Romapụ 6 - Kịrịkẹnị Baịbụl

Fị Si Pịrị Ọkụma Kraịst Ḅe Na Gbọrịḅụ Ḅụ Ḍumo

¹ Anịọkụma, cheye wa nwọ ḍuko ḅe? Wa pa si ḅie simemamun ḅe, mịẹse Tamụnọ Ḅe ḍikiḅụgerere mị sumamunḅịa ḅara?

² Ngịsị ọkọ paka ẹkẹ! Wa fị si pịrịsam nde wa ineda pịkị anịa ḅie ḍumomamunḅịa ọkụ?

³ Anịatịḅị pikipikiye ofori-ẹ mịn mị ó nemimẹ: ini mengi se wa sara se Kraịst Jizọs Ḅe na gbọrịye mịẹmẹ oria fị ḅie sọnị.

⁴ Mịna mengi sara mị ḅụ, anịọkụma ini wa se chụa ori na ḍipisam, wa oria fị ḅụ ye ḍia ọkịsam, mịẹse ini nwọ fị ḅụ Kraịst Ḅe sịsẹma ḅara Ḍaḅọ ḅe boma nyana kụrọ mị ḅụ, anị mine sọ pịkị ịwọ ḍumo nwọ kọnḅịa ọkụ-ẹ.

⁵ Anịatịḅị wa nemikase ọ̀ ḅụ sọ se ori na fịmẹ ḅẹḅẹ anị gbọrị ḅara mị wa pịkị nwọse ọ̀ ḅụ sọ ori na fị ḅụ sịsẹ se ḍumoḅịa.

⁶ Wa pịkị mịn mị nwọ nemi waraḅẹ; na mine ḅe olomu sime ḅara mị anị nwọse Kraịst Ḅe ḅụ chụa mgbẹsẹchịn ọgọnọ ḅakụḅaasam, mịẹse si mị ḅe ojumịnị mị fịḅịa ẹrẹchị, mịẹse wa ḅarị omoni sọ si pịrị ẹka ọkụ.

⁷ Anịatịḅị tomoniḅọ fị sịkị si ḅarị iniḅọ ḅụ kụrọ nyanakẹ.

⁸ Wa nemikase Kraịst Ḅe na fịmẹ ḅẹḅẹ, wa ḅerenimẹ na wa pịkị ori na ḍumoḅịa.

⁹ Anịatịḅị wa nemimẹ na ini fị ḅụ Kraịst Ḅe nwọ sịsẹmasam se ọ̀ ḅarị fị ẹkẹ—fị ḅarị ọ̀ ḅụ kụrọ nyanakẹ.

¹⁰ Ọ̀ kọn fị mị ọ̀ fị si pịrịmẹ. Anị gbọrị sịkị mị kẹngẹ-ẹ, se mịọkụ ò ḍumo wara ye mị, ò ḍumo Tamụnọ Ḅe pịrịmẹ.

¹¹ Anị gbọrị ḅara ḅụ fịsapụ ḅara ọ́ nwọse ọ́ ḅụma kịẹnma si mị gbolomaye ḅụ, ọkụma Jizọs Kraịst Ḅe ḅụ ọ́ ḅọrọ Tamụnọ Ḅe na gbọrịye mịẹ ḍumo nwọ kọn.

¹² Si ḅarị ḅẹrẹtọn ọ́mịna fịḅịa ojuma pịrị ma, ó ḅofa ọ́mịna fịḅịa ojuma ḅiarịaye ma nwọ mịẹ.

¹³ Ọ́ pịkị ọ́mịna ḅụ ma ḅụ gbọrị pẹkẹrẹ sọ se si mị chuku koroma ma, ó ḅofa anị se sitịḅịnyana fịrị nwọ nwẹngị. Anịnakaraka, ómine ọ́mịna ḅụ ma se Tamụnọ Ḅe pịrị, ini fị ḅụ ọkị ḅọrọma ḅo ḍumo ḅie chusa tomoni ḅara ḅụ, se ọ́mịna bebe ḍumo mị mgba se sarakoroma ọ̀ pịrị se ori anị se karakaramịẹmịẹye fịrị nwọ nwẹngị.

