Matio 6 - Kịrịkẹnị Baịbụl

Iḅimịẹ Na Gbakịma Ḍieye

¹ “Ọ́ tọrụkweinma, ómine amaogbo Tamụnọ fịrịma nwẹngịarị sịkị, nweni ómine ọrị-ẹ nwọ ḅẹ ḅara ọ́ nwọse àrị mịẹ ma. Ó nemikase amaogbo ọkọ mịẹmẹ nwọ ḅẹḅẹ ọ́ gbọrị gbẹịnye sọ nyana ẹkẹ ọ́mịna Ḍa soḅie sime ḅọ Ḅe ḅara ḅụ.

² “Anịẹrẹchị ị́ ye se ḍie mịẹḅịa ọkụ oforiḅọ pịrịaḅẹ ḅẹḅẹ, opuma anị ḍiepakụmama, epekelepepeapụma tẹkẹwarịma ḅie mịẹmịẹ ḅara mị, pịkịna ateli ogbo na. Ini ọkọ mịẹmẹ, mịẹse tomoni ini tokoniḅịa ḅara. À ḍuko kụrọma ọ́ pịrịaḅẹ na, inia gbẹịnye ini ọkị karamasam,

³ ọkụma ị́ ḅarachụa mịẹḅịa ọkụ oforiḅọ pịrịarị sịkị, ị́rị́ na kpekitẹịn ikiaḅọ sọnị nemi ẹka ḅara nwọse anị mịẹ.

⁴ Anịsịkị anị ḅo ḅọị ye nwọ sọḅịa, se ị́ Ḍa Ḅe, ị́ ḅọịma mịẹye mị nwọ ọrị ḅọ Ḅe ori ị́ gbẹịnḅịa.

Tẹkẹ Na Gbakịma Ḍieye

⁵ “Ị́ tẹkẹarị sịkị, epekelepepeapụma mịẹ ọkụ nwọ mịẹ ma! Anị inia ḅụḅẹlẹḅẹlẹmẹ tẹkẹwarịma ḅie chịẹ tẹkẹ, pịkị ateli aka ma ḅụ na, mịẹse tomoni mamgba ini ọrịḅịa ọkụ. À ḍuko kụrọma ọ́ pịrịaḅẹ na inia gbẹịnye ini ọkị karamasam.

⁶ Ọkụma ị́ tẹkẹḅịa sịkị, ị́ya jukuru ḅie sọ, se ḅọkọ mị palị, ị́ Ḍa Ḅe ini tọrụseọrịkaḅọ Ḅe tẹkẹ. Se ị́ Ḍa Ḅe, ị́ ḅọịma mịẹye mị ọrị ḅọ Ḅe ori ị́ gbẹịnḅịa.

⁷ “Ị́ tẹkẹarị sịkị, yeḅụsọka ḅaka ọkwẹịn kọnma, oruḅẹrẹ nemiapụma mịẹmịẹ ḅara mị, ini koromamẹ na inia oruma àrị ini naaḅịa inia tẹkẹma nangwọ ye gose.

⁸ Ini sime ḅara nwọ simema. Ị́ Ḍa Ḅe, ma ị́ ye ḍukoka simeogbo ori ị́ ḅụpalịmayema nemi waraḅẹ.

⁹ Mịn anịọkụma ọ́ tẹkẹḅịa ọkụ-ẹ: ‘Mịna Ḍa soḅie sime ḅọ: Ye ị́ya fịafịa ẹrẹ mị osiḅụ sime;

¹⁰ ye ị́ya Amanyanakiri mị ḅo; ye ị́ tọnye mịẹ tomonikiri mị ḅie, anị soḅie sime ḅara.

¹¹ Mịmgba ḅe fịye se wa pịrị.

¹² Wa mịẹirimasayema ḅụ ḅarasin wa pịrị, mine sọ ḅarasin wa mịẹirimapụma pịrịpịrị ḅara.

¹³ Wa se mun kụrọ ḍaḍiki ḅie chuma, ọkụma wa koko si ḅọ ḅe ḅara ḅie.’

¹⁴ “Ó nemikase jịn apụ se ọ́ mịẹirimaye ḅụ ḅarasin ini pịrịmẹ ḅẹḅẹ, ọ́mịna Ḍa soḅie sime ḅọ Ḅe sọnị pịkị ḅarasin ọ́ pịrịḅịa.

¹⁵ Ọkụma ó nemikase jịn apụ se ọ́ mịẹirimaye ḅụ ḅarasin ini pịrịkẹ ḅẹḅẹ, anịsịkị ọ́mịna Ḍa soḅie sime ḅọ Ḅe sọnị pịkịna ọ́mịna mịẹirimama ḅụ ḅarasin ọ́ pịrị ẹkẹ.

Ḅuruseḅụḅama Na Gbakịma Ḍieye

¹⁶ “Se ó ḅuru se ḅụḅamaḅịa sịkị, ọ́ tọrụ furuma ma, anị epekelepepeapụ ma mịẹmịẹ ọkụ mị. Ini inia simeḅara mị nwọ wẹrị simamẹ mịẹse nwenimgba nemi na ini ḅuruse ḅụḅamaḅẹ. À ḍuko kụrọma ọ́ pịrịaḅẹ ini ḅeinma ini gbẹịnsam.

¹⁷ Ọ́ fịye fịka ḅụ simearị sịkị, ọ́ tọrụsịkịrị se ọ́ tịḅị adala,

¹⁸ mịẹse jịn apụ ineda nemi ẹka ḅara na ó ḅuruseḅụḅaamaḅẹ ọ́mịna Ḍa, tọrụseọrịkaḅọ ḅe kẹngẹ mị nemiḅịaye-ẹ. Se ọ́mịna Ḍa Ḅe ọ́ ḅọịma mịẹye mị ọrị ḅọ Ḅe mị ọ́ gbẹịnḅịaye-ẹ.

