Nehọm 3 - Kịrịkẹnị Baịbụl

Tamụnọ Ḅe Ḅẹrẹkọn Ninivẹ Mị Pịrịmẹ

¹ Anị iruo na nini kọn opuama mị, fa sime anị pịrịmẹ, simaḅịa ngọ na ọfọịnḅịaye na anịa ḅie ḅakamẹ!

² Poki! Fomuye nyọ fiema na, kiri nwẹngị arụ ma ḅụọ na, asụnma ḅụọ ḅie ma na, kiri nwẹngị owuni arụ ma ḅie fiearị ọkụ na!

³ Asụn nwẹngịmapụ ma ini owu pakamẹ, okola-agiji ma wakam ma ḅọrọmẹ, sụḅa ma nwananị nwananị mẹ! Ḍụẹịn ma ise se ḅụ kpokponima gelema simemẹ, àrị kịẹn ḅịa ọkụ ofori-ẹ— tomoni arịa ọgọnọ sokoro mḅiḅilemẹ!

⁴ Sẹfị Ninivẹ mị ini fomuḅara se anị pịrịsam. Ḍiri-a mịẹmịẹaye na arị mịẹmịẹaye na ḅein iḅi nyọ, ḍiri se sẹma mbasị, se tomonima seni omoniapụ mịẹmẹ.

⁵ Kụrọmamgba Nyanaḅọ Ḅe nwọ ḅẹmẹ, “À fomuḅara se ị́ pịrịḅịa, Ninivẹ! Àrị ị́ seni papaḅụsinḅịa se sẹ mamgba ị́ ọrịḅịa, ị́ya ḅụgerere mamgba ḅie ị́ ḍikiḅịa.

⁶ À yeḅụsọka ḅara se ị́ mịẹḅịa se ịlọlị seni ị́ gbẹịn-gbitipumaḅịa. Ḅalafa ḅụ tomoni ị́ ḍikiḅịa.

⁷ Ị́ ọrịapụ goyegoye ini ọḅụ gbinmaḅịa. Ini nwọ ḅẹḅịa, ‘Ninivẹ mị fa ḅie omi-ẹ! Tụḅọ ḍikiḅụgerere nyana anị pịrịḅe? Tụḅọ anịa kuḅie kụrọ mị nwọ ḍọkịḅe?’”

⁸ Ninivẹ, ị́ iḅi Tebẹs, Ijipt sẹ mị ḅie tịḅịnị ama mị nẹngị ḅara omi? Anị sọnị, agbọ sọ anị pịrịḅịa onu na kịkịna tọrụ anị nwọ nyanamẹ—Naịl tọrụ mị anị anịa agbọ mịẹ.

⁹ Anị ḅẹrẹtọn Sudan na Ijipt na pịrịmẹ, anịa kụrọ mị mun kuluma nyọ ofori-ẹ; Libya anị anị na gbọrịju sọ ye-ẹ.

¹⁰ Anị sọnị Tebẹs a tomonima ini ini desin mẹ. Opu atelima aka ḅụ ini inia awọma fomu ḅaamẹ. Ini ikoli se inia tịḅịnịma ịkasị somẹ se ini ini ḍiama ini kun soapụma pịrịmẹ.

¹¹ Ninivẹ, ị́rị́ sọnị ị́ mun iruḅu tọrụḅaama ḅie sọḅịa! Ị́rị́ na tarakapụma ḅara ḅie ị́rị́ sọnị ị́ mangị so ḍọkịḅịa.

¹² Ị́ya kụrọ owuni-a kirima, àrị ḅịasa figi chịnmgbọlụ chụasa chịnma na kịkịnaḅịa chịnma jike, se chịnmgbọlụma àrị sokoro kpọkọrọpụma ị́ ḅịpị ḅie sọḅịa!

¹³ Ị́ya owunima ini eremeni sime ọkụ simemẹ, pịkị ị́ya sẹ mị anị ḍikiḍikiapụ oforika ḅara, anị nwọse ị́rị́ na tarakapụma tọrọkọ sime waraḅẹ. Ó seni ọ́mịna onu ḅọkọ ma ḅọrọma ikulele ma, fịnị àrị ḍọkịma kọsịmaḅịa.

¹⁴ Ó mengi ḍu ini ọ́ gbẹịnmachịẹḅịa sịkị mị wẹrịma se ḅụkarakarama, se ọ́mịna kụrọ owuni kirima ọ́ nwọ mịẹ kụrọma! Aḅaịn mị gbẹịn se biriki nwọ mịẹ, se biriki okpokpo ma mịẹ karakarama!

¹⁵ Ọ́ mịẹ la-ọkụ la-ọkụ ini ọ́ dọkịma ḅaakẹ nwọ ḅẹḅẹ, ini owu ḅie ọ́ ḅaaḅịa; igurube ma ini ḍipi koromaye fị fama ḅara mị ini ọ́ famaḅịa ọkụ-ẹ. Igurube yi sara ḅara ọ́ nwọse yi sara waraḅẹ!

¹⁶ Ị́ ḅakama tuḅoni nyanatẹịn sotọrụ sime lolia ma nẹngịmẹ! Igurube arịa pamba ma finji se fin so ọkụ, anị ini mịọkụ sosa ọkụ-ẹ.

¹⁷ Igurube oḅoku ene ḅụ warị agbagba ḅụ sime ọkụ, anị ị́ya tịḅịnị fịrịnwẹngịapụma sime ọkụ-ẹ. Ọkụma ịrụa pakaḅosa ḅẹḅẹ, àrị finsosam, se gbọrịḅọ sọnị àrị mun anga nemikẹ!

¹⁸ Siria amanyanaḅọ, ị́ya gọvịnapụma ini fịsam, se ị́ya ḅịpị ḅẹrẹlapụ ma sọ ini fịsam! Tụndụ ma ọgọnọ, ị́ya tomonima ini galagalasam, se ini ọkị so vinpịkị warị ḅoḅịa ḅọ ofori-ẹ.

¹⁹ Ị́ laye ma àrị gwọḅịa ye ofori-ẹ; se ị́ya ịnọ ma ini ineda àrị gwọ ḅịamaẹkẹ. Ị́ya fa mị naa apụ mamgba, ini ḅara farị se ḍorokumẹ. Ị́ya siamịẹmịẹye ma ḅie gbọrịḅọ sọ mangị sokẹ.