Nẹhimaya 9 - Kịrịkẹnị Baịbụl

Tomoni Ma Inia Si Ma Gopakụmamẹ

^1-2 Anị gbọrị akalụ mị ḅie si inein-a ḍin fịnjị ene mị ḅụ tomonima koḅiriamẹ, inia sima gose kururu seni fịye-se-ḅụḅamamẹ. Jịn sẹ apụma ḅie ini gbọtụma iniaḅụ pusikimasam. Ini okuru ḅiriaye ḅiri pịkịna fọn seni inia tịḅị ọgọnọ saramẹ seni kururu ḍiepakụma gose. Anịsịkị ini sịsẹ se sakị ini na inia ḅieju-aḍapụma na mịẹ-a sima gomẹ.

³ Tẹrẹ awa na gbasịye ḅụ Nyanaḅọ inia Tamụnọ Ḅe Olokoma ini nwọ go ini pịrịmẹ, anịsịkị ísí tẹrẹ awa ma ini nwọse inia sima gopakụma se Nyanaḅọ inia Tamụnọ Ḅe tẹkẹmẹ.

⁴ Livaị apụma chịẹse-ḅẹrẹḍukoḅịa ẹbẹ anịnyọ omi-ẹ, anịa ọgọnọ anị mịna Livaị apụma Jẹsụwa, Banaị, Kadmịẹl, Shẹbanaya, Bunị, Shẹribaya, Banaị, pịkị Kịnenaị ḅe na chịẹye-ẹ. Ini kụrọma oloku Nyanaḅọ inia Tamụnọ Ḅe tẹkẹmẹ.

⁵ Mịna Livaị apụma: Jẹsụwa, Kadmịẹl, Banaị, Hashabneaịa, Shẹribaya, Hodia, Shẹbanaya ḅe na pịkị Pẹtahaya ḅe na tẹkẹ mị chịn koromamẹ. Ini nwọḅẹmẹ: “Ọ́ sịsẹ chịẹ se Nyanaḅọ ọ́mịna Tamụnọ Ḅe tokoni; ò tokoni ḅene-ḅene la! Ye ḅẹḅọ ḅẹḅọ oria boma nyana ẹrẹ mị tokoni, tomoniḅọ tokoni ḅaka la nyọ ofori-ẹ nwọḅẹ sọnị.”

Si Gopakụma Tẹkẹ

⁶ Anịsịkị Izrẹlapụma mị tẹkẹ mị kọnmẹ: “Ị́rị́, Nyanaḅọ, ị́rị́ ngẹrị anị Nyanaḅọ Ḅe-ẹ; ị́rị́ so ma na sotọrụ lolia ma na tẹmẹmẹ. Ị́rị́ kiri na tọrụ na, arịa ḅie simeaye goyegoye na tẹmẹmẹ; ị́ ḍumo seni arịmgba pịrịmẹ. Soḅie-a kụrọ ma tịḅịtu se ị́ tẹkẹmẹ.

⁷ Ị́rị́ Nyanaḅọ Tamụnọ Ḅe, Ebram ḅe sẹlẹmẹ seni Ụr ḅie ọ̀ pakụma so Babilọn mun mẹ; ị́rị́ oria ẹrẹ ḍinma se Ebraham seni ọ̀ chịnmẹ.

⁸ Ị́ ḍọkịḅo ọrịmẹ na ori ị́ ḅụ ḅereni nyanamẹ, se ị́ ori-na-ọḅọkụ-fịmẹ. Ị́ ḅereni ọ̀ pịrịmẹ na Kenan apụ ama mị, ị́ seni ọ̀ pịrịḅịa, Hitaị apụ ama mị na pịkịna Amọraị apụ ama mị na, Pẹrizaị apụ ama mị na, Jebus apụ ama mị na, Gagashaị apụ ama mị na, anị ò furo ḅie pakaḅoḅịa apụma angaḅịa ama ma-ẹ. Ị́ ḅereniye mị ị́ kokomẹ, anịatịḅị kuḅie-se-ị́ ḅụgbana gbẹịnmẹ.

