Obedaịa 1 - Kịrịkẹnị Baịbụl

¹ Mị Obadaya ḅe koro ịkịan mị-ẹ—anị Kụrọmamgba Nyanaḅọ Ḅe Idọm sẹ mị ḅụ ḍukoaye-ẹ. Nyanaḅọ Ḅe ori oria oku nwẹngị ḅọ se sẹma fịrịmasam, se mine wa oria oku mị naasam: “Ḅụkarakarama! Ó ye wa ọmụ se Idọm mị paka!”

Nyanaḅọ Ḅe Ọ̀ Fomuḅara Se Idọm Pịrịḅịa

² Nyanaḅọ Ḅe nwọse Idọm ḅẹmẹ, “Àrị ị́ mịẹse ị́ ḅụ lọkọḅịa; ị́ ọrị ḅọ goyegoye ị́ ḍikisimaḅịa.

³ Ị́ya ḅụdekichịẹma mị anị oḅori se ị́ chịnsam. Ị́ya tịḅịnị ama mị ị́ anị se kụrọ ịkụ ọgọnọ ḅụ owuni ineda tolu sọ ẹka nyọ mịẹsam; ị́ya warị mị gelele tụndụma ọgọnọ omi-ẹ gose, ị́ nwọse ị́ ḅụ ḅẹmẹ, ‘Tụḅọ ineda ị̀ jine koromaḅẹ?’

⁴ Igo ḅe warị gele ḅara ị́ nwọse ị́ya warị nama gelema sọnị, anị sime ḅara anị ḅọrọ lolia ma ogboku ḅụ sime sọnị, àrị ị́ jine koromaḅịa.

⁵ “Furuapụ ḍinḅie ḅo ọkụma, inia ḅụḅẹlẹye kẹngẹ mị ini ọkị soḅịaye-ẹ. Tomoni tụmgbakị elelenda nwọ gbala ọkụma, ini pa kalaye se koroma koromamẹ mịẹse tomoni ineda kọn ayema gbalaḅịa ḅara. Ọkụma ị́rị́ na tarakapụma ini okorona okorona ị́ ọfịn sinsam.

⁶ Isọ furoḅie pakaḅo apụ, ọ́mịna ngọ ini ọfọịnsam.

⁷ Ọ́mịna ḅụ sọ apụma ini ó telimasam; ọ́mịna ama ḅie ini ó depakụmasam. Ómine na deinma ḅụ sime-a tomonima mịọkụ ini ómine nẹngịmasam. Ómine na yefị gboloma ikiapụ ma ini mịọkụ ḍẹịntu ọ́ pịrịsam; ini nwọse ọ́ ḅẹmẹ, ‘Ómine opuma nemi kụkụye mị anị nde ju omi?’

⁸ “À fomuḅara seni Idọm pịrịḅịa ene mị inia yenemiapụma àrị ini famaḅịa inia nemi mị à nwọ kọrọrọsinḅịa.

⁹ Timan owunima inia ḅalafaḅịa, pịkị Idọm ḅie sime owuniḅọ goyegoye ini nwọ ḅaaḅịa.”

Nyanaḅọ Ḅe Gose Fomuḅara Se Idọm Mị Pịrịḅịaye Ọ̀ Nwọ Ḍukomẹ

¹⁰ Nyanaḅọ Ḅe pịkị nwọ ḅẹmẹ, “Ómine Idọm apụ, anịatịḅị ọ́mịna mịnapụ Izrẹlapụma, Jekọb ḅe furoḅie pakaḅo-apụ ma ọ́ nwọ furu, pịkị ini ḅaaye gose, ini ọ́ famaḅịa, se ọ́ ḅarị osi nyanaka gbasoḅịa.

¹¹ Ini na tarakapụma inia onu ma kan koroma ene mị ọ́ ḅụsikima simemẹ. Jerusalẹm ngọma pụra so se àrị ḍiama inia ḅụ ma pịrị igoniapụma na ómine na, ó si gbasịmẹ.

