Romapụ 13 - Kịrịkẹnị Baịbụl

Nwẹngị Sẹ Mị Ḍikiḍikiarịapụ Ma Pịrị Na Iḅi Fịrị

¹ Tomoniḅọ goyegoye sẹ mị ḍikiḍikiarịapụ ma ḍukoye ma nwọ mịẹ, anịatịḅị Tamụnọ Ḅe kụrọ pịrịka simeogbo kụrọ nyana gbọrịḅọ ofori-ẹ, se nwọ sime kụrọnyanapụ ma Tamụnọ Ḅe ini se koromamẹ.

² Nwọ sime wararị kụrọnyanaḅọ ḅe na tụḅụrụ ḅọ goyegoye iniḅọ Tamụnọ Ḅe tọn koromaye na tụḅụrụaḅẹ; se ọkọ simeye mịẹḅọ goyegoye ḅẹrẹkọn ọkịḅo iniḅọ ḅụ pịrịaḅẹ.

³ Anịatịḅị iḅiye mịẹapụ ḅẹrẹtọn apụ ḍikiḅalafa ẹkẹ, ọkụma siye mịẹapụ re-ẹ. Kụrọnyanaḅọ ḅe ḍikiḅalafaka mị ị́ ḅụḅẹlẹ? Anị-ẹ ḅẹḅẹ iḅiye mị mịẹ anịsịkị ori ị́ tokoniḅịa.

⁴ Anịatịḅị ori Tamụnọ fịrịnwẹngịḅọ-ẹ ị́ya iḅi gose. Ọkụma ị́ nemikase siye mịẹmẹ ḅẹḅẹ, ò ḍikiḅalafa, anịatịḅị oria ḅụfụka se tomoniḅọ pịrị mị karakaramẹ. Ori Tamụnọ fịrịnwẹngịḅọ-ẹ se Tamụnọ ịganị nwọse siye mịẹapụ ma ọgọnọ gbanaḅịa.

⁵ Mịn mị gose ọ́ kụrọnyana apụma ḍukoye nwọ mịẹḅịa—Tamụnọ Ḅe fomuḅara mị kẹngẹ gosekẹ, ọkụma pịkị sina iḅina nemi kuḅie mị na gose-ẹ.

⁶ Mịn ọ́ pịkị gose amaochoaye gbẹịn-arịye mị tịḅị-ẹ, anịatịḅị kụrọnyana apụma ini fịrịnwẹngị Tamụnọ Ḅe pịrịaḅẹ, ini nwẹngị na iḅi fịrịma ini nwọ nwẹngị ḅeinmarị sịkị.

⁷ Ị́ inia ḅara ọlọ sa se ini gbẹịn, ị́rị́ ḅarana nyana ngọma ḅe amaocho igbiki ma se ini gbẹịn, se ini osi pịkị kụn se inimgba pịrị.

Nwẹngị Jịnḅọ Jịnḅọ Pịrị Na Gbẹịn-a Fịrị

⁸ Gbọrịḅọ ḅara sọnị sa ọlọma—ómine ọlọḅịa sa, anị jịnḅọ jịnḅọ ḅẹlẹma kẹngẹ-ẹ. Iniḅọ juo tomoniḅọ ḅẹlẹmaḅọ goyegoye Oloko mị ḍukoye nwọ mịẹsam.

⁹ Tọn koroma na mịẹ ma-ẹ nwọ ḅẹ ayema, “Sẹfị ma, nweni ḅaa ma, furu ma, jịnḅọye sọlị ma” ma mamgba na pịkị jịn aye na, arịmgba tọn koroma na mịẹ ma-ẹ nwọ ḅẹ aye-ẹ, “Ị́ ḅụḅẹlẹma ḅara nwọse ị́ juo tomoniḅọ ḅẹlẹma.”

¹⁰ Mịna juo tomoniḅọ ḅẹlẹmaḅọ goyegoye ngịsị siye se iniḅọ juo tomoniḅọ mịẹ ẹkẹ. Anịọkụma, ḅẹlẹma nyana mị, anị bebe Oloko mị mgba ḍukoye nwọ mịẹ mị-ẹ.

¹¹ Ọ́ mịn mị nwọ mịẹḅịa, gbarịmaka ḅara ḅụ, anịatịḅị ó nemimẹ na ọ́ mọnọ ḅụ sịsẹḅịa sịkị mị lasam. Anịatịḅị wa ḍụaḅọrọma nyanaḅịa sịkị mị, mịọkụ anị kpekitẹịn wa tatarị ḅereni sịkị mị nẹngịmẹ.

¹² Kalaye kọnmẹ ḍin mị ḅọrọḅịa, eneḅa mị kpekisam, ó ye wa ḅarị sime kanakana pịrịaye nwọ mịẹma, se wa se enekuḅu ḅie owusọḅịaye ma nwọ deki ọlọ.

¹³ Ó ye wa iḅiọkụ mịna ḅụ wẹrị kpaịnma enekaka ḅie simearịapụ ḅara ḅụ, kamụsọ, oloko abalaka ḅụtima na iruḅu tọrụḅaama na ḅụkẹ, pịkị sẹfị na ichipịnị-a si nwẹngị ḅụkẹ, pịkị ḅụgbẹịnka mịẹmịẹye ḅụkẹ, owusọ na jịnḅọ ḍikitọrụfụka na ḅụkẹ.

¹⁴ Ọkụma Nyanaḅọ Jizọs Kraịst Ḅe owuniayema ọkị ḅiri, se ḅarị ojumịnị mị ḅiarị siaye ma nwọ abalama anị anị ḅiarịyema mịẹ anị pịrị ḅụ.