Matio 26 - Kịrịkẹnị Baịbụl

Ini Ḅia Jizọs Ḅe Pịrịye Mị

¹ Jizọs Ḅe màye mamgba nwọ ḍie so sịkị, ọ̀ nwọse oria ọḅụḍukoapụma ḅẹmẹ,

² “Ó nemi ḅara ḅụ mama ḍin la ḅịa sịkị, Saḅaḅọrọ Alalị mị wa nwọ fịḅịa, se Tomoniḅọ Tọkụ Ḅe ini nwọ ḅọrọma se mgbẹsẹchịn ọgọnọ ọ̀ ḅakụḅaaḅịa.”

³ Anịsịkị tịḅịnị Agbamịẹapụma na Ju sẹnịapụma na gele agbamịẹḅọ ḅe warị ḅie koḅirimamẹ, anị ini Kayafas nwọse chịnḅọ ḅe,

⁴ se ḅịpị ọkịamẹ ini ḅọịma Jizọs Ḅe nwọ kun se Ọ̀ ḅaaḅịa ḅara.

⁵ “Wa alalị mị ḅie anị mịẹ ẹkẹ,” ini nwọ ḅẹmẹ, “Tomonima ḅofa amafiemaye mịẹ.”

Bẹtani Ḅie Ini Pulo Se Jizọs Ḅe Tịḅị Saramẹ

⁶ Jizọs Ḅe Saịmọn, ḅụkan obi kọn ḅọ ḅe warị ḅie simearịogbo, Bẹtani ama mị ḅie.

⁷ Gbọrị eremeniḅọ yela ololo, se kụnụ pịkị opu igbiki la olo ḅie ḅein ye nwọse ọ̀ damaḅomẹ, árị anị se Jizọs Ḅe tịḅị saramẹ ò yefịarị ogbo.

⁸ Ọkụma ọḅụḍukoapụma mịn mị ọrị sịkị ini ịganịmẹ. Ini gbelamẹ, “Nde á gose papa mị ḅara se anị igweinmarịye?

⁹ Mgbọkụ ini mịn kụnụ olo mị se opu igbiki dẹrị, se ḍie igwein apụma pịrịsam!”

¹⁰ Jizọs Ḅe ini ḍukoarịye mị nwọ nemi se, nwọse ini ḅẹmẹ, “Nde ó gose ḅụfụka se eremeniḅọ ma pịrịarịye? Anịatịḅị árị opu iḅiye mịẹ ị̀ pịrịsam.

¹¹ Ọ́ sịkịmamgba igwein apụma na simeḅịa, ọkụma àrị ómine na sịkịmamgba sime-ẹkẹ.

¹² Mịn kụnụ olo mị nwọse ị̀ya oju ḅụ sara mị ḅụ, árị ị̀ karakarama ị̀ya ḍipi mị pịrịmẹ.

¹³ Mịọkụ, à ḍuko kụrọma ọ́ pịrịaḅẹ! Ini mịn iḅiọkwẹịn mị ḍukoḅịa nyọ layelaye, bebe tomonikiri mị mgba ḅie, á mịẹye mị ini nwọse chụa ḍukoḅịa, á se ḅiekoroma ḅụ.”

Judas Ḅe Jizọs Ḅe Se Ịbafị Mị Ḅereni-ọkịmẹ

¹⁴ Anịsịkị oyimaịn ọḅụḍukoapụ fịnjịma ḅie gbọrịḅọ, Judas Ịskarịọt nwọ chịnḅọ ḅe tịḅịnị agbamịẹapụma nwọ damamunmẹ

¹⁵ se nwọ ḅẹmẹ, “Cheye ọ́ nwọse ị̀ pịrị ḅe à nemikase Jizọs Ḅe nwọ ḅọrọma ọ́ pịrị ọkụma?” Ini seleḅa pẹkẹrẹ-a soi nwọ kịẹn se ọ̀ pịrịmẹ.

