Matio 8 - Kịrịkẹnị Baịbụl

Jizọs Ḅe Gbọrị Owuḅọ Gwọmẹ

¹ Jizọs Ḅe chịngị mị ọgọnọ koroḅo sịkị, ḅaka tomonikpo Ò ḍukomẹ.

² Anịsịkị ḅụkan obi kọn àrị gbọrị owuḅọ Ọ̀ damaḅomẹ, Ọ̀ tọrọkọ ḅụ ọ̀ kpẹrẹkị koro, se nwọ ḅẹmẹ, “Nyanaḅọ, Ị́ nemikase ḅereniḅịa ọkụma, Ị́ ineda ị̀ mịẹfịafịamaḅịa.”

³ Jizọs Ḅe Ọ̀ ḅara ịsụn pakụma ọ̀ lamamẹ, se nwọ pẹkẹrẹ mẹ, “À ḅimẹ, fịafịa!” Anịkirikiri nweniḅọ ḅe ọ̀ kọn obi mị ḅụ ọ̀ ḅụ iḅimẹ.

⁴ Anị Jizọs Ḅe nwọse ọ̀ ḅẹye-ẹ, “Poki! Ḍuko gbọrịḅọ sọnị pịrịma, ọkụma so dada agbamịẹḅọ ḅe damamun, se ori ị́ sime ọkụ ḍiki anịsịkị Moziz ḅe tọn koromasa agba mị nwọ mịẹ, se ḍiepakụma tomoniḅọ goyegoye nwọ pịrị na ị́ ḅụ iḅisam.”

Jizọs Ḅe Gbọrị Rom Owunitịḅịnịḅọ Fịrịnwẹngịḅọ Gwọmẹ

⁵ Jizọs Ḅe Kapanịọm ḅie sọ sịkị, gbọrị Rom owunitịḅịnịḅọ Ori na ịrịamẹ, se Ọ̀ tẹkẹmẹ na Ọ̀ ḅarachụa ọ̀ pịrị-ẹ:

⁶ “Ị̀ Nyanaḅọ, ị̀ya fịrịnwẹngịḅọ warị ḅie obi se mọnọye ọgọnọ ḅọlọlọ waraḅẹ, ori ineda ḅụ jikekẹ, se opuma tọrụsiọrịaḅẹ.”

⁷ Jizọs Ḅe nwọ ḅẹmẹ, “À mun mịẹse ọ̀ ḅụ iḅiḅịa.”

⁸ Anị owunitịḅịnịḅọ ḅe pẹkẹrẹye-ẹ, “Yei anịkẹ, ị̀ Nyanaḅọ, ị́rị́ ị̀ya warị ḅo mị Ị́ gbẹịnkẹ. Ị́rị́ pa kụrọ pịrị, ị̀ya fịrịnwẹngịḅọ ḅe ọ̀ ḅụ iḅiḅịa.

⁹ Ị̀rị̀ sọnị, kụrọ nyana ḅẹrẹtọn apụma chuku ḅie simeḅọ-ẹ, à pịkị ị̀ chuku ḅie sime owuni nyana waraḅẹ. À tọn ḅe ḅọ ḅe pịrị na ‘Mun!’ ò mun mẹ, à pịkị tọn ísíḅọ ḅe pịrị na, ‘Ḅo!’ ò ḅomẹ; à pịkị tọn ị̀ya omoniḅọ ḅe pịrị na ‘Mịn mịẹ!’ nwọ ḅẹ ọkụma, ori anị mịẹmẹ.”

¹⁰ Jizọs Ḅe mịn mị naa sịkị, anị Ọ̀ ḅụgbiripumamẹ, se Ọ̀ nwọse Ò ḍuko mun-arị apụma ḅẹmẹ, “À ḍuko ọ́ pịrịaḅẹ na, ma à nwọ sime opu ḅereni nyanaḅọ nwọ ọrịkẹ Izrẹl mị ḅie.

¹¹ À ḍuko kụrọma ọ́ pịrịaḅẹ na, tọn apụ ịrụa mị pakapaka nyọ na, ịrụa mị sọsọ nyọ na ḅụ wẹrị ḅo soḅie Amanyanakiri mị ḅie Ebraham ḅe na, Aịzịk ḅe na, pịkị Jekọb ḅe na sime yefịḅịa,

¹² ọkụma Amanyanakiri mị ḅie sime na gbẹịn apụma ini nwọ suma pakụma kanakana mị ḅie chuḅịa, ini anị nyọ ḅụ sime owu se pịkị inia akama farịḅịa.”

¹³ Anị Jizọs Ḅe nwọse owunitịḅịnịḅọ ḅe ḅẹye-ẹ, “So warị mun, ị́ ḅereni ḅara mị anị pịkị nwọ paka ị́ pịrị.” Se anị kirikiri owunitịḅịnịḅọ ḅe fịrịnwẹngịḅọ ḅe ḅụ iḅimẹ.

Jizọs Ḅe Tọn Apụ Gwọmẹ

¹⁴ Jizọs Ḅe Pita ḅe warị nwọ mun mẹ, se anị nyọ Ò Pita ḅe fuarọ ma nwọ ọrịmẹ mọnọye ọgọnọ, ḅụfụka ḅụ á ḅọlọlọ waraḅẹ.

¹⁵ Ọ̀ ḅara se á ḅara lamamẹ se ḅụfụka mị á koroma somẹ, se á sịsẹ sakị fịrịnwẹngị Ọ̀ pịrịmẹ.

