Matio 23 - Kịrịkẹnị Baịbụl

Jizọs Ḅe Ḅerijine Ọkwẹịn Nwọ Kọnmẹ Oloko Ḍieapụ Ma Na Farisiapụ Ma Na Gbakịmaye Ḅụ

¹ Anịsịkị Jizọs Ḅe nwọse tomonikpo mị na oria ọḅụḍukoapụma na ḅẹmẹ.

² “Oloko ḍieapụma na, Farisiapụma na anị Moziz Oloko mị fiearịye nwọ ḍuko pakụmarị apụma-ẹ.

³ Ómine ini ḍuko ọ́ pịrịarịyema nwọ mịẹ, pịkị àrị ḍuko nwẹngị, ọkụma ómine inia ye mịẹḅara nwọ ḍikima yemịẹ ma, anịatịḅị ini ḍuko ọkụ ini nwọ mịẹmịẹkẹ.

⁴ Ini opuma ikuaye fịna se tomonima ọgọnọ gbanamẹ, na ini pụra ọkụma inia ḅaratụmgbalị kẹngẹ sọ ini se àrị lama, ḅarachụa pụra-ẹkẹ.

⁵ Ini yegoyegoye nwọ mịẹmẹ tomonima pa ini ọrịḅịa gose. Ini se inia fụḅara ogboma na ḅara kọngọma na ḅụ kpọ fịafịa ḍiri mị ḅie pakaḅo gịẹịn yema ḍụḅa la-ọkụ ḍiki, inia koro ḅụchụayema chuku ịsakama nangwọ la-ọkụ ḍiki!

⁶ Alalị fị nyọma ḅụ iḅitẹịn kirima ini nwọ ḅẹlẹmamẹ, pịkị tẹkẹwarịma ḅie iḅitẹịn ịkasịema sẹlẹ ọrụtọn iniaḅụ wẹrịmamẹ.

⁷ Ini ḅimẹ fẹchiri ḅie tomoni ini kereni pịkị ‘Yeḍieḅọ,’ nwọse ini chịn.

⁸ Ini yeḍieapụ se ọ́ chịnma, anịatịḅị ómine mgba mịnapụ-ẹ, gbọrị yeḍieḅọ kẹngẹ mị ọ́ nyanaye-ẹ.

⁹ Ọ́ pịkị ‘Ḍaḅọ,’ nwọse mị tomonikiri ḅie, gbọrịḅọ sọ chịnma, anịatịḅị gbọrị Ḍaḅọ kẹngẹ mị ọ́ nyanaye-ẹ soḅie.

¹⁰ Ini pịkị ‘Tịḅịnịḅọ,’ se ọ́ chịnma, anịatịḅị gbọrị tịḅịnịḅọ kẹngẹ mị ọ́ nyanaye-ẹ, anị Mẹsaya Ḅe-ẹ.

¹¹ Ọ́mịna ḅie opusọtẹịnḅịa ḅọ ḅe ọ́mịna fịrịnwẹngịḅọ nwọ sọḅịa.

¹² Mịna ḅụ se opuḅọ mịẹḅọ goyegoye ini nwọ iderimaḅịa, se mịnaḅụ iderimaḅọ goyegoye ini nwọse opuḅọ mịẹḅịa.

Jizọs Ḅe Inia Epekelepepe Mịẹaye Ma Nwọ Ḍuko Simamẹ

¹³ “Sifụla sime ọ́ pịrị, ómine Oloko ḍieapụ na Farisiapụ na! Epekelepepe-a tomoni! Ó tomonima tọrụkuḅu soḅie Amanyanakiri ḅọkọ mị palịmẹ, ọkụma ómine na mịnaḅụ na ọ́ sọmun ḍọkịkẹ, ọ́ pịkị ḅereni ḅụkụrọma sọmun ḍọkị apụma pịrịkẹ ini sọmun!