⁹ “Mịna ḅieju-aḍapụma Ijipt ḅie tọrụsiọrị la-ọkụ ị́ ọrịmẹ; inia ḅarachụa-ḅi-chịn-ḅịpị mị ị́ naamẹ Awụwụ Tọrụ mị ḅụ.

¹⁰ Amanyanaḅọ ḅe ḅụ ḅalafama ḅụgbiripuma fịrị ị́ nwọ nwẹngịmẹ, oria fịrịtịḅịnị ma na, pịkịna oria ama mị ḅe tomonima na, anịatịḅị ini ị́ya tomonima pụnda ọkụ ị́ nemimẹ. Mịmgba sọnị ị́ nyana ẹrẹso mị, anịsịkịḅụ ị́ nwọ seni ini nẹngịmamẹ.

¹¹ Opu tọrụ mị ḅieḅụ ị́ ateli mịẹ ị́ya tomonima pịrịmẹ se kpoinkpoin-kiri ọgọnọ ị́ ini toluma ḅọrọmamẹ. Ini ḍuko apụma gbun tọrụ mị ḅie ini simbi fịmẹ, ịganịarị opu tọrụ ḅie ḍụparị ḅile-fa-ọkụ.

¹² Soḅuno ị́ nwọse enekaka ḅie ini pamunmẹ, pịkịna ḍin ḅie ḅụ ị́ fịnị kọrịma inia ateli pịrịmẹ.

¹³ Saịnaị Tụndụ mị nyọ ḅụ soḅie ị́ koroḅomẹ; ị́ ọkwẹịn ị́ya tomonima pịrị pịkị iḅi oloko seni ini pịrịmẹ pịkị karakara ḍawọaye na.

¹⁴ Ị́ ini telimamẹ na ị́ya Ịnyọsara Ene ma ini osiḅụ àrị koko, ị́ya fịrịnwẹngịḅọ Moziz ḅe ḅụ ị́ ḅọrọ ị́ya olokoma seni ini pịrịmẹ.

¹⁵ “Fịye ini tarị sịkị, soḅie ḅụ ị́ fịturu seni ini pịrịmẹ, ị́ pịkịna ḍụparị ḅie pakaḅo mengi seni ini pịrịmẹ. Ị́ ḍuko ini pịrịmẹ ini ama mị ọkị se anịa ḅụ kụrọ nyana anị ị́ ḅereni ini pịrị ama mị.

¹⁶ Ọkụma mịna ḅieju-aḍapụma ḅo opuaye mịẹse kọngọ kụrọmamẹ ini pịkị ị́ tọn ini pịrịayema kokokẹ.

¹⁷ Ini ḅịpịpoki ḍụkụkẹ; ị́ mịẹaye mamgba ini se ḅieḅaramamẹ; ị́ mịẹsa ḅụgbiripumaye ma ini se ḅieḅaramamẹ. Inia opuaye mịẹḅụ ini tịḅịdaḅịaḅọ sẹlẹmẹ, ini seni pịkịma mun Ijipt ḅie omoniapụ mịẹḅịa ẹrẹchị. Ọkụma ị́rị́ yeḅụ ḅarasinsin Tamụnọ-ẹ; ị́rị́ iḅi pịkịna ḅẹlẹma nyanamẹ, ị́ sarama ịganị-ganịkẹ. Ị́ya ḍikiḅụgerere mị ḍụḅamẹ; ị́rị́ ini sịkịkẹ.

¹⁸ Ini oru tẹmẹmẹ, ini posa ayamburama nambulo ọkụ simeye se ini nwọḅẹmẹ, ḅe mị Ijipt ḅie ini ọkịpakụmaḅo oru ḅe-ẹ! Ini ị́ wọlọ la-ọkụ ḍiki, Nyanaḅọ!

¹⁹ Ọkụma ị́rị́ ini wẹrịsokẹ anịnyọ onwun ele ḅie, anịatịḅị ị́ya ḍikiḅụgerere mị ḍụḅamẹ. Soḅuno mị na fịnị mị na ị́ ọkị sokẹ anị enekaka na ḍin na ḅụ ateli seni ini ḍie aye ma-ẹ.