Soḅie Ngọma

¹⁹ “Mịn tomonikiri ḅie ómine ngọ koḅiri ọ́ ḅụ wẹrịma ma, akakaraḅa na, ajarị na, ye simasima nyọ mị, furuapụ kan sọ se ye furuarị nyọ mị.

²⁰ Ó soḅie anịnakaraka ngọ koko ọ́ ḅụ wẹrịma, akakaraḅa na ajarị na ineda ye sime ẹka nyọ mị, furuapụ pịkị ineda kan sọ se yefuru ẹka nyọ mị

²¹ anịatịḅị ó kuḅiemgbọlụ sịkịmamgba ọ́mịna ngọma sime nyọ simeḅịa.

Oju Mị Ḅe Enekuḅu Mị

²² “Tọrụmgbọlụma, àrị tọnjie simeọkụ simemẹ oju mị ḅụ. Ị́ tọrụmgbọlụma nemikase gịọngịọnmẹ ḅẹḅẹ, ị́ya oju mị mgba enekuḅu na ḅeinḅịa

²³ ọkụma ị́ tọrụmgbọlụma nemikase simẹ ḅẹḅẹ, ị́ya oju mị mgba kanakana ḅie simeḅịa. Anịọkụma ị́ ḅie sime enekuḅu mị nemikase kanakana-ẹ ḅẹ ọkụma anị ḅalafama ḅara se kanakanaḅịa ọkụ ḍiki!

Tamụnọ Ḅe Na Tomoniḅọ Nyana-nyanaye Ma Na

²⁴ “Gbọrịḅọ ineda omoniḅọ sọ mama tịḅịnị pịrị ẹkẹ; ọ̀ taraka se gbọrịḅọ wẹrịma, se ísí ḅọ ḅe ḅẹlẹmaḅịa; ọ̀ ḅụiderima gbọrịḅọ pịrị, se ísí ḅọ ḅe ḍikisimaḅịa. Ị́ ineda fịrịnwẹngị Tamụnọ Ḅe na igbiki na pịrị ẹkẹ.

²⁵ “Mịn à gose ḍuko ọ́ pịrịye-ẹ na ọ́ fị se ḍumoḅịa fịye na ḅuḅuye na gose, ómine ọ́ ḅụ ḅalaḅalama ma nwọ ḅẹ ye mị-ẹ, anịkanịka oju ḅụ ọ́ chụaḅịa ye gose. Jịnye ka sọnị ḍumo mị anị fịfịye nẹngị ka? Oju mị anị pịkị chụaye nẹngị ka?

²⁶ Sotọrụ fenima ḍiki àrị chịnmgbọlụ ḍipikẹ, àrị fịye soku se fịye koko warị ḅie chu koromakẹ; ọ́mịna soḅie Ḍaḅọ Ḅe àrị ḍikiḍikiaḅẹ! Ó yelatẹịn fenima nẹngịka?

²⁷ Ọ́mịna ḅie nde gbọrịḅọ yekalaye nwọse iniḅọ laḅịa kụra ma ḅụ chụa ḅe iniḅọ anị gose kpalakpalamẹ nwọ ḅẹ ye ẹrẹchị?

²⁸ “Se nde ḅụchụaye gose ọ́ ḅalaḅalarị ye? Piri ḅie sime ngwengwema sẹnịarị ḅara ḍiki, àrị fịrịnwẹngịkẹ pịkị ḅụchụaye mịẹ arịa ḅụ pịrịkẹ.

²⁹ Ọkụma à ḍuko ọ́ pịrịaḅẹ na Amanyanaḅọ Sọlọmọn ḅe na mịnaḅụ na ori ngọ nyana laḅara mgba, mà ngwengwe ma ḅe gbọrịye iḅiọkụ iḅi ḅụchụaye ọ̀ nwọ nyanakẹ.

³⁰ Tamụnọ Ḅe mị ḅụchụaye se piri ḅie osueinma chụaye-ẹ anị mịmgba mịanga sime se ḅa ḅarị ọrị ẹka osueinma, se fịnị ḅie dọkịmaḅịaye ma-ẹ. Anịọkụma Ọ̀ ḅụchụaye se ọ́ chụatẹịn ẹka? Ọ́ nyana ḅereni boka la ọkụ ḍiki!

³¹ “Anị gose ḅụḅalaḅala se ị́ ḅụ pịrịma: ‘Nde ị̀ya fịye ḅoḅịa anga? anịkanịka ị̀ya ḅuḅuye? anịkanịka ị̀ya ḅụchụaye?’

³² (Mà ma anị oruḅẹrẹnemiapụma sịkịmamgba kuḅie-chịẹ-chịẹ-chịẹ nyana pịrịaye ma-ẹ.) Ọ́mịna Ḍa soḅie sime ḅọ Ḅe Ò nemi waraḅẹ na mà ye mamgba ọ́mịna ḅụpalịmamẹ.

³³ Anịnakaraka, Tamụnọ Amanyanakiri mị na ori ị́ ḅara ḅiarịyema na ị́ ḅụpalịmaye sọtẹịn yegoyegoye nẹngị se Ori ísí-a ye mamgba nwọse chụa ị́ pịrịḅịa.

³⁴ Anịẹrẹchị ḅa mị gose ḅụḅalaḅala nyana ma, anị anịa ḅụ karaḅịa ḅụḅalaḅala nwọ nyana anịa ḅụ pịrịḅịa. Anị ọkọ gbẹịnkẹ jịnye se ene mị se ḅoḅịa ḅụḅalaḅalama ḅụ chụa.