Nẹhimaya 10 - Kịrịkẹnị Baịbụl

¹ Tatarị ḅarapụnụḅọ anị gọvịna ḅe-ẹ, Hakalaịya tọkụ Nẹhimaya ḅe, anịeso Zẹdẹkaya ḅe pịkịna ḅarapụnụmẹ. Mịna apụma sọnị ḅarapụnụmẹ: Sẹraịya, Azaraịya, Jerimaya, Pashọ, Amaraya, Malkaịja, Hatọsh, Shẹbanaya, Malọk, Harim, Mẹrimọt, Obadaya, Danịẹl, Ginetọn, Barọk, Mẹshụlam, Abaịja, Mijamin, Meazaịya, Bilgaị, pịkịna Shẹmaịya ḅe na. Jẹsụwa Azanaịa tọkụ, Binuị Hẹnadad-sẹ-ḅọ, Kadmịẹl, Shẹbanaya, Hodia, Kelita, Pẹlaya, Hanan, Maịka, Rihọb, Hashabaya, Zakọ, Shẹribaya, Shẹbanaya, Hodia, Banaị, pịkị Bẹnịnụ ḅe na. Parọsh, Pahat Moab, Ilam, Zatu, Banaị, Bunị, Azgad, Bebaị, Adonaịja, Bigvaị, Adin, Ata, Hẹzekaya, Azọ, Hodia, Hashọm, Bẹzaị, Harif, Anatọt, Nebaị, Magpiash, Mẹshụlam, Hiza, Mishẹzabẹl, Zadọk, Jadua, Pẹlataya, Hanan, Anaịya, Hosia, Hananaya, Hashọb, Halohẹsh, Pilha, Shobẹk, Rihọm, Hashabna, Measaya, Ahaịa, Hanan, Enan, Malọk, Harim, pịkịna Beana ḅe na.

Agbamịẹapụ: Livaị apụ: Tomonima tịḅịdapụ: Ḅịpịse-ogbosọ Ḍiri Mị

²⁸ Mine Izrẹlapụ, anị agbamịẹapụ na, Livaị apụ na, Oputẹkẹwarị koruapụ na, Oputẹkẹwarị ḅie nime chuapụ na, Oputẹkẹwarị ḅie fịrịnwẹngịapụ na, pịkịna Tamụnọ Oloko mị ḍukoye mịẹarịapụ mamgba na, iniaḅụma pusikimasam mịna ama ḅie angarị jịn-sẹ-apụ ma ḅie ḅụ, mine, mịna ere mamgba na gboloma, pịkị mịna awọmẹnịma ḅie sẹnị seni ineda yekaịnḅoḅịa awọmẹnị mamgba na se chụa,

²⁹ mịanga mịna tịḅịnịma ḅụ sọ se yekarịfịmẹ; worinime sime wa pịrịmẹ wa anị kanmẹ ḅẹḅẹ, na wa Tamụnọ Oloko mị ḍukoḅaraḅụ wẹrị ama angaḅịa, anị Tamụnọ Ḅe, oria fịrịnwẹngịḅọ Moziz ḅe ḅụ seni wa pịrịye mị; na Nyanaḅọ, wa Nyanaḅọ Ḅe tọn wa pịrịaye mamgba wa mịẹḅịa; wa pịkịna oria olokoma na àrị ḅi aye mamgba na kokoḅịa.

³⁰ Wa mịna ama ḅie angarị jịn-sẹ-apụ ma na ere-sime-gboloma-ẹkẹ.

³¹ Jịn-sẹ-apụ nemikase Ịnyọsara Ene ḅie anịkanịka jịn osi nyana ene ḅie ḅo fịayemgbọlụ anịkanịka jịn fịaye sọnị se wa dẹrị ḅimẹ ḅẹḅẹ wa fẹ ẹkẹ inia ḅara. Sọnọma kụra karama kụra goyegoye, ozu mị ḅie wa ḅarị yeḍipi-ẹkẹ, safịapụ sa goyegoye wa wẹrịsoḅịa.

³² Kụra goyegoye, gbọrịḅọ gbọrịḅọ seleḅa sọnọ-a opu okpokpo, sọnọ-a opu okpokpo nwọ gbẹịn gbẹịnḅịa, anị seni ḅarachụa Oputẹkẹwarị ḅụ fịrịnwẹngị igbiki gbẹịnḅịaye-ẹ.

