Romapụ 8 - Kịrịkẹnị Baịbụl

Tẹmẹ Ḅe Ḅie Ḍumo Mị

¹ Ḅaa ḅẹrẹsi ḅarị mịọkụ sime Kraịst Jizọs Ḅe na gbọrị ḅụ sime ḍumo kọn-arị apụma pịrịkẹ.

² Anịatịḅị mine ọkịḅo Kraịst Jizọs Ḅe na gbọrịye mịẹ Tẹmẹ Ḅe oloko mị, ị̀ fimasam si na fị na oloko mị ḅụ.

³ Oloko mị ineda mịẹkaye mị, tomoniḅọ simeḅara mị ḅe ịnyọ ofori mị gose, Tamụnọ Ḅe anị mịẹsam. Ọ̀ ḅẹrẹsi pẹlẹ se tomoni ḅie sime si mị pịrịmẹ, oria Tọkụ Ḅe nwọse fịrịma mị ḅụ, si ḅụ ḅein tomoniḅọ simeḅara kịkẹ oju ḅụ wẹrị ḅo ḅọ ḅe, se si mị nwọ dekisinḅịa ẹrẹchị.

⁴ Tamụnọ Ḅe mịn mị nwọ mịẹmẹ mịẹse Oloko mị ḅiarị karakara ayema mịna ḅie nwọ mịẹ ḅeinmaḅịa ọkụ, mine Tẹmẹ Ḅe ḅi ḍumo ḅara nwọ kọn-arị apụma, tomoni sime ḍumo ḅaraḅụkẹ.

⁵ Tomoni simeḅara mị ḍuko ini pịrị ḍumo ḅara nwọ kọn-arị apụma, inia kuḅie ma se tomoni simeḅara mị tọn ini pịrị ḅara nwọ mịẹmẹ. Tẹmẹ Ḅe ḍuko ini pịrị ḅara nwọse ḍumo kọn-arị apụma inia kuḅie ma Tẹmẹ Ḅe tọn ini pịrịye ma mịẹmẹ.

⁶ Ojumịnị mị ḅẹrẹtọn nweniḅọ pịrị mị anị fị ọkịḅoḅomẹ; Tẹmẹ Ḅe ḅẹrẹtọn nweniḅọ pịrị mị anị ḍumo na deinma na ọkịḅoḅomẹ.

⁷ Anịgose tomoniḅọ ḅe ḅo Tamụnọ Ḅe na tarakaḅọ nwọ sọmẹ ojumịnị mị ḅẹrẹtọn ọ̀ pịrịarị sịkị, anịatịḅị ori ineda Tamụnọ oloko mị ḍukoye mịẹkẹ, ọ̀ pịkị kọkọma ineda anị ḍukoye mịẹ ẹkẹ.

⁸ Ini nwọ inia ojumịnị ma ḅi ḅara se ḍumo kọn-arị apụma, ini ineda Tamụnọ Ḅe ḅụḅẹlẹye mịẹ ẹkẹ.

⁹ Ọkụma ómine ọ́mịna ojumịnị ma ḅi ḅara ọ́ nwọse ḍumo kọn ma, anịnakaraka, Tẹmẹ Ḅe ḅi ḅara ọ́ nwọse ḍumo kọn nemikase, Tamụnọ Tẹmẹ Ḅe kọkọma ọ́mịna ḅie angamẹ ḅẹḅẹ. Kraịst Tẹmẹ Ḅe nyanakaḅọ goyegoye, oria tomoniḅọkẹ.

¹⁰ Ọkụma Kraịst Ḅe ó ḅie angamẹ ḅẹḅẹ, ọ́mịna ojuma si mị gose fị-ẹ mun aḅẹ nwọ ḅẹ sọnị, Tẹmẹ Ḅe ò ḍumo se ọ́ pịrịḅịa anịatịḅị ini ómine seni Tamụnọ Ḅe na karakara ḅụ wẹrịsam.

¹¹ Nemikase, Tamụnọ Tẹmẹ Ḅe, fị ḅụ Jizọs Ḅe sịsẹma ḅọ ḅe ọ́mịna ḅie angamẹ ḅẹḅẹ, anịọkụma fị ḅụ Kraịst Ḅe sịsẹma ḅọ ḅe pịkịna ḍumo se ọ́mịna fịḅịa ojuma pịrịḅịa ọ́mịna ḅie sime oria Tẹmẹ Ḅe ḅụ.

¹² Anịẹrẹchị, ị̀ya mịnapụ, wa mịẹka mịẹka ḅara ḅụ simeye nyana waraḅẹ, ọkụma mịna ojumịnị mị ḅi ḅara nwọse ḍumo kọn mịkẹ.

