Nẹhimaya 3 - Kịrịkẹnị Baịbụl

Kpoto Jerusalẹm Onu Ma Nama Mị

¹ Mịn anị Jerusalẹm onu ma nama ọkụ mị-ẹ. Gele Agbamịẹḅọ, Ẹlaịashib ḅe na, ò juo agbamịẹapụma na kpoto Anana Onu ḅọkọ mị namamẹ, se pịkị anị mịẹfịafịamamẹ, seni ḅọkọ ma seni anịaḅụ chụamẹ. Ini onu ma mịẹfịafịama ọkịmun Sọnọasi Sokopi warị mị na pịkị Hananẹl Sokopi warị mị na lamẹ.

² Jẹriko owuapụma ísí pẹkẹrẹ mị namamẹ. Imraị tọkụ, Zakọ ḅe jịn pẹkẹrẹ namamẹ.

³ Hasenaya sẹ mị Inji Onu ḅọkọ mị namamẹ. Ini ọgbụnụnụ ma chụa, pịkịna ḅọkọ ma chụamẹ, ini pịkịna ḅọkọ ịkasịaye seni arịaḅụ chụamẹ.

⁴ Hakọz tọkụ Yuraya ya Mẹrimọt ḅe jịn pẹkẹrẹ namamẹ. Mishẹzabẹl tọkụ Bẹrẹkaya ya Mẹshụlam ḅe pịkị jịn pẹkẹrẹ namamẹ. Beana tọkụ Zadọk ḅe anị ḍukoma pẹkẹrẹ mị namamẹ.

⁵ Tẹkoa owuapụma pịkị anị ḍukoma pẹkẹrẹ mị namamẹ, ọkụma ama mị ḅie tịḅịnịma, fịrị mị ḍikiḍikiarịapụ ma tọn ini pịrị ḅara mị, fịrị mị ini nwẹngị ḍụkụkẹ.

⁶ Pasia tọkụ Joiada ḅe na, Ḅẹsodiya tọkụ Mẹshụlam ḅe na Jẹshana Onu ḅọkọ mị namamẹ. Ini ikulele seni arịaḅụ chụa pịkịna ḅọkọ ma chụamẹ ini pịkịna ḅọkọ ịkasịḅịaye seni arịaḅụ chụamẹ.

⁷ Gibiọnḅọ Mẹlataịya ḅe na, Jadọn Mẹrọnọtḅọ ḅe na, pịkị Gibiọn na Mizpa na ḅie owuapụma anị ḍukoma pẹkẹrẹ mị namamẹ ọkịmun Yufretis Tọrụ mị ḅụ Ịrụasọsọ nyọ ḍikiḍikiarị gọvịna ḅe anga warị mị lamẹ.

⁸ Hahaịya tọkụ Ọzaịẹl, goli mịẹmịẹaye nemiḅọ ḅe pịkịna anị ḍukoma pẹkẹrẹ mị namamẹ. Hananaya, kụnụ olo mịẹmịẹḅọ ḅe anị ḍukoma pẹkẹrẹ mị namamun Finjima Onu ḅọkọ mị lamẹ.

⁹ Rifaya Họ tọkụ, Jerusalẹm mị seni mama kiri pu ḅụ gbọrị pẹkẹrẹ ḅụ ḅẹrẹtọn arịḅọ ḅe anị ḍukoma pẹkẹrẹ mị namamẹ.

¹⁰ Jẹdeya Harumaf tọkụ ḅe, oria warị na kpeki, anị ḍukoma pẹkẹrẹ mị namamẹ. Hatọsh Hashabneaịa tọkụ ḅe anị ḍukoma pẹkẹrẹ mị namamẹ.

¹¹ Harim tọkụ Malkaịja ḅe na, Pahat Moab tọkụ Hashọb ḅe na anị ḍukoma pẹkẹrẹ mị na pịkịna Fịturu fọị-a nyọma ḅụsime Sokopi warị mị na namamẹ.