³³ Wa Oputẹkẹwarị ḅie tẹkẹtẹkẹḅịa sịkị-ma-ḅụ-aye ma wa nwọ pakụmaḅoḅịa: osiḅụ sime fịturu, ene ene ḅe ḍiepịrịaye agbamịẹmịẹḅịa fịayemgbọlụ, ene ene ḅụ dọkịma agbamịẹḅịa nama, Ịnyọsara Ene ḅie seni ḍiepịrịaye agbamịẹḅịaye, Ịwọ Akalụ Alalị enema na pịkị osi nyana jịn ḍiepịrịaye agbamịẹḅịaye na, se jịn osi nyana agbamịẹḅịaye na, seni Izrẹl mị mịẹasi sinḅịa ḍiepịrịaye agbamịẹḅịaye na, pịkị Oputẹkẹwarị ḅie mịẹka mịẹka ḅara ḅụ sime jịn aye na.

³⁴ Mine tomonima na, agbamịẹapụma na pịkịna Livaị apụma na, kụra goyegoye ḅie ịkịan-wakịḅịa, anị seni dọkịma agbamịẹ se Nyanaḅọ mịna Tamụnọ Ḅe pịrịḅịa fịnị pakụmaḅoḅịa sẹma nemiḅịa ọkụ, Oloko mị ḍukoḅaraḅụ.

³⁵ Kụra goyegoye wa tatarị soku fịayemgbọlụ ma wa nwọse Oputẹkẹwarị ḅie mun ḍiepịrịaye agbamịẹḅịa, pịkị mịna chịnmgbọlụ-chụa-chịn ma ḅụ tatarị ḅịasa chịnmgbọlụma na.

³⁶ Mịna ḅie tatarị owutọkụ yiḅọ-yiḅọ se mun Oputẹkẹwarị ḅie agbamịẹḅọ ḅe, Oloko mị ḍukoḅara ọ̀ tọkụ ḅe seni osiḅụ wẹrị Tamụnọ Ḅe pịrị. Wa pịkịna mịna nambuloma ḅie tatarị yiwu ḅe se osiḅụ wẹrịḅịa, pịkịna mịna ananama na oḅorima na ḅie tatarị yi ayema sọnị.

³⁷ Wa tatarị soku fịayemgbọlụ seni mịẹ-a fịturu ma wa se mun Oputẹkẹwarị ḅie agbamịẹḅọ ḅe pịrịḅịa kụra goyegoye, pịkịna mịna jịn ḍiepịrịaye agbamịẹḅịa iru na, oliv pulo na, pịkịna jịn kịrịkịrị chịnmgbọlụ-a fịaye na. Livaị apụma, mịna ozu ḍipi ịwọ amama ḅie ḅo oyi-a-kiri-ḅe-gbọrị-kiri mị ọkịkị apụma; mịna amakiri ma ḅieḅụ paka fịayema ḅe oyi-a-kiri-ḅe-gbọrị-kiri mị wa se mun ini pịrịḅịa.

³⁸ Erọn furoḅie-agbamịẹapụ ma ini Livaị apụma na gbọrị anga simeḅịa oyi-a-kiri-mị-ḅe gbọrị kiri mị ochoḅịa sịkịḅụ pịkị seni Oputẹkẹwarị ḅie fịrịnwẹngịḅịa igbiki na gbolomaye ḅụ, Livaị apụma ini ocho-ocho oyi-a-kiri-ḅe-gbọrị-kiri mamgba ḅe gbọrị kiri ini seni mun Oputẹkẹwarị mị ḅie igbiki-koko-jukuru mị ḅie chu.

³⁹ Izrẹlapụma na Livaị apụma na anị ini ocho-pakụmaḅosa fịayema na iru na, oliv pulo na se mun Oputẹkẹwarị ḅie fịrịnwẹngịaye ma sime yekoko-jukuru ḅie chuḅịa, anịsịkị ḅụ anị agbamịẹapụma na Oputẹkẹwarị koruapụma na fịrị ḅie simearị sịkị ḅụ-ẹ, anịnyọ anị pịkị Oputẹkẹwarị ḅie nime-chu-ogboapụ ma anga agbagba mị-ẹ. Mịna Tamụnọ Ḅe warị mị wa sịkị ẹkẹ.