Romapụ 11 - Kịrịkẹnị Baịbụl

Tamụnọ Ḅe Nyana Izrẹl Mị Pịrị Ḍikiḅụgerere

¹ Anịọkụma, à gbelamẹ, Tamụnọ Ḅe ori oria tomonima nwọ sịkị? Ngịsị ọkọkẹ! Ị̀rị̀ na ị̀ ḅụ na Izrẹlḅọ-ẹ, Ebraham furoḅie pakaḅo ḅọ, Bẹnjamin furo ḅie ḅọ.

² Tamụnọ Ḅe ori oria tomonima sịkịkẹ, sakị sịkị ngịsị ọ̀ sẹlẹọkị apụma. Fịafịa ḍiri mị ḍukoye ó nemimẹ, Ịlaịja ḅe Izrẹl mị gose Tamụnọ Ḅe na ọkwẹịn ḍiri pẹkẹrẹ mị ḅie na:

³ “Nyanaḅọ, ini ị́ya ịkịankoroapụma ḅaasam se ị́ya agbamịẹ ẹbẹ ma suma gbinsam; ị̀rị̀ ngẹrị anị kọnsaye-ẹ, ini pịkị ị̀ ḅaa ḍọkịaḅẹ.”

⁴ Cheye Tamụnọ Ḅe nwọse ọ̀ pẹkẹrẹ? “Kịnị oyimẹndẹ fịnjị na kịnị oyiasi na owuapụ ḅụ à nwọse ị̀ ḅụ wẹrịmamẹ, maa, Beal oru mị tẹkẹka apụ.”

⁵ Mịọkụ, anị gbọrị ḅara mịn anị mị sịkị sọ anị simeọkụ-ẹ: boka apụ omi-ẹ Tamụnọ Ḅe sẹlẹọkịsa apụma ḅụ, oria ḍikiḅụgerere mị gose.

⁶ Oria nweni sẹlẹ mị anị oria ḍikiḅụgerere ḅụ sẹrẹrẹmẹ, ini mịẹye ḅụ anị wẹrị ḅokẹ. Anịatịḅị Tamụnọ nweni sẹlẹ mị nemikase tomoni mịẹye ḅụ wẹrị ḅomẹ nwọ ḅẹ ọkụma, anịọkụma oria ḍikiḅụgerere mị ḅarị kọkọma ḍikiḅụgererekẹ.

⁷ Anịọkụma cheye? Izrẹlapụma ini ḍiki simeye ini ḅarị nwọ ọrịkẹ. Tamụnọ Ḅe sẹlẹọkịsa ḅoka apụma mị anị ọrịye-ẹ. Kirikọn apụma ḅeri inikima Tamụnọ chịn pụkọ mị nwọ pịrịmẹ.

⁸ Fịafịa ḍiri mị ḍuko ḅara ḅụ, “Tamụnọ Ḅe mịẹse inia kuḅie ma na koromama na oḅokumẹ; ọkịḅo mịmgba ene mị la sọ ini ineda inia tọrụmgbọlụma se yeọrịkẹ pịkị inia ḅeri ma se ye naakẹ.”

⁹ Se Devid ḅe nwọ ḅẹmẹ, “Ye inia alalị ma ḍẹịn sọ se ini kun; ye ini ḅịkị, ye ini ḅụfụka se ini pịrị!

¹⁰ Ye inia tọrụmgbọlụma pụn, mịẹse ini ineda yeọrị ẹka ḅara; ye ini pịkị inia ḅụfụka ma chuku ḅie sime sịkịmamgba ḅụ.”

¹¹ Anịọkụma, à gbelamẹ, Juapụma ḅụọ tọmbụlọ sịkị ini ḅịkị se ye inia ḅụ lama? Ọkọ simeye ofori-ẹ! Anịatịḅị ini si mịẹye gose, ḍụaḅọrọma ḅo Jịnsẹapụma pịrịsam, Juapụma mịẹse iniḅo ini ḍikitọrụfụkaḅịa.

¹² Juapụma mịẹ si mị ḅakama ḅẹlẹma ọkịḅo tomonikiri mị pịrịmẹ, inia tẹmẹ anga igwein mị ḅakama ḅẹlẹma ọkịḅo Jịnsẹapụma pịrịsam. Anịọkụma, ḅẹlẹma ma ḅakatẹịnḅịa ọkụ ḍiki, ini Juapụ mamgba kịẹnḅịpị mị nwọse Jịnsẹapụma ḅụ chụaḅịa sịkị!

