Matio 28 - Kịrịkẹnị Baịbụl

Fịḅụsịsẹ Mị

¹ Ịnyọsara Ene mị ḅọrọ sịkị, Chọchị ene mị ḅe ḅaso ḅiri, anị Meri Magdalin ma na ísí Meri ma na mun iḍupu mị ḍiki-ẹ mun ye-ẹ.

² Ḅụnemika ogbo kiri mị kụrọma jikemẹ, Nyanaḅọ Ḅe enjẹlḅọ soḅie koroḅo ḍụparị mị imbibilesin se anịa ọgọnọ kpọnjị simemẹ.

³ Oria simeḅara mị so ḅịa ọkụ ḅịamẹ anịsịkị oria ḅụchụayema pịkị ijiriji ḅịa ọkụ ḅịamẹ.

⁴ Nyọ koruapụma ḅalafa se ḅụgeregere so ọkụma ini ḅo fịsapụ simeọkụ simemẹ.

⁵ Enjẹlḅọ ḅe ọkwẹịn eremenima pịrị, se nwọ ḅẹmẹ, “Ó ḅalafama,” “à nemimẹ na ó Jizọs Ḅe ḍọkịaḅẹ, ini se mgbẹsẹchịn ọgọnọ ḅakụḅaa ḅọ Ḅe.

⁶ Mịanga Ori ofori-ẹ Ọ̀ sịsẹsam, Ò ḍuko ḅara ḅụ. Ó ḅo Ọ̀ ḅọlọlọ sime nyọ mị ḍiki.

⁷ Mịọkụ, ọ́ fịkịrị somun ḍuko Oria ọḅụḍukoapụma pịrị, ‘Na fị ḅụ Ọ̀ sịsẹsam, na mịọkụ Ori inia tọrọkọ ḅọrọ tatarị Galili mun aḅẹ, anịnyọ ómine Ori ọrịḅịa!’ Ḍiki à ḍuko ọ́ pịrịsam.”

⁸ Anị ini ḅo iḍupu mị koromasoye-ẹ, ḅalafa ḅụ, anị sọnị ḅieḅẹlẹ inia ḅie ḅein waraḅẹ, se mangị mun ḍuko Oria ọḅụḍukoapụma pịrịmẹ.

⁹ Ḅụnemika ḅụ Jizọs Ḅe ini na ịrịa se nwọ ḅẹmẹ, “Dein ómine na sime.” Ini Ọ̀ damaḅo se Ọ̀ ḅụọchuku kun se kpẹrẹkị Ọ̀ pịrịmẹ.

¹⁰ Jizọs Ḅe nwọse ini ḅẹmẹ, “Ọ́ ḅalafa ma,” “ó mun ḍuko ị̀ya mịnapụma pịrị, na ini so Galili mun anị nyọ ini ị̀ ọrịḅịa.”

Nyọ Koruapụma Ḍukopakụmaye Mị

¹¹ Eremenima ini mun àrị nyọ mị nwọ mun-arịogbo, iḍupu mị koru sime owunima ḅie tọn-apụ so opuama mị ḅie tịḅịnị agbamịẹapụma damamun se pakaye mamgba nwọ ḍuko ini pịrịmẹ.

¹² Tịḅịnị agbamịẹapụma sẹnịapụma ḅụ sọ se ini mịẹḅịa ḅara nwọ ḅiamẹ, ini ḅaka igbiki seni owunima pịrịmẹ

¹³ se nwọ ḅẹmẹ, “Ọ́ nwọ ḅẹḅịa na, Oria ọḅụḍukoapụma wa mọnọarị ogbo, ḍin ḅie ḅo Oria oju mị furu se somẹ.

¹⁴ Se gọvịna ḅe nemikase mịn mị naamẹ ḅẹḅẹ, wa mịẹse anị ọ̀ ḅụokoroḅịa se ọ̀ ḅarị ó se ḅụḅalaḅala ḅie chu ẹkẹ.”

¹⁵ Nyọ koruapụma igbiki mị ọkị se ini ḍuko ini pịrị ọkụ mị nwọ mịẹmẹ. Ọkịḅo mịmgba ene mị la sọnị, Juapụma mị ini pa se anị ḍuko wasama àrị ọkụ-ẹ.

Jizọs Ḅe Ḅụ Se Oria Ọḅụḍukoapụma Ḍiemẹ

¹⁶ Ọḅụḍuko oyigbọrịapụ fịnjịma Galili chịngị mị nwọ mun mẹ Jizọs Ḅe ḍuko ini pịrị nyọ mị.

¹⁷ Ini Ori ọrị sịkị ini kpẹrẹkị Ọ̀ tẹkẹmẹ, inia ḅie tọn-apụ makuḅie nyanamẹ nwọ ḅẹ sọnị.

¹⁸ Jizọs Ḅe kpekima mun se nwọse ini ḅẹmẹ, “Ini kụrọmamgba nwọse ị̀ pịrịsam soḅie na tomonikiri ḅie na.

¹⁹ Anịẹrẹchị, ọ́ nyọ mamgba ḅụ tomoni mamgba nwọ damamun: ini se ị̀ya ọḅụḍukoapụ nwọ mịẹ: Ḍaḅọ Ḅe na Tọkụ Ḅe na, Fịafịa Tẹmẹ Ḅe na ẹrẹ ḅụ mengi se ini sara,

²⁰ ye se ini ḍie, oloko ḅara ḅụ à se ọ́ pịrị aye layelaye ini nwọ koko. Ḍiki à sịkịmamgba ómine na simeḅịa, ọkịmun tomonikiri mị ḅe kuluma sịkị la.”