¹⁶ Anịsịkị ọkịmun, Judas ḅe achọ ḍọkịmẹ, Jizọs Ḅe nwọse ịbafịḅịa ọkụ.

Jizọs Ḅe Oria Ọḅụḍukoapụma Na Saḅaḅọrọ Alalị Fịye Mị Fịmẹ

¹⁷ Suka Fịturu Alalị mị ḅe tatarị ene mị ḅụ ọḅụḍukoapụma Jizọs Ḅe damaḅo se ò gbelamẹ, “Nde Ị́ ḅi na wa Saḅaḅọrọ Alalị fịye mị nwọ karakarama Ị́ pịrịḅịa nyọ?”

¹⁸ “Ómine ama mị ḅie gbọrị owuḅọ nwọ damamun,” ọ̀ nwọse ini ḅẹmẹ, “Se ḍuko ọ̀ pịrị: ‘Yeḍieḅọ ḅe nwọ ḅẹmẹ, ị̀ya sịkị mị anị ḅo ḅarakuḅu lasam ị̀ya ọḅụḍukoapụma na ị̀rị̀ na ị́ya warị ḅie wa Saḅaḅọrọ Alalị mị nwọ fịḅịa.’”

¹⁹ Ọḅụḍukoapụma Jizọs Ḅe ḍuko ini pịrị ḅara mị nwọ mịẹmẹ, se Saḅaḅọrọ Alalị fịye mị nwọ karakaramamẹ.

²⁰ Saso ḅiri lasịkị, Jizọs Ḅe oyimaịn ọḅụḍukoapụ fịnjịma na kpọnjị sime se yefịmẹ.

²¹ Ini fịye mị fịarịogbo, Jizọs Ḅe nwọ ḅẹmẹ, “À ḍuko ọ́ pịrịaḅẹ, ọ́mịna ḅie gbọrịḅọ ị̀ se ịbafịḅịa.”

²² Ọḅụḍukoapụma opuma ngịrịmẹ, se gbọrịḅọ, gbọrịḅọ sakị ò gbelamẹ, “Karakaraye ḅụ ị́ ị̀ ḅẹkẹ, Nyanaḅọ?”

²³ Jizọs Ḅe pẹkẹrẹmẹ, “Ị̀rị̀ na gbọrị-sịkịḅụ ḅarase bọlị ḅie fịye dekifịarị ḅọ ḅe, mị ị̀ se ịbafịḅịaye-ẹ.

²⁴ Tomoniḅọ tọkụ Ḅe ọ̀ fịḅịa, Fịafịa ḍiri mị ḍuko ọkụ ḅụ, ọkụma anị ḅalafamaye sọ ori ḅọ ḅe pịrịḅịa nwọ Tomoniḅọ Tọkụ Ḅe se ịbafịḅịa ḅọ ḅe! Ini oyika mị iḅitẹịnmẹ!”

²⁵ Judas, ịbafịḅọ ḅe nwọse ò gbelamẹ, “Pikipikiye ofori-ẹ, Yeḍieḅọ, na ị̀ ḅẹkẹ?” Jizọs Ḅe ọ̀ pẹkẹrẹmẹ, “Anị ị́ ḍuko ọkụ-ẹ.”

Nyanaḅọ Ḅe Saso Fịye Mị

²⁶ Ini ye mị fịarịogbo, Jizọs Ḅe fịturu deki se anị ḅẹlẹma, anị pu, anị se ọḅụḍukoapụma pịrịmẹ. Se nwọ ḅẹmẹ, “Ómine ọkị se fị, mị ị̀ya oju mị-ẹ.”

²⁷ Ọ̀ pịkị ọmọngọ mị dekimẹ, mịẹḅaka se Tamụnọ Ḅe ḅẹ so sịkị ori anị se ini pịrịmẹ. Se nwọ ḅẹmẹ, “Ómine mgba anị ḅu,

²⁸ mị ị̀ya oju pulo mị-ẹ, Tamụnọ ọḅọkụ mị mịẹ kụrọmaye mị, àrị ọsụn tọn-apụ pịrị pulo mị, siḅụ-ḅarasin mị gose.

