunan ay fagayu at nafakamulun anriruk sis fafil fagrirukan sabaliwas Israel at ngay fun.

Simri nu Gfunan Talun Israel

¹⁵ Gina sis faduak safulu e fituk banwa Asa nu gfunan sis Uda, Simri gfasigad gfunan sis Israel, ay nafunan kaduge fituk menit sis Tirsa. Ginanya, at ngay tagfawayan maful sis Gibetun, sis talun Filistia.

¹⁶ Kaduge ngay tagfawayan sanya, kanya nadungug sik barita te, Simri nafabul fun Ela. Nu katanya, ginanya mandi fag menit, ngay taw Israel nafili Umri laman Israel at fun. Ay ginanya Umri sik tagfangguna ngay tagfawayan.

¹⁷ Umri ay fagayu taw Israel nalao siginans Gibetun ay naligung furuan Tirsa.

¹⁸ Ay Simri nu nalag te, kafag furuan nababawan wan, kanya nasakbo sas fun at bale tangabat ay nairug fagdaul bale ay kanya anbul.

¹⁹ Anfasludan takatanya aroro sat ngay asalanan. Aroro nafakamulun mauri sis Yawi at daga salubangan, ay nafaning Erubuam at ugali ay anggan nafae asalanan ngay taw Israel.

²⁰ Ay tiba ya at kinfasludan kaduge Simri gfunan ay anggan sabaliwa nu gfawayan Ela, anriruk sis fafil fagrirukan sabaliwas Israel at ngay fun.

Umri nu Gfunan Talun Israel

²¹ Ginanya, ngay taw Israel ankafud sas dua. Ay sik afud at fakaylatun at fun Tibni, Ginat at baguama. Ay faduak afud at fakaylatun at fun, Umri.

²² Ay tagalo Umri amabitsug yap tua tagalo Tibni, Ginat at baguama. Nu katanya, Tibni anbul sas awayan ay Umri ansik fun.

²³ Gina sis fatuluk safulu e sadik banwa Asa nu gfunan sis Uda, Umri gfasigad gfunan sis Israel. Ay kanya nu gfunan labi duak banwa, at unumk banwa sis Tirsa.

²⁴ Umri nabayad sas Semer unumk safulu e waluk fabudbungguan salapi laman nangagbilug buksul Samarya, ay nafawat sik furuan sanya. Ay nafangayan kafag furuan te, Samarya, gfaning Semer at ngayan, at dan tagagbilug buksul.

²⁵ Umri nafakamulun at mauri sis Yawi at daga salubangan, gtungud yay at naguna anya fag ngay fun.

²⁶ Kanya nafaning Erubuam, Nebat at baguama, at ugali, ay nafae asalanan ngay taw Israel. Kanya fagayu nafadotama Yawi, Israel at Dius, siginan at yud e masuad fag ngay fagsegan.

²⁷ Ay tiba ya at kinfasludan kaduge Umri gfunan ay fagayu at nafakamulun anriruk sis fafil fagrirukan sabaliwas Israel at ngay fun.

²⁸ Umri anbul ay nanamoli anya sas Samarya. Ay at baguama Akab natubus anya laman sik fun.

Akab nu Gfunan Talun Israel

²⁹ Gina sis fatuluk safulu e waluk banwa Asa nu gfunan sis Uda, Umri at baguama Akab gfasigad gfunan sis Israel. Akab, Umri at baguama, gfunan sis Israel kaduge duak safulu e duak banwa, sis Samarya.

³⁰ Akab, Umri at baguama, nafakamulun at mauri sis Yawi at daga salubangan gtungud yay ngay fun at naguna anya.

³¹ Saman ya nu gfaning Erubuam, Nebat at baguama, at ugali, kanya andadwa ya sas Esebel, Etbaal at baguina. Etbaal talun Sidun at fun. Siginan ginanya, Akab gseg ay gfauseganan Baal.

³² Sis Samarya kanya nafawat yangay sik fagnansegan Baal ay sik fagirugan fanggalangun laman sanya fag fagsegan.

³³ Ay nafawat sik turuk fagtoglagan Asera fag fagsegan. Siginan takatanya, Akab nafadotama Yawi, Israel at Dius, gtungud yay at naguna anya fag ngay fun sis Israel.

³⁴ Gina Akab gfunan, Kiel fag taw Betel nadog yay nafawat furuan Eriku. Ay nu ntabu gfawat furuan at fagtungkudan, Abiram, at baguama at tiba kaka anbul. Ay gina nafawat furuan at ngay faningding sakbawan, Segub, at fuyu anbul yangay. Nu katanya, anfasludan Yawi at longan siginans Uswe, Nun at baguama.