Zẹkaraịa 13 - Kịrịkẹnị Baịbụl

Ḅụ Fịafịa Ma Mengi

¹ “Anị ḅo anịsịkị lasịkị,” Kụrọmamgba Nyanaḅọ Ḅe, ọkọ ḅẹmẹ, “gbọrị mengi tụḅụ ḅie finjiḅịa, se Devid ḅe ḅụ koroḅo apụma na Jerusalẹm apụma na mịẹfịafịama ḅịa inia mịẹirima ma na oru-a mịẹmịẹaye ma na ḅụ.

² Anịsịkị àrị ama mị ḅie oru ẹrẹ ma sinḅịa, se gbọrịḅọ sọ ḅarị ngịsị àrị se ḅiekoroma-ẹkẹ. Ḅereni ọkị na nụḅọ ịkịankoroḅọ-ẹ nwọ ḅẹḅọ ḅẹḅọ, à nụḅọ sinḅịa, se pịkị oru-tẹkẹ-ḍọkị tẹmẹ mị sinḅịa ama ḅie.

³ Nemikase tomoniḅọ pa anịkanịka ḅara ḅụ ḅẹaḅẹ na nụḅọ ịkịankoroka-koroka nwọ ḅẹḅẹ, nụḅọ ḍaḅọ na nyengiḅọ na mị ḍuko nụḅọ pịrịḅịaye-ẹ na, nụḅọ fịḅie sọḅịa, anịatịḅị ò ḅereni ọkịaḅẹ na ọ̀ Nyanaḅọ Ḅe ọkwẹịn mị kọn-aḅẹ, anịnakaraka iruo anị ọ̀ kọn arịye-ẹ. Ori ịkịankoroḅịa sịkị, ḍawu na nyọngọrọ na mị ò temi ḅaaḅịaye-ẹ.

⁴ Anịsịkị ḅo lasịkị, gbọrị ịkịankoroḅọ sọ ofori-ẹ, tịḅị fura nyana nụḅọ tẹmẹḅụ-ọrịye mị pịrị, anịkanịka ịkịankoro ḅara se yemịẹ anịkanịka ịkịankoro apụ ḅụchụaye chụa, se oḅori-se-nweni-chịẹmaḅịa ẹrẹchị.

⁵ Anịnakaraka, ọ̀ ḅẹḅịa, ‘Ị̀rị̀ ịkịankoroḅọkẹ; ị̀rị̀ ozu kọrịḅọ-ẹ—ị̀ya ḍumo mgba à se ama ḅie ozu kọrịsam.’

⁶ Se nemikase tomoniḅọ ò gbelamẹ, ‘Ị́ya ekpe laye ma che aye?’ ọ̀ pẹkẹrẹḅịa, ‘inikio warị ye se ị̀ lamamẹ.’”

Tamụnọ Anana Ḍikiḍikiḅọ Ḅe Ḅa Mị Ḅe Kụrọpịrị

⁷ Kụrọmamgba Nyanaḅọ Ḅe ọkọ ḅẹmẹ, “Sịsẹ, kongo, se anana ḍikiḍikiḅọ ḅe, anị fịrịnwẹngị ị̀ pịrịḅọ ḅe, owu se ọ̀ paka! Ọ̀ ḅaa, se ananama àrị galagalaḅịa. Àrị owu se ị̀ya tomonima pakaḅịa

⁸ se sẹ mị se tẹrẹ-a kiripu ḅụ mama kiri fịḅịa.

⁹ Se à kiri kọn tẹrẹ karama kiri mị ḍaḍikiḅịa se ini mịẹfịafịamaḅịa, ini fịnị se seleḅa mịẹfịafịama ọkụ. Àrị ini ḍaḍikiḅịa ini goli ḍaḍiki ọkụ. Se ini ị̀ tẹkẹḅịa, à pịkị ini pẹkẹrẹḅịa. À ḍuko ini pịrịḅịa na ini anị ị̀ya tomoni-ẹ, se ini ḅereni pakụmaḅịa na Ị̀rị̀ anị inia Tamụnọ-ẹ.”