Psailm 33 - An tSaltair nó Sailm Ḋáiḃí 1965 (Ó Cuinn)

Salm 33. Exultate, justi.

¹ Go mba é an Tiarna ḃur ngairdeas, a ḟíréin: óir is é an buíoċas is dual agus is dúċas ó ḋea‑ḋuine.

² Molaigí an Tiarna leis an gcláirseaċ: seinnigí a ṁolaḋ leis an liút, agus le cruit na ndeiċ téad.

³ Canaigí aṁrán úrnua don Tiarna: go mba ard‑aigeantaċ dea‑ċroíúil a ṡeinneas siḃ a ṁolaḋ.

⁴ Óir is fíor é briaṫar an Tiarna: agus is dílis iad a oibreaċa uile.

⁵ Bíonn grá aige ar an ḃfíréantaċt agus ar an mbreiṫiúnas: tá an talaṁ lán de ṡuáilcí an Tiarna.

⁶ Is le briaṫar an Tiarna a rinneaḋ na neaṁa: agus rinneaḋ a sluaite uile le gaoṫ a anála.

⁷ Tá mar ḃeaḋ sé ag cruinniú agus ag carnaḋ uisce na farraige: agus mar ḃeaḋ an aiḃéis ṁór á cur i leataoḃ aige, i dteaċ a ṡéad.

⁸ Bíoḋ eagla ar an talaṁ uile roiṁ an Tiarna: bíoḋ urraim oraiḃ roiṁe, a luċt áitiṫe na cruinne.

⁹ Óir, is é laḃair, agus rinneaḋ aṁlaiḋ: is é dʼordaiġ, agus ba ní buanseasṁaċ é.

¹⁰ Cuireann an Tiarna coṁairle na bpágánaċ ar ceal: agus cuireann sé bearta na ndaoine ar neaṁní, agus diúltaíonn sé do ċoṁairlí na ḃflaṫ.

¹¹ Fanfaiḋ coṁairle an Tiarna go deo: agus fanfaiḋ smaointe a ċroí ó ġlúin go glúin.

¹² Is beannaiṫe an ṁuintir, arb é an Tiarna láivé a nDia: agus is beannaiṫe an cine a ṫoġ sé mar a oiḋreaċt féin.

¹³ Féaċann an Tiarna anuas ó neaṁ, agus aṁarcann sé ar an Áḋaṁċlann uile: bíonn a maireann ar an talaṁ á scrúdú aige óna ṫeaċ agus óna áras.

¹⁴ Bíonn a gcroiṫe uile á múnlú aige: agus níl ní dá ndéanann siad naċ dtuigeann sé.

¹⁵ Cá ḃfuil an rí a dtarrṫóḋ neart a ṡlua é: nó an fear cróga a ṫiocfaḋ slán lena mórneart?

¹⁶ Ní meastar eaċ aċ ina ní gan tairḃe ċun duine a ṡlánú: ní ṡaorfaiḋ a ṁórneart duine ar biṫ.

¹⁷ Féaċ, mar ḃíonn súil an Tiarna ar an dream darb eagal é: agus ar an dream a ṫéann i muinín a ṫrócaire;

¹⁸ Ar moḋ go slánaí sé a n‑anam ón mbás: agus go mbeaṫaí sé iad in aimsir an ġorta.

¹⁹ Bʼḟoiġneaċ a dʼḟan ár n‑anam leis an Tiarna: óir is é ár gcaḃair agus ár sciaṫ é.

²⁰ Is é ḃíos mar ċúis ġairdis ag ár gcroí: ó ḃíoḋ dóċas againn as a Ainm Naofa.

²¹ Bíoḋ do ṫrócaire ċarṫanaċ, a Ṫiarna, á doirteaḋ orainn: de réir mar ċuirimid ár ndóċas ionat.