Pakaso 5 - Kịrịkẹnị Baịbụl

Moziz Ḅe Na Erọn Ḅe Na Ijipt Amanyanaḅọ Ḅe Tọrọkọ

¹ Anị Moziz ḅe na Erọn ḅe na so Ijipt Amanyanaḅọ ḅe damamun se nwọse ọ̀ ḅẹye-ẹ, “Nyanaḅọ, Izrẹl Tamụnọ Ḅe, nwọ ḅẹmẹ, ‘Ị̀ya tomonima wẹrịso mịẹse ini mun onwun ele ḅie, osi se ị̀ pịrị ḅụ ḅieḅẹlẹ alalị fị.’”

² “Nyanaḅọ Ḅe tụḅọ?” amanyanaḅọ ḅe ọkọse ini gbelamẹ. “Nde à gose ọ̀ ḅịpịpoki seni Izrẹl mị wẹrịso se ini soḅịaye? Nyanaḅọ Ḅe àrị ò nemikẹ, à pịkị Izrẹl mị wẹrịso se ini soẹkẹ.”

³ Moziz ḅe na Erọn ḅe na nwọse ọ̀ pẹkẹrẹmẹ, “Hibru apụ Tamụnọ Ḅe ori ọ̀ ḅụ seni wa ḍiesam. Ḅereni wa pịrị wa tẹrẹ-a ḍin se somun onwun ele ḅie ḅụ agbamịẹ wa Nyana Tamụnọ Ḅe pịrị. Wa nemikase ọkọ mịẹkẹ ḅẹḅẹ, ori obi ḅụ anịkanịka ọmụ ḅụ ḅọrọ wa ḅaafamaḅịa.”

⁴ Amanyanaḅọ ḅe nwọse Moziz ḅe na Erọn ḅe na ḅẹmẹ, “Nde ó gose tomonima mịẹse ini ḅarị inia fịrịma nwẹngịkaye? Ọ́ mịẹse omoniapụ ma pịkịma somun inia fịrịnwẹngị!

⁵ Ómine, ọ́ ḅakatẹịn Ijipt apụma nẹngịsam. Mịọkụ ọ́ ḅarị fịrịnwẹngị ḍụkụkẹ!”

⁶ Anị gbọrị ene ḅie amanyanaḅọ ḅe Ijipt apụma ḅụ tịḅịda omoniapụ na fịrịnwẹngịapụma na pịkị Izrẹlapụ tịḅịnịma na ḅẹmẹ:

⁷ “Ọ́ ḅarị ini se fọị-aḅaịn tẹmẹḅịa nangwọ nangwọ osuein sọnị se ini pịrịma. Ye ini ma ḅarana mun àrị ḍọkị.

⁸ Ọkụma ye ini tatarị sịkị tẹmẹ tẹmẹ aḅaịn ma kịẹnḅịpị la-ọkụ pa pịkị nwọ tẹmẹ, gbọrị fọị-aḅaịn kẹngẹ sọnị kịẹnḅịpị ḅụ iderimaka ḅaraḅụ. Ini iḅiọkụ nwẹngịḅịa fịrị nyanakẹ, anị ini gose pa ị̀ ḅẹarịye-ẹ na àrị ini wẹrịso ini mun agbamịẹ inia Tamụnọ Ḅe pịrị!

⁹ Ómine ini mịẹse ini gagama fịrịnwẹngịtẹịn ịnyọsara oforika ḅaraḅụ, anị mịẹse ini ḅarị sịkị nyana sime iruoaye poki-ẹkẹ.”

¹⁰ Omoniapụ ma na fịrịnwẹngịarị tịḅịnịma na Izrẹl tịḅịnịma na somun nwọse Izrẹlapụma ḅẹmẹ, “Amanyanaḅọ ḅe nwọ ḅẹmẹ na ọ̀ ḅarị ngịsị nangwọ nangwọ osuein se ọ́ pịrị-ẹkẹ.

¹¹ Ọ̀ nwọ ḅẹmẹ na ó mun ḅarana ómine anị ọrịḅịa angaḅụ anị nyanaḅo ọ́mịnaḅụ pịrị, ọkụma anị gbọrị kịẹnḅịpị mị ọ́ pa pịkị nwọ tẹmẹ fọị-aḅaịn ḅụ.”

¹² Anịẹrẹchị tomonima so bebe Ijipt mị mgba mun kelemamẹ, nangwọ nangwọ osuein ḍọkị ḅụ.

