Matio 4 - Kịrịkẹnị Baịbụl

Jizọs Ḅe Ḍaḍiki Mị

¹ Anịsịkị Tẹmẹ Ḅe Jizọs Ḅe nwọ ḅọrọma onwun ele ogbo mun mẹ, Oru ḅe Ọ̀ ḍaḍikiḅịa ẹrẹchị.

² Jizọs Ḅe ḅuru Ọ̀ tarịmẹ enekaka-a mesi na ḍin-a mesi Ọ̀ nwọse onwun ele ogbo sime so sịkị.

³ Anị Oru ḅe Ọ̀ damaḅo se nwọ ḅẹye-ẹ, “Ị́rị́ Tamụnọ Tọkụ Ḅe-ẹ ḅẹḅẹ, ḅẹrẹtọn ma ḍụparịma pịrị, se àrị ḍinmaḅo fịturu sọ.”

⁴ Jizọs Ḅe pẹkẹrẹmẹ, “Fịafịa ḍiri mị nwọ ḅẹmẹ, ‘Tomoniḅọ ineda fịye kẹngẹ ḅụ wẹrị ḍumo ẹkẹ, ọkụma Tamụnọ Ḅe kọn ọkwẹịn ma ḅụ re-ẹ.’”

⁵ Anị Oru ḅe pịkịna Jizọs Ḅe ọkị Jerusalẹm, Osiḅụ sime Opuama mị munye-ẹ Oputẹkẹwarị mị ḅe geletẹịn nyọ mị ọgọnọ Ò se chịẹmamẹ,

⁶ se nwọse Ọ̀ ḅẹmẹ, “Ị́rị́ nemikase Tamụnọ Tọkụ Ḅe-ẹ ḅẹḅẹ, fuku koro, anịatịḅị fịafịa ḍiri mị nwọ ḅẹmẹ, ‘Tamụnọ Ḅe ori Ị́ gbolomaye ḅụ tọn oria enjẹlapụma pịrịḅịa; ini inia ḅarama se Ị́ ọlọ chịẹmaḅịa, mịẹse Ị́ ḅụọma ḍụparị bịan se ye àrị la ẹka ḅara.’”

⁷ Jizọs Ḅe pẹkẹrẹmẹ, “Ọkụma fịafịa ḍiri mị pịkịna nwọ ḅẹmẹ, ‘Ị́rị́ ị́ Nyana Tamụnọ Ḅe ḍaḍikima.’”

⁸ Oru ḅe pịkịna Jizọs Ḅe se opuma gele gbọrị tụndụ ọgọnọ nwọ mun mẹ, se sẹkiri mị ḅe amanyanakiri mamgba na àrị ḅe opu mamgba laḅara na se Ò ḍiemẹ.

⁹ Oru ḅe nwọ ḅẹmẹ, “Mịnaye mamgba à nwọse Ị́ pịrịḅịa,” “Ị́ kpẹrẹkị se ị̀ tẹkẹḅịa ọkụma.”

¹⁰ Jizọs Ḅe pẹkẹrẹ se nwọ ḅẹmẹ, “Sikima, ị́rị́ Oru! Fịafịa ḍiri mị nwọ ḅẹmẹ, ‘Kpẹrẹkị ị́ Nyana Tamụnọ Ḅe nwọ tẹkẹ, se fịrịnwẹngị ori kẹngẹ nwọ pịrị!’”

¹¹ Oru ḅe anịsịkị Jizọs Ḅe wẹrịsomẹ, se enjẹlapụ ḅo ḅarachụa Ọ̀ pịrịmẹ.

Jizọs Ḅe Oria Fịrị Sakịmẹ Galili Ḅie

¹² Jizọs Ḅe ḅo naamẹ na ini Jọn ḅe se ikoli ḅie chusam nwọ ḅẹ sịkị, Ò so Galili mun mẹ.

¹³ Nazarẹt ḅie Ọ̀ ḅarị simekẹ, ọkụma Ò somun Kapanịọm ḅie simemẹ, Galili Ḍapa aka ḅụ sime ama mị, Zẹbụlọnị na Naftalaị na nyọma ḅụ.

¹⁴ Mịn mị mịẹmẹ, mịẹse ịkịankoro Aịzaya ḅe ḍukoye mị ḅo kọkọmaye sọḅịa ḅara na.

¹⁵ “Zẹbụlọnị ama na pịkị Naftalaị ama na, ateli mị ḅọrọ mun tọrụ mị la, Jọdan mị ḅe saḅamanga, Galili Jịnsẹapụ ama mị!

¹⁶ Kanakana mị ḅie angapụma ini opu enekuḅu ọrịḅịa. Ini nwọ fị mị ḅe kanakana ama mị ḅie angapụma enekuḅu ḅịa ini pịrịḅịa.”

¹⁷ Anịsịkị ọkịmun Jizọs Ḅe sakị oria oku mị ḅe ḅẹrẹ nwọ ḍukomẹ: “Ómine ọ́mịna sima ḅụ vinpịkị, anịatịḅị soḅie Amanyanakiri mị kpekisam!”

Jizọs Ḅe Inein-a Injiḅaapụ Chịnmẹ

¹⁸ Jizọs Ḅe Galili Ḍapa aka ḅụ nwẹngịarị sịkị, Ori mama mịnapụ ọrịmẹ, injiḅaapụ, Saịmọn (ini Pita se chịnḅọ ḅe) na numbireowu Andru ḅe na, ịgbọ se ḍapa mị ḅie inji kun aḅẹ.

¹⁹ Jizọs Ḅe nwọse ini ḅẹmẹ, “Ómine ị̀ ḍuko se à tomoni kunḅoḅịa ọkụ se ó ḍieḅịa.”

²⁰ Anịkirikiri ini inia ịgbọma wẹrịso se Ò ḍukomẹ.

²¹ Ọ̀ nwẹngịmamun pịkị jịn mịnapụ ọrịmẹ, Jems ḅe na Jọn ḅe na, Zẹbidi owuapụ awọma. Ini inia arụ ḅie inia ḍa Zẹbidi ḅe na sime inia ịgbọma nwọ sẹlẹaḅẹ. Jizọs Ḅe ini chịnmẹ,

²² anịkirikiri ini arụ mị na inia ḍaḅe na koromaso se Jizọs Ḅe ḍukomẹ.

Jizọs Ḅe Yeḍie, Tamụnọ Ḅẹrẹ Ḍuko, Pịkị Obi Gwọmẹ

²³ Jizọs Ḅe Galili mịmgba nwẹngị kelema, se inia tẹkẹwarịma ḅie yeḍiemẹ. Ori Amanyanakiri mị ḅe Iḅi Ḅẹrẹ mị nwọ ḍuko se pịkị tomonima gwọmẹ inia kịrịkịrị obima ḅie.

²⁴ Oria ẹrẹ mị wasama bebe Siria sẹ mị kelemamẹ, anị mịẹse obi tọrụ kịrịkịrị kọn apụma na pịkị kịrịkịrị ḅụfụka nyanapụ mamgba ini nwọ ọkịḅo ọ̀ pịrịmẹ, pịkị sitẹmẹ ḅie simeapụ na, fụmụ obi kọn apụ na, ḅụọ na ḅara na fịapụ na—se Jizọs Ḅe inimgba gwọmẹ.

²⁵ Tomonikpo Galili ḅie wẹrị Ò ḍukomẹ, pịkị Oyi Ama ma ḅie wẹrị ḅo apụma na Jerusalẹm na, Judia na, pịkị Jọdan mị ḅe ísí saḅamanga amama ḅie wẹrị ḅoapụma na.