Psailm 30 - An tSaltair nó Sailm Ḋáiḃí 1965 (Ó Cuinn)

Salm 30. Exaltabo te, Domine.

¹ Móróiḋ mé ṫú, a Ṫiarna, mar ṫóg tú mé: agus níor lig tú do mo naiṁde a mbua a ṁaíoṁ orm.

² Mo Ṫiarna Dia, ġlaoiġ mé ort: agus leiġeasaiġ tú mé.

³ Is tú, a Ṫiarna, a ṫug mʼanam aníos as ifreann: ċuṁdaiġ tú mo ḃeaṫa ón dream a ṫéann síos sa ṗoll.

⁴ Seinnigí molaḋ an Tiarna, a naoṁa an Tiarna: altaígí dó lena naofaċt a ċur i gcuiṁne.

⁵ Óir ní ṁaireann a ḟearg aċ seal faitiḋ na súile, agus tá an ḃeaṫa ina ḋea‑ṫoil: siúd is go ḃfanann an brón ar feaḋ oíċe, tagann an lúċáir ar maidin.

⁶ Is é dúirt mé agus mé faoi ṡéan, ní ḃainfear bogaḋ asam: ó ḃí tú ċoṁ maiṫ sin dom, a Ṫiarna, ag cur treise i mo ṡliaḃ.

⁷ Dʼiompaiġ tú do ġnúis uaim: agus is mé a ḃí buarṫa.

⁸ Ġlaoiġ mé ort ansin, a Ṫiarna: agus bʼḟíor‑uṁal a ḋruid mé le mo Ṫiarna.

⁹ Cad é an tairḃe atá im ḟuil: nuair a ṫéim síos go dtí an poll?

¹⁰ An mbeiḋ an luaiṫ ag altú duit: nó an ḃfoilseoiḋ sí dʼḟírinne?

¹¹ Éist, a Ṫiarna, agus bíoḋ trócaire agat orm: bí agam, a Ṫiarna, mar ċúntóir.

¹² Dʼaṫraiġ tú mo ḃrón go lúċáir: scaoil tú an saic‑éadaċ díom, gur ċuir tú áṫas orm.

¹³ Dá ḃrí sin beiḋ gaċ dea‑ḋuine ag seinm do ṁolta gan staonaḋ: a Ḋia liom, beiḋ mé á altú duit go deo.