Romapụ 16 - Kịrịkẹnị Baịbụl

Pọl Ḅe Ò Kereniḅịpị Se Sẹịn Mẹ

¹ À mịna eremeni mịnaḅọ Fibi ma nwọse ó ḍieaḅẹ, Sẹnkiria chọchị mị ḅie fịrịnwẹngịḅọ ma.

² Nyanaḅọ Ḅe ẹrẹ ḅụ ómine árị ọkị, Tamụnọ-a tomoni mịẹ gbẹịn ḅara ḅụ, se árị ọ́mịna ḅara ḅiḅịa ḅarachụa goyegoye ọ́ nyana á pịrị, anịatịḅị árị opuma ḅarachụa tọn-a apụ pịrịsam, pịkị ị̀rị̀ sọnị.

³ À kereniḅịpị se Prisila ma na Akwila ḅe na sẹịnmamẹ, ị̀ ḅụ sọ fịrịnwẹngịarị apụma, Kraịst Jizọs Ḅe fịrị mị ḅie.

⁴ Ị̀ gose inia ḍumo nwọ fama-ẹ tọn apụma, àrị opuma mịẹḅaka se ini ḅẹmẹ, ị̀rị̀ kẹngẹkẹ, ọkụma Jịnsẹapụ chọchị mamgba sọnị-ẹ.

⁵ Inia warị ḅie koḅirimarị chọchị mị à nwọ kerenimẹ. Kereniḅịpị pịkị sime ị̀ ḅụ yela ikiaḅọ, Epinetọs ḅe pịrịmẹ, ori mị tatarị Esia pẹkẹrẹ mị ḅụ Kraịst Ḅe ḅereni owuḅọ-ẹ.

⁶ Kereniḅịpị pịkị sime Meri ma pịrịmẹ, kụrọma fịrịnwẹngị ọ́ pịrịsaḅọ ma.

⁷ Andronaịkọs ḅe na Junias ḅe na à nwọ kerenimẹ, ị̀ pembe Juapụ se ị̀rị̀ na ikoli ḅie sime apụma. Okunwẹngịapụ ma ogboku ini iḅiọkụ se ini nemimẹ, ini tatarị Kraịst Ḅe ḅereni apụ sọ se ị̀rị̀ ḅo sọmẹ.

⁸ Amplịatọs ḅe kereni ị̀ pịrị, Nyanaḅọ Ḅe nwẹngị gboloma mị ḅie ị̀ ḅụ yela ikiaḅọ ḅe.

⁹ Ọbanọs ḅe sọ kereni ị̀ pịrị Kraịst Ḅe fịrị mị ḅie mịna juo fịrịnwẹngịḅọ ḅe, pịkị Stakis ḅe na, ị̀ ḅụ yela ikiaḅọ ḅe.

¹⁰ Apeles ḅe kereni, ori ọ̀ ḅụ seni Kraịst Ḅe pịrị iḅi ḅara mị pakasaḅọ ḅe. Aristọbulọs furoapụ ma kereni.

¹¹ Hẹrọdịọn ḅe kereni, ị̀ pembe Juḅọ ḅe, pịkị Nasisọs furo ḅe apụma na, Kraịst Ḅe ḅụ mịnapụma.

¹² Traịfina ḅe na Traịfosa ḅe na kereni ị̀ pịrị, Nyanaḅọ Ḅe fịrị nwọ nwẹngịarịapụ ma, pịkị Pasis ḅe nwọ kereni, opuma fịrịnwẹngị Nyanaḅọ Ḅe pịrịsa ḅọ ḅe.

¹³ À kereniḅịpị seni Rufọs ḅe fịrịmamẹ, Nyanaḅọ Ḅe fịrị ḅie tọrụ pakaḅọ ḅe, pịkị nyọngọrọma na, sịkịmamgba anị owutọkụ ḅara nwọse ị̀ ọkị ọkị ḅọ ma.

¹⁴ Asinkritọs ḅe kereni ị̀ pịrị, pịkị Flegọn ḅe na, Hẹmis ḅe na, Patrobas ḅe na, Hamas ḅe na, pịkị ini na sime ísí Kraịst Ḅe ḅereni mịnapụma na.

¹⁵ Kereniḅịpị sime Filologọs na, Julia na, Niriọs ḅe na pịkị nụmbụrarọma na, Olimpas na pịkị ini na sime Tamụnọ-a tomoni mamgba na.