²⁹ À ḍuko ọ́ pịrịaḅẹ, à ḅarị jịn sịkị se mịn iru mị ḅu-ẹkẹ, ọkịmun àrị ómine na ịwọma anị ḅuḅịa ene la, ị̀ Ḍa Ḅe Amanyanakiri mị ḅie.”

³⁰ Anịsịkị ini ḅo gbọrị nime nwọ chumẹ, se pakaso Oliv Tụndụ mị nwọ mun mẹ.

Jizọs Ḅe Pita Ḅe Ò Pikiḅịa Ịkịan Nwọ Koromẹ

³¹ Anị Jizọs Ḅe nwọse ini ḅẹye-ẹ, “Mị ḍin ḅie ómine mgba mangị ị̀ koromasoḅịa, anịatịḅị Fịafịa ḍiri mị nwọ ḅẹmẹ, ‘Tamụnọ Ḅe ananaḍikiḍikiḅọ ḅe ḅaaḅịa, se ananama galagalaḅịa.’

³² Ọkụma à fị ḅụ sịsẹḅịa sịkị, àrị ọ́ tọrọkọ pẹlẹma so Galili munḅịa.”

³³ Pita ḅe pẹkẹrẹ se nwọse Jizọs Ḅe ḅẹmẹ, “Àrị ngịsị ị́ wẹrịso-ẹkẹ, ísí apụ mamgba ị́ wẹrịsoḅịa nwọ ḅẹ sọnị!”

³⁴ Jizọs Ḅe nwọse Pita ḅe ḅẹmẹ, “Kọkọmaye à nwọ ḍuko ị́ pịrịaḅẹ na, mị ḍin, ọḅọkọ ma paịnka simeogbo, ị́ tẹrẹ-a sịkị se ị̀ pikiḅịa.”

³⁵ Pita ḅe pẹkẹrẹ se nwọ ḅẹmẹ, “Ngịsị àrị ị́ piki-ẹkẹ, àrị ị́rị́ na fịḅịa nwọ ḅẹ sọnị!” Se ísí ọḅụḍukoapụ mamgba anị gbọrị ḅara mị nwọ ḅẹmẹ.

Jizọs Ḅe Gẹtsimẹnị Ḅie Tẹkẹmẹ

³⁶ Anị Jizọs Ḅe oria ọḅụḍukoapụma na so Gẹtsimẹnị nwọ chịn gbọrị nyọ mun ye-ẹ, se ọ̀ nwọse ini ḅẹmẹ, “Ọ́ mịanga sime, anịsịkị ị̀rị̀ à somun anịanga tẹkẹḅịa.”

³⁷ Ò Pita ḅe na, Zẹbidi mama owuapụ awọma na, ọkị ọḅụ chụamẹ. Ngịrị na fị ḅụḅalaḅala na Ọ̀ pụnụmamẹ,

³⁸ se Ọ̀ nwọse ini ḅẹmẹ, “Ị̀ kuḅie mị anị opuma ibo dekisam, ọkịmun fị mị lamẹ. Ọ́ mịanga sime se ị̀rị̀ na koru.”

³⁹ Ò kele nwẹngị sikima mun se, ọ̀ ḅụ se chịẹma gbin, tọrụ se kiri iḅo se tẹkẹmẹ, “Ị̀ Ḍa, anị ḅọrọ ineda mịẹḅịa ọkụma, ye mị tọrụsiọrị ọmọngọ mị ị̀ gbarị ḅọrọ! Ọkụma à ḅi ḅara mịkẹ, Ị́ ḅi ḅara mị-ẹ.”

