Taịtọs 2 - Kịrịkẹnị Baịbụl

Kọkọma Ḍieye

¹ Ọkụma karakara, ḍie gbẹịnye mị anị ị́ ḍieḅịaye-ẹ.

² Ḍuko sẹnịsa owuapụma pịrị na ini tọrụ gbẹlẹma, nemi nyana, se ḅụ ọlọ; ye ini karakaraye ḅụ sime inia ḅereni mị ḅụ.

³ Anị gbọrị ḅara ḅụ, pịkị ḍuko sẹnịsa eremeni ma pịrị na ini ḅụ osi ḍumo kọn-arị eremeni ḅara nwọse ye mịẹ Tamụnọ Ḅe ḅie. Ini nweni ḍukosimapụ nwọ sọ ma, pịkị omoniapụ sọ iru pịrị ma. Ini iḅiye nwọ ḍie,

⁴ mịẹse ini ye se eremeni ma ḍieḅịa ḅara, se ini inia deapụ ma na, inia awọma na nwọ ḅẹlẹma ḅịa ḅara,

⁵ ini inia ḅụ ọlọ se fịafịa ḍumo kọnḅịa ḅara, se ḅụiderima inia deapụ ma pịrị, pịkị warị ḍikiḍiki ḍin eremeni nwọ sọḅịa ḅara, mịẹse gbọrịḅọ sọnị Tamụnọ oku mị ḅụ siye ḍuko ẹka ḅara.

⁶ Anị gbọrị ḅara ḅụ, kụrọma ọkwẹịn asẹmẹnị ma pịrị na ini ḅụọlọ apụ nwọ sọ.

⁷ Ị́rị́ na mịnaḅụ na, yemamgba ḅụ daye mịẹḅịa ḅọ ị́ nwọ sọḅịa iḅi ḍumokọn ḅụ. Ị́ya yeḍie ḅụ gbụkụkụ ḍumokọn se pịkị ti ma.

⁸ Tomoni ineda siye ḍọkịḅo ẹka ọkwẹịn nwọse karakara ḅara se yeḍie, mịẹse ị́rị́ na tarakapụma ḅụgerereḅịa ḅara mịna ḅụ ini nyana se ḍukoḅịa siye ofori ḅara ḅụ.

⁹ Omoniapụma ini nyana apụma ḍukoarịye nwọ mịẹḅịa se yemamgba ḅụ inia ḅieḅẹlẹmaḅịa. Ini inia ḅịpị pẹkẹrẹma

¹⁰ anịkanịka inia ye nwọ furu ma. Anịnakaraka, ye ini ḍiepakụma na ini anị sịkịmamgba iḅi pịkị kuḅie se ḅụgbana gbẹịn apụ-ẹ, mịẹse ini iḅi ẹrẹ ọkịḅo Tamụnọ mịna Ḍụaḅọrọmaḅọ Ḅe ḍieye mị nwọ pịrịḅịa ḅara inia mịẹaye mamgba ḅụ.

¹¹ Anịatịḅị Tamụnọ Ḅe ọ̀ nyana nweni mgba pịrị ḍụaḅọrọma ḍikiḅụgerere mị ḍieḅelemasam.

¹² Anị ḍikiḅụgerere mị ye se wa ḍiemẹ na wa Tamụnọ kịkẹka ḍumo ḅụ ḅarasin pịkị tomonikiri mị ḍiki pụkọsoliarịye ma na, se ḅụọlọ ḍumo na, gbụkụkụ ḍumo na pịkị Tamụnọ kịkẹ ḍumo na nwọ kọn, mị tomonikiri mị ḅie,

¹³ wa ḅẹlẹmasa Ene mị nwọ koruarị sịkị, wa tọrụseḍikiye mị, mịna opu Tamụnọ pịkị ḍụaḅọrọmaḅọ Jizọs Kraịst Ḅe boma mị tolupakaḅịa sịkị.

¹⁴ Ori ọ̀ ḅụ se wa pịrịmẹ, sitịḅị mamgba ḅie wa ḍụapakụmaḅoḅịa ḅara se wa se fịafịa apụ na, sime ori kẹngẹ pịrị apụ na, pịkị iḅiye mịẹ mị gose kuḅie chịẹ-chịẹ-chịẹ apụ na nwọ mịẹḅịa ẹrẹchị.

¹⁵ Mayema nwọse yeḍie, pịkị ḅakama ị́ nyana kụrọ mị mgba nwọse kuḅie kụrọma ọkwẹịnkọn na, iḅikaye ḅụ ịganị ị́ na àrịapụma pịrị. Ḅereni se inia ḅie gbọrịḅọ sọnị ị́ ḍiki iderimama.