1 Fun 13 - Fanawbuid tagsibaliwas Fakayabian

Dius at Fagsuguan nu Gfararang sas Erubuam

¹ Ginanya Yawi nasugu at fagsuguan at sadi siginans Uda. Kanya andasug sas Betel, gina fun Erubuam malindug sis day fagirugan laman namon at fanggalangun.

² Yawi nasugu at fagsuguan laman namauri kafag fagirugan, ay glong te, “Katatuy Yawi at longan: E kasalug ban sik munama at ngayan Usyas, siginans Dabid at kasugfunanan. Ay gina ban an-gurang, kanya nangirug ste fag fagirugan ngay tagfon fanggalangun tagfakamulun si sangay fagnansegan si tangabat fag ngay buknga. Ay at ngay butul ban umkirug sanya.”

³ Ginanya yangay fia fag menit, Dius at fagsuguan nalong te, “Katatuy fagtoglagan te, Yawi at longan kafasludan: tuy ban fag fagirugan umkarang ay umkafud dua ay tagsanya fag dafug umburas.”

⁴ Fun Erubuam nu nadungug Dius at fagsuguan nu guro sabaliwas fagirugan sis Betel, kanya natiu Dius at fagsuguan ay nalong te, “Gamati anya!” Dewa katanya, fun at take antugas ay wa mafalelegan ya.

⁵ Ay fagirugan ankarang ay ankafud dua ay dafug anburas, kata Yawi at longan siginan at fagsuguan.

⁶ Fun Erubuam get sas Dius at fagsuguan te, “Darangini sas Yawi am Dius te, fafiai ku take.” Ay Dius at fagsuguan nadarangin ay fun Erubuam at take anfia kata aro taw.

⁷ Ay sanya ginan, fun Erubuam nalong sas Dius at fagsuguan te, “Gewan, sa wata ku bale laman nanfangon. E fon au sa emu.”

⁸ Ay Dius at fagsuguan nalong sas fun te, “Dewa ro wo gfon sa angku sik wabilug am ramraman, kwa nangalo emu laman nanfangon ay nanginum ste fag talun.

⁹ Aroro Yawi nasugu angku te, lag au gfangon ay ginum ste, ay nu guli au, wa sa ya aro taw ku dalan.”

¹⁰ Ay kanya nu kafoli, wa nasa ya at dalan gina sas Betel.

¹¹ Ay ginanya e sik taglong at mafagtainan wan ay kanya gbanwan sis Betel. At ngay baguama nalao sa anya laman namasaful sabaliwa Dius at fagsuguan at nafakamulun sis Betel ginanya fag menit, ay fagayu at nalong sas fun Erubuam.

¹² Kafag taglong nainto sat ngay baguama te, “Dada kafag taw at dalan gina guli?” Ay at ngay baguama nafoyung nu dada Dius at fagsuguan fag taw Uda at dalan.

¹³ Ay kanya nalong sat ngay baguama te, “Falganani tam asnu.” Ay nu nafalganan wan, kafag taglong nasakay,

¹⁴ ay nanamafalo Dius at fagsuguan ay nasud gina malunggung si sik fun kayu daul at lanbung ay ginto te, “O wo wan Dius at fagsuguan tagsiginans Uda?” Ay kafag taw gbalus te, “Sabv.”

¹⁵ Ay kafag taglong glong anya te, “Gewan, nanfangon wata sa ku bale.”

¹⁶ Ay Dius at fagsuguan gbalus te, “Kwa masine kafoli ay kwa manangalo emu, ay kwa yangay masine nanfangon ay nanginum ste fag talun.

¹⁷ Aroro Yawi nasugu angku te, lag au gfangon ay ginum kaduge au ste, ay nu guli au, wa sa ya aro taw ku dalan.”

¹⁸ Ay kanya fag taglong at mafagtainan glong te, “Au sik taglong kyangay kata emu. Yawi nalong angku siginan sik tagbarita te, nantaban au emu sa ku bale laman nanfangon o ay nanginum.” Ay aroro mangaro kafag taglong kamuag way.

¹⁹ Nu katanya, Dius at fagsuguan nanangalo, ay nafasfuan anya gfangon ay nainum sit bale.

²⁰ Ay gina kanya fag dua malunggung ay gfangon, Yawi naringang sat mafagtainan fag taglong,

²¹ ay kafag taglong nalong sas Dius at fagsuguan tagsiginans Uda te, “Katatuy Yawi at longan: ‘Nafamabo o am Dius Yawi ay wo nafaning at suguan emu.

²² Anfoli o ay nafangon ay nainum ste fag talun, dewa nalong emu te, lag gfangon ay lag ginum ste. Nu katanya, wa ban sam mangaguyang at fagfolian nu namoli am bilug.’ ”

²³ Dius at fagsuguan nu ntabu wa gfangon, at mafagtainan fag taglong nafalganan at betaw at sakayan fag asnu.

²⁴ Kaduge Dius at taglong si sangaba dalan, sik liun nafablang ay nafabul anya, ay at bilug mataygilid sisad dalan, ay at asnu ay kafag liun malindug sit day tigyangan.

²⁵ Ngay taw tagdalan sanya nalag at bilug, ay kafag liun sit day tigyangan. Kafag ngay taw nalo sat mafagtainan fag taglong at furuan, ay nabarita at nalag.

²⁶ At mafagtainan fag taglong nu nadungug, nalong te, “Kanya Dius at fagsuguan at nafamabo Yawi. Yawi nafabayan kanya fag liun nu kagat ay gfabul anya, kata Yawi at nafararang sa anya.”

²⁷ Kanya nalong sat ngay baguama te, “Falganani ku asnu.”

²⁸ Sanya ginan, kanya nalao ay nalag Dius at fagsuguan nu mataygilid sisad dalan, ay at asnu ay kafag liun sit day tigyangan. Dewa katanya kanya fag liun di naon kafag taw at bilug, ay wa yangay nagat at asnu.

²⁹ Ay kafag taglong naurug Dius at fagsuguan at bilug ay nafasas asnu at tungud guyuy ay nabuba sat furuan laman nangabalu ay namoli.

³⁰ Ay kanya nanamoli at usama at bilug sat sadili fagfolian ay gwayway te, “We gfayaun ngaro, faduksay!”

³¹ Nu nanamoli wan, kanya nalong sat ngay baguama te, “Nu nbul kban, namoli ban am angku sas fagfolian magamut Dius at fagsuguan; fasii angku at day tigyangan.

³² Aroro umfasludan ban Yawi at longan sabaliwas fagirugan fanggalangun tagsis Betel, ay sabaliwa sangay fagnansegan si tangabat fag ngay buknga sis Samarya fag ngay furuan.”

³³ Nu nlangfe katanya, fun Erubuam wa naubun at fagmauriun, abat ngate, kanya nafataglayun nu gfili ngay taw laman tagfon fanggalangun. Nusnga sinu takaylat kasik tagfon fanggalangun, fun Erubuam nafasaman wan.

³⁴ Aroro siginan takatanya fag asalanan, fun Erubuam at kasugfunanan we sawad ya sas fagdaul daga.