⁴⁰ Ò vinpịkị tẹrẹ-a ọḅụḍukoapụma damaḅomẹ, se ọrịmẹ na ini mọnọaḅẹ, Ọ̀ nwọse Pita ḅe ḅẹmẹ, “Nde mịẹse ómine tẹrẹ-apụma ineda ị̀ ḅụ sọ gbọrị sịkị kẹngẹ sọ se ị̀rị̀ na korukaye?

⁴¹ Ó koru, se tẹkẹ, mịẹse ọ́ ḅịkịmun telima ḅie sọẹka ḅara. Tẹmẹ mị anị ḅụ karakarama waraḅẹ, ọkụma ịnyọ ojumịnị mị ḅụ ofori-ẹ.”

⁴² Jizọs Ḅe pịkị maịn karama sịkị se somun tẹkẹmẹ, “Ị̀ Ḍa à mị tọrụsiọrị ọmọngọ mị ḅuka simeogbo anị ḅọrọ ẹkẹ ḅẹḅẹ, Ị́ ḅi ye mị mị-ẹ.”

⁴³ Ọ̀ pịkị kpoto vinpịkị mun mẹ se ọḅụḍukoapụma mọnọarị ọkụ nwọ ọrịmẹ, ini ineda inia tọrụmgbọlụma finjikẹ.

⁴⁴ Jizọs Ḅe pịkị ini koromasomẹ, se tẹrẹ-a sịkị karamaye nwọse tẹkẹmẹ, àrị gbọrị ọkwẹịnma nwọ kọnmẹ.

⁴⁵ Anịsịkị ò vinpịkị ọḅụḍukoapụma damamun se nwọ ḅẹmẹ, “Ọ́ pa mọnọ se ịnyọ sara-ao? Ḍiki! Sịkị mị anị ḅo ḅarakuḅu lasam ini Tomoniḅọ Tọkụ Ḅe ḅọrọma si apụma pịrịsam.

⁴⁶ Ọ́ Sịsẹ, ó ye wa so. Ḍiki, ḅe anị ị̀ se ịbafị ḅọ ḅe-ẹ!”

Jizọs Ḅe Kun Mị

⁴⁷ Jizọs Ḅe pa ọkwẹịn simearịogbo anị Judas, oyimaịn ọḅụḍukoapụ fịnjịma ḅie gbọrịḅọ ḅo laye-ẹ. Ḅaka tomonikpo ọ̀ ḅụ sọmẹ, okola-agiji na imgbele na nwọ ọlọ waraḅẹ. Tịḅịnị agbamịẹapụma na Ju sẹnịapụma na ini fịrịmamẹ.

⁴⁸ Ịbafịḅọ ḅe ori elekima se tomonikpo mị pịrịmẹ na, “À ḅịpị nọnjụḅịa ḅọ ḅe, anị ọ́ ḍọkịarịḅọ ḅe-ẹ. Ómine ò kun!”

⁴⁹ Judas ḅe ọ̀ gbụkụkụma Jizọs Ḅe damamun se nwọ ḅẹmẹ, “Dein ị́rị́ na sime, Yeḍieḅọ,” se ọ̀ ḅịpị nọnjụmẹ.

⁵⁰ Jizọs Ḅe nwọse ọ̀ ḅẹmẹ, “Ikiaḅọ nde ị́ nwẹngịarị ọkụ?” Anị ini ḅo Jizọs Ḅe kun se kụrọma ori ọlọ se soye-ẹ.

⁵¹ Jizọs Ḅe na sime apụma ḅie gbọrịḅọ, oria okola-agiji mị wọrọpakụma, anị se Gele Agbamịẹḅọ ḅe warị omoniḅọ ḅe ḅeri pẹlẹ sinmẹ.

⁵² Anị Jizọs Ḅe nwọse ọ̀ ḅẹye-ẹ, “Ị́ya okola-agiji mị se anịa lubu ḅie chụa, anịatịḅị okola-agiji deki apụ mamgba okola-agiji fị nwọ kọnḅịa.

