Matio 7 - Kịrịkẹnị Baịbụl

Ḅẹrẹkọn Jịn Apụ Pịrị Mị

¹ “Ḅẹrẹkọn jịn apụ pịrị ma, mịẹse Tamụnọ Ḅe sọ ḅẹrẹkọn ị́ pịrị ẹka ḅara,

² anịatịḅị ị́ se ḅẹrẹkọn jịn apụ pịrị ḅara, mị Tamụnọ Ḅe sọ pịkị se ḅẹrẹkọn ị́ pịrịḅịa ọkụ-ẹ. Ị́ se yetọn jịn apụ pịrịye, Ọ̀ pịkị nwọse yetọn ị́ pịrịḅịa.

³ Nde, anịọkụma, ị́ gose ị́ mbire ḅe tọrụmgbọlụ ḅie sime fun mị ọrị se ị́ tọrụmgbọlụ ḅie sime chịn ikiḅa mị nwọse yechịnka ḅara?

⁴ Nde ị́ gose dadama nwọse ị́ mbire ḅe ḅẹ ye, ‘Sisi, ye àrị ị́ tọrụmgbọlụ ḅie sime fun mị sin,’ anịsịkị chịn ikiḅa ị́ tọrụmgbọlụ ḅie sime waraḅẹ?

⁵ Ị́rị́, epekelepepe tomoniḅọ! Tatarị ị́ tọrụmgbọlụ ḅie sime chịn ikiḅa mị sin, anịsịkị re, ị́ ḅelema ị́ mbire ḅe tọrụmgbọlụ ḅie fun mị ọrị se anị sinḅịa.

⁶ “Opuma fịafịa simeye seni obirima pịrị ma ḅofa àrị vinpịkị owu se ị́ paka. Ị́ya yelaye mị se oporopo tọrọkọ gbin koroma ma àrị papa ḅụọ se àrị nanga kọsịmaḅịa.

Ḅi-i, Ḍọkị-ị, Gbolo-o

⁷ “Ḅi-i, anị ị́ ḅaralaḅịa, ḍọkị-ị, ị́ pịkị ọrịḅịa, gbolo-o, ḅọkọ mị finji ị́ pịrịḅịa

⁸ anịatịḅị ḅiarịḅọ goyegoye iniḅọ ḅaralaḅịa, ḍọkịarị ḅọ ḅe pịkị ọrịḅịa, ḅọkọ mị pịkị finji gboloarịḅọ ḅe pịrịḅịa.

⁹ Ómine ḍapụma ḅie ḍụparị se iniḅọ tọkụ pịrịḅịa ḅọ omi ò fịturu ḅi sịkị?

¹⁰ Anịkanịka oruwu se ọ̀ pịrị ḅe ori inji ḅi sịkị?

¹¹ Ómine nwọ sime siapụ, iḅi-a ye se ọ́mịna awọ pịrị ọkụ nemi ọkụma. Nde anị ḅara mị nẹngịma ḅara ọ́mịna Ḍa soḅie sime ḅọ Ḅe ineda iḅiaye nwọse Ọ̀ ḅara ye ḅi apụma pịrịtẹịn ẹka ọkụ!

¹² “Ị́ ḅi na jịn apụ mịẹ ị́ pịrị-ẹ nwọ ḅẹ ḅara nwọ mịẹ jịn apụ pịrị: mịn mị anị Moziz Oloko mị na ịkịankoroapụma na ḍieye mị fiearịye-ẹ.

Kpapụ Odoḅọkọ Mị

¹³ “Kpapụ odoḅọkọ mị ḅie wẹrị sọmun, anịatịḅị ḅọrọ mun kanakana mị ḅie sọ odoḅọkọ mị gbereremẹ, ateli mị pịkị sarasaramẹ, anịa ḅie nwẹngị mun-arị apụma ini ḅakamẹ.

¹⁴ Ọkụma ḅọrọ mun ḍumo mị la odoḅọkọ mị kpapụ mẹ, ateli mị sọnị kụrọmẹ gose, boka apụ mị anị ḍọkịḅoye-ẹ.