¹² Mgbọkụ ó ḅieḅẹlẹ ẹkẹ ọ́mịna mịnapụ Juda ḅie sime apụma sifụḅara ḅie sọ sịkị. Mgbọkụ ó ḍoroku ẹkẹ inia si ene ḅụ. Mgbọkụ ómine ini ḍẹrị ẹkẹ ye inia ḅụ si sịkị.

¹³ Mgbọkụ ómine ị̀ya tomonima opuama ḅie sọ ḍoroku ẹkẹ inia tọrụsiọrị ma ḅie se inia ngọma kọrị ẹkẹ ye ini na si ene mị ḅụ.

¹⁴ Mgbọkụ ó mun tẹrẹ-a ichira ateli ma ḅie chịẹ ẹkẹ mangị soarịapụ ma kunḅịa ẹrẹchị. Mgbọkụ ómine ini ḅọrọma se ini na tarakapụma pịrị ẹkẹ ye inia ḅụ si ene ḅụ.

Tamụnọ Ḅe Ọ̀ Fomuḅara Se Jịn-a Sẹ Ma Pịrịḅịa

¹⁵ “Ene mị kpekisam, Ị̀rị̀ Nyanaḅọ Ḅe, à ḅẹrẹkọn bebe sẹ mamgba pịrịḅịa sịkị. Idọm, ọ́ nwọ mịẹye mị ini se ọ́ mịẹḅịa. Ọ́ mịẹye mị ómine anị nyana ọkịḅịa.

¹⁶ Ị̀ya fịafịa chịngị mị ọgọnọ ḅụ ị̀ya tomonima ini akụ ḅụfụka nyanasam. Ọkụma akụtẹịn ḅụfụka mị nwọ kpekima sime-a sẹma ọrịḅịaye-ẹ; ini arịmgba ọkị ḅu se sịkịrị faḅịa.

Izrẹl Mị Ọmụ Anịa Ḅara Iḅiḅịa

¹⁷ “Ọkụma tọn apụ Zaịyọn Tụndụ mị ọgọnọ mangị soḅịa, anị pịkị osiḅụ simeḅịa. Jekọb tomonima ini kiri mị nyanaḅịa kọkọma iniaye-ẹ nwọḅẹ ḅaraḅụ.

¹⁸ Jekọb ḅe na Josẹf ḅe na tomonima ini fịnị kịkẹḅịa; fịnị samịna ịnyanya kọrịma ḅara ini nwọse Isọ tomonima famaḅịa. Isọ ḅe furoḅie pakaḅo-apụ ḅụ kọnḅịa ḅọ ofori-ẹ. Ị̀rị̀, Nyanaḅọ Ḅe, ọkwẹịnsam.

¹⁹ “Juda chuku daọrụ ḅụ ḅoapụ ma ini Idọm ḅie angaḅịa; ịrụasọsọ nyọ sime chịngịma pẹkẹrẹ apụma ini kụrọḅara se Filistia ọkịḅịa. Izrẹlapụma ini Ifrem na Sameria na kirima na nyanaḅịa; Bẹnjamin tomonima ini Giledị ọkịḅịa.

²⁰ Ini desin ọgọnọju Izrẹlapụ owunima ini vinpịkị ḅo se Fonisia ọkịmun ọgọnọ pẹkẹrẹ ọrụ sime Zarẹfat kanse anị ọkịḅịa. Sadis ḅie anga ini desin Jerusalẹm apụma ini Juda mị ḅe chuku ọrụ ḅụ sime amama kụrọḅara se àrị ọkịḅịa.

²¹ Ọmụḅaraiḅi Jerusalẹm owuapụma ini owu se Idọm paka se ḅẹrẹtọn anị pịrịḅịa. Se Nyanaḅọ Ḅe na mịnaḅụ na ori Amanyanaḅọ sọḅịa.”