¹³ Anịatịḅị ó nemikase ojumịnị ḅe ḍumo nwọ kọn-aḅẹ ḅẹḅẹ, ọ́ fịḅịa ọkụma ó nemikase Tẹmẹ Ḅe ḅụ ḅọrọ ọ́mịna simịẹmịẹayema ḅaamẹ ḅẹḅẹ ó ḍumoḅịa.

¹⁴ Tamụnọ Tẹmẹ Ḅe ateli se ḍiearị apụma, ini Tamụnọ owuapụ awọ-ẹ.

¹⁵ Anịatịḅị Tamụnọ Ḅe se ọ́ pịrị Tẹmẹ Ḅe ori ó se omoniapụ mịẹkẹ, ọ̀ pịkị ḅalafa se ọ́ pịrịkẹ, anịnakaraka, Tẹmẹ Ḅe ó se Tamụnọ awọ mịẹmẹ se Tẹmẹ Ḅe kụrọ ḅụ mị wa ḅọrọ oloku owu Tamụnọ Ḅe chịn-arịye-ẹ, “Ḍaḅọ! Ị̀ya Ḍaḅọ!”

¹⁶ Tamụnọ Tẹmẹ Ḅe ọ̀ ḅụ se mịna tẹmẹ ma na gboloma se ḍukopakụmamẹ na mine Tamụnọ awọ-ẹ.

¹⁷ Mine oria awọ-ẹ nwọ ḅẹ sịkị, wa ò se koroma oria tomonima pịrị ḅẹlẹma ma nwọ nyana ọkịḅịa, se pịkị Kraịst Ḅe na Tamụnọ Ḅe se kụrọma ọ́ pịrị ḅẹlẹma mị nyana ọkịḅịa, anịatịḅị wa nemikase Kraịst Ḅe ọrị tọrụsiọrị ma nwọ ḍiaọkịmẹ ḅẹḅẹ, wa pịkịna oria boma mị sọ nwọ ḍiaọkịḅịa.

Tọrọkọju Ḅoḅịa Boma Mị

¹⁸ À koromamẹ na wa mịọkụ ọrịarị tọrụsiọrị mị se ini ḍieḅelema se wa pịrịḅịa boma mị na otomaḅịa ọkụ ngịsị ofori-ẹ.

¹⁹ Tẹmẹaye mamgba opuma kuḅie chịẹ tarịka ḅụ koruaḅẹ Tamụnọ Ḅe oria owuapụ awọma nwọ ḍieḅelemaḅịa sịkị.

²⁰ Anịatịḅị tẹmẹye ma yeḅụsọkẹ, anị tọn wẹrị ḅaraḅụkẹ, ọkụma Tamụnọ Ḅe tọn ḅara ḅụ-ẹ, anị sọnị kuḅie pa tọn aḅẹ

²¹ na tẹmẹayema na mịnaḅụ na tọrụseḍikimẹ na gbọrị ene laḅịa sịkị ini ḅụrụḅụrụ ye mị ḅe omoni ḅara ḅie àrị ḍụaḅọrọmaḅịa, se àrị ḅo Tamụnọ Ḅe awọma ḅe bomasa ngẹrị ḅụnyana mị nwọ ḍiaọkịḅịa.

²² Anịatịḅị wa nemimẹ na ọkịḅo mị sịkị mị la, bebe tẹmẹaye mamgba yiḅịa ẹrẹchị jikearị eremeniḅọ, ḅụọyị ḅụ ḅiede ọkụ nwọse ḅiedeaḅẹ.

²³ Ọkụma tẹmẹayema kẹngẹ ḅiedekẹ, mine Tẹmẹ Ḅe nyanasa apụma anị Tamụnọ ḍiepịrịayema ḅụ tatarịye mị nyanasa apụma sọnị wa ḅiedemẹ mịna ḅie ḅụ, wa Tamụnọ Ḅe koruarị sịkị; ọ̀ wa se oria owuapụ awọ mịẹ se gbọtụḅara wa finmaḅịa ọkụ.

²⁴ Anịatịḅị tọrụseḍikiye ḅụ ini wẹrị wa ḍụaḅọrọmamẹ; ọkụma wa tọrụseḍikiye mị nwọ ọrịmẹ ḅẹḅẹ, anịọkụma anị ḅarị tọrụseḍikiyekẹ. Nweniḅọ anịatịḅị ọrịsaye nwọse pa tọrụseḍikiye mịẹ ẹkẹ.

²⁵ Ọkụma wa ọrịkaye wa tọrụse nwọ ḍikimẹ ḅẹḅẹ, wa inema anị koruḅịa.

²⁶ Anị gbọrị ḅara mị ḅụ Tẹmẹ Ḅe ḅomẹ ḅarachụa wa pịrịḅịa ẹrẹchị, mịna ḅụ ịnyọ oforikaye gose. Anịatịḅị wa tẹkẹ na gbẹịn ḅara wa nwọ nemikẹ. Tẹmẹ Ḅe na mịnaḅụ na mine gose Tamụnọ Ḅe na ọkwẹịnmaḅẹ, ọkwẹịn ineda ḍuko ẹka ḅara ḅụ ḅiedeaḅẹ.

