Zẹkaraịa 14 - Kịrịkẹnị Baịbụl

Jerusalẹm Na Sẹ Ma Na

¹ Nyanaḅọ Ḅe sime ḅẹrẹkọnḅịa ene mị kpekisam. Anịsịkị ini Jerusalẹm ọfọịnḅịa, se ini ọfọịnḅoaye ma ini àrị ḍieḅịa ọ́mịna tọrụkuḅu.

² Nyanaḅọ Ḅe, ọ̀ sẹ mamgba koḅiriḅo owu se Jerusalẹm pakaḅịa. Opuama mị, ini anị ọkịḅịa, warịma ini ọfọịnḅịa, ini pịkị eremeni ma ḅụ kanḅịa. Tomonima ḅụ pẹkẹrẹ desin ḅie sọḅịa, ọkụma iniaḅụ kọn apụma ini ini sin-ẹkẹ opuama mị ḅie.

³ Anịsịkị Nyanaḅọ Ḅe ọ̀ pakamun ísí-a sẹma na owu sọḅịa, ḅọrọsa sịkị ọ̀ sọsọ ọkụ mị.

⁴ Anịsịkị Oliv Tụndụ ọgọnọ ọ̀ chịẹḅịa, anị Jerusalẹm ḅụ ịrụapakapaka nyọ mị. Anịsịkị gbọrị opu pẹsịkiri Oliv Tụndụ mị se maịn puḅịa, ịrụapakapaka nyọ ọkịmun ịrụasọsọ nyọ la. Tụndụ mị ḅụ pẹkẹrẹ ọgọnọju daḅịa, pịkịna pẹkẹrẹ chukuju daḅịa.

⁵ Mị tụndụ mị se maịn pu pẹsị kiri ḅie ḅụ, mị ọ́ pịọrụ ḅọrọsoḅịaye-ẹ. Ọzaya ḅe Juda da sịkị kiri mị gbụama puse ọ́mịna ḅieju-aḍapụma fin so ọkụ ó fin soḅịa. Nyanaḅọ ị̀ Tamụnọ Ḅe, ò ḅoḅịa, enjẹlapụ mamgba ò se ọ̀ ḅụ chụa ḅoḅịa.

⁶ Anị ḅo anịsịkị lasịkị, oḅoku na ijiriji na ḅarị sime-ẹkẹ,

⁷ kanakana pịkị ḅarị sime-ẹkẹ. Enekuḅu sime gbasoḅịa ḍin ḅie sọ. Ma ma pakaḅịa sịkị Nyanaḅọ Ḅe ngẹrị mị nemiḅịaye-ẹ.

⁸ Anị ḅo anị ene lasịkị, Jerusalẹm ḅie ḅu mengi sakị ideriḅịa, anịa ḅụ gbọrị pẹkẹrẹ mun Jikeka Tọrụ mị ḅie koroḅịa, ísí pẹkẹrẹ mị mun Mẹditirenia mị ḅie koroḅịa. Kụra mamgba anị se ideriḅịa, ịrụakpoin na ene sịkị na.

⁹ Anịsịkị Nyanaḅọ Ḅe, ori mị amanyanaḅọ sọ sẹkiri mị mgba pịrịḅịaye-ẹ; tomoniḅọ goyegoye Tamụnọ ḅara se ọ̀ tẹkẹḅịa pịkị anị gbọrị ẹrẹ ḅụ ò nemiḅịa.

¹⁰ Anị sẹ mị mgba, Giba ọgọnọju ọkịḅo Rimọn chukuju la, ini anị mịẹ sẹrẹrẹmaḅịa. Jerusalẹm mị anị gelema chịẹ anị kelema nyọma nẹngịḅịa; opuama mị, Bẹnjamin Onu ḅọkọ ḅụ ọkịmun Ịkọlị Onu ḅọkọ mị lamẹ, anị olomu ma ḅọkọ sime sosa nyọ mị, se pịkịna Hananẹl sokopi warị ḅụ ọkịmun amanyanaḅọ iru-mịẹ-a nyọma lamẹ.

¹¹ Tomonima anịnyọ ini deinma kokoḅara ḅie angaḅịa, amakan ḅe ẹrẹma ḅarị oforika ḅụ.

¹² Nyanaḅọ Ḅe, ọ̀ ḅalafama obi se ḅo owuse-Jerusalẹm-paka ama mamgba pịrịḅịa. Ini ḍumo-arị-ogbo inia oju mịnị ḅụrụḅịa; inia tọrụmgbọlụma na ḅịpịḅie-a ḅẹlẹ ma na ḅụrụfaḅịa.

¹³ Anịsịkị Nyanaḅọ Ḅe, ọ̀ ḅụḅalaḅala na ḅalafa na se iniaḅie chu so-ọkụma, ininini ngẹrị iniaḅụma na sọsọ-simeḅịa.

¹⁴ Juda owuapụma ini owu sọ Jerusalẹm mị ḍụaḅịa ini sẹma ḅie ọfọịnḅo ngọ mamgba nwọ ọkịḅịa — goli na seleḅa na ḅaka ḅịtẹ na.

¹⁵ Ḅalafama obi asụnma na asụn awọma na, ike-nambuloma na pịkị yepụra asụn ma na laḅịa — nyọ nyọ ḅụ sime tarakapụ nama mamgba obi àrị laḅịa.

¹⁶ Ini Jerusalẹm na doniaso se kọn apụma, kụra goyegoye anịnyọ mun Kụrọmamgba Nyanaḅọ Ḅe, tẹkẹḅịa amanyanaḅọ ḅaraḅụ pịkị Soro-warị Alalị fịḅịa.

¹⁷ Nemikase mun Kụrọmamgba Nyanaḅọ Ḅe, amanyanaḅọ ḅara se ọ̀ tẹkẹka sẹ simesime, ene inia kiri koro-ẹkẹ.

¹⁸ Nemikase Ijipt apụma Soro-warị Alalị mị fị ḍụkụkẹ nwọ ḅẹḅẹ, Nyanaḅọ Ḅe se ísí mun ḍụkụka amama sẹịnmaḅịa obi ma inisọ ini laḅịa.

¹⁹ Mịn anị sime Ijipt na ísí-a Soro-warị Alalị mị ḍọkịka amama pịrịḅịa fomuḅara-ẹ.

²⁰ Anịsịkị, asụnma pụkọ ḍiki ḅụ kpọ gbụmụ mamgba ini nwọ gịẹịnḅịa “Mịẹfịafịama Nyanaḅọ Ḅe pịrịye.” Oputẹkẹwarị ḅie sime yechụọ-a ḅẹlẹ mamgba na, agbamịẹ ẹbẹ tọrọkọ sime bọlị ma na osiḅụ sime ọkụ, mị àrị sọ simeḅịa ọkụ-ẹ.

²¹ Jerusalẹm ḅie na Juda mgba na ḅie sime yechụọ-a ḅẹlẹ mamgba ini ọrụtọn ḅaraḅụ àrị sikima koromaḅịa, se fịrịnwẹngị Kụrọmamgba Nyanaḅọ Ḅe pịrị gose. Agbamịẹ apụma àrị se agbamịẹ namama suḅịa. Anịḅo anịsịkị lasịkị Kụrọmamgba Nyanaḅọ Ḅe Oputẹkẹwarị ḅie, gbọrị tuḅoniḅọ sọ ḅarị sime-ẹkẹ.