Jịnsẹapụ Ma Ḅe Ḍụaḅọrọma Mị

¹³ À mịọkụ ọkwẹịn ómine Jịnsẹapụma pịrịaḅẹ: ị̀rị̀ nwọ okunwẹngịḅọ sọ Jịnsẹapụma pịrị warasịkị, àrị ị̀ya fịrị mị se pụkọsolima ḅara mịẹḅịa.

¹⁴ Ọbịasi, à nemikase ị̀ya sẹ apụma mịẹse iniḅo yeḍikipụkọsoli apụ sọ ọkụma, anị ḅụ à wẹrị dapụ ḍụaḅịa.

¹⁵ Anịatịḅị ini Juapụma sịkị sịkị, Tamụnọ Ḅe na tarakapụ mamgba pịkịḅo Tamụnọ Ḅe na ikiasọmẹ. Nde anịọkụma, anị simeḅịa ọkụ ini ini ọkịḅịa sịkị? Anị ḍumo sọ fịapụma pịrịḅịa.

¹⁶ Tarị fịturu pẹkẹrẹ mị ini nemikase nwọse Tamụnọ Ḅe pịrịmẹ nwọ ḅẹḅẹ, anịọkụma, bebe okpokpo mị sọnị pịkị oriaye-ẹ; se ini chịn-akuno ma nwọse Tamụnọ Ḅe pịrịmẹ ḅẹḅẹ, ịkpangịma sọnị pịkị oriaye-ẹ.

¹⁷ Oliv nwọ chịn chịn ḅụ ini ḍipi se ḍikiḍikipakụmaḅo ịkpangịma ḅụ daye ini nwọ pẹlẹsinsam, se piri ḅie ngẹrị pakaḅo oliv chịn ịkpangị nwọse anịa ḅụ oḅolo chụamẹ. Ómine Jịnsẹapụma piri ḅie ngẹrị pakaḅo oliv chịn mị simeọkụ ọ́ nwọ simemẹ, mịọkụ Juapụma ḅụ ịnyọ na ḅein tẹmẹ anga ḍumo mị ọ́ nwọ ḍiaọkịsam.

¹⁸ Anịẹrẹchị, ómine ini ịkpangị pẹlẹ ọkụ nwọse pẹlẹsin apụma ḍikisimama. Nde ómine ineda opuamịẹye mịẹḅịa ọkụ? Ómine papa ịkpangị-ẹ, ọ́ ḅarachụa kunoma pịrịkẹ—kunoma re mị ḅarachụa ọ́ pịrịye-ẹ.

¹⁹ Ọkụma ọ́ nwọ ḅẹḅịa, “Iin, ini ịkpangịma kanị sin se kiri pakụma wa pịrịmẹ.”

²⁰ Mịn mị kọkọmaye-ẹ. Ini ini kanị sinmẹ ini ḅerenika ye gose, ómine ọ́ kụrọma chịẹmẹ ó ḅereniye gose. Ọkụma ómine opuamịẹye koroma kọn anị pịrị ma, anịnakaraka, ọ́ ḅalafa nyana.

²¹ Tamụnọ Ḅe ọ̀ ḅarasin Juapụma pịrịkẹ, chịn mị na sopaka ịkpangị ọkụ simeayema, ọ́ chịn ḅara ọ̀ ḅarasin ọ́ pịrị ḅe?

²² Mịọ wa Tamụnọ Ḅe iḅi mịẹ kuḅie na pịkị owoi kuḅie na simeọkụ nwọ ọrịsam. Ori owoi ḅịkịapụ ma dapakamẹ, ọkụma iḅimịẹ kuḅie nyana ọ́ pịrịmẹ—ó nemikase mị kuḅie mị ḅụ simemamunmẹ ḅẹḅẹ. Ọkụma ómine ọkọ mịẹkẹ ḅẹḅẹ ómine sọnị ini ọ́ kanị sinḅịa.

²³ Se Juapụma, ini nemikase inia ḅerenika mị ḅụ ḅarasinmẹ ḅẹḅẹ, ini ini seni ini pakaḅo-a nyọma ḅie kpoto chụaḅịa, anịatịḅị Tamụnọ Ḅe ori ineda anị mịẹḅịa.

