Zẹkaraịa 3 - Kịrịkẹnị Baịbụl

Ịkịankoroḅọ Ḅe Tẹmẹ Ḅụ Gele Agbamịẹḅọ Ḅe Ḅụ Ọrịye

¹ Jịn tẹmẹ ḅụ ọrịye ḅụ, Nyanaḅọ Ḅe Gele Agbamịẹḅọ, Jọsụwa ḅe se ị̀ ḍiemẹ, Nyanaḅọ Ḅe enjẹlḅọ ḅe tọrọkọ ọ̀ chịẹ waraḅẹ. Se anịnyọ Jọsụwa ḅe anga sịkị Oru ḅe ọ̀ chịẹ waraḅẹ, ḅụkarakarama ḅẹrẹ ḍuko ọ̀ pụnụmaḅịa ẹrẹchị.

² Nyanaḅọ Ḅe enjẹlḅọ ḅe nwọse Oru ḅe ḅẹmẹ, “Ye Nyanaḅọ Ḅe ḅẹrẹ ḅarasi kọn ị́ pịrị Oru! Ye Nyanaḅọ Jerusalẹm ḅẹlẹmaḅọ ḅe ḅẹrẹ ḅarasi kọn ị́ pịrị. Ḅeḅọ ḅe fịnị ḅie ini sinpakụmaḅo chịn kịkẹḅọ-ẹ.”

³ Jọsụwa ḅe anị nyọ ịlọlị ḅụchụaye ọ̀ nwọ chụa waraḅẹ.

⁴ Enjẹlḅọ ḅe nwọse ò koruarị soḅie oria fịrịnwẹngịapụma ḅẹmẹ, “Ḅeḅọ ḅe, chụa ịlọlị-a ḅụchụayema ọ̀ nwọ sin.” Anịsịkị ọ̀ Jọsụwa ḅe ḅẹmẹ, “Àrị ị́ya si mị sinsam se ị́ chụaḅịa ịwọ ḅụchụaye se ị́ pịrịḅịa.”

⁵ Ọ̀ kụrọ se fịrịnwẹngịapụma pịrịmẹ ini fịafịa tịḅịkunye se Jọsụwa ḅe tịḅị kun. Ini ọkọ mịẹmẹ, anịeso ini ịwọ ḅụchụaye se ọ̀ chụamẹ, Nyanaḅọ Ḅe enjẹlḅọ ḅe anịnyọ chịẹsimearịogbo.

⁶ Anịsịkị enjẹlḅọ ḅe ḍuko Jọsụwa ḅe pịrịmẹ na

⁷ Kụrọmamgba Nyanaḅọ Ḅe nwọ ḅẹmẹ: “Ị́ nemikase ị̀ya olokoma ḍukoye mịẹ se à tọn ị́ pịrị fịrịma nwẹngịmẹ nwọ ḅẹḅẹ, anị ị́ pa ị̀ya Oputẹkẹwarị mị na anịa odo warịma na tịḅịdaḅịa, se à pịkị ị́ya tẹkẹma naaḅịa, àrị à pakaḅoḅo enjẹlapụma tẹkẹma naanaa ọkụ mị.

⁸ Anịgose poki, Jọsụwa, ị́rị́ anị Gele Agbamịẹḅọ ḅe-ẹ; pịkị ómine ò juo agbamịẹapụma sọ, ò poki, ómine anị tọrọkọju iḅi-elekima-ẹ; àrị ị̀ya fịrịnwẹngịḅọ ḅe, anị ini Ịkpangị se chịnḅọ ḅe ḍiepakụmaḅịa!

⁹ Jọsụwa ḅe tọrọkọ, à gbọrị sọnọma-tọrụ-nyana ḍụparị se koromaḅẹ. Anịa ọgọnọ à gbọrịye gịẹịnḅịa, se kpọkpọ gbọrịene ḅụ mị ama mị mịẹ-a sima à nwọ sinḅịa.

¹⁰ Anị ene mị ḅo laḅịa sịkị, ọrụḅọḅọ nụḅọ na palịangaḅọ nwọ chịnḅo tọrụḅẹlẹ nyanaḅịa, mị dein-na-kokoḅara-na sime nyọ ḅụ, ọ́mịna irumịẹ chịnmgbọlụ ozuma na figi ejema na kelema nyọ mị ḅie.”