Chịn Na Anịa Mgbọlụ Na

¹⁵ “Ómine ọ́mịna ḅụ ọbị iruo ịkịankoroapụma ḅụ; anana ḅara ini nwọse ọ́ damaḅoḅịa ọgọnọ ḍikitọrụ ḅụ, ọkụma ḅieju ḅụ jokoma ye se nweni lamalama piri obiri sime ọkụ mị ini sime ọkụ-ẹ.

¹⁶ Inia yemịẹ ḅara ḅụ ọ́ wẹrị ini nemiḅịa. Ịga chịn ineda elelenda chụa ẹkẹ, ịga chịn pịkị ineda figi chịnmgbọlụ chụa ẹkẹ.

¹⁷ Iḅi chịn iḅi chịnmgbọlụ chụaḅịa, ọkụma si chịn si chịnmgbọlụ mị anị chụaḅịaye-ẹ.

¹⁸ Iḅi chịn ineda si chịnmgbọlụ chụa ẹkẹ, si chịn ineda pịkị iḅi chịnmgbọlụ chụa ẹkẹ.

¹⁹ Iḅi chịnmgbọlụ chụaka chịn goyegoye ini anị pẹlẹ gbinḅịa, se anị se fịnị ḅie gbin chuḅịa.

²⁰ Anịẹrẹchị, iruo ịkịankoroapụma, inia yemịẹ ḅara ḅụ mị ọ́ wẹrị ini nemiḅịaye-ẹ.

Àrị Ị́ Nemi Kẹ

²¹ “‘Nyanaḅọ, Nyanaḅọ!’ Nwọse ị̀ chịn ḅọ goyegoye soḅie Amanyanakiri mị ḅie sọ ẹkẹ, ọkụma ị̀ Ḍa soḅie sime ḅọ Ḅe ḅiayema mịẹarị apụma kẹngẹ-ẹ.

²² Ḅẹrẹkọn Ene mị lasịkị tọn apụ nwọse ị̀ ḅẹḅịa, ‘Nyanaḅọ, Nyanaḅọ! Ị́ya ẹrẹ ḅụ wa ịkịankoromẹ, ị́ya ẹrẹ ḅụ wa tọn-a si-a-tẹmẹ nwọ depakụmamẹ, pịkị tọn-a ḅụgbiripuma fịrịnwẹngịmẹ!’

²³ Anịsịkị à nwọse ini ḅẹḅịa, ‘Àrị ó nemikẹ. Ómine ị̀ ḅụ wẹrị sikima, ómine sitịḅịnyana-a tomoni!’

Mama Warị Nama Apụ Ma

²⁴ “Anịẹrẹchị mà, ị̀ya ọkwẹịnma na, se àrị ḍukoarịye mịẹḅọ goyegoye iniḅọ yenemiḅọ kịkẹmẹ, anị, iniḅọ warị nwọse ḍụparị ọgọnọ nama ḅọ ḅe-ẹ.

²⁵ Ene mị koroḅịa, opu mengi seriḅo anị kelemaḅịa, fọrụ mị kụrọma fieḅo anị warị mị laḅịa, ọkụma anị ḅịkị ẹkẹ, anịatịḅị ini anị se ḍụparị ọgọnọ namamẹ.

²⁶ “Ọkụma, mà, ị̀ya ọkwẹịnma na, se àrị ḍukoarịye mịẹka ḅọ goyegoye iniḅọ yenemikaḅọ kịkẹmẹ, anị iniḅọ warị se onwun ọgọnọ nama ḅọ ḅe-ẹ.

²⁷ Ene mị koroḅịa, opu mengi seriḅo anị kelemaḅịa, fọrụ mị kụrọma fieḅo anị warị mị laḅịa, se anị ḅịkị koroḅịa. Anịa sokoro mị opuma ḅalafamaḅịa!”

Jizọs Ḅe Nyana Kụrọ Mị

²⁸ Jizọs Ḅe mà yema ḍuko so sịkị, anị ḅụgbiripumaye sọ se tomonikpo mị pịrịmẹ, Oria yeḍie mị sime ḅara mị gose.

²⁹ Oloko ḍieapụma sime ḅara Ọ̀ nwọ simekẹ; anịnakaraka, ḅẹrẹtọn kụrọ nyanaḅọ ḅara Ọ̀ nwọse yeḍiemẹ.