²⁰ Ị́ya iḅimịẹḅụ, ini mịẹḅịaye ị́ nwọ ḍuko ini pịrịmẹ; mana ị́ nwọse fịye mịẹ ini ḍikiḍikimẹ, ị́ pịkịna mengi seni ini pịrị ḅumẹ.

²¹ Onwun ele mị ḅie kụra mesi ḅụ ini ḅiaye mamgba ị́ nyana ini pịrịmẹ; inia ḅụchụayema kankẹ, inia ḅụọma foin inia ḅụfụkamakẹ.

²² “Ị́rị́ ini mịẹmẹ ini sẹsẹ na amanyanakiri na nẹngịmamẹ, ini na eke nyana amama. Ini Hẹshbọn ama mị nẹngịmamẹ, Saịhọn ḅe ḅẹrẹtọntọn nyọ mị, pịkịna Bashan ama mị na anị Ọg ḅe amanyanaḅọ sọ ama mị.

²³ Ị́ tọn-a awọmẹnị seni ini pịrịmẹ, sotọrụ lolia ma ḅaka ọkụ ḅaka awọmẹnị, se ị́ mịẹmẹ ini ama mị nẹngịma seni anịa ḅie anga mẹ anị ị́ ḅereni inia ḅieju-aḍapụma pịrịsa ama mị.

²⁴ Ini Kenan ama mị nẹngịmamẹ; ị́rị́ anịnyọ ḅụ angapụma nẹngịmamẹ. Ị́ya tomonima ị́ kụrọ seni ini pịrịmẹ inia ḅụḅẹlẹ ḅara ini nwọse anịanga ḅụ tomonima na Kenan amanyanapụma na mịẹ.

²⁵ Ị́ya tomonima ini owuni-koruarị-kụrọ-opuama ma nẹngịma se àrị ọkịmẹ, fịye pakụma iḅi kirima na, ngọ ḅie ḅein-a warịma na, ini tẹmẹ seni mengi koko opuaye ma na, oliv ejema na, chịnmgbọlụ chụa ejema na, pịkịna irumịẹ chịnmgbọlụ ozuma na. Ini fị ḅiyeḅiye ini fịmẹ seni ḅo ḍụḅamẹ; ị́ se ini pịrị iḅiaye mamgba ḅụ ini tọrụ ḅẹlẹ nyanamẹ.

²⁶ “Ọkụma ị́ya tomonima ini kọngọ kụrọmaye mịẹmẹ se ị́ ḅịpị pokikẹ; ini ọḅụ pịkị ị́ya olokoma gbinmẹ. Ini inia ḅerinụnụ ịkịankoroapụma ḅaamẹ, anị ḍuko ini pịrị na ini tọrụ pịkị ị́ da-ẹ ḅe apụ ma-ẹ. Sịkịna sịkịna ḅụ ini ị́ wọlọmẹ,

²⁷ anịḅụ ị́ mịẹmẹ inina-tarakapụma ini nẹngịma seni ḅẹrẹtọn ini pịrịmẹ. Inia tọrụsiọrịma ḅie ini ị́ chịnmẹ na ḅarachụa ini pịrị, soḅie ị́ wẹrị inia ḅịpị pẹkẹrẹmẹ. Ị́ya opu ḍikiḅụgerere ḅụ ị́ tịḅịdapụ se ini fịrịmamẹ anị inina-tarakapụma ḅara ḅie ini ḍụa apụ ma-ẹ.

²⁸ Deinma ḅo sịkị, ini pịkịna si mịẹmẹ, se ị́ mịẹmẹ inina-tarakapụma pịkị ini nẹngịmamẹ. Anịsọnị ini si ḅụ pịkị se ị́ ḅe na ini ḍụa-ẹ ḅẹ sịkị, soḅie ḅụ ị́ ini naamẹ, sịkịna sịkịna ḅụ ị́ ini ḍụamẹ ị́ya opu ḍikiḅụgerere ḅụ.

