1 Fun 14 - Fanawbuid tagsibaliwas Fakayabian

Akya Gfoyung sabaliwas Erubuam

¹ Ginanya, Erubuam at munama Abya anke fakasaitun.

² Fun Erubuam nalong sat mangena te, “Alanbungani at yud maugali, laman we gtoglag ya emu te, o wan ku mangena, ay saos Silu. Sanya Akya fag taglong nu gbanwan, ebi at nalong angku te, nanfunan kban ste fag talun.

³ Sanya o, ay bubai famonun safuluk tinapay daul, ay ngay tinapay ayu sirut, ay sik fagsuadan at mapnu deut. Kanya ro glong sa emu nu setain takadasug ban sa ta baguama.”

⁴ Ay fun Erubuam at mangena nafakamulun takatanya. Kanya nasas Silu, sas Akya at bale. Akya mafufuama wan ay wa glag ya.

⁵ Ay Yawi nalong sas Akya te, “Erubuam at mangena kadasug laman nanginto sabaliwa at baguama ke fakasaitun. Longi ro sa anya ku nalong sa emu. Kanya ro kadasug, galanbungan yud maugali laman we gtoglag anya.”

⁶ Ay Akya nu nadungug kafag mangena nu gsakbo, nalong te, “Erubuam at mangena! Sakboi. Wain am fakamaninganun te, tibak taw way o? E nasugu angku laman gfoyung emu sik mabalu fag barita.

⁷ Loi wan ay nanlong o sas Erubuam te, ‘Katatuy Yawi, Israel at Dius, at longan: Nafili kwa emu siginans fagngayuan taw laman namangguna o ku ngay taw Israel.

⁸ Nabul au fagmafunanun siginans Dabid at ngay kasugfunanan ay nafon au sa emu. Dewa katanya, wo kata ku fagsuguan Dabid, at nafaning ku ngay suguan ay at nafaning tua angku siginans fagdaul at amatanganan ay at nafakamulun ku fakaylatun.

⁹ O, anke asalanan o gtungud yay fagayu fun at naguna emu at asalanan. Nafadotama o angku siginan nu gfawat o tibak fagsegan at mawatan siginans sanbung. Natalyuyan wo angku.

¹⁰ Ay katsi mafalganan au gfaurianan Erubuam at ngay kasugfunanan. Namamin au fagayu Erubuam at kalongan mangama, fagsuguan ay yud fagsuguan. Namamin au Erubuam at ngay kasugfunanan kata nu girug ngay nakaurian yakmay namin.

¹¹ Idu ban nangon am ngay kalongan takabul sisad furuan, ay manuk tungud nangon at kinbul sis talun. Yawi at nalong tuy!’

¹² “Nu katanya, falganani ay ulii wan sam bale. Gina ro wo gsakbo sas furuan, am munama umbul wan.

¹³ Ay fagayu ban taw Israel kabalu anya ay namoli. Sia way lang ban sis Erubuam at kalongan at manabayan at fagnamoliun, aroro sia way lang at matuyan sas Yawi, Israel at Dius at daga salubangan.

¹⁴ Ay ginanya yangay ban fia fag buknga, Yawi nanfili sik taw at nanfunan ngay taw Israel, at namamin Erubuam at kasugfunanan. Katsi wan nu kafasludan!

¹⁵ Ay Yawi ban namaranranugan ngay taw Israel laman umkata sik ngay sigbo tagranranugan sis mamam. Nangaiyan ban ngay taw Israel ste ginan fag daga at masine, at nafon sat ngay mangaguyang, ay nanrapyagan anya fagayu sas dife Liskung Eufrates, aroro kanya fagayu nafadotama Yawi siginan at nawat fag turuk fagtoglagan Asera fag fagsegan.

¹⁶ Ay Yawi ban gfabayan ngay taw Israel nu gababawan sat ngay fawayan aroro siginans Erubuam at ngay asalanan at nafae asalanan ngay taw Israel.”

¹⁷ Ay Erubuam at mangena anlindug ay noli sas Tirsa. Ay gina kanya gsakbo sat bale, at munama anbul.

¹⁸ Fagayu taw Israel anbalu ay nanamoli anya, kata Yawi at longan siginan at taglong Akya.

¹⁹ Ay tiba ya at kinfasludan kaduge Erubuam gfunan ay fagayu at nafakamulun anriruk sis fafil fagrirukan sabaliwas Israel at ngay fun.

²⁰ Erubuam nafunan kaduge duak safuluk banwa. Ay nu nbul wan, at baguama Nadab at natubus anya laman sik fun.

Reubuam nu Gfunan Talun Uda

²¹ Reubuam, Sulumun at baguama, at funan sis Uda. Kanya ufatk safulu e sadik banwa gina gfasigad gfunan. Kanya nafunan sis Erusalem kaduge labi fituk banwa, sis Yawi at nafili fag furuan siginan fagayu Israel at ngay gaban laman gfauseganan at ngayan. Reubuam at mina Naama, sik taw Amun.

²² Ngay taw Uda nafakamulun at mauri sis Yawi at daga salubangan. Siginan kafag ngay taw at asalanan, Yawi maksvn nu kadotama anya fagayu, gtungud yay nu kadotama at ngay mangaguyang.

²³ Kanya fagayu nawat fagnansegan si tangabat fag ngay buknga ay si sangay fun kayu at marabung at lanbung, ay nawat ngay turuk fagtoglagan Asera fag fagsegan.

²⁴ Saman ya takatanya, e ngay mangama ay e ngay mangena tagfaebayad sit talun. Kanya fagayu nafakamulun ngay asalanan at maksvn nu mauri, kata Yawi at naiyan fag ngay taw at ngay asalanan.

²⁵ Ay sis falabi limak banwa Reubuam nu gfunan, Sisak, Igiptu at fun, nanamawayan Erusalem.

²⁶ Ay kanya nabul tagsis Yawi at bale fag ngay ramraman ay anggan tagsis fun at bale. Ay kanya nabuba yangay Sulumun at nafawat fag ngay famalabag fagayu, at masifigan gintu.

²⁷ Dewa katanya, fun Reubuam nafawat yay ngay famalabag at mawatan siginans tansu, laman fantubus at nabulan fag ngay famalabag, ay nafaalaga sa sangay fun ayu sirut tagulit fun at sakbawan bale.

²⁸ Ay galay fun Reubuam sas Yawi at bale, ngay tagulit gbuba sanya kafag ngay famalabag, ay nu ntabu wan, gfafoli wan sa sangay tagulit at fagfungsuan.

²⁹ Ay tiba ya at kinfasludan kaduge Reubuam gfunan ay fagayu at nafakamulun anriruk sis fafil fagrirukan sabaliwas Uda at ngay fun.

³⁰ Reubuam ay Erubuam gawayan gugat.

³¹ Reubuam anbul ay nanamoli anya sat ngay mangaguyang at fagfolian sis Dabid at furuan. At mina sik taw Amun at ngayan Naama. Ay at baguama Abya natubus anya laman sik fun.