Nẹhimaya 2 - Kịrịkẹnị Baịbụl

Nẹhimaya Ḅe So Jerusalẹm Mun mẹ

¹ Atazakzis ḅe ḅo amanyana si karama kụra mị ḅie inein akalụ ḅiri ḅụ, amanyanaḅọ ḅe yefịarị sịkịḅụ. Àrị iru ọkịmun ọ̀ pịrịmẹ. Jịn sịkị àrị ngịrị ma ori ọrịkẹ,

² anịḅụ ò gbelamẹ, “Cheye gose ị́ opuma ngịrị-ao? Ị́ ḅụfụkaka sịkị anịọkụma anị fieaḅẹ na ị́ ḅieḅẹlẹkẹ.” Ị̀ ḅalafamẹ

³ se à nwọ pẹkẹrẹmẹ, “Amanyanaḅọ ḍumo gbamaso! Nde àrị ngịrị-ẹka ọkụ, ị̀ya ḅieju-aḍapụma ini nwọ ḍipi opuama mị nwọ kansarasosa sịkị, pịkịna anịa onu ḅọkọ ma fịnị dọkịma gbinsam?”

⁴ Amanyanaḅọ ḅe gbelamẹ, “Cheye ị́ nwọ ḅi?” À Soḅie Tamụnọ Ḅe tẹkẹmẹ,

⁵ se à nwọse amanyanaḅọ ḅe ḅẹmẹ, “Nemikase Ị́rị́ Amanyanaḅọ ḅe ị̀ ḅẹlẹmamẹ nwọḅẹ ọkụma, pịkịna àrị ị́ ḅara ḅiḅịaye mị ḅereni ị̀ pịrịḅịa ọkụma, ye à so Juda ama mị mun, ị̀ya ḅieju-aḍapụma ini nwọ ḍipi nyọ mị, mịẹse àrị ineda kpoto opuama mị namaḅịa ọkụ.”

⁶ Amanyanaḅọ ḅe, anịsịkịḅụ tarọ ma orianga sịkị á kpọnjị sime waraḅẹ, à ḅiye mị ini ḅereni ị̀ pịrịmẹ. Ori ị̀ gbelamẹ nde sịkị ị́ mun ḅe, se nde sịkị ị́ vinpịkị ḅoḅe? Amanyanaḅọ ḅe, anị ọ̀ ḅụḅẹlẹmẹ; ori ị́ se sẹịnmẹ, se à sịkị go ọ̀ pịrịmẹ.

⁷ Anịsịkị à ḍuko ọ̀ pịrịmẹ na ò kele iḅimịẹ ḅaraḅụ ḍiri pẹkẹrẹ seni ị̀ pịrị, à se mun Yufretis Tọrụ ḅụ ịrụasọsọ nyọ ḅụ sime sẹma ḍikiḍikiarịapụ ma pịrị, na ini ị̀ ḅụfụkamama à nwẹngị ḅọrọ mun Juda mị la.

⁸ À pịkịna ọ̀ ḅara à seni mun Esaf, anị amanyanaḅọ ḅe opu piri mị ḍikiḍikiarịḅọ ḅe pịrịḅịa ḍiri pẹkẹrẹ ḅimẹ, na ọ̀ chịn seni ị̀ pịrị à seni Oputẹkẹwarị mị tọrọkọ sime owuni-kụrọ-warị mị ḅọkọ ma chụaḅịaye, pịkị opuama mị ḅe onu ma chịn na, pịkịna àrị angaḅịa warị chịn na. Amanyanaḅọ ḅe àrị ọ̀ ḅara ḅiye aye mamgba ò seni ị̀ pịrịmẹ. Anịatịḅị Tamụnọ Ḅe ori ị̀rị̀ na omi-ẹ.

⁹ Amanyanaḅọ ḅe, da owuni na, pịkịna asụn gbọrị owuni kpo na se ị̀ ḅụchụamẹ, se à nwẹngị mị kọnmamun Yufretis Tọrụ mị ḅụ ịrụasọsọ pẹkẹrẹ mị lamẹ. Anịnyọ ḅụ Amanyanaḅọ ḅe se ị̀ pịrị ḍiri mị à nwọse nyọ mị ḍikiḍikiarị gọvịna apụma pịrịmẹ.

¹⁰ Ọkụma Bẹt Horọn ama mị ḅieḅụ ḅo Sanbalat ḅe na Tobaya, Amọn sẹ mị ḅie gbọrị opu fịrịnwẹngịḅọ na naamẹ na gbọrịḅọ Izrẹl mị tẹlịma iḅima Izrẹlapụma pịrịḅịa ẹrẹchị ḅomẹ, se mịn mị opuma ini ịganịmamẹ.