²⁴ Ómine Jịnsẹapụma piri ḅie ngẹrị pakaḅo oliv chịn simeọkụ anị ó simeọkụ-ẹ, se ini kanị sin ye mị, anịsịkị, mịẹmịẹkaye ḅara ḅụ, ini anị seni karakara ḅara se ḍipi pịkị ḍikiḍikipakụmaḅo oliv chịn ḅụ oḅolomẹ. Juapụma ini ḅarana ḍipi chịn mị simeọkụ anị ini simeọkụ-ẹ; anị pịkị sarasaratẹịnḅịa, anịọkụma, Tamụnọ Ḅe kanị sin ịkpangịma nwọ ọkịḅo àrị pakaḅo chịn mị ḅụ chịrọma mị.

Tamụnọ Ḍikiḅụgerere Sime Nwenimgba Pịrịmẹ

²⁵ Ḅọị sime kọkọmaye omi-ẹ, ị̀ya mịnapụ, à ḅi na ó nemi-ẹ nwọ ḅẹye, anị ọ́ mịẹse ọ́ ḅarị koroma ẹkẹ na ó yenemimẹ. Mịn anị-ẹ, Izrẹlapụma inia kọngọ kụrọma mị simegbasoyekẹ, ọkụma anị sime mun Tamụnọ Ḅe damaḅoḅịa Jịnsẹapụma kịẹnḅịpị mị kara sịkị nwọ laḅịa.

²⁶ Mịn pịkị Izrẹl mị mgba ḍụaḅọrọma mị nyanaḅịa ọkụ-ẹ. Fịafịa ḍiri mị ḍuko ḅara ḅụ, “Ḍụaḅọrọmaḅọ Ḅe Zaịyọn ḅie ọ̀ wẹrị ḅoḅịa se Jekọb ḅe furoḅie pakaḅo apụma nyana sitịḅị mamgba nwọ sinḅịa.

²⁷ Àrị ini na mị ọḅọkụ mị nwọ fịḅịa, àrị inia sima nwọ sinḅịa sịkị.”

²⁸ Ini Iḅi Ḅẹrẹ mị sịkịye gose Juapụma ómine Jịnsẹapụma gose Tamụnọ Ḅe na tarakapụ sọsam. Ọkụma Tamụnọ Ḅe ye sẹlẹọkị ḅara mị ḅụ ini oria ikiapụ sọmẹ ḅieju-aḍapụma tịḅị gose.

²⁹ Anịatịḅị Tamụnọ Ḅe ori ò kuḅie ḍinmaḍinmakẹ ọ̀ sẹlẹọkị pịkị ḅẹlẹmasa ḅọ mị ḅụ.

³⁰ Ómine Jịnsẹapụma ọkụma ḅọrọsa sịkị Tamụnọ Ḅe ḅịpị ó pokikẹ, ọkụma ọ́ Tamụnọ ḍikiḅụgerere mị nwọ nyanasam Juapụma ḅịpịpokikaye gose.

³¹ Anị gbọrị ḅara mị ḅụ, ómine ọkịsa ḍikiḅụgerere mị gose, Juapụma ḅarị Tamụnọ Ḅe ḅịpịpokikẹ, mịẹse ini ma sọnị Tamụnọ Ḅe ḍikiḅụgerere mị nwọ ḍiaọkịḅịa ọkụ.

³² Anịatịḅị Tamụnọ Ḅe mịọkụ nweni mgba seni ḅịpịpokika mị anịa ikoliapụ nwọ mịẹsam, mịẹse nweni mgba ḅụ ò ḍikiḅụgerere ḍiepakụmaḅịa ọkụ.

Tokoni Sime Tamụnọ Ḅe Pịrị

³³ Tamụnọ Ḅe pẹrẹ mị ḅaka la-ọkụ ḍiki! Oria nemi na oria yekaịnḅo ḍawọye ma na gbun la-ọkụ ḍiki! Tụḅọ ineda ò ḍuko pẹlẹsaye ma paka ọkụ nwọ ḍuko ḅelema ḅe? Tụḅọ ineda oria mịẹaye ma nwọ kaịnḅo ḅe?

³⁴ Fịafịa ḍiri mị ḍuko ḅara ḅụ, “Tụḅọ Nyanaḅọ Ḅe kuḅie nemi? Tụḅọ ineda tetema se ọ̀ pịrị ḅe?

³⁵ Tụḅọ jịn sịkị ye se ọ̀ pịrịsa, mịẹse ọ̀ pịkịna anị gbẹịnḅịa ọkụ?”

³⁶ Anịatịḅị ori mị ye mamgba tẹmẹye-ẹ, se ye mamgba ọ̀ ḅụ wẹrị ḍumo pịkị sime ọ̀ pịrịmẹ. Ye boma mị sime Tamụnọ Ḅe pịrị gbaso! Amẹn.