1 Fun 12 - Fanawbuid tagsibaliwas Fakayabian

Ngay Taw Israel Nafamabo Reubuam

¹ Reubuam nasas furuan Sekem nu inda ngay taw Israel nu maful, laman nanfili anya sik fun.

² Ay Erubuam, Nebat at baguama, nu nadungug takatanya, anfoli sas Israel. (Ginanya, Erubuam gbanwan sis Igiptu aroro nalagyu fun Sulumun.)

³ Israel at ngay tagfangguna nagewan Erubuam, ay kanya fagayu nalo sas Reubuam ay nalong anya te,

⁴ “Am mama nafaidapan emi maksvn. Katsi faagani yap at nafabuba sa emi fag famubaun. Nu gfakamulun tua ban o katanya, namaning ban mi emu.”

⁵ Ay Reubuam nabalus te, “Foni yap angku tuluk menit laman gamatangan au, ay sanya ginan ban, afolii yap sa angku.” Ay kafag ngay taw noli wan.

⁶ Ay fun Reubuam ang wa vtv nanamakamatoan ngay fagtainan, ebi at mama Sulumun at ngay fagsuguan gina yay gleleg. Reubuam nainto sa anya te, “Tain ay fangatulun laman gbalus au kanya fag ngay taw?”

⁷ Ay kanya fagayu nabalus te, “Katsi, nu gfalag tuo am fagmalukmeun sa anya fagayu, ay nu gfon tuo at fagetun, kanya ban fagayu gfaning tua emu kabavn.”

⁸ Ay Reubuam wa nafaning kanya fag ngay fagtainan at fangatulun. Abat ngate, nu nanget fangatulun sa way at ngay mabaguama sat ngay fagsud at kin-gurang gasfuan anya.

⁹ Ay Reubuam nainto sa anya fagayu te, “Tain ay fangatulun ku famalus sa kafag ngay taw at nalong angku te, ‘Faagani yap am mama at nafabuba sa emi fag famubaun.’ ”

¹⁰ Ay at mabaguama fag ngay tagfangatulun, Reubuam at ngay fagsud, nalong anya te, “Balusi sa kafag ngay taw te, ‘Ku sumyu ngenge gtungud yap tua ku mama at fagwan.

¹¹ Ku mama nafaidapan ayu maksvn. Gtungud yay kanya nu namabiatan au ayu. Ku mama at famalang ayu nu sik famulpug, angku ku famalang sik ngay agipan tua.’ ”

¹² Ay nu nlangfe tuluk menit, Erubuam ay ngay taw Israel anfoli yay sas Reubuam, kata ebi at longan te, “Afolii yap stie sis fatuluk menit.”

¹³ Ay Reubuam wa nafaning kafag ngay fagtainan at fangatulun. Abat ngate, nalong way sa anya fagayu at mauri,

¹⁴ kata at mabaguama fag ngay tagfangatulun at longan. Ay nalong te, “Ku mama nafaidapan ayu maksvn, ay namaidapan kyangay ro ayu maksvn. Ku mama at famalang ayu nu sik famulpug, angku ku famalang sik ngay agipan tua.”

¹⁵ Reubuam wa gdungugan ngay taw aroro katanya Yawi at fakaylatun laman umfasludan at longan sas Erubuam, Nebat at baguama, siginans Akya fag taw Silu.

¹⁶ Fagayu taw Israel nu nasaful te, Reubuam wa gdungugan, kanya fagayu nalong te, “Wami kataip ya sas Dabid at kasugfunanan. Wami ngap e fagmagbilugun siginans Ese at kasugfunanan. Wami kasalag ya emu, Dabid at kasugfunanan. Ngay taw Israel, guli watam.” Nu katanya, ngay taw Israel noli wan.

¹⁷ Ay dewa katanya, Reubuam gfunan yay gugat ngay taw Israel tagbanwan sis talun Uda at ngay furuan ayu daul.