⁵³ Ó nemika na àrị ineda Ị̀ Ḍa Ḅe chịnḅịa na ọ̀ ḅarachụa ị̀ pịrị, se Ọ̀ pịkị kirikiri owuni poku-a tesi oyimaịn fịnjị nẹngịma owuni enjẹlapụ nwọse ị̀ fịrịmaḅịa?

⁵⁴ Anị ọkọ paka ọkụma nde Fịafịa ḍiri mị ḅo kọkọmaye nwọ sọḅịa ọkụ, na anị mị ḅara nwọ pakaḅịa ḅẹye mị?”

⁵⁵ Anị Jizọs Ḅe ọkwẹịn tomonikpo mị pịrịye-ẹ, “Ómine okola agijima na imgbelema na nwọse ḅo ị̀ kun-e ḅo, ị̀rị̀ furuḅọ ọkụ? Eneḅeneḅene àrị Oputẹkẹwarị mị ḅie sime yeḍie-ḍiemẹ, ómine ị̀ kunkẹ.

⁵⁶ Ọkụma màye mamgba pakasam ịkịankoroapụma Fịafịa ḍiri mị ḅie gịẹịnsa yema ḅo kọkọmaye nwọ sọḅịa gose.” Anị ọḅụḍukoapụ mamgba ò koroma mangị soye-ẹ.

Jizọs Ḅe Ḅẹrẹchiri Mị Tọrọkọ Chịẹmẹ

⁵⁷ Jizọs Ḅe kun apụma Ò se Kayafas Gele Agbamịẹḅọ ḅe warị mun mẹ, anị Oloko ḍieapụma na, sẹnịapụma na koḅirima nyọ mị.

⁵⁸ Ọkụma Pita ḅe sasaju ḅụ wẹrị Ò ḍuko mun Gele Agbamịẹḅọ ḅe odo mị ḅọkọ lamẹ. Ori odo mị ḅie sọmun se nyọ koruapụma na kpọnjị simemẹ, anịanga kuluma mị ọrịḅịa ẹrẹchị.

⁵⁹ Tịḅịnị agbamịẹapụma na bebe ḅẹrẹchiri mị mgba na ini se Ọ̀ tịḅị gbanaḅịa iruoaye nwọ ḅiamẹ, se Jizọs Ḅe pụnụma se Ọ̀ ḅaaḅịa gose;

⁶⁰ ọkụma ini ineda ḍọkịḅoye ofori-ẹ, tọn-apụ pakaḅo Ọ̀ ḅụ iruoaye nwọ ḍukomẹ ḅẹ sọnị. Anịḅe kuluma mama owuapụ nwẹngị pakaḅo

⁶¹ se nwọ ḅẹmẹ, “Ḅe ḅọ Ḅe nwọ ḅẹmẹ, ‘Àrị ineda Oputẹkẹwarị mị nwọ sumagbinḅịa, se tẹrẹ-a ḍin ḅụ anị nama chịẹmaḅịa.’”

⁶² Gele Agbamịẹḅọ ḅe sịsẹ chịẹ se nwọse Jizọs Ḅe ḅẹmẹ, “Ini se Ị́ pụnụmayema ḅụ Ị́ nyana se pẹkẹrẹḅịaye ofori?”

⁶³ Ọkụma Jizọs Ḅe gboinma ò pokimẹ. Gele Agbamịẹḅọ ḅe pịkị ḅarị ọkwẹịn Ọ̀ pịrịmẹ, “Ḍumo gbamaso Tamụnọ Ḅe ẹrẹ ḅụ, à mịọkụ ye karị ị́ pịrịaḅẹ: ḍuko wa pịrị ị́rị́ Mẹsaya Ḅe-ẹ ḅẹḅẹ, Tamụnọ Tọkụ Ḅe.”

