Romapụ 2 - Kịrịkẹnị Baịbụl

Tamụnọ Ḅẹrẹkọn

¹ Ị̀ya ikiaḅọ, ị́rị́ ị́ ḅẹrẹkọn jịn apụ pịrịpịrị? Ị́ ngịsị ḅụḍụaye nyanakẹ, ị́ la-ọkụ la-ọkụ sọnị. Anịatịḅị ị́ ḅẹrẹkọn jịn apụ pịrị se ini mịẹ gbọrịye ma nwọ mịẹarị sịkị, ị́ ḅẹrẹsi pẹlẹ ị́ ḅụ pịrịsam.

² Wa nemimẹ na Tamụnọ Ḅe ọ̀ karakaramẹ ọ̀ ḅẹrẹkọn ọkọsimeye ma mịẹapụ pịrịarị sịkị.

³ Ọkụma ị́rị́, ị̀ nikio ḅe na mịnaḅụ na mayema nwọ mịẹ-aḅẹ, ị́ gose ḅẹrẹsi pẹlẹ jịn apụ pịrịarịye ma! Ị́ koroma ḅara Tamụnọ ḅẹrẹkọn mị ị́ gbarị ḅe?

⁴ Anịkanịka, sosi ị́ oria opu iḅimịẹ mị nwọ ḍikisimamẹ, oria yeḍikitọrụsin mị na ye inema mị na. Pikipikiye ofori-ẹ, ị́ nemimẹ na Tamụnọ Ḅe ori iḅi mịẹmịẹmẹ; anịatịḅị ò ḅimẹ ọ̀ ḅụkụrọma ị́ mịẹse ị́ siḅụ vinpịkị.

⁵ Ọkụma ị́ kụrọ kuḅiemgbọlụ nyanamẹ pịkị ininachịnmẹ. Anịọkụma, ị́ mịẹ-aḅẹ ị́ya fomuḅara mị ḍụḅatẹịn Tamụnọ Ḅe oria ịganị na karakara ḅẹrẹkọn ene mị nwọ ḍieḅelemaḅịa sịkị.

⁶ Anịatịḅị Tamụnọ Ḅe ọ̀ gbẹịnye se tomoniḅọ goyegoye nwọ pịrịḅịa iniḅọ mịẹye sime ḅara ḅụ.

⁷ Da tomoni iḅi nwọ mịẹmamun-aḅẹ, se boma na osi na ḍọkịaḅẹ, pịkị simegbaso ḍumo na; Tamụnọ Ḅe simegbaso ḍumo nwọse ini pịrịḅịa.

⁸ Ísí-a tomonima ngẹrịfị ḍọkịapụ-ẹ, se karakaraye mị sịkịmẹ, kurakaye mị nwọ ḍukonwẹngịaḅẹ, inia ọgọnọ Tamụnọ Ḅe ḅẹrẹḅuosọ ḅụ oria opu ịganị se saraḅịa.

⁹ Tọrụsiọrị na ḅụakụ na sime siye mịẹapụ mamgba pịrịḅịa, Juapụma tatarị-ẹ, anịsịkị anị Jịnsẹapụma sọnị nwọ laḅịa.

¹⁰ Ọkụma Tamụnọ Ḅe boma na osi na, pịkị deinma na nwọse iḅiye mịẹapụ ma pịrịḅịa, Juapụma tatarị-ẹ, pịkị Jịnsẹapụma sọnị.

¹¹ Anịatịḅị Tamụnọ Ḅe gbọrị ḅara nwọse ḅẹrẹkọn ḅọḅọ nwọ pịrịḅịa tọrụḍikika ḅụ.

¹² Jịnsẹapụma ini Moziz Oloko mị nwọ nyanakẹ, ini simịẹ se famẹ; Oloko mị sikima anga pịrị ḅụ. Juapụma Oloko mị nwọ nyanamẹ; ini si mịẹmẹ se ini Oloko mị ḍiki ḅẹrẹkọn ini pịrịmẹ.

¹³ Anịatịḅị Oloko mị nwọ na mị ḅụ tomoni ḅọrọ Tamụnọ Ḅe na karakara ḅụ simekẹ, ọkụma Oloko mị tọnye mị nwọ mịẹ mị ḅụ-ẹ.

¹⁴ Jịnsẹapụma ini Oloko mị nyanakẹ, ọkụma ini inia kuḅie se Oloko mị ḍukoye nwọ mịẹ sịkị mịẹ sịkị àrị inia oloko nwọ sọmẹ, maa ini Oloko mị nyanakẹ nwọ ḅẹ sọnị.

¹⁵ Inia yemịẹḅara ḍiepakụmamẹ na Oloko mị tọnye mị inia kuḅie gịẹịn waraḅẹ. Inia yemịẹḅara mị ḍiepakụmamẹ na mịn mị kọkọmaye-ẹ, inia koroma ma nwọ dasịkị ḅẹrẹkọn inia ḅara sima pịkị dasịkị ḅụ ḅẹrẹkọn inia ḅara iḅimarị sịkị.

