Zẹkaraịa 9 - Kịrịkẹnị Baịbụl

Palịa Anga Sẹ Ma Tịḅị Ọgọnọ Ḅẹrẹpẹlẹ Ḅịpị

¹ Mị anị Nyanaḅọ Ḅe oku mị-ẹ: Ọ̀ tọnpẹlẹsam na ò fomuḅara se Hedrak ama mị na pịkị Damaskọs opuama mị na pịrịḅịa. Izrẹl sẹma ngẹrịkẹ, ọkụma Siria tịḅịnị ama mị sọ, sime Nyanaḅọ Ḅe pịrịmẹ.

² Hamat, anị Hedrak ekeḅụ sime ama mị sọ, sime ọ̀ pịrịmẹ, anị anị pịkị sime Taya na Saịdọn na pịrị ọkụ-ẹ, arịa yemịẹḍin ḅara mamgba na.

³ Taya mị anị owuni warị nama anịaḅụ pịrịsam, se fun sara ọkụ saraḅara nwọse seleḅa na goli na koḅiri koromasam!

⁴ Ọkụma Nyanaḅọ Ḅe, anị nyanaye mamgba ori ọkịsoḅịa. Ori anịa ngọ mamgba ọkị mun tọrụogbo wokumaḅịa, se ori opuama mị dọkịma kirisaraḅịa.

⁵ Ashkẹlọn opuama mị, anị mịn mị ọrị se ḅalafa nyanaḅịa. Gaza opuama mị anị ọrịḅịa se opu ḅụakụ nyanaḅịa. Ẹkrọn sọ, anịa kuḅie kụrọ mamgba galagalaḅịa. Gaza mị anị ḅarị amanyanaḅọ nyana-ẹkẹ, se Ashkẹlọn mị anị gbọngọlọma simeḅịa, gbọrịḅọ sọ ḅarị ḅie oforika ḅaraḅụ.

⁶ Kịrịkịrị-a sẹ ḅie-a tomoni anị Ashdọd ḅie angaḅịaye-ẹ. Nyanaḅọ Ḅe nwọ ḅẹmẹ, “Mịna ḅụdekichịẹma Filistia apụ mamgba àrị ini mịẹiderimaḅịa.

⁷ Ini ḅarị pulo ḅụ sime nama pẹị-ẹkẹ, pịkị jịn tọnye-nyana-fịaye fịẹkẹ. Kirikọn apụ mamgba ini ḅo ị̀ya tomonima ḅie apụ sọḅịa, se Juda sẹ mị ḅụ ịkpangị sọḅịa. Ẹkrọn mị ḅo ị̀ya tomonima ḅie pẹkẹrẹ sọḅịa, Jebus apụma ḅo sọ ọkụ mị.

⁸ Àrị ị̀ya ama mị ḍikiḍikiḅịa, mịẹse owuni ineda anịa ḅie toluḅọrọ ẹka ḅara. À ḅarị ḅereni ẹkẹ kụrọ apụ ḅo ị̀ya tomonima pụnụma. Àrị ọrịsam ị̀ya tomonima tọrụsiọrị la ọkụ.”

Tọrọkọju Amanyanaḅọ Ḅe

⁹ Ó ḍoroku, ḍoroku, Zaịyọn-a tomoni! Ḅieḅẹlẹ ḅụ ó ḍoroku, ómine Jerusalẹm-a tomonima! Ḍiki, ọ́mịna amanyanaḅọ ḅe ori ọ́ damaḅo aḅẹ! Ọmụḅaraiḅi ḅieḅẹlẹ ḅụ ò ḅo aḅẹ, ọkụma ḅụiderima ḅụ yepụra asụn ọgọnọ ò ḅoaḅẹ— yepụra asụn tọkụ ọgọnọ.

¹⁰ Nyanaḅọ Ḅe ọkọ ḅẹmẹ, “Izrẹl ḅie sime owuni arụ ma à àrị sinḅịa! à pịkị Jerusalẹm ḅie sime asụnma ọkịḅịa; ini se owu sọ lubu ma à àrị anyịmaḅịa. Ọ́mịna amanyanaḅọ ḅe ò dein pịrịḅịa sẹma ogboku; ọ̀ ḅẹrẹtọn tọrụ ḅụ ḅọrọ mun tọrụ laḅịa, Yufretis Tọrụ ḅụ so mun tomonikiri mị kuluma la.”

Tamụnọ-a Tomoni Ma Ḅe Pịkịmaḅo Mị

¹¹ Nyanaḅọ Ḅe ọkọ ḅẹmẹ, “Àrị ómine na fị ọḅọkụ mị anị agbamịẹ pulo mị à nwọse mịẹkụrọmaye mị ẹrẹchị, ọ́mịna tomoni, mengi oforika olulu ma ḅie ini de mun koromapụ ma, àrị ini pakụmaḅoḅịa.

¹² Ọ́ pịkịmaḅo ómine ini de so se mịọkụ kuḅie kụrọ nyana apụma; ọ́ pịkịma ọ́mịna ḍụaḅọrọma sime nyọ ḅo. Mịọkụ à ḍuko ọ́ pịrịaḅẹ, à mama kiri nẹngị ḅẹlẹma nwọse ọ́ gbẹịnḅịa, ómine oria tọrụsiọrị ma gose.

¹³ À Juda mị se gbọrị owuni lubu ḅara mịẹḅịa se Izrẹl ḅe se ḍẹịn ḅara wẹrịḅịa. À Zaịyọn owuapụma se okolo agiji ḅara wẹrịḅịa, se Gris owuapụma na owusọḅịa.”

¹⁴ Nyanaḅọ Ḅe oria tomonima ọgọnọju ḅụ ọ̀ ḅụ ḍiepakụmaḅịa; ò so wakam ḅara se oria ḍẹịn ma tẹịnḅịa. Kụrọmamgba Nyanaḅọ Ḅe epelepe mị ofuroḅịa; se chukuju irisi ma ḅie ọ̀ kan toluḅịa.

¹⁵ Kụrọmamgba Nyanaḅọ Ḅe ori oria tomonima kokoḅịa, se ini inina-tarakapụma ḅaaḅịa. Ini owuḅie olokuḅịa, iru tọrụsọ apụ oloku ọkụ se ini inina-tarakapụma pulo ọsụnḅịa; bọlị ḅie ini ọsụn agbamịẹ ẹbẹ ọgọnọ sara pulo ideri ọkụ anị nwọse ideriḅịa.

¹⁶ Anị ene ḅo lasịkị, Nyanaḅọ Ḅe ori oria tomonima ḍụaḅịa, anana ḍikiḍikiḅọ ḅalafamaye ḅie oria ananama ḍụa ọkụ. Ini oria ama ḅie amanyanaḅọchu ḅirima yela ḍụparị ḅịa ọkụ ḅịaḅịa.

¹⁷ Ama mị ndende sime iḅi na ḍikitọrụgbẹịn na nwọ nyana ḅe! Asẹmẹnị ma anịa fịyemgbọlụ ma na iru ma na ḅie sẹnị kụrọḅịa.