Psailm 78 - An tSaltair nó Sailm Ḋáiḃí 1965 (Ó Cuinn)

Salm 78. Attendite, popule.

¹ Éistigí le mo ḋlí, a ṗobail liom: claonaigí ḃur gcluasa do ḃriaṫra mo ḃéil.

² Fosclóiḋ mé mo ḃéal i ḃfáiṫscéal: foilseoiḋ mé seanráite ársa.

³ A ċualamar agus ar ar ċuireamar eolas: agus a dʼinis ár n‑aiṫreaċa dúinn:

⁴ Ionas naċ gceilfimis iad ar ċlann na nglún a ṫiocfas: aċ ag foilsiú onóra an Tiarna, agus na hoibreaċa móra iontaċa atá déanta aige.

⁵ Rinne sé conraḋ le Iácób, agus ṫug sé dlí dʼIosrael: agus dʼordaiġ sé dár n‑aiṫreaċa a ṫeagasc dá gclann.

⁶ Go mbʼḟeasaċ é dá slioċt: agus don ċlann nár saolaíoḋ go fóill;

⁷ Ar ṁoḋ nuair dʼḟásfaidís aníos: go dtaispeánfaidís é dá gclann;

⁸ Ionas go gcuirfidís a ndóċas i nDia: agus gan oibreaċa Dé a ḋearmad, aċ a aiṫeanta a ċoṁlíonaḋ;

⁹ Agus gan ḃeiṫ mar a sinsear, a ḃí ina nglúin ṁíḋílis, ċruaṁuincálaċ: glúin nár ṡuiġ a gcroí mar ba ċeart, agus nár ċloiġ a sprid go buan le Dia.

¹⁰ Mar ċlann Eṗráím: a ḃí in éide caṫa, ag iompar boġanna, agus a ṫiontaiġ a gcúl i lá an ċaṫa.

¹¹ Níor ċoinníodar conraḋ Dé: níor ṫoilíodar siúl de réir a ḋlí;

¹² Aċ ḋearmaid siad a ndearna sé: agus na hoibreaċa iontaċa a ṫaispeáin sé ar a son.

¹³ Rinne sé niṫe iontaċa i súile ár sinsir, i dtír na hÉigipte: i maċaire Ṡóáin.

¹⁴ Rinne sé ḋá leaṫ den ḟarraige, gur lig dóiḃ dul eatarṫu: ċuir sé na huiscí ina seasaṁ ina gcarn.

¹⁵ Ṫreoraiġ sé iad le néal i riṫ an lae: agus ar fuaid na hoiċe le solas tine.

¹⁶ Scoilt sé cloċa crua an ḟásaiġ: gur ṫug sé dóiḃ le hól astu, mar ḃeaḋ as an doiṁneaċt ṁór.

¹⁷ Ṫug sé uiscí as an gcarraig ċloiċe: gur sciord siad amaċ mar na haiḃneaċa.

¹⁸ Aċ i ndiaiḋ ar ṫarla ba ṁó a ṗeacaíodar ina éadan: ag cur caṫuiṫe san ḟásaċ ar an Té is Airde.

¹⁹ Ċuireadar caṫuiṫe ar Ḋia ina gcroí: agus dʼiarradar a mian den ḃia.

²⁰ Laḃraíodar fós in aġaiḋ Dé, á rá: An ḃfeisteoiḋ Dia clár san ḟásaċ?

²¹ Is fíor gur ḃuail sé an ċarraig ċloiċe, gur sciord na huiscí amaċ, agus gur riṫ na sruṫanna aisti: aċ an féidir leis fós arán a ṫaḃairt, nó feoil a ṡoláṫar dá ṗobal?

²² Nuair a ċuala Dia sin ḃí fearg air: gur fadaíoḋ tine in Iácób, agus gur éiriġ tromḋíḃeirg in aġaiḋ Iosrael;

²³ De ḃrí nár ċreideadar i nDia: agus nár ċuireadar a ndóċas ina ċuidiú.

²⁴ Ní lúide dʼordaiġ sé do na néalta in airde: agus dʼoscail sé doirse neiṁe.

