Pakaso 26 - Kịrịkẹnị Baịbụl

Nyanaḅọ Ḅe Pakaḅoḅo Ikowarị Mị

¹ “Osiḅụ sime Ikowarị mị, anịa ḅieju mị mịẹ anị à pakaḅoḅo Ikowarị nwọsọ, iḅi-lọkọ-ḅịtẹ oyi-a warị bulu bulu tọrụ na, awụwụ tọrụ na, pịkị pulo-pulo wulu na se ḍoriye nwọse anị ḅirima. Enjẹlapụ ini nwọ ḍori ḅịtẹma ḅụ.

² Ḅịtẹ warị mị mịẹse anị jịnye jịnye na gbasị, anịa ịsụn mị maịnfa kuḅu-a soi, anịsịkị finji mị inein-a kuḅu.

³ Arịa ḅụ sọnọ nwọ gbin seni gbọrịḅụ wẹrị, pịkị ị́sị́ sọnọ ma seni gbọrịḅụ wẹrị.

⁴ Bulu bulu tọrụ nyana ḅịtẹ nwọse aka mị ḅụ ḍiki se tolumaḅịa aye nwọ chụa gbọrịye gbọrịye ḅụ.

⁵ Ḍiki se tolumaḅịa ayema ḅụ mesi oyi fịnjị nwọse tatarị ḅịtẹ warị mị ḅụ chụa pịkị maịn karama ḅịtẹ warị mị ḅụ sọnị ḍiki se tolumaḅịa ayema ḅụ mesi oyi fịnjị nwọ chụa, anị ísíye mị na gbasị pịkị kuraḅịa ḅara.

⁶ Goli seni mịẹ yesụkaḅịaye ḅụ mesi oyi fịnjị nwọ tẹmẹ, anị seni mama pẹkẹrẹ ma kpechi gboloma se arịḅo gbọrịḅụ sime.

⁷ “Se Ikowarị mị gbẹịnḅịa oḅori-ichuka-se-ḍori-ḅịtẹ oyigbọrị-warị-fịnjị nwọ mịẹ.

⁸ Arịmgba gbasịa ḅara nwọse àrị mịẹ, ịsụn mị kuḅu-a soi na pẹkẹrẹ, anịsịkị finji mị inein-a kuḅu.

⁹ Arịa ḅụ sọnọ nwọ gbin gboloma se gbọrịḅụ wẹrị, se ị́sị́ sonio ma pịkị gbọrịḅụ sime. Sonio karama ḅịtẹ warị mị anị se maịn iko, seni Ikowarị mị tọrọkọ kikima.

¹⁰ Kuluma ḅịtẹ warị mị aka ḅụ ḍiki se tolumaḅịa aye mesi oyi fịnjị nwọ chụa anị gbọrị ḅịtẹ kpo mị ḅụ, pịkị ísí ḅịtẹ kpo mị aka ḅụ ḍiki se tolumaḅịa aye mesi oyi fịnjị nwọ chụa.

¹¹ Alapẹlẹka ikulele se mịẹ yesụkaye ḅụ mesi oyi fịnjị nwọ tẹmẹ, se àrị seni ḍiki se toluma ayema ḅie sụka se maịn ma seni gbọrị nyọ kikimaye nwọ mịẹḅịa ọkụ.

¹² Ḅịtẹ warị mị ḅụ gbana ikiḅa mị seni Ikowarị mị ọḅụju sụka.

¹³ Anganga ḅụ anịa ịsụn mị ḅụ kọn ḅịtẹ ikiḅa mị anị seni Ikowarị mị akasịkị ma kikimaḅịa aye nwọ mịẹ.

¹⁴ “Pịkị jịn mama nyọ kikimaye nwọ mịẹ, gbọrịye pulo-puloye seni bile-ajirima-oju-apụra se mịẹye, anịsịkị ísí ye mị ḍikitọrụgbẹịn nama ojuapụra seni mịẹye, anị seni nụngọ da nyọ mị kikimaḅịaye mị-ẹ.

¹⁵ “Gbụsụnụ ọjị chịn nwọse Ikowarị mị anịa ḅọkọ-chụa-chịn mị nwọ mịẹ.

¹⁶ Ḅọkọ-chụa-chịn ma gbọrịye gbọrịye ịsụn laḅịaye anị jie-a ḅụọ-ẹ, finji mị mama ḅụọ na pẹkẹrẹ nwọ laḅịa,

¹⁷ ḅọkọ-chụa-chịn ma ḅeri ma ḅụ maịn seni jịnye-jịnye ḅie chuḅịa aye nwọ chụa, mịẹse àrị ineda kpechiaḅịa ọkụ. Ḅọkọ-chụa-chịn mamgba àrị seni jịnye-jịnye ḅie chuḅịa aye àrị nwọ nyanaḅịa.