²⁹ Ị́ inia ḅeri nụnụmẹ na ini ị́ya ḍawọaye ma ḍukoye mịẹ, ọkụma opuaye mịẹ ḅụ ị́ya olokoma ini sịkịmẹ, ị́ya Olokoma koko mị anị ḍumo ateli mị-ẹ nwọḅẹsọnị. Tịḅịḅiekụrọ na ininachịnḅụ na, ini àrị koko ḍụkụkẹ.

³⁰ Kụra ḅọrọ kụra sọ, inema ḅụ inia ḅeri ị́ nụnụnụnụmẹ. Ị́ya ịkịankoroapụ ị́ nwọ jikemẹ na ini ọkwẹịn, ọkụma ị́ya tomonima ini inikimẹ, anịẹrẹchị ị́ mịẹmẹ jịn-a sẹ ini nẹngịmamẹ.

³¹ Anịsọnị, ị́ya ḍikiḅụgerere mị ḍụḅa ẹrẹchị, ị́ ini sịkị anịkanịka ini ḅaasinkẹ. Ị́rị́ opu iḅimịẹ pịkị ḍikiḅụgerere nyana Tamụnọ-ẹ!

³² “Yei Tamụnọ, mịna Tamụnọ, ị́ ḍụḅa la-ọkụ ḍiki! Ị́ ḅalafamamẹ, ị́ Kụrọmẹ! Ḅereni ḅụ ị́ya ọḅọkụ ma ị́ kokomẹ. Asiria amanyanapụma wa pụnda sịkị ngịsị, ọkịḅo nwọ la sọnị, wa tọrụsiọrị lamasam! Mịna amanyanapụ na, mịna tịḅịnị na, mịna agbamịẹapụ na, pịkị mịna ịkịankoroapụma na, mịna ḅieju-aḍapụma na, pịkịna mịna tomoni mamgba na tọrụsiọrịmẹ. Se ḅiekoroma wa tọrụsiọrị lasa ọkụ!

³³ Ị́ karakaraye mị mịẹmẹ ị́ seni wa pịrị fomuḅara mị ḅụ; kuḅie-se-ḅụgbana gbẹịnḅọ ị́ nwọ sọmẹ, wa si mịẹsam nwọḅẹ sọnị.

³⁴ Mịna ḅieju-aḍapụma na, mịna amanyanapụma na, tịḅịnịma na, pịkịna agbamịẹapụma na ini ị́ya Olokoma kokokẹ. Ị́ tọn ini pịrịayema na ị́ ḅerinụnụ ayema na ini pokikẹ.

³⁵ Ị́ya ḅẹlẹma ḅụ, amanyanapụ ḅẹrẹtọn ị́ya tomonima pịrịmẹ anị ị́ seni ini pịrị finjima fịaye pakụma ama mị ḅie ini anga sịkị; ọkụma siḅụ-pịkị seni ị́ tẹkẹ mị ḅụ ini ḅịkịmẹ.

³⁶ Se mịọkụ ị́ seni wa pịrị ama mị ḅie mine omoniapụ-ẹ, mị fịaye pakụma wa pịrị ama mị ḅie.

³⁷ Amakiri mị pakụmaḅoaye ma so ị́ se mịna ọgọnọ gbana amanyanapụma damamunmẹ, wa simịẹ ẹrẹchị. Inia ḅụḅẹlẹḅara ini nwọse mine na mịna namama na mịẹmẹ, se wa pịkịna opu kururu ḅie simemẹ.”

Tomoni Ma Ḅarapụnụ Ḅịpị Ogbosọ Pịrịmẹ

³⁸ Pakasaye mamgba gose, mine Izrẹlapụma tẹmẹḅụ na gbun koroma ḅụ na ḅịpịogbosọ-ḍiri gịẹịnmẹ, mịna tịḅịnịma na, Livaị apụma na pịkịna mịna agbamịẹapụma na iniaye oḅoloaye ma seni anị oḅolo pịkịna ḅarapụnụ anị pịrịmẹ.