⁶⁴ Jizọs Ḅe ọ̀ pẹkẹrẹmẹ, “Ị́rị́ ọkọ ḅẹmẹ. Ọkụma à ḍuko ómine mgba pịrịaḅẹ: na mịọkụ ọkịmun, ọ́ Tomoniḅọ Tọkụ Ḅe ọrịḅịa Kụrọmamgba Nyanaḅọ Ḅe amaḅara anga ò sime waraḅẹ, pịkị so elekimama ọgọnọ wẹrị ḅoḅịa sịkị!”

⁶⁵ Mịn mị ḅụ, Gele Agbamịẹḅọ ḅe ịganị ḅụ oria ḅụchụaye kan se nwọ ḅẹmẹ, “Mịn Tamụnọ ḍukosima-ẹ! Wa ḅarị jịn onyechịẹapụ ḅikẹ! Mịnyọ ḅụ ómine Oria sitịḅị ọkwẹịnma nwọ naasam!

⁶⁶ Nde ó koroma ọkụ?” Ini ọ̀ pẹkẹrẹmẹ, “Ḅẹrẹ Ọ̀ ḅara sisam, Ọ̀ fị na gbẹịnmẹ.”

⁶⁷ Anịsịkị ini fụla se Ọ̀ tọrụ sara se Ò fomumẹ se Ọ̀ ḅụrọ apụma

⁶⁸ nwọ ḅẹmẹ, “Mẹsaya ịkịankoro wa pịrị! Mgbamgba tụḅọ Ị́ ḅakụ!”

Pita Ḅe Jizọs Ḅe Pikimẹ

⁶⁹ Pita ḅe odo mị ḅie kpọnjị sime waraḅẹ, fịrịnwẹngị Gele Agbamịẹḅọ ḅe pịrịarị iremeniawọma ḅie gbọrịḅọ ọ̀ damaḅo se nwọ ḅẹmẹ, “Ị́rị́ sọnị Jizọs Galili ḅọ Ḅe na nwẹngịḅọ-ẹ.”

⁷⁰ Ọkụma ori inimgba tọrụkuḅu ḅụ anị pikimẹ. “Ị́ ḍukoarịye tịḅị à nemikẹ,” ọ̀ nwọ pẹkẹrẹmẹ,

⁷¹ se odo mị ḅie ḅọrọ pakaso nyọ mị mun mẹ. Jịn fịrịnwẹngị iremenitọkụ ori ọrị se nwọse anịanga ḅụ sime owuapụma ḅẹmẹ, “Ò Jizọs Nazarẹt ḅọ Ḅe na nwẹngị simemẹ.”

⁷² Pita ḅe pịkị anị pikimẹ, se pẹkẹrẹmẹ na, “À yekarịfịmẹ na ori ḅọ Ḅe àrị Ò nemikẹ!”

⁷³ Sịkị kele ḅọrọ sịkị anịnyọ ḅụ chịẹsime owuapụma Pita ḅe damaḅo se nwọ ḅẹmẹ, “Anị sime ḅara ị́rị́ inia ḅụ gbọrịḅọ-ẹ, ị́ya ọkwẹịn ḅara mị ị́ ḍiepakụmamẹ!”

⁷⁴ Anịsịkị Pita ḅe yekarịfịmẹ, “Ye Tamụnọ Ḅe ḅụfụka se ị̀ pịrị à nwọ ḍukoarịye mị kọkọmayekẹ ḅẹḅẹ! Ori ḅọ Ḅe ngịsị àrị Ò nemikẹ!” Anị gbọrị kirikiri ḅụ ọḅọkọ ḅe paịnmẹ,

⁷⁵ se Pita ḅe Jizọs Ḅe ḍuko ọ̀ pịrịye mị nwọse ḅiekoromamẹ: “Ọḅọkọ ma paịnka simeogbo tẹrẹ-a sịkị ị́ nwọse ị̀ pikiḅịa na ị́ ị̀ nemika-ẹ.” Ọ̀ pakaso se mun ḅụ akụ ḅara nwọse owumẹ.