¹⁶ Saso ḅiri ḅo lasịkị, ini si-a-tẹmẹ ḅie sime tọn apụ nwọ ọkịḅo Jizọs Ḅe pịrịmẹ. Jizọs Ḅe kọn gbọrị ọkwẹịn si-a-tẹmẹma desinmẹ, se obiapụ mamgba ḅụ iḅimẹ.

¹⁷ Ọ̀ mịn mị nwọ mịẹmẹ mịẹse ịkịankoro Aịzaya ḅe ḍukoye mị ḅo kọkọmaye sọḅịa ḅara na, “Ori ḅara na mịna obima nwọ pụramẹ, pịkị mịna ịnyọḅụoforikama nwọ dekisinmẹ.”

Jizọs Ḅe Ọḅụḍukoḅịa Apụ Ma

¹⁸ Jizọs Ḅe Ò kelema tomonikpo mị ọrị sịkị, Ọ̀ tọn Oria ọḅụḍukoapụma pịrịmẹ na ini ḍapa mị saḅa ísí pẹkẹrẹ mun.

¹⁹ Gbọrị Oloko ḍieḅọ Ọ̀ damaḅo se nwọ ḅẹmẹ, “Yeḍieḅọ,” “à ḅụkarakaramamẹ Ị́ ḍuko Ị́ munḅịa nyọ goyegoye nwọ mun.”

²⁰ Jizọs Ḅe nwọse ọ̀ pẹkẹrẹmẹ, “Pụnụma àrị pokolo nyanamẹ, fenima pịkị feni-warị nwọ nyanamẹ, ọkụma Tomoniḅọ Tọkụ Ḅe ḅọlọlọ se ịnyọsaraḅịa nyọ sọnị ọ̀ nyanakẹ.”

²¹ Jịnḅọ, anị Oria ọḅụḍukoapụma ḅie gbọrịḅọ pịkịna nwọ ḅẹmẹ, “Ị̀ Nyanaḅọ, ḅereni ị̀ pịrị à tatarị somun ị̀ ḍa ḅe ḍipi.”

²² Jizọs Ḅe nwọse ọ̀ pẹkẹrẹmẹ, “Ị̀ ḍuko se ye fịapụma inia fịapụma ḍipi.”

Jizọs Ḅe Irisi Deinmamẹ

²³ Jizọs Ḅe gbọrị arụ ḅụkụlọmẹ, se Oria ọḅụḍukoapụma Ọ̀ ḅụ sọmunmẹ.

²⁴ Ḅụnemika ḅara ḅụ kụrọ irisi fiemẹ ḍapa mị ḅie, arụ mị sọnị ḅalafama ḅara ḅụ ḅile-ẹ tọn aḅẹ. Ọkụma Jizọs Ḅe Ọ̀ mọnọaḅẹ.

²⁵ Ọḅụḍukoapụma Ọ̀ damamun se Ò wosịsẹmamẹ, se nwọse Ọ̀ ḅẹmẹ, “Wa ḍụa, Nyanaḅọ!” “Wa fa-ẹtọn aḅẹ!”

²⁶ Jizọs Ḅe nwọ pẹkẹrẹmẹ, “Nde ó gose nwọ sime ḅaramgba nwọse ḅalafaye?” “Ómine kala ḅereni nyana apụ!” Anịeso Ọ̀ sịsẹ se ịganị fọrụ mị na amburama na pịrị se tọrụ mị deinma simemẹ.

²⁷ Nweni mamgba ḅụgbiripumẹ se nwọ ḅẹmẹ, “Ḅe ḅọrọ ndende ọkụ sime tomoniḅọ?” “Se fọrụ mị na amburama na sọnị Ọ̀ ḅịpị pokimẹ!”

Jizọs Ḅe Si-a-tẹmẹ Ḅie Sime Mama Owuapụ Gwọmẹ

²⁸ Jizọs Ḅe Gadara ama pẹkẹrẹ mị nwọ ḅo sịkị, anị ḍapa mị ḅe saḅamanga ḅụ, ḍụẹịn ḍipi nyọ mị ḅie wẹrị pakaḅo mama owuapụ ori na ịrịamẹ. Mịnapụma inia ḅie si-a-tẹmẹ omi-ẹ. Ini ḅalafama so ọkụma gbọrịḅọ sọnị dadama anị ateli mị ḅie ḅọrọḅọrọkẹ.

²⁹ Kirikiri ini olokumẹ, “Wa ị́rị́ na che mịẹ gbolomaye nwọ nyana, ị́rị́ Tamụnọ Tọkụ? Sịkị mị ma laka simeogbo, ị́ ḅụfụka se wa pịrị-ẹḅosa?”

³⁰ Anị nyọ na kpeki anga ḅụ oporopo ogbo yefịaḅẹ.

³¹ Si-a-tẹmẹma Jizọs Ḅe tẹkẹmẹ, “Ị́ mine depakụmaḅịa ḅẹḅẹ, wa se anị oporopo ogbo mị ḅie fịrịma.”

³² Jizọs Ḅe nwọse àrị ḅẹmẹ, “Ó mun.” Anị àrị somun oporopoma ḅie sọye-ẹ. Oporopo mamgba mangị mun chịngị mị anga sime ḍapa mị ḅie koro se simbi fịmẹ.

³³ Oporopoma ḍikiḍikisime apụma mangị so ama mị ḅie mun seni anị nyọ pakaye mamgba na si-a-tẹmẹma ḅie simeapụma ḅụ pakayema na nwọ ḍuko pakụmamẹ.

³⁴ Anị ama mị ḅie simeapụ mamgba paka ḅomẹ, Jizọs Ḅe na ịrịaḅịa ye gose, se ini Ori ọrị sịkị, ini Ọ̀ tẹkẹmẹ na Ori inia ama pẹkẹrẹ mị nwọ koroma so.