Nẹhimaya 8 - Kịrịkẹnị Baịbụl

Ẹzra Ḅe Oloko Mị Go Tomoni Ma Pịrịmẹ

¹ Sọnọma akalụ mị ḅie ḅụ, Izrẹlapụ mamgba ini ḅụkoroma inia amama ḅie simesam. Anị akalụ mị ḅe ngei ene inimgba Jerusalẹm amaogbo, Mengi-Onu-Odo ḅie koḅiriamẹ. Ini Ẹzra, agbamịẹḅọ pịkịna iḅiọkụma Oloko mị nemi ḍiri nemiḅọ ḅe ḅẹmẹ Nyanaḅọ Ḅe Moziz ḅe ḅụ ḅọrọ se Izrẹlapụma pịrị Oloko ḍiri mị ọkịḅo.

² Anịḅụ Ẹzra ḅe anị ọkị tomonima koḅiria sime nyọ ḅomẹ, owuapụ, eremeni, pịkịna awọmẹnịma ḅie sẹnị seni ineda yekaịnḅoḅịa apụ na.

³ Anịnyọ amaogbo onu mị nyọḅụ ori Oloko mị go ini pịrịmẹ dede ḅie sakịmun eneogboin lamẹ, inimgba pịkị ḅeri tokoloma pokimẹ.

⁴ Ẹzra ḅe mị mịẹmịẹye mị gose ini ḍụpọ seni ḅakụ gololoye ọgọnọ ọ̀ chịẹmẹ. Mịna apụma oria amaḅara anga chịẹmẹ: Matitaya, Shima, Anaịya, Yuraya, Hilkaya pịkịna Measaya ḅe na; pịkịna oria ereḅara anga ḅụ mịna apụma Pẹdaya, Mishaẹl, Malkaịja, Hashọm, Hashbadana, Zẹkaraya na pịkịna Mẹshụlam ḅe na chịẹmẹ.

⁵ Ẹzra ḅe anị gololoye mị ọgọnọ chịẹ tomonima nẹngị warasịkị, ini inia tọrụmgbọlụ mamgba seni ọ̀ ḅụ wẹrịmẹ. Ò ḍiri mị finji kirikiri inimgba sịsẹ chịẹmẹ.

⁶ Ẹzra ḅe nwọḅẹmẹ, “Nyanaḅọ, opu Tamụnọ Ḅe ọ́ nwọ tokoni!” Tomoni mamgba inia ḅarama dekichịẹma se nwọḅẹmẹ: “Anị-ọkọ-sime! Anị-ọkọ-sime!” Ini kpẹrẹkị inia tọrụ seni kiri lama se tẹkẹmẹ.

⁷ Ọḅụkọ ini sịsẹ inia kirima ḅụ chịẹmẹ, se mịna Livaị apụma Jẹsụwa, Banaị, Shẹribaya, Jamin, Akọb, Shabetaị, Hodia, Measaya, Kelita, Azaraịya, Jozabad, Hanan ḅe na pịkịna Pẹlaya ḅe na ḅelema Oloko mị fieye ḍuko ini pịrịmẹ.

⁸ Ini ḅịpịḅụ Tamụnọ Oloko mị pịkị ḍuko ḅelema ini pịrịmẹ, mịẹse tomonima ineda anị kaịnḅoḅịa ọkụ.

⁹ Oloko mị ḅiye mị tomonima nwọ naa sịkị, anị opuma inia ḅie sọmun ini jikeye gose ini sakị owumẹ. Anịgose gọvịnaḅọ Nẹhimaya ḅe na Ẹzra, agbamịẹḅọ pịkịna iḅiọkụma Oloko mị nemi-ḍiri-nemiḅọ ḅe na pịkịna Oloko mị fieye ḍuko ḅelema ini pịrịarị Livaị apụma na ḍuko tomoni mamgba pịrịmẹ na, “Mịmgba Ene mị anị Osiḅụ-sime Nyanaḅọ ọ́mịna Tamụnọ Ḅe pịrịmẹ, anịgose ómine ngịrị pịkị owu ma.

¹⁰ Mịọkụ ó so warị mun seni alalị fịaye chụọ sara. Fịaye ma na iru ma na ó seni nyanakapụma na ḍia fị. Mịmgba mị osiḅụ-sime wa Nyanaḅọ Ḅe pịrịmẹ, anịgose ómine ngịrịma. Nyanaḅọ Ḅe seni ọ́ pịrịsa ḅieḅẹlẹ mị anị ómine mịẹkụrọmaḅịa.”

¹¹ Livaị apụma tomonima kuḅie deinma se ḍuko ini pịrịaḅẹ na nwọ sime osiḅụ-sime ene ḅụ ini ngịrịma.

¹² Anịḅụ tomoni mamgba so warị mun se ḅieḅẹlẹ ḅụ fị-na-ḅu-na-ḅụ simemẹ, pịkịna ini nyanaye seni jịn apụ na ḍiamẹ, anịatịḅị ini go ini pịrị ḍiri mị ini kaịnḅomẹ.

Oguruguru Tịḅị Kikima Alalị Mị

¹³ Anịḅe eneḅa sẹsẹ ma ḅie tịḅịnịma na, agbamịẹapụma na, Livaị apụma na gboloma Ẹzra ḅe damamunmẹ Olokoma ḍukoaye ma ḍawọḅịa ẹrẹchị.

¹⁴ Ini ḍọkịḅo ọrịmẹ na Nyanaḅọ Ḅe Moziz ḅe ḅụ ḅọrọ se ini pịrị Oloko mị tọn Izrẹlapụma pịrịmẹ na Oguruguru Tịḅị Kikima Alalị mị koro-sịkị-koro-sịkị ini oguruguru warị ḅie anga.

¹⁵ Anịgose ini ḅịpị fịrịma Jerusalẹm na ísí opuamama na kala amama na sẹịnmamẹ: “Ọ́ paka chịngịma ọgọnọ mun, aka ịkpangị na oliv chịn ịkpangị na kọrọ ịkpangị na pịkị jịn-a chịn ịkpangị na nwọse ḅo, wa seni tịḅịkikima nyọ namaḅịa Oloko mị ḍiri mị ḅie gịẹịn ḅaraḅụ.”

¹⁶ Anịḅụ tomonima ini chịn ịkpangị ọkịḅo se, seni inia sẹrẹrẹ warịochuma ọgọnọ na, odo ma ḅie na, Oputẹkẹwarị odo mị ḅie na, pịkịna amaogbo Mengi-Onu-Ḅọkọ mị nyọ ḅụ na Ifrem Onu Ḅọkọ mị nyọ ḅụ na oguruguru warịma namamẹ.

¹⁷ Kunso seni pịkịmaḅo apụ mamgba oguruguru-a warịma nama seni arịa ḅie angamẹ. Nọn tọkụ Jọsụwa ḅe sịkị ngịsị mị anị tatarị mịẹ sịkị mị-ẹ, ọrụḅọḅọ pịkị opuma ḅieḅẹlẹmẹ.

¹⁸ Alalị-a ḍin ma ḅie ngei ene ọkịmun kuluma ene mị la, Tamụnọ Oloko ḍiri mị ḅie gbọrị ene gbọrị pẹkẹrẹ gbọrị pẹkẹrẹ ini nwọ gomẹ. Sọnọma ḍin ini nwọse alalị mị fịmẹ, se nine-a ḍin karama ene mị ini alalị fị kuluma mịẹmịẹye mịẹmẹ anị Oloko mị ḅi ḅaraḅụ.