1 Fun 15 - Fanawbuid tagsibaliwas Fakayabian

Abya nu Gfunan Talun Uda

¹ Gina sis falabi waluk banwa Erubuam, Nebat at baguama, nu gfunan sis Israel, Abya gfasigad gfunan sis Uda,

² Kanya gbanwan sis Erusalem ay nu gfunan tuluk banwa. At mina Maaka, Absalum at baguina.

³ Abya nafakamulun kata at mama at nafakamulun fag ngay asalanan. Ay wa namatuyan sas Yawi, ay kanya wa nafaning at mangaguyang Dabid.

⁴ Dewa katanya, aroro sas Dabid, Yawi nafataglayun Abya at ngay kasugfunanan nu gfunan sis Erusalem, ay nafon anya sik baguama at nantubus ban anya laman sik fun, ay namabitsug Erusalem.

⁵ Yawi nafakamulun takatanya, aroro Dabid nafakamulun tua Yawi at fakaylatun fagayu, ay di nafamabo at ngay suguan kaduge gleleg, sangay at nafakamulun sas Uryas fag taw Ket.

^6-7 Reubuam ay Erubuam gawayan gugat gina Abya gleleg, ay Abya ay Erubuam gawayan yangay. Ay tiba ya at kinfasludan kaduge Abya gfunan ay fagayu at nafakamulun anriruk sis fafil fagrirukan sabaliwas Uda at ngay fun.

⁸ Ay Abya anbul ay nanamoli anya sas Dabid at furuan. Ay at baguama Asa natubus anya laman sik fun.

Asa nu Gfunan Talun Uda

⁹ Gina sis faduak safuluk banwa Erubuam nu gfunan sis Israel, Asa ansik fun sis Uda.

¹⁰ Kanya nafunan sis Erusalem kaduge ufatk safulu e sadik banwa. At fufuina Maaka, Absalum at baguina.

¹¹ Asa nafakamulun at masine sis Yawi at daga salubangan, kata at mangaguyang Dabid.

¹² Kanya naiyan ngay mangama ay mangena tagfaebayad siginans talun ay nafaukas fagayu fagsegan at ngay mangaguyang at nafawat.

¹³ Kanya naiyan yangay at fufuina Maaka fag fun mangena, aroro kanya nafawat at maksvn nu mauri fag turuk fagtoglagan Asera fag fagsegan. Ay Asa nafafuan kafag turuk ay nafairug sis Liskung Kidrun.

¹⁴ Ay Asa deyud naiklas ngay fagnansegan sa tangabat fag ngay buknga, kaduge kanya gleleg matuyan tua gugat sas Yawi.

¹⁵ Ay kanya nabuba sas Yawi at bale at nafasaman fag ngay fagagbilugun anggan at mama at nafasaman fag ngay fagagbilugun ay anggan gintu ay sanbung salapi.

¹⁶ Asa ay Baasa, Israel at fun, gawayan gugat kaduge gfunan.

¹⁷ Baasa Israel at fun nafawayan talun Uda, ay nafaksvn furuan Rama at alad laman we masakbo ay maduksun siginans Uda, fun Asa at talun.

¹⁸ Ay Asa nasugu laman namul ngay salapi ay gintu siginans fagfungsuan ngay ramraman sis Yawi at bale, ay siginan at sadili bale. Kanya nafatigwanan sat ngay fagsuguan, ay nasugu anya fagayu laman namon sas Ben-Adad, Tabrimun at baguama, Kesyun at fufu, talun Aram at fun, tagbanwan sis furuan Damasku.

¹⁹ Ay Asa nalong anya te, “Kaylat au nangawat sik nasadian sa emu, kata ta mesa mama at nawat. Nafabuba au emu sik famonun sanbung salapi ay gintu. Fai yud e masuad ya am nasadian Baasa, Israel at fun, laman glao ro siginan ku talun.”

²⁰ Ay Ben-Adad naylat fun Asa at famonun ay nasugu at ngay fun tagfawayan laman namawayan sa sangay furuan sis Israel. Ay kanya nababo ngay furuan Iyun, Dan, Abel-Bet-Maaka ay fagdaul talun Naftali, anggan talun tagligung dagat Kineret.

²¹ Ay Baasa nu nadungug kafag barita, anragang wan nu gfaksvn furuan Rama at alad, ay nanamanwan wan sas furuan Tirsa.

²² Sanya ginan, fun Asa nasugu fagayu taw Uda laman namuba ngay gang ay ngay balse, ebi Baasa at famale sis Rama. Ay kanya nagbilug kafag ngay famale laman gfaksvn furuan Geba tagsis Benamin fag talun ay anggan furuan Mispa.

²³ Ay tiba ya at kinfasludan kaduge Asa gfunan ay fagayu at nafakamulun anriruk sis fafil fagrirukan sabaliwas Uda at ngay fun. Ay kanya gina mafufuama, anke fakasaitun sit ngay darafa.

²⁴ Ay Asa nu nbul wan, nanamoli anya magamut at ngay mangaguyang sis Dabid at furuan. Ay at baguama Eusafat natubus anya laman sik fun.

Nadab nu Gfunan Talun Israel

²⁵ Gina sis faduak banwa Asa nu gfunan sis Uda, Erubuam at baguama Nadab ansik fun sis Israel, ay nafunan sanya kaduge duak banwa.

²⁶ Ay kanya nafakamulun at mauri sis Yawi at daga salubangan kata at mama, ay nafae asalanan ngay taw Israel.

²⁷ Baasa, Akya at baguama, siginans Isakar at gaban, anke algan mauri sas Nadab ay nafabul anya sis Gibetun, sis taw Filistia at talun. Anfasludan takatanya gina Nadab ay fagayu Israel at ngay tagfawayan gfawayan Gibetun.

²⁸ Baasa nafabul Nadab gina sis fatuluk banwa Asa nu gfunan sis Uda, ay natubus anya laman sik fun.

²⁹ Ay Baasa gina gfasigad gfunan, kanya nafabul Erubuam at kalongan fagayu, kata Yawi at longan siginan at fagsuguan Akya, fag taw Silu.

³⁰ Anfasludan takatatuy aroro siginans Erubuam at ngay asalanan at nafae asalanan ngay taw Israel. Kanya fag ngay asalanan nafadotama Yawi, Israel at Dius.

³¹ Ay tiba ya at kinfasludan kaduge Nadab gfunan ay fagayu at nafakamulun anriruk sis fafil fagrirukan sabaliwas Israel at ngay fun.

³² Asa ay Baasa, Israel at fun, gawayan gugat kaduge gfunan.

Baasa nu Gfunan Talun Israel

³³ Gina sis fatuluk banwa Asa nu gfunan sis Uda, Baasa, Akya at baguama, gfasigad gfunan sis Israel sis furuan Tirsa, ay kanya nafunan kaduge duak safulu e ufatk banwa.

³⁴ Kanya nafakamulun at mauri sis Yawi at daga salubangan, ay nafaning Erubuam at ugali, at nafae asalanan ngay taw Israel.