¹⁶ Mịnapụ ḅịpị nọnjụ ọ́ nwọ seni jịnḅọ jịnḅọ kereni. Kraịst chọchị mamgba inia kereniḅịpị seni ọ́ fịrịmamẹ.

Kuluma Datekerema Ma

¹⁷ Àrị ọ́ tẹkẹmẹ, ị̀ya mịnapụ: ọ́ tọrụ se inia ḅụ wẹrị nwọ pua dekiḅo, pịkị tomoni-a ḅereni pịkị iḅo se ómine ọkịsa ḍieye mị na tụḅụrụarịapụma, inia ḅụ ọ́ ḅụsin!

¹⁸ Anịatịḅị ọkọsimeaye ma mịẹarịapụ ma ini fịrịnwẹngị wa Nyanaḅọ Jizọs Kraịst Ḅe pịrịkẹ, ọkụma inia ḅụlọ ma mị ini nwẹngị pịrịarịye-ẹ. Inia ḅẹlẹ ọkwẹịnma na pụatokoni na mị ini se oḅori se yenemika apụma chamarịye-ẹ.

¹⁹ Ḅọḅọ ó se iḅiọkwẹịn mị ọkị iḅi ḅara mị nwọ naasam, mịn mị gose ị̀ ḅie pịkị ó ḍiki ḅẹlẹmẹ. À ḅimẹ ó yenemi iḅiye mị ḅụ, ọkụma siye ḅụ si nemika apụ nwọ sọ.

²⁰ Se Tamụnọ Ḅe mịna deinma pakaḅoarị nyọ nwọ sọ ḅọ ḅe, ḅọlọka sịkị ḅụ, ọ́mịna ḅụọchuku oru ḅe nwọ kọsịmaḅịa. Wa Nyanaḅọ Jizọs Kraịst Ḅe ḍikiḅụgerere mị ómine na sime.

²¹ Timoti ḅe ị̀ juo fịrịnwẹngịḅọ ḅe oria kereniḅịpị se ọ́ fịrịmamẹ; anị Lusịọs ḅe na, Jasịn ḅe na, Sosipata na ị̀ juo Juapụma pịkị ó kereni ọkụ-ẹ.

²² Ị̀rị̀, Tatịụs, mịn ḍiri mị gịẹịn-arị ḅọ ḅe, Kraịst Ḅe kereniḅịpị nwọse ọ́ fịrịmamẹ.

²³ Gaịọs ḅe, à ḅo pịrịḅọ ḅe, wa oria warị ḅie chọchị mịẹarịḅọ ḅe kereniḅịpị seni ọ́ fịrịmamẹ. Erastọs, ama igbiki koko ḅọ ḅe, pịkị mịna mịnaḅọ Kwọtọs ḅe na inia kereniḅịpị se ọ́ fịrịmamẹ.

²⁴ [Wa Nyanaḅọ Jizọs Kraịst Ḅe ḍikiḅụgerere mị ómine mgba na sime. Amẹn.]

Kuluma Tokoni Tẹkẹ

²⁵ Ó ye wa boma se Tamụnọ Ḅe pịrị! Ori ineda mịẹse ọ́ kụrọma ọ́mịna ḅereni ḅụ chịẹmẹ, à ḍuko ọ́ pịrị Iḅi Ḅẹrẹ mị sime ḅara ḅụ, Jizọs Kraịst Ḅe gboloma oku mị, pịkị tọn-a ḅụọ ḅụ ḅọị sime se ini mịọkụ mịẹḅelemasa kọkọmaye mị sime ḅara ḅụ.

²⁶ Anị simeọkụ simeọkụ ịkịankoroapụma gịẹịn ayema ḅụ ini ḅọrọ anị kọkọmaye mị mịẹḅelemasam, se ḍumo gbaso Tamụnọ Ḅe tọn koroma ḅara ḅụ, ini mịẹse sẹ mamgba anị nemisam, mịẹse nweni mamgba ḅereni se pịkị ḅịpịpokiḅịa ọkụ.

²⁷ Boma sime ori kẹngẹ Tamụnọ Ḅe, ngẹrị nemi mamgba nyanaḅọ ḅe pịrị gbaso, Jizọs Kraịst Ḅe ḅụ! Amẹn.