¹⁶ Anị ḅụ, à ḍukoarị sịkị Iḅi Ḅẹrẹ mị sime ḅara, mịn ḅara mị anị nwọ simeḅịa anị Ene mị ḅie, Tamụnọ Ḅe Jizọs Kraịst Ḅe ḅụ ḅọrọ ḅẹrẹkọn tomoni-a ḅie ḅọị sime koroma mamgba pịrịḅịa sịkị mị.

Juapụ Ma Na Oloko Mị Na

¹⁷ Ị́rị́ kwanị-a? Juḅọ-ẹ ị́ nwọse ị́ ḅụ chịnmẹ, ị́ kuḅie se Oloko mị ḅụ gbanamẹ, se Tamụnọ Ḅe gbolomaye ḅụ ḅụbomamẹ;

¹⁸ Tamụnọ Ḅe ḅi na mịẹ nwọ ḅẹye mị ị́ nemimẹ, Oloko mị ḅụ ị́ ḅọrọ karakaraye mị nwọ sẹlẹḅịa ọkụ ḍawọḅosam.

¹⁹ Ị́ nemi kpaịnmamẹ na ị́rị́ ateli se tọrụmgbọlụpụn apụma ḍiearịḅọ-ẹ, enekuḅu sọ kanakana ḅie sime apụma pịrịḅọ-ẹ,

²⁰ ye ḍuko ḍuko tịḅịḅie karakapụ ma dagbụkụkụmarịḅọ, pịkị yese yenemikapụ ḍiearịḅọ. Ị́ ḅereni ọkịmẹ na karakaraye ḅụ Oloko mị ḅie simeayema ị́ iḅiọkụma àrị ḍawọ nemisam.

²¹ Ị́ ye se jịn apụ ḍiemẹ—nde mịẹse ị́ ye se ị́ ḅụ ḍieka ḅara? Ị́ Tamụnọ ḅẹrẹ ḍukomẹ na, “Furu ma,”—ọkụma ị́rị́ ị́ furu-ao?

²² Ị́ nwọ ḅẹmẹ, “Sẹfị ma”—ọkụma ị́rị́ ị́ sẹfị-ao? Ị́ oru tẹkẹ ḍikisimamẹ—ọkụma ị́ oruwarị ma ḅie ye furu-ao?

²³ Ị́ bomamẹ na ị́ Tamụnọ oloko nwọ nemi waraḅẹ—ọkụma ị́ ḅụgerere se Tamụnọ Ḅe tọrụ chụa-ao, oria oloko mị nwọ kan ḅụ?

²⁴ Fịafịa ḍiri mị nwọ ḅẹmẹ, “Ómine Juapụma gose, ini Jịnsẹapụma Tamụnọ Ḅe ḍukosimaye-ẹ.”

²⁵ Ị́ nemikase Oloko mị ḍukoye mịẹmẹ ḅẹḅẹ, ị́ya ḅụpẹlẹ mị yelaye-ẹ, ọkụma ị́ nemikase Oloko mị ḍukoye mịẹkẹ ḅẹḅẹ, mgbọkụ ị́ ḅụ sọnị ị́ pẹlẹka iḅitẹịnmẹ.

²⁶ Jịnsẹḅọ, se ḅụpẹlẹka ḅọ ḅe nemikase oloko mị ḍukoye mịẹmẹ nwọ ḅẹ ọkụma, Tamụnọ Ḅe ọ̀ ḅụpẹlẹ ḅọ ḅara nwọse ọ̀ kịẹnma ẹka?

²⁷ Anị-ẹ nwọ ḅẹ sịkị, ómine Juapụma, Jịnsẹapụma ḅẹrẹsi pẹlẹ ọ́ pịrịḅịa, anịatịḅị ómine Oloko mị kanmẹ, anị gịẹịn koroma ọ́ pịrịmẹ, ọ́ pịkị ḅụpẹlẹmẹ nwọ ḅẹ sọnị, ini Oloko mị ḍukoye nwọ mịẹmẹ, ini ojumịnị ḅụpẹlẹkẹ nwọ ḅẹ sọnị.

²⁸ Ye ḍikiḍikiḅara ḍiki ọkụma, tụḅọ jokoma Juḅọ, kọkọma ḅụpẹlẹsa ḅọ? Ori ọgọnọ ḍikitọrụ ḅụ Juḅọ ḅe, anị ojumịnị ḅụ ḅụpẹlẹ ḅọ ḅe, jokoma Juḅọ ḅe orikẹ.

²⁹ Anịnakaraka, jokoma Juḅọ ḅe anị ḅieju ḅụ Juḅọ ḅe-ẹ, mịn mị fiearịye anị kuḅie ḅụ ḅụpẹlẹsa ḅọ ḅe-ẹ, mịn mị anị Tamụnọ Tẹmẹ Ḅe oria fịrị-ẹ, gịẹịn Oloko mịkẹ. Ọkọsime ḅọ Tamụnọ Ḅe ḅara tokoniḅịpị nyana-nyanamẹ; tomoni-a ḅaraḅụkẹ.