²⁵ Dʼḟear sé fós manna anuas orṫu le hiṫe: agus ṫug sé bia ó neaṁ dóiḃ.

²⁶ Is aṁlaiḋ dʼiṫ an duine bia na n‑aingeal: óir ċuir sé ċucu a ndíol bia.

²⁷ Ḋúisiġ sé an ġaoṫ anoir faoi neaṁ: agus trína ċuṁaċta ṫug sé isteaċ an ġaoṫ aniar aneas.

²⁸ Dʼḟear sé feoil orṫu ċoṁ tiuḃ leis an luaiṫ: agus éin faoi ċleite mar ġaineaṁ na farraige.

²⁹ Lig sé anuas i measc a bpailliún é: mórṫimpeall a n‑áitreaḃ.

³⁰ Dʼiṫeadar agus ḃí a ndóṫain acu mar sin; ó ṫug sé ar ṡantaíodar dóiḃ: ní raḃadar gan a mian a ḟáil.

³¹ Aċ ṫáinig tromḋíḃeirg Dé orṫu agus an bia ina mbéal go fóill, gur ṁaraiġ sé an ṁéid ab acṁainní orṫu: ṁaraiġ go deiṁin, agus ċuir sé toġa fear Iosrael ar lár.

³² Aċ i ndiaiḋ ar ṫarla ba ṁóide a ṗeacaíodar: agus níor ċreideadar dá oibreaċa iontaċa.

³³ Mar sin ċaiṫ sé a laeṫanta i ndíoṁaointeas: agus a mblianta i mbuaireaṁ.

³⁴ Nuair a ṁaraiġ sé iad, ċuadar á iarraiḋ: dʼiompaíodar go luaṫ, agus dʼḟiafraíodar faoi Ḋia.

³⁵ Agus ċuiṁníodar gurḃ é Dia a gcuṁaċt: agus gurḃ é an Dia is Airde a ḃfuascailteoir.

³⁶ Ina ḋiaiḋ sin, ní raḃadar aċ á ṁeallaḋ lena mbéal: agus ag cur cluana air lena dteanga.

³⁷ Óir níorḃ é ar fad a ḃí in aice lena gcroí: agus níor leanadar go buanseasṁaċ dá ċonraḋ.

³⁸ Aċ ḃí sé ċoṁ trócaireaċ agus gur ṁaiṫ sé a míġníoṁarṫa dóiḃ: agus níor scrios sé iad.

³⁹ Is iomaí uair, go deiṁin, a lig sé a ḟearg ṫairis: agus nár lig sé dʼiomlán a ḋíḃeirge éirí.

⁴⁰ Óir smaoiniġ sé naċ raiḃ iontu aċ feoil: agus naċ raḃadar aċ mar ṡéideán gaoiṫe a ṫéann ṫairis, agus naċ ḃfilleann arís.

⁴¹ Ba ṁinic a ċuireadar caṫuiṫe air san ḟásaċ: agus a ċrádar é sa tír ḟiáin.

⁴² Ṫiontaíodar ar gcúl, agus ċuireadar caṫú ar Ḋia: agus corraí ar an Té is Naofa in Iosrael.

⁴³ Níor ċuiṁníodar ar a láiṁ: ná ar an lá a dʼḟuascail sé iad as láiṁ an naṁad;

⁴⁴ Mar a rinne sé a ṁíorúiltí in Éigipt: agus a ḟearta i maċaire Ṡóáin.

⁴⁵ Rinne sé fuil dá n‑uiscí: ionas nárḃ ḟéidir leo ól as na haiḃneaċa.

⁴⁶ Ċuir sé na cuileoga isteaċ ina measc, á n‑iṫe suas: agus na loscainn a scriosfaḋ iad.

⁴⁷ Ṫug sé a dtoraḋ don ṗéist ċapaill: agus a gcuraíoċt don dreolán teaspaiġ.

⁴⁸ Scrios sé a gcraoḃaċa fíniúna le cloċa sneaċta: agus a gcrainn ṁaoildearga leis an sioc.

⁴⁹ Agus ḃuail sé a n‑eallaċ le cloċa sneaċta: agus a gcaoiriġ le caorṫa tine.