¹² Halohẹsh tọkụ Shalọm, Jerusalẹm ḅie ḅẹrẹtọn ísí pẹkẹrẹ mị pịrịarịḅọ ḅe, anị ḍukoma pẹkẹrẹ mị namamẹ. (Oria eremeni awọma sọnị fịrị mị ḅụ ini ḅarachụamẹ.)

¹³ Hanọn ḅe na Zanoa opuama mị ḅie angapụma na, Pẹsịkiri mị ḅie Onu ḅọkọ mị namamẹ. Ini ḅọkọ seni arịaḅụ chụa pịkịna ikulele na ḅọkọ ịkasịḅịaye na seni arịaḅụ chụamẹ, onu-agbagba mị ini pịkịna kele nwọ telima mun ḅụọ-a tẹrẹ ẹndẹ na jieasi fịnjị nwọ lamẹ, pịkịna ọkịmun Ḅụrụaye Onu Ḅọkọ mị lamẹ.

¹⁴ Rikab tọkụ Malkaịja, ḅẹrẹtọn Bẹt-Hakirẹm pẹkẹrẹ mị pịrịarịḅọ ḅe kpoto Ḅụrụaye Onu ḅọkọ mị namamẹ. Ọ̀ ḅọkọ ma seni anịaḅụ chụa pịkịna ikulele na ḅọkọ ịkasịaye na chụamẹ.

¹⁵ Kolhoze tọkụ Shalọm, ḅẹrẹtọn Mizpa pẹkẹrẹ mị pịrịarịḅọ ḅe kpoto Ḍụparịma chuku ḅie pakaḅo Mengi Onu ḅọkọ mị namamẹ. Onu mị ḅe ḅọkọ mị ọ̀ gbẹịnmẹ, seni ọ̀ ḅọkọ ma seni arịa kiriḅụ chụa se pịkị ikulele na ḅọkọ ịkasịaye na seni chụamẹ. Shila Ḍapa mị nyọ ḅụ, ori ísí onu mị nama mun amanyanaḅọ ozu mị lamẹ, pịkịna mun Devid opuama ịkpịkpa ma ḅụ tu kiri daọrụ mị na lamẹ.

¹⁶ Azbọk tọkụ Nẹhimaya, ḅẹrẹtọn Bẹt Zọ mị ḅụ gbọrị pẹkẹrẹ pịrịarịḅọ ḅe, anị ḍukoma pẹkẹrẹ mị nama mun Devid iḍupu mị na ḍapa mị na pịkịna owunima odo mị na lamẹ.

Onu Mị Ḅụ Fịrịnwẹngị Livaị Apụ Ma

¹⁷ Mịna Livaị apụma onu mị ḅụ tọn tọn anyọ ḅụ fịrịnwẹngịmẹ: Banaị tọkụ Rihọm ḅe anị ḍukoma pẹkẹrẹ mị namamẹ; Hashabaya, Keila mị ḅụ gbọrị pẹkẹrẹ ḅụ ḅẹrẹtọn arịḅọ ḅe, ọ̀ ḅẹrẹtọn àrị nyọ mị ẹrẹḅụ anị ḍukoma pẹkẹrẹ mị namamẹ;

¹⁸ Hẹnadad tọkụ Bawaị, ḅẹrẹtọn Keila ḅụ ísí pẹkẹrẹ mị pịrịarịḅọ ḅe anị ḍukoma pẹkẹrẹ mị namamẹ;

¹⁹ Jẹsụwa tọkụ Iza, ḅẹrẹtọn Mizpa mị pịrịarịḅọ ḅe owuniaye warị mị tọrọkọ onu mị nama mun onu mị kanama nyọ mị lamẹ;

²⁰ Zabaị tọkụ Barọk ḅe, anị ḍukoma pẹkẹrẹ mị namamun Gele Agbamịẹḅọ Ẹlaịashib ḅe warị ḅọkọ mị lamẹ;

²¹ Hakọz tọkụ Yuraya ḅe ya Mẹrimọt ḅe anị ḍukoma pẹkẹrẹ mị namamun Ẹlaịashib ḅe warị kuluma mị lamẹ.