¹³ Omoniapụ tịḅịda fịrịnwẹngịapụma kụrọḅara seni tọn ini pịrịmẹ na ini nangwọ nangwọ osuein se ini pịrị pịrị sịkị ḅụ, gbọrị ene ḅụ ini tẹmẹ tẹmẹ fọị-aḅaịn ma kịẹnḅịpị la-ọkụ, ini pa pịkị nwọ tẹmẹ.

¹⁴ Ijipt omoniapụ tịḅịda fịrịnwẹngịapụma ini Izrẹlapụ tịḅịdapụ ma fomufomumẹ, anị ini se fịrị mị ḅụ tịḅịdapụ mịẹ apụma. Ini nwọse ini gbelamẹ, “Nde ó gose tatarị sịkị ọ́ tẹmẹ tẹmẹ fọị-aḅaịn ma kịẹnḅịpị la-ọkụ ḅarị nwọ tẹmẹ tẹmẹkaye mịọkụ?”

¹⁵ Anị Izrẹl tịḅịdapụ ma so amanyanaḅọ ḅe damamun se ḅẹrẹ seni ò suaye-ẹ, “Amanyanaḅọ, nde ị́ gose mị ḅara se wa mịẹye?

¹⁶ Ini ḅarị nangwọ nangwọ osuein se wa pịrịpịrịkẹ, ọkụma ini pa tọn wa pịrịaḅẹ na wa fọị-aḅaịn tẹmẹ! Mịọkụ ini pịkị wa fomufomuaḅẹ. Ị́ya tomonima anị mịẹirimaye-ẹ.”

¹⁷ Amanyanaḅọ ḅe nwọse ini pẹkẹrẹmẹ, “Ómine ikulamẹ, ọ́ pịkị fịrịnwẹngị ḅikẹ, anị ó gose ị̀ ḅẹye-ẹ na àrị ọ́ wẹrịso se ó mun agbamịẹ Nyanaḅọ Ḅe pịrị.

¹⁸ Mịọkụ ọ́ pịkịma somun fịrịnwẹngị! Ini ḅarị nangwọ nangwọ osuein se ọ́ pịrị-ẹkẹ, ọkụma ọ́ pa pịkị anị gbọrị kịẹnḅịpị mị tẹmẹ tẹmẹḅịa fọị-aḅaịn ḅụ.”

¹⁹ Izrẹl tịḅịdapụ ma ini ọrịmẹ na ini ḅụfụka ḅụ sọsam, ini tatarị tẹmẹ tẹmẹ fọị-aḅaịn ma kịẹnḅịpị la-ọkụ gbọrị eneḅụ, ini pa pịkị nwọ tẹmẹ tẹmẹḅịa nwọḅẹ sịkị.

²⁰ Ini amanyanaḅọ ḅe warị ḅụ pịkịma soarị sịkị, Moziz ḅe na Erọn ḅe na ini chịẹ sime ini koruarị anga ḅụ, ini ḅo ini na ịrịamẹ.

²¹ Ini nwọse Moziz ḅe na Erọn ḅe na ḅẹmẹ, “Nyanaḅọ Ḅe ọ́ mịẹye mị ori ọrịsam ọ̀ pịkị anịa fomuḅara seni ọ́ pịrịḅịa, anị ọ́ mịẹse amanyanaḅọ ḅe na oria fịrịtịḅịdapụ ma na wa ḍikiḅụnwọnwọye ẹrẹchị. Ómine ẹmbẹ finji ini pịrịsam mịẹse ini wa ḅaaḅịa ọkụ.”

Moziz Ḅe Ḅẹrẹ Mị Se Nyanaḅọ Ḅe Suamẹ

²² Anị Moziz ḅe ini wẹrịso se mun Nyanaḅọ Ḅe tẹkẹ se nwọḅẹye-ẹ, “Nyanaḅọ, nde ị́ gose si anga ḅara se ị́ya tomonima na kọnye? Nde ị́ gose ị̀ fịrịma se à mịangaḅoye?

²³ À mun ị́ya ḅẹrẹ ḍuko amanyanaḅọ ḅe pịrị sịkị ngịsị, ọ̀ sakị si ḍumo se ini na angamẹ. Ị́ pịkị gbọrị ḅara sọnị mịẹkẹ ḅarachụa ini pịrịḅụ!”