Romapụ 3 - Kịrịkẹnị Baịbụl

¹ Anịọkụma Juapụma Jịnsẹapụma ḅụ iḅitẹịn anga omi? Anịkanịka ḅụpẹlẹ mị nyanaḅo yela sọye omi?

² Iḅiọkụ ḅakamẹ, ḅọkọ ḅọkọ ḅụ! Tatarịye, Tamụnọ Ḅe oria oku mị se Juapụma ḅara chụamẹ.

³ Cheye paka ḅe inia ḅụ da apụ nemikase kuḅie se ḅụgbanagbẹịn apụ nwọ sọka ọkụma? Anị ọkọ pakamẹ nwọ ḅẹ ọkụma anị fie-ao na Tamụnọ Ḅe sọnị kuḅie se ḅụgbanagbẹịnḅọka?

⁴ Pikipikiye ofori-ẹ na ọkọkẹ! Tamụnọ Ḅe kọkọmaye ḍuko ḅọ-ẹ, ḅẹḅọ ḅẹḅọ iruo ḅọ-ẹ nwọ ḅẹ sọnị. Fịafịaḍiri mị ḍuko ḅara ḅụ, “Ị́ karakaramẹ anị nwọ ḍiepakụmaḅịa ị́ ọkwẹịn sịkị; ị́ ḅẹrẹiḅi ọkịḅịa ini ḅẹrẹkọn ị́ pịrịḅịa sịkị.”

⁵ Ọkụma anị nde nde sime ḅe, mịna karakaraka mịẹmịẹaye ma ḅelema Tamụnọ Ḅe karakaramịẹmịẹye mị nwọ ḍiepakụmatẹịn ọkụma? Cheye wa nwọ ḍuko ḅe? Tamụnọ Ḅe ò siye mịẹmẹ wa nwọ ḅẹ ḅe, ò fomuḅara se wa pịrị ọkụma? (Tomoni ọkwẹịn ọkwẹịn ḅara mịnyọ à nwọse ọkwẹịnmẹ.)

⁶ Anị ọkọ pakaḅịa ọkụ ofori-ẹ! Tamụnọ Ḅe nemikase karakara ḅẹrẹkọnka ḅọ ọkụma, nde ori ineda ḅẹrẹkọn tomonikiri mị pịrịḅịa ọkụ?

⁷ Anị nde nde paka ḅe, ị̀ya mịẹkuramaka mị nemikase fịrịnwẹngị Tamụnọ boma nwọ pịrị se oria kọkọmaye mị nwọ ḍieḅelematẹịn ọkụma? Nde à pa ḅẹrẹsi nwọ nyanamamunḅịa ye ị̀rị̀ siḅọ-ẹ nwọ ḅẹ ḅara ḅụ?

⁸ Nde anịọkụma wa gose nwọ ḅẹ ẹkaye, “Ye wa siye mịẹmamun iḅiye ḅoḅịa ḅara?” Da apụ kọkọma ị̀ wọlọsam ḅẹrẹ se ị̀ pụnụma ḅụ, na ị̀rị̀ ọkọ ḅẹmẹ! Ini ḅẹrẹsi nyanaḅịa, anị ini gbẹịn ḅara ḅụ.

Karakara Tomoniḅọ Ofori-ẹ

⁹ Anịọkụma iḅimẹ, mine Juapụma, wa iḅitẹịn Jịnsẹapụma nẹngị ḅara omi? Ngịsị ọkọ simeye ofori-ẹ! À ḍiepakụmasam na Juapụma na Jịnsẹapụ mamgba na gbọrị ḅara mị nwọse si mị kụrọ chuku ḅie omi-ẹ.

¹⁰ Fịafịaḍiri ma ḍuko ọkụ mị ḅụ: “Karakara gbọrịḅọ sọ ofori-ẹ,

¹¹ ye kaịnḅo gbọrịḅọ sọ ofori-ẹ, anịkanịka Tamụnọ Ḅe tẹkẹarị gbọrịḅọ sọ ofori-ẹ.

¹² Tomoni mamgba Tamụnọ Ḅe ḅụ vinpịkị sosam; inimgba nwẹngị irimasam gbọrịḅọ sọnị karakaraye mịẹkẹ, gbọrịḅọ kẹngẹ sọnị.

¹³ Inia pụkọ ma finji iḍupu ọkụ simemẹ; sitịḅị-iruoaye inia ḅịpịḅie-a ḅẹlẹ ma ḅụ ḅeinmẹ, pịkịna nweni ḅaaḅịa ẹrẹmapụkọ oruwu ịlakpọ ḅara se inia ḅịpị-a pẹkẹrẹ ma ḅie sara pakaḅomẹ,

¹⁴ inia ḅịpị ma ḅie akụ gọlị ọkwẹịn opuma ḅakamẹ.

¹⁵ Ye se nweni lama na ḅaa na ḅụ ini ọbịrịmẹ;

¹⁶ ini yekankọsịma na tọrụsiọrịma mịẹaye na nwọ mịẹ koromaḅịa ini mun nyọ goyegoye ḅụ.