¹⁴ Ye si ḅẹrẹtọn ọ́ pịrị ma: anịatịḅị oloko mị chuku ḅie ómine ofori-ẹ, ọkụma Tamụnọ Ḅe ḍikiḅụgerere mị chuku ḅie-ẹ.

Karakaramịẹmịẹye Mị Ḅe Omoni

¹⁵ Anịọkụma, cheye? Wa simịẹ ḅe, wa oloko mị chuku ḅie simeka se Tamụnọ Ḅe ḍikiḅụgerere mị chuku ḅie sime ye ẹrẹchị? Anị gose ọkọ pakaḅịaye ofori-ẹ!

¹⁶ Pikipikiye ofori-ẹ, ó nemimẹ na ómine omoni ḅara nwọse ọ́mịna ḅụ ma seni gbọrịḅọ nwọ pịrị na ómine ò ḍukoye mịẹḅịa nwọ ḅẹ sịkị, ò ḍukoye ọ̀ nwọ mịẹḅịa ọ́ nwọ ḅẹ ḅọ ḅe, ọ́ nyanaḅọ nwọ sọsam, sosi si-ẹ, anị mị ọkịḅoḅịaye anị fị-ẹ. Anịkanịka ḍukoye mịẹ, anị mị ọkịḅoḅịaye anị Tamụnọ na karakara ḅụ sime-ẹ.

¹⁷ Ọkụma mịẹḅaka sime Tamụnọ Ḅe pịrị! Anịatịḅị gbọrị sịkị ómine omoni sọ si pịrịmẹ nwọ ḅẹ sọnị, ini se ó ḍieye ma ḅụ ọ́ ḍọkịḅo kọkọmaye ma, ọ́mịna kuḅie mgba ọ́ nwọse ḅịpịpoki ḅara se àrị daọkịsam.

¹⁸ Si ḅụ ini ó finmamẹ, se ó vinpịkịḅo karakaraye mị ḅe omoni nwọ sọsam.

¹⁹ À tomoni ọkwẹịn ọkwẹịn ḅara se ọkwẹịn kọn aḅẹ, ómine ḅe ịnyọ nyanaka mị gose yekaịnḅo ḅụ. Gbọrị sịkị ọ́ gbọtụḅara ọ́mịnaḅụ ma seni omoni mịẹ ịlọlịamịẹmịẹye na sitịḅị na pịrịmẹ, sitịḅị mịẹmịẹaye mịẹḅịa ẹrẹchị. Anịẹrẹchị mịọkụ ọ́ gbọtụḅara ọ́ ḅụ ma se omoni mịẹ karakaraye mị pịrị fịafịa mịẹmịẹaye gose.

²⁰ Ómine omoni sọ si pịrị sịkị, karakaramịẹmịẹye ḅụ ómine ọ́mịnaḅụ ma sinmẹ.

²¹ Che sọye ọ́ nwọ nyana mịọkụ ọ́mịna ḅụgereremaye ma ọ́ nwọ mịẹarị sịkị? Àrịye ma ọkịḅoḅoye anị fị-ẹ!

²² Ọkụma mịọkụ ini si ḅụ ó fimasam se ó ḅo Tamụnọ Ḅe omoniapụ nwọ sọsam; anịḅe sọye anị ọ́mịna ḍumo nwọse ḅeinma ḍie Tamụnọ Ḅe pịrị mị-ẹ, anị ọkịḅoḅịaye anị simegbaso ḍumo-ẹ.

²³ Anịatịḅị si mị ḅe gbẹịnye anị—fị-ẹ; ọkụma igbikigbẹịnka Tamụnọ ḍiepịrịye mị anị simegbaso ḍumo-ẹ, Kraịst Jizọs wa Nyanaḅọ Ḅe na gbọrịye mịẹ ḅụ.