Psailm 25 - An tSaltair nó Sailm Ḋáiḃí 1965 (Ó Cuinn)

Salm 25. Ad te, Domine, levavi.

¹ Is ċugat, a Ṫiarna, a ṫógfas mé mʼanam; is ionat a ċuir mé mo ḋóċas, a Ḋia: ná lig dom ḃeiṫ do mo náiriú, agus ná lig do mo naiṁde a ṁaíoṁ go ḃfuaireadar mo ḃua.

² Ní ḃeiḋ náire ar ar ċuir a ndóċas ionat: aċ an dream a ċiontaíos gan ċúis, is orṫu a ḃeiḋ an aiféala.

³ Taispeáin do ṡlite dom, a Ṫiarna: agus teagasc do ċosáin dom.

⁴ Treoraiġ ar aġaiḋ id ḟírinne mé, agus bí do mo ṁúineaḋ: óir is tú Dia mo ṡlánaiṫe; is asat a ḃíoḋ mo ṁuinín ar feaḋ an lae.

⁵ Go mba ċuiṁneaċ leat, a Ṫiarna, do ṁaoṫ‑ṫrócaire: agus do ċarṫanaċt ġráṁar, ó ḃíodar ann riaṁ anall.

⁶ Ná cuiṁniġ ar ṗeacaí ná ar ċoirṫe mʼóige: aċ cuiṁniġ orm de réir do ṫrócaire, a Ṫiarna, agus de réir do ċineáltais.

⁷ Is grásṁar, fíréanta é an Tiarna: ar an áḃar sin múinfiḋ sé an tslí do na peacaiġ.

⁸ Treoróiḋ sé an dream a ḃíos uiríseal de réir an ċirt: agus múinfiḋ sé a ṡlí don dream a ḃíos ceansa.

⁹ Níl i gcosáin uile an Tiarna aċ an trócaire agus an ḟírinne: don dream a ċoṁallas a ċonraḋ agus a ḟianaisí.

¹⁰ Mar ṁaiṫe led Ainm, a Ṫiarna: bí trócaireaċ dom i mo ṗeaca ós mór é.

¹¹ Cá ḃfuil an fear a mbíonn eagla an Tiarna air: múinfiḋ sé eolas dósan ar an slí a ṫoġfaiḋ sé.

¹² Mairfiḋ a anam faoi ṡéan: agus titfiḋ oiḋreaċt na tíre ar a ṡlioċt.

¹³ Ligeann an Tiarna a rún leis an dream a mbíonn a eagla orṫu: agus noċtfaiḋ sé a ċonraḋ dóiḃ.

¹⁴ Bíonn mo ṡúile i gcónaí ag féaċaint faoi ḋéin an Tiarna: óir tarraingeoiḋ sé mo ċosa amaċ as an líon.

¹⁵ Iompaiġ ċugam agus déan trócaire orm: óir táim i mo ṫruán tréigṫe.

¹⁶ Tá a ṫuilleaḋ crá ar mo ċroí: taḃair slán as an ngéiḃeann mé.

¹⁷ Féaċ ar mo ḃuaireaṁ agus ar mo ḃrón: agus maiṫ dom mo ṗeaca uile.

¹⁸ Féaċ ar mo naiṁde agus a líonṁaireaċt: agus an fuaṫ fíoċṁar atá acu dom.

¹⁹ Cuṁdaiġ mʼanam agus fuascail mé: ná lig dom ḃeiṫ náiriṫe ó ċuir mé mo ḋóċas ionat.

²⁰ Go seasa neaṁċoirṫeaċt agus ionracas dom: óir bʼasat a ḃí mo ṁuinín.

²¹ Taḃair Iosrael slán, a Ḋia: as gaċ géiḃeann ina mbíonn sé.