¹¹ À ḅọrọmun Jerusalẹm mị lamẹ,

¹² Tamụnọ Ḅe ị̀ chukuruma se à mun nwẹngị Jerusalẹm mị pịrịḅịa fịrị mị à ḍuko gbọrịḅọ sọnị pịrịka tẹrẹ-a ḍin lamẹ. Se gbọrị ene ḍin ogbo à sịsẹ se nwẹngị pakamẹ, ị̀rị̀ na mun apụma ḅie kalapụ à nwọ ọkị ị̀ ḅụchụamẹ. Nama ma ḅie wa ọkị gbọrị nama anị ị̀ pụra yepụra asụn ḅe kẹngẹ-ẹ.

¹³ Pa pịkị ḍin ḅie mị àrị opuama mị wẹrịso Pẹsịkiri Onu Ḅọkọ mị ḅụ ịrụasọsọ nyọ ḅụ ḅọrọ mun chuku ọrụ ḅụ Dragọn Mengi tịḅị ọgọnọju ḅụ ḅọrọ mun Ḅụrụaye Onu Ḅọkọ mị lamẹ. À mun-arị sịkị, à kweinma onu ma na pịkịna fịnị dọkịmasa onu ḅọkọ ma na ḍikimẹ.

¹⁴ Anịsịkị opuama mị ḅụ ịrụapakapaka nyọ daọrụ ḅụ à nwẹngị ọgọnọ ọrụ damun Pẹsịkiri Onu Ḅọkọ mị na Amanyanaḅọ Ḍapa mị na lamẹ. Ị̀ pụra nwẹngịarị yepụra asụn ḅe kansaraye ma ḅie ori ineda ḅọrọḅịa ateli ọrịkẹ.

¹⁵ Anịẹrẹchị à koro Kidrọn Pẹsịkiri ḅie mun seni onu ma ḍiki nwẹngịma mun mẹ. Anịsịkị à pịkịna vinpịkị à ḅo ọkụ mị ḍuko nwẹngịmun Pẹsịkiri Onu Ḅọkọ mị ḅọrọmun opuama mị lamẹ.

¹⁶ Ama mị ḅie sime fịrịtịḅịnị ma ḅie gbọrịḅọ sọnị, à mun-anga na, à mịẹarịye na nemiḅọ ofori-ẹ. Anịsọnị gbọrịye sọ à ḍuko ị̀ juo Juapụma pịrịkẹ—anịḅọrọ agbamịẹapụ ma-o, tịḅịnị ma-o, fịrịtịḅịnị ma-o, anịkanịka papa jịn apụ sọnị, fịrị mị ḅụ ḅarachụa nwẹngịḅịa apụma sọnị à yeḍuko ini pịrịkẹ.

¹⁷ Anịsịkị, mịọkụ à nwọse ini ḅẹmẹ, “Ó ḍiki, ḅo wa la ḅụfụka mị, anịatịḅị Jerusalẹm mị kangulugulusam, anịa onu-a ḅọkọ sọnị dọkịfasam. Ó ye wa kpoto opuama mị onu ma nama chịẹma seni wa la ḅụgerere mị ḅo kuluma.”

¹⁸ Se à pịkịna ḍuko ini pịrịmẹ, Tamụnọ Ḅe wẹrị ị̀rị̀ na sime se ḅarachụa ị̀ pịrị ọkụ na, pịkịna Amanyanaḅọ ḅe ḍuko ị̀ pịrịaye na. Ini ḅereni se nwọḅẹmẹ, “Ó ye wa kpoto onu ma namachịẹma!” Se ini ḅụkarakarama fịrị sakị mị pịrịmẹ.

¹⁹ Sanbalat ḅe na Tobaya ḅe na Gẹshẹm nwọse chịn gbọrị Arabḅọ na wa tọn seni mịẹḅịaye mị naa sịkị ini wa ḍẹrị se nwọḅẹmẹ, “Ó koroma seni ọ́ mịẹ ḅiarịye mị anị cheye? Ọ́ kọngọ kụrọma Amanyanaḅọ ḅe pịrị-ẹ mun-ao?”

²⁰ À nwọ pẹkẹrẹmẹ, “Soḅie Tamụnọ Ḅe ọ̀ mịẹḅịa, seni ye mine na tọrọkọ-tọrọkọ munḅịa. Mine oria fịrịnwẹngịapụ-ẹ, wa pịkịna fịrị mị sakị-ẹmun-aḅẹ. Ọkụma Jerusalẹm mị nyana ngọma ḅieḅụ ọ́ nyana kụrọ ofori-ẹ, pịkịna anịa ama anga-anga ḅara na gbolomaye ḅụ ó gbolomaye ofori-ẹ.”