²⁷ Se Tamụnọ Ḅe, tomoni-a kuḅiemgbọlụma ọrị ḅọ ḅe, Tẹmẹ Ḅe koromarịye nemimẹ; anịatịḅị Tẹmẹ Ḅe mine gose Tamụnọ Ḅe na ọkwẹịnmaḅẹ na mine Tamụnọ-a tomoni-ẹ nwọ ḅẹye gose, ọ̀ pịkị ḅi ḅara mị ḅụ.

²⁸ Wa nemimẹ na Tamụnọ Ḅe ye mamgba se iḅi fịrịnwẹngị ọ̀ ḅẹlẹma apụma pịrịpịrịmẹ, ori ọ̀ tọn ḅara ḅụ chịn ọkịsa apụma.

²⁹ Tamụnọ Ḅe sẹlẹọkịsa apụma, ori ini se sikima koromasam, ini oria Tọkụ Ḅe simeọkụ nwọ sime, mịẹse Tọkụ Ḅe tọn-a mịnapụ ogboku tatarị kiri nwọ daḅịa ḅara.

³⁰ Anị Tamụnọ Ḅe ò sikima koromasa apụma nwọ chịn ọkụ mị-ẹ; se ọ̀ pịkị ọ̀ chịnsa apụma mịẹse iniḅo ori na karakaramẹ se ọ̀ pịkị ini na oria boma mị nwọ ḍiamẹ.

Jizọs Kraịst Ḅe Ḅie Sime Tamụnọ Ḅẹlẹma

³¹ Maye mamgba ḅụ, cheye wa ineda nwọ ḍuko ḅe? Tamụnọ Ḅe nemikase mịna ḅụ simemẹ ḅẹ ọkụma, tụḅọ ineda mine na ye mịẹ ḅe?

³² Ori oria Tọkụ Ḅe pembe sọnị nwọse ọ̀ ḅụ wẹrịma ka se ò seni nweni mgba pịrị sịkị! Ori oria Tọkụ Ḅe nwọse wa pịrịmẹ anịọkụma ò ḅereni se ye mamgba se papa wa pịrị ẹka?

³³ Tụḅọ ḅẹrẹ se Tamụnọ Ḅe sẹlẹọkịsa tomonima tịḅị gbana ḅe? Tamụnọ Ḅe na mịnaḅụ na ḍukopakụmamẹ na ḅẹrẹ inia ḅarasi-ẹkẹ!

³⁴ Tụḅọ, anịọkụma, ḅẹrẹsi pẹlẹ ini pịrị ḅe? Kraịst Jizọs Ḅe kẹ, anị fị ḅọ ḅe, anịkanịka, nwọ ḅẹ na ini fị ḅụ sịsẹma ḅọ ḅe, se Tamụnọ Ḅe amaḅara anga ḅụ sime waraḅẹ, Ò mine gose Tamụnọ Ḅe na ọkwẹịnmaḅẹ!

³⁵ Tụḅọ, anịọkụma, Kraịst Ḅe ḅẹlẹma ḅụ wa pusikima ḅe? Ḅụfụka ineda anị mịẹ ḅe, anịkanịka ḅụkụrọ, anịkanịka tọrụsiọrị, anịkanịka fịyepụkọtarị, anịkanịka igwein, anịkanịka ye se nweni lamaḅịaye, anịkanịka fị?

³⁶ Fịafịa ḍiri mị ḍuko ḅara ḅụ, “Ị́ gose ene mamgba wa fị ḅie omi-ẹ; ḅaaḅịa anana mịẹ ọkụ ini nwọse wa mịẹ-aḅẹ.”

³⁷ Ẹn-ẹn, mayema ḅie mgba wa karasa ọmụḅaraiḅi nwọ nyana waraḅẹ wa ḅẹlẹma ḅọ ḅe ḅụ!

³⁸ Anịatịḅị à nemi kpaịnmamẹ na ineda wa pusikimaḅịaye ofori-ẹ Oria ḅẹlẹma ḅụ: fị anịkanịka ḍumo, enjẹlapụ anịkanịka soḅie sime jịn ḅẹrẹtọn apụ, anịkanịka mịn sịkị ḅe kụrọ-aye, anịkanịka ḅoḅịa sịkị mị ḅe-aye sọnị;

³⁹ ọgọnọju sime tomonikiri mị sọnị, pịkị chukuju sime tomonikiri mị sọnị, tẹmẹayema ḅie mgba ineda Tamụnọ Ḅe ḅẹlẹma ḅụ wa pusikimaḅịaye ofori-ẹ, Kraịst Jizọs, wa Nyanaḅọ Ḅe ḅụ ḅọrọ sime wa pịrị ḅẹlẹma mị.