Zẹkaraịa 1 - Kịrịkẹnị Baịbụl

Nyanaḅọ Ḅe Oria Tomoni Ma Chịnmẹ Na Ini Vinpịkị Ọ̀ Damaḅo

¹ Darịọs ḅe Pesia da maịn karama kụra ḅụ, nine karama akalụ ḅie, anị Nyanaḅọ Ḅe mị oku mị se ịkịankoro Zẹkaraya, Bẹrẹkaya ḅe yi tọkụ, Ido yaḅe fịrịmaye-ẹ.

² Kụrọmamgba Nyanaḅọ Ḅe ḍuko Zẹkaraya ḅe pịrịmẹ na ò tomonima ḅe, “Ị̀rị̀ Nyanaḅọ Ḅe àrị opuma ịganị ọ́mịna ḅieju-a ḍapụma pịrịmẹ,

³ ọkụma mịọkụ, àrị ọ́ ḅẹaḅẹ, ‘Ó vinpịkị ị̀ damaḅo, Ị̀rị̀ sọ à pịkị ọ́ damaḅoḅịa.

⁴ Ómine ọ́mịna ḅieju-a ḍapụma simeọkụ simema. Ḅọlọsa sịkị ngịsị ịkịankoroapụma ị̀ya oku ma se ini pịrịmẹ na, ini ḅarị ngịsị sitịḅịnyana ḍumo kọnma. Ọkụma ini ị̀ pokikẹ, ini pịkị ị̀ ḅịpị pokikẹ.

⁵ Ọ́mịna ḅieju-a ḍapụma na, ini ịkịankoroapụma na, ini fị ḅọrọsam.

⁶ Ị̀ya fịrịnwẹngịapụ, ịkịankoroapụma ḅụ à ḅọrọ ḅẹrẹtọn ọ́mịna ḅieju-a ḍapụma pịrị, pịkị inia ḅerijinejinemẹ, ọkụma ini àrị se yechịnchịnkẹ, ini pịkị anị dekiḅo ini pịrị tọrụsiọrị ọrịrịmẹ. Anịsịkị re mị ini siḅụ pịkị se ḅereni ọkịmẹ na Ị̀rị̀ Kụrọmamgba Nyanaḅọ Ḅe, ini lagbẹịn fomuḅara à nwọse ini pịrịmẹ, anị à tọnmẹ na à mịẹḅịa nwọḅẹ ḅaraḅụ.’ ”

Ịkịankoro Zẹkaraya Ḅe Tẹmẹ Ḅụ Asụn Ma Ọrị Mẹ

⁷ Darịọs ḅe sẹ da ḅe mama kụra ḅụ, (Shibat akalụ) oyigbọrịye fịnjị karama akalụ mị ḅie, si-inein-a ḍin fịnjị ene ḅụ Nyanaḅọ Ḅe ḍin ḅie gbọrị oku se ị̀ pịrịmẹ tẹmẹ ḅụ.

⁸ À Nyanaḅọ Ḅe gbọrị enjẹlḅọ ọrịmẹ, pulo-pulo asụn ọ̀ nwọse nwẹngị aḅẹ. Matọl ejema sime pẹsịkiri mị ḅie ò ḅo dachịẹmẹ, se oria ọḅụju jịn asụn omi-ẹ—pulo-pulo aye na gwagwaye na pịkị ḅịaḅịaye na.

⁹ Àrị ò gbelamẹ, “Ị̀ nyanaḅọ mà asụnma, àrị che fie-ao?” Ọ̀ nwọ pẹkẹrẹmẹ, “Árị fieye à nwọ se ị́ ḍieḅịa.

¹⁰ Nyanaḅọ Ḅe àrị fịrịmamẹ na àrị mun iḅiọkụma sẹkiri mị ḍiki.”

¹¹ Àrị ḍuko enjẹlḅọ ḅe pịrịmẹ: “Wa nwẹngị sẹkiri mgba kelemasam, se wa ḍọkịḅo ọrịsam na, sẹkiri mgba ḅarachụaḅọ nyanaka ḅụ na pịkị jụmḅọ chukuḅie sime ḅaraḅụ anị omi-ẹ.”

¹² Anị enjẹlḅọ ḅe nwọḅẹye-ẹ, “Kụrọmamgba Nyanaḅọ, kụra-tesi-oyi-fịnjị ị́ nwọse ịganị Jerusalẹm na Juda opuamama na pịrịsam. Anị ọkịmun nde sịkị lasịkị re ị́ ḅo ḍikiḅụgerere nyana ini pịrịḅe?”

¹³ Nyanaḅọ Ḅe, ò kuḅiekụrọma pẹkẹrẹ ḅịpị se enjẹlḅọ ḅe pịrịmẹ,

¹⁴ se enjẹlḅọ ḅe ḍuko ị̀ pịrịmẹ, na à Kụrọmamgba Nyanaḅọ Ḅe ḍukoaye ma ḍuko wasa: “À gbun ḅẹlẹma na iḅi kuḅie na nyana Jerusalẹm pịrịmẹ ị̀ya fịafịa ama mị,

¹⁵ se à pịkị opuma ịganị nyana yawụma dein ḅụ sime amama pịrịmẹ. Anịatịḅị àrị ị̀ya ịganị ọlọchịẹma ị̀ya tomonima pịrịarị sịkị, arịa sẹma mịẹse ị̀ya tomonima tọrụsiọrịtẹịnmẹ.

¹⁶ Anịgose à pịkịma Jerusalẹm ḅosam, à ḅo ḍikiḅụgerere ḍiepakụma opuama mị pịrịḅịa. Ị̀ya Oputẹkẹwarị mị pịkịma ḅoḅịa, se opuama mị ini kpoto anị namaḅịa.”

¹⁷ Enjẹlḅọ ḅe pịkị ḍuko ị̀ pịrịmẹ, na à ḍuko wasa na “Kụrọmamgba Nyanaḅọ Ḅe nwọ ḅẹmẹ, na oria opuama mamgba àrị pịkị mịẹyeḅarasọ nyanaḅịa. Ọ̀ pịkị gbọrị sịkị se ḅarachụa Jerusalẹm mị pịrịḅịa se opuama mị se oriaye mịẹḅịa.”

Ịkịankoroḅọ Ḅe Maịn Karama Ọrị Mẹ: Ori Ịvalị Ọrị Mẹ

¹⁸ Jịn tẹmẹ ḅụ ọrịye ḅụ, inein-a owoi-nambulo tịḅị ịvalị à nwọ ọrịmẹ.

¹⁹ Ọkwẹịn ị̀ pịrịarị enjẹlḅọ ḅe à nwọ gbelamẹ, “Ma ịvalị ma, àrị che fie-ao?” Ọ̀ nwọ pẹkẹrẹmẹ, “Juda na Izrẹl na, Jerusalẹm apụma na galagalama tomonikiri mị ḅe kụrọ ma gose àrị chịẹmẹ.”

²⁰ Anịsịkị Nyanaḅọ Ḅe inein-a fịrịnwẹngịapụ na inia amana ma na, nwọse ị̀ ḍiemẹ.

²¹ À gbelamẹ, “Mịna owuapụma, ini ḅo chemịẹ-ẹ ḅo.?” Ọ̀ nwọ pẹkẹrẹmẹ, “Ini ḅo tọrụgbẹịnma, gbọtụma Juda ama mị kankọsịma, pịkị tomonima galagalama sẹma ḅalafama pịkị àrị sumagbin-e ḅomẹ.”