¹⁷ Deinma ateli mị ma ini nemikẹ,

¹⁸ ma ini pịkị Tamụnọ ḍikiḅalafaḅịa ọkụ ḍawọ nemikẹ.”

¹⁹ Mịọkụ wa nemimẹ na Oloko mị ḍukoye goyegoye anị sime Oloko mị chuku ḅie sime apụma nwọ pịrịmẹ, mịẹse kikichụa tomoni nyana inia ḅụ ḍuko fimaḅịaye nwọ pịrị, se bebe tomonikiri mị ọkịḅo Tamụnọ ḅẹrẹkọn ḅie ḅụ chuḅịa ye gose.

²⁰ Anịatịḅị Tamụnọ Ḅe tọrụkuḅu ini karakaraḅọ ḅara se kịẹnma ḅọ ofori-ẹ, Oloko mị ḅiye nwọ mịẹ ḅụ. Oloko mị mịẹarịye anị mịẹse tomoniḅọ ḅe nemi, na ò si mịẹsam.

Tamụnọ Ḅe Tomoni Ma Mịẹse Ini Ori Na Karakara Ọkụ Mị

²¹ Ọkụma mịọkụ Tamụnọ Ḅe mịẹse tomoni ori na karakaraḅịa ọkụ mị ini nwọ mịẹḅelemasam, ọkụma anị oloko na gbolomakẹ. Moziz Oloko mị na ịkịankoroapụma na onyechịẹ anị pịrịmẹ nwọ ḅẹ sọnị.

²² Tamụnọ Ḅe tomoni mịẹse iniḅo karakaramẹ ini Jizọs Kraịst Ḅe ḅụ nyana ḅereni mị gose. Tamụnọ Ḅe mịn mị nwọse Kraịst Ḅe ḅereni apụ mamgba nwọ pịrịmẹ, anịatịḅị kịrịye ngịsị ofori-ẹ:

²³ tomoni mamgba si mịẹsam, se Tamụnọ Ḅe ḍụaḅọrọma mị ḅụ opuma sasamẹ.

²⁴ Ọkụma Tamụnọ Ḅe se papa ḍie wa pịrị ḍikiḅụgerere mị ḅụ, inimgba Jizọs Kraịst Ḅe ḅụ ḅọrọ ori na karakarasam, anị ini finma ḅọ ḅe.

²⁵ Tamụnọ Ḅe ò se pịrịpakụmamẹ mịẹse oria ḅụse agbamịẹ fị mị ḅụ ọ̀ ḅọrọ tomoni mịẹ sima ḅụ ḅarasin ini pịrịḅịa ḅọ nwọ sọḅịa ọkụ, ini ọ̀ ḅụ nyanaḅịa ḅereni mị ḅụ. Tamụnọ Ḅe mịn mị nwọ mịẹmẹ oria karakara mị nwọ ḍiepakụmaḅịa ẹrẹchị. Ḅọrọsa sịkị mị ḅụ ori inema se, tomoni mịẹ sima ḍikitọrụsinmẹ.

²⁶ Ọkụma mịọkụ, tomoni mịẹ sima ọ̀ ḅarị ọkọ se àrị ḍikitọrụsinkẹ se oria karakara mị nwọ ḍiepakụmaḅịa ẹrẹchị. Mịn ḅara mị ḅụ Tamụnọ Ḅe ọ̀ ḅụ ḍiepakụmaḅịa na ọ̀ karakaramẹ, na ọ̀ pịkị Jizọs Ḅe ḅereniḅọ goyegoye mịẹse iniḅọ karakaraḅọ sọsọmẹ.

²⁷ Anịọkụma, nde wa ineda se ḅụbomaḅịaye? Gbọrịye sọ ofori-ẹ! Nde mịn mị gose ọkọ pakaye? Wa Oloko mị ḅịpịpokimẹ, anị? Ẹn-ẹn! Ọkụma na wa ḅerenimẹ nwọ ḅẹye ẹrẹchị-ẹ.

²⁸ Anịatịḅị wa ḍukopẹlẹmẹ na ini tomoniḅọ mịẹse ò ḅo Tamụnọ na karakara mị ḅereni kẹngẹ ḅụ-ẹ, iniḅọ Oloko mị ḍukoye mịẹmẹ nwọ ḅẹye gosekẹ.

²⁹ Anịkanịka Tamụnọ Ḅe Juapụma kẹngẹ Tamụnọ? Jịnsẹapụma ori inia Tamụnọka? Ye sime ḅara ḅụ, ori inia Tamụnọ-ẹ.

³⁰ Tamụnọ Ḅe gbọrịḅọ-ẹ, ọ̀ mịẹse Juapụma ḅereni ḅụ ḅọrọ ori na karakaraḅịa, Jịnsẹapụma sọnị inia ḅereni ḅụ ọ̀ ḅọrọ ini na karakaraḅịa.

³¹ Anịọkụma anị fie-ao na wa Oloko mị ḅụ ḅarasin-ao mịn ḅereni mị gose? Ẹn-ẹn, ngịsị ọkọ pakakẹ, anịnakaraka, wa kapụma Oloko mị ọlọmẹ.