¹⁸ Aduniram tagfangguna ngay tagafabulunan fag ngay fagsuguan. Ay Reubuam nasugu anya sa sangay taw Israel laman namafoli ngay taw Israel at fagmasadiun, dewa katanya, ngay taw Israel nafana way anya gang yakmay anbul. Ay Reubuam nu nasaful at kinfasludan sas Aduniram, kanya nasakay wa vtv sat kabayu ke faguyudan ay nalagyu sas Erusalem.

¹⁹ Nu katanya, dasug katsi, ngay taw Israel gfawayan yay gugat Dabid at ngay kasugfunanan.

²⁰ Ay fagayu taw Israel nu nadungug te, Erubuam noli wan, nauro anya sa sik fagmafulun ay nafili anya sik fun sas fagdaul Israel. Uda way lang fag gaban tagfaning Dabid at kasugfunanan.

Semaya Nafararang sas Reubuam

²¹ Reubuam nu ndasug sas Erusalem, kanya nafaful sadik sandan waluk safuluk libuk tagsaful fia fag tagfawayan siginans fagdaul Uda ay Benamin at kasugfunanan laman namawayan ngay taw Israel, ay laman kanya gdog nanfunan kafag ngay taw.

²² Ay Dius nalong sat fagsuguan Semaya te,

²³ “Nanlong o sas fun Reubuam, Sulumun at baguama, ay sas Uda ay sas Benamin at kasugfunanan fagayu, ay sas fagayu taw te,

²⁴ ‘Yawi glong te, Lag am gfawayan ay ngay faduksay fag ngay taw Israel. Fagayu am, ulii wan, aroro au wan at nafafasludan fagayu.’ ” Ay kanya fagayu nafaning Yawi at longan ay noli wan.

Erubuam nu Gfunan Talun Israel

²⁵ Fun Erubuam nafaksvn furuan Sekem at alad sis talun Efraim at fagagbilugun fag ngay buksul, ay kanya nabanwan sanya. Siginans Sekem, kanya nafaksvn yangay furuan Penyel.

²⁶ Sanya ginan fun Erubuam gamatangan te, “Tibaginan ban kafoli yay sas Dabid at kasugfunanan fagmafunanun.

²⁷ Ngay taw ban nu kafoli sas Yawi at bale sis Erusalem laman namon fanggalangun, manfoli sas Reubuam, tagfunan sis talun Uda. Kanya ro fagayu manamabul angku ay kafoli ro sas fun Reubuam.”

²⁸ Fun Erubuam nu nafakamatoan at ngay tagfangatulun, nafawat duak baka riangan siginans gintu, ay nalong sa sangay taw te, “Malufuy way nu glo am sas Erusalem. Damai, Israel, ste way ay ngay fagsegan at nafaduksun ayu siginans talun Igiptu.”

²⁹ Ay fun Erubuam nafasas Betel at sadik baka riangan, ay at sadi nafasas Dan.

³⁰ Fun Erubuam at nafakamulun takatanya nafae asalanan Israel. Fagayu taw nalo dewa sitsigons Dan laman namauseganan kafag baka riangan sanya.

³¹ Fun Erubuam nafawat yangay ngay fagnansegan si tangabat fag ngay buknga, ay nafili ngay tagfon fanggalangun dewa yud taw Lebi.

³² Fun Erubuam nafae fagmafulun gina sis falabi limak menit sis fawaluk magdanun, kata tagsis Uda fag fagmafulun. Ay kanya nafon ngay fanggalangun sis fagirugan sis Betel laman sat nafawat fag ngay baka riangan. Sanya yangays Betel kanya nafili ngay tagfon fanggalangun laman at namakamulun sat nafawat fag ngay fagnansegan si tangabat fag buknga.

³³ Ay gina sis falabi limak menit sis fawaluk magdanun, sit nafili way fag menit, fun Erubuam nafon sik ngay fanggalangun sas fagirugan at nafawat sis Betel. Kanya nafae fagmafulun laman sa sangay taw Israel, ay nasas fagirugan laman namon sik ngay fanggalangun.