Zẹkaraịa 10 - Kịrịkẹnị Baịbụl

Nyanaḅọ Ḅe Ḍụaḅọrọma Ḅerenimẹ

¹ Ọ́ Nyanaḅọ Ḅe ḅara ene ḅi, kụra mị ḅie fọngụ sịkị mị ḅụ. Ori Nyanaḅọ Ḅe anị ene sịkị soḅuno ma na otita ma na se sẹịn se ozuma ḅie ịnyanya ma wiliwili ọrụḅọḅọ pịrịmẹ.

² Tomoni mun oru na tọrụtoluapụ na ḅara yegbelamẹ, ọkụma inia ḅara ini nyanaḅo pẹkẹrẹ ḅịpị mamgba iruoaye famamẹ, pịkị papaye-ẹ. Dapụ ḍawọ pufinjimẹ, ọkụma ini ómine dairimamẹ; ini se ọ́ pịrị kuḅiekụrọ mị yeḅụsọkẹ. Mị ḅụ tomonima fasa anana ḅara se nwẹngịma ḅọrọmẹ. Ini ḅụfụka ḅie omi-ẹ anịatịḅị ini tịḅịnịḅọ nyanakẹ.

³ Nyanaḅọ Ḅe ọkọ ḅẹmẹ, “Ḅẹrẹtọn ị̀ya tomonima pịrị àrị igoniapụma, àrị ini ḍikiḅieḅumẹ, à pịkị fomuḅara se ini pịrịḅịa. Juda-a tomonima ị̀ya tomoni-ẹ, se Ị̀rị̀ Kụrọmamgba Nyanaḅọ Ḅe àrị ini ḍikiḍikiḅịa. Ini ị̀ya kụrọ asụn owuni sọḅịa.

⁴ Iniaḅie ḅụ anị amaḍikiḍiki apụ na tịḅịnị na, ḅẹrẹtọn apụ na pakaḅo ị̀ya tomonima ḍikiḍikiḅịaye-ẹ.

⁵ Owuni ọmụḅaraiḅi nyana se inina-tarakapụma nanga ateli ọpọtọkọ ma ḅie ḍipi ọkụ, anị Juda apụma ọmụḅaraiḅi nyanaḅịa ọkụ-ẹ. Ini owusọḅịa anịatịḅị Nyanaḅọ Ḅe ori ini na omi-ẹ, ini pịkị inina-tarakapụ asụn owunima inumaḅịa.

⁶ “À Juda tomonima mịẹḅịa ini kụrọ; Àrị Izrẹl tomonima ḍụaḅịa. À ḍikiḅụgerere nyana ini pịrịḅịa se inimgba ọkị warịḅoḅịa. Ngịsị àrị ini sịkịkẹ nwọḅẹ ḅara anị ini simeḅịa ọkụ-ẹ. Ị̀rị̀ anị Nyanaḅọ inia Tamụnọ Ḅe-ẹ; àrị inia tẹkẹma naaḅịa.

⁷ Izrẹl tomonima ini owuniapụ kụrọ ọkụ kụrọḅịa, ere iru ḅuarịapụ ḅieḅẹlẹ ḅara ini nwọse ḅieḅẹlẹḅịa. Inia ọḅụju ḅoarị apụma mị ọmụḅaraiḅi mị se ḅiekoroma se ḅieḅẹlẹḅịa Nyanaḅọ Ḅe mịẹsaye mị ẹrẹchị.

⁸ “Àrị ị̀ya tomonima chịn se ini koḅiriḅịa. Àrị ini ḍụa se ini mịẹḅakamaḅịa ini tatarị sime ḅara mị.

⁹ Àrị ini se sẹma ḅie galagalama chusam nwọ ḅe sọ, àrị ḅọlọ nyọma ḅie ini pa ị̀ se ḅiekoromaḅịa. Ini na inia awọma na ini ḍumoḅịa se gboloma soḅoḅịa.

¹⁰ Ijipt ḅie na Asiria ḅie na àrị ini ọkị inia sẹ ḅie ḅo koromaḅịa. À pịkị ini se Giledị ḅie na Lẹbanọn ḅie na koromaḅịa; ama mị ḅiemgba tomoni ḅeinḅịa.

¹¹ Ini inia ḅụfụka opu tọrụ mị saḅaḅọrọso sịkị, Ị̀rị̀, Nyanaḅọ Ḅe àrị amburama fomusinḅịa, Naịl tọrụ mị ḅie ḍian ma àrị samịnaḅịa. Ḅụdekichịẹma Asiria mị anị iderimaḅịa, opu Ijipt mị anịa kụrọ mị faḅịa.

¹² Àrị ị̀ya tomonima mịẹkụrọmaḅịa; ini ị̀ tẹkẹ se ị̀ ḅịpị pokiḅịa.” Nyanaḅọ Ḅe ori ọkwẹịnsam.