⁵⁰ Lig sé amaċ dásaċt a ḟeirge ina mullaċ, díḃeirg agus confaḋ agus buaireaṁ: agus ċuir sé droċ‑aingil isteaċ ina measc.

⁵¹ Scaoil sé an srian lena ḋíḃeirg, agus níor lig sé lena n‑anam iad: aċ scaoil sé a n‑anam leis an bplá.

⁵² Agus ḃuail sé gaċ céadġin clainne san Éigipt: an drong ab airde agus ab acṁainní i dtiṫe Ċam.

⁵³ Aċ i dtaoḃ a ṁuintire féin de, ṡeol sé amaċ iad mar ċaoiriġ: agus ṫug sé tríd an ḃfásaċ iad mar ṫréad.

⁵⁴ Ṫug sé amaċ slán iad, ionas naċ raiḃ áḃar eagla acu: agus ḃáiġ sé a naiṁde faoin ḃfarraige.

⁵⁵ Agus ṫug sé iad idir ṫeorainn a ṡanctóra: go dtí an sliaḃ a ċeannaiġ sé lena láiṁ ḋeas.

⁵⁶ Ċaiṫ sé amaċ na págánaiġ rompu: agus rinne sé an tír a roinnt eatarṫu mar oiḋreaċt, agus ṫug sé ar ṫreiḃeanna Iosrael cur fúṫu ina bpubaill.

⁵⁷ Aċ dá ainneoin sin ċuireadar caṫú agus míṫaitneaṁ ar an Dia is Airde: agus níor ċoinníodar a ḟianaisí;

⁵⁸ Aċ ṫugadar a gcúl leis, agus ṫréigeadar é mar a rinne a sinsear: ag dul i leataoḃ mar ḃoġa briste.

⁵⁹ Óir ċrádar é le haltóra ar ċnoic: agus ġríosaíodar ċun díḃeirge é lena n‑íoṁánna.

⁶⁰ Nuair a ċuala Dia sin, ḃí fearg air: agus ġlac sé mórḋíḃeirg le hIosrael.

⁶¹ Ionas gur ṫréig sé an tabarnacal i Síló: an puball a ḃí curṫa aige i measc na ndaoine.

⁶² Scaoil sé a ċuṁaċt ċun broide: agus a ġlóir i láiṁ an naṁad.

⁶³ Scaoil sé a ṗobal le béal an ċlaíṁ: agus ḃí fearg air lena oiḋreaċt.

⁶⁴ Dʼídiġ an tine a ḃfir óga: agus ní dearnaḋ cleaṁnasa dá maiġoeana.

⁶⁵ Maraíoḋ a sagairt leis an gclaíoṁ: agus ní raiḃ na baintreaċa ann a ċuirfeaḋ cluiċe caointe.

⁶⁶ Ba ansin a ḋúisiġ an Tiarna mar ḋúisíonn duine as a ċodlaḋ: agus mar ḟaṫaċ a dtug an fíon croí dó.

⁶⁷ Ṫiomáin sé a naiṁde ar gcúl: agus dʼḟág sé náire ḃuan orṫu.

⁶⁸ Ḋiúltaiġ sé do ṫabarnacal Iósaif: agus níor ṫoġ sé treiḃ Eṗráím;

⁶⁹ Aċ ṫoġ sé treiḃ Iúda: mar tá Sliaḃ Ṡíóin dá dtug sé a ġrá.

⁷⁰ Agus ṫóg sé ansin a ṫeampall in airde: agus leag sé a ḃun mar an talaṁ a ḃunaiġ sé go buan.

⁷¹ Ṫoġ sé Dáiḃí a ṡeirḃíseaċ: agus ṫug sé é óna banraċa.

⁷² Ġlac sé é, agus é i ndiaiḋ na gcaoraċ trom uan: ionas go mbeaṫóḋ sé Iácób a ṗobal, agus Iosrael a oiḋreaċt.

⁷³ Dá ḃrí sin ḃeaṫaiġ sé iad le croí dílis ḟíor: agus rialaiġ sé go céillí iad le hiomlán a ċuṁaċt.