Onu Mị Ḅụ Fịrịnwẹngị Agbamịẹapụ Ma

²² Mịna agbamịẹapụma onu mị ḅụ tọn tọn angaḅụ fịrịnwẹngịmẹ: Jerusalẹm iri ma ḅieḅụ ḅo agbamịẹapụ anị ḍukoma pẹkẹrẹ mị namamẹ;

²³ Bẹnjamin ḅe na Hashọb ḅe na inia warịma tọrọkọ sime anị ḍukoma pẹkẹrẹ mị namamẹ; Ananaịya tọkụ Measaya ya Azaraịya ḅe oria warị tọrọkọ anị ḍukoma pẹkẹrẹ mị namamẹ;

²⁴ Binuị tọkụ Hẹnadad ḅe Azaraịya warị ḅụ anị ḍukoma pẹkẹrẹ mị namamun onu mị ịkọlị lamẹ.

^25-26 Ụzaị tọkụ Pẹlal ḅe anị ḍukoma pẹkẹrẹ mị namamẹ, onu mị agbagba ḅụ na, amanyanaḅọ odo ḅụ ọgọnọ ọrụ sokopi warị mị na, nyọ koruapụ odo mị na kpeki nyọḅụ, ọ̀ fịrị mị sakịmẹ; Parọsh tọkụ Pẹdaya ḅe anị ḍukoma pẹkẹrẹ mị namamun Mengi Onu ḅọkọ ḅụ ịrụapakapaka nyọ na Oputẹkẹwarị koruapụ sokopi warị mị na lamẹ. (Mịnyọ mị anị Ọfẹl nwọ chịn opuama mị na kpekimẹ, anị Oputẹkẹwarị fịrịnwẹngịapụma anga nyọ mị-ẹ.)

Fịrịnwẹngị Jịn Apụ

²⁷ Tẹkoa owuapụma anị ḍukoma pẹkẹrẹ mị namamẹ, inia maịn karamaye, Oputẹkẹwarị koruapụ opu sokopi warị mị na damadama gbọrị nyọḅụ ini sakị mun Ọfẹl mị na kpeki onu mị lamẹ.

²⁸ Agbamịẹapụ gbọrị kpo anị ḍukoma pẹkẹrẹ mị namamẹ. Asụn Onu ḅọkọ ḅụ wẹrị ọgọnọ ọrụda, ọrụḅọḅọ nụḅọ warị tọrọkọye mị namamẹ.

²⁹ Ima tọkụ Zadọk ḅe oria warị tọrọkọ sime ísí pẹkẹrẹ mị namamẹ. Shẹkanaịya tọkụ Shẹmaịya, ịrụapakapaka nyọ da Onu ḅọkọ mị ḍikiḍikiarịḅọ ḅe, ísí pẹkẹrẹ mị namamẹ.

³⁰ Shẹlẹmaya tọkụ Hananaya ḅe na, Zalaf sonio karama tọkụ Hanọn ḅe na, ísí pẹkẹrẹ mị namamẹ, anị ini maịn karama namaye-ẹ. Bẹrẹkaya tọkụ Mẹshụlam ḅe oria warị tọrọkọ sime ísí pẹkẹrẹ mị namamẹ.

³¹ Malkaịja, goli fịrịnwẹngịḅọ ḅe, ísí pẹkẹrẹ mị namamun Oputẹkẹwarị fịrịnwẹngịapụma na, tuḅonima na nyọ mị lamẹ, anị onu mị ọgọnọ ọrụḅụ, ịrụapakapaka nyọ da onu mị ọgọnọ sime warị mị, Mifkad Onu ḅọkọ na kpekiye mị.

³² Goli fịrịnwẹngịḅọ ḅe na tuḅonima na kuluma pẹkẹrẹ mị namamẹ, anga sịkịḅụ sime warị mị ḅụ ọkịmun Anana Onu ḅọkọ mị lamẹ.