¹⁸ Chuku daọrụ mị ḅụ si-a ḅọkọ-chụa-chịn nwọ mịẹ

¹⁹ seleḅa pẹkẹrẹ-a mesi nwọ mịẹ arịa chuku sẹkẹ, mama chuku sẹkẹye gbọrị ḅọkọ-chụa-chịn chuku ḅụ sime se arịa ḅeri ma jịnye-jịnye ḅie sọḅịa.

²⁰ Ḅọkọ-chụa-chịnḅụ si nwọ mịẹ Ikowarị mị ḅụ ọgọnọ daọrụ mị pịrị

²¹ se seleḅa chuku sẹkẹye ḅụ mesi nwọ mịẹ, maịn gbọrị-ḅọkọ-chụa-chịn chuku, gbọrị-ḅọkọ-chụa-chịn chuku ḅụ.

²² Ikowarị mị ọḅụ seni ịrụasọsọ anga da nyọ mị ḅụ, sonio-a ḅọkọ-chụa-chịn nwọ mịẹ,

²³ pịkị mama ḅọkọ-chụa-chịn nwọ mịẹ ịkọlị ma ḅụ chụa.

²⁴ Ma ịkọlị ma arịa ḅọkọ-chụa-chịn ma, chuku mị ḅụ àrị kpechi pịkị arịmgba chụrọma mun tịḅịju la. Ị́ seni mama ịkọlị ma mịẹ mama chịnma mịẹ gbọrị ḅara mị ị́ seni pịkị àrị mịẹḅịa ọkụ-ẹ.

²⁵ Anịọkụma nine-a ḅọkọ-chụa-chịn ma na arịa ineinfasi chuku sẹkẹ seleḅa ma na, maịn gbọrị chịn chuku gbọrị chịn chuku ḅụ-ẹ.

²⁶ “Jie-a ọjị chịn nwọ seni ḅọkọ ọgọnọ mgbẹsẹ-a chịn nwọ mịẹ, se sọnọ-a chịn Ikowarị mị ḅụ gbọrị pẹkẹrẹ ḅụ simeḅịa,

²⁷ sọnọ pịkị ísí ịrụasọsọ anga da nyọ simeḅịa, ọḅụju ḅụ.

²⁸ Ogboku mgbẹsẹchịn mị, anị iwoma mun chịnma ḅirima-ḅiri la, Ikowarị mị ḅụ gbọrị tongu ḅụ ọkịmun ísí tongu la.

²⁹ Ḅọkọ-chụa-chịn ma goli seni àrị oḅolo, pịkị goli se mịẹ kelekeleye ma seni àrị se mgbẹsẹchịn ma ḅụ sụka palị, àrị sọnị goli seni àrị mị-ẹ.

³⁰ Tụndụ mị ọgọnọ à seni ị́ ḍie ḅara mị nwọse Ikowarị mị nama chịẹma.

³¹ “Ḍikitọrụ-gbẹịn-lọkọḅịtẹ, ini bulu bulu na, awụwụ na, pịkị pulo-pulo nama oju ichuka seni ḍoriye nwọse nyọ kikima ḅịtẹ mị mịẹ. Anịaḅụ enjẹlḅọ ḍori chụa.

³² Ọjị chịn se mịẹ warịḅọkọ inein-a chịnma ḅụ anị seni sụka, anị ini goli seni oḅolo ayema, ye sụka àrị mgbọlụma se àrị sụka palị, àrị seni inein-a seleḅa chuku sẹkẹaye mịẹ.

³³ Nyọ kikima ḅịtẹ mị seni Ikowarị mị ochu mị chuku ḅie yesụka àrị mgbọlụma ḅụ sụka, ye ḅụ gịẹịn mama ḍụparị pẹkẹrẹ ma sime Ọḅọkụ Igbe mị se nyọ kikima ḅịtẹ mị ọḅụju koroma. Nyọ kikima ḅịtẹ mị anị Fịafịa nyọ mị na Fịafịatẹịn nyọ mị na ḅụ eke chụaḅịa.

³⁴ Ḅịpịgbẹịnye mị seni Ọḅọkụ Igbe mị ọgọnọ koroma.

³⁵ Dẹbụl mị se Fịafịatẹịn nyọ mị ḅụ pakụma koroma, Ikowarị mị anịa ọgọnọ da nyọ mị ḅụ; se tọnjie gbanaye mị chuku daọrụ ḅụ koroma.

³⁶ “Ikowarị mị ḅọkọ mị ḅụ ḍikitọrụgbẹịn lọkọ ḅịtẹ, ini bulu bulu na, awụwụ na, pịkị pulo-pulo nama oju ichuka seni ḍori ḅirimasa nyọ kikima ḅịtẹ nwọse sụka.

³⁷ Sọnọ-a goli se oḅolosa ọjị chịn ị́ nwọ mịẹ nyọ kikima ḅịtẹ mị pịrịḅịa, se goli yesụka àrị mgbọlụ ị́ nwọse àrị sụkaḅịa; sọnọ-a alapẹlẹka ikulele nwọ mịẹse arịa chuku sẹkẹ.