¹⁴ Sifụla sime ọ́ pịrị, ómine Oloko ḍieapụ na Farisiapụ na! Epekelepepe-a tomoni! Ó deapụfị eremenima bin, se ini inuma inia warịma ọkịmẹ, anịsịkị tọrụpaka nangwọ tẹkẹ nwọ kọn ini pịrịaḅẹ! Mịn mị gose ọ́mịna ḅụfụka sitẹịnḅịa!

¹⁵ “Sifụla sime ọ́ pịrị, ómine Oloko ḍieapụ na Farisiapụ na! Epekelepepe-a tomoni! Ọ́ tọrụma dọkụ kelema se bebe sẹma nwọ saḅa koromẹ, ọ́ pa gbọrịḅọ mịẹse iniḅọ vinpịkị ó ḍuko nwẹngịḅịa ẹrẹchị se anị ọ́ ḅara sọ sịkị, ómine iniḅọ mịẹse iniḅọ mama sịkị se kọrịfịnị ḅie sọ, ó sime ḅara mị nẹngịmẹ!

¹⁶ “Sifụla sime ọ́ pịrị, ómine tọrụmgbọlụpụn ateli ḍieapụ! Ọ́ nwọse ye ḍiemẹ na, ‘Tomoniḅọ nemikase Oputẹkẹwarị mị nwọ karịfị ọkụma, anị yeḅụ ofori-ẹ ọkụma iniḅọ Oputẹkẹwarị mị ḅie sime golima nwọ karịfịmẹ ḅẹḅẹ, ò ḅereni yemị anị ọ̀ fịnamasam.’

¹⁷ Yenemika tọrụmgbọlụpụn apụ! Nde maịn ma ḅụ yesọtẹịnye, goli mị mọnọ se goli mị mịẹfịafịama Oputẹkẹwarị mị?

¹⁸ Ọ́ pịkị nwọse yeḍiemẹ na, ‘Tomoniḅọ nemikase agbamịẹ ẹbẹ mị nwọ karịfịmẹ ḅẹḅẹ anị yeḅụ ofori-ẹ ọkụma ò nemikase agbamịẹ ẹbẹ mị ọgọnọ sime ḍiepịrịye mị nwọ karịfịmẹ ḅẹḅẹ, ò ḅereni yemị anị ọ̀ fịnamasam.’

¹⁹ Ọ́ tọrụmgbọlụpụn ọkụ ḍiki! Nde yeḅụsọtẹịnye, ḍiepịrịye mị mụnọ se ḍiepịrịye mị nwọ mịẹfịafịama agbamịẹ ẹbẹ mị?

²⁰ Anị ọkụma tomoniḅọ agbamịẹ ẹbẹ mị se yekarịfị sịkị, ori agbamịẹ ẹbẹ mị na anịa ọgọnọ sime ḍiepịrịayema na nwọse chụa karịfịsam;

²¹ tomoniḅọ pịkị Oputẹkẹwarị mị nwọ karịfị ọkụma, ori anị na Tamụnọ Ḅe na nwọ karịfịaḅẹ, anị nyọ anga ḅọ ḅe

²² tomoniḅọ pịkị so mị nwọ karịfị ọkụma, Tamụnọ Ḅe amanyana ngada mị na anịa ọgọnọ sime ḅọ Ḅe na ọ̀ nwọ karịfịsam.

²³ “Sifụla sime ọ́ pịrị, ómine Oloko ḍieapụ na Farisiapụ na! Epekelepepe-a tomoni! Oyi-a kiri ḅe gbọrị kiri ọ́ nwọse Tamụnọ Ḅe pịrịmẹ, fịye ḅẹlẹma ịnyanyama ḅụ sọnị, ọgụ na, kụnụḍiri na, ọha na, pembe-aye, ọkụma yeḅụsọtẹịn ḅara sime Oloko mị ḅe-a ḍieyema ọ́ nwọse yechịnkẹ, karakara ḅẹrẹkọn na, ḍikiḅụgerere nyana na, jịnḅọ inumaka na, pembe-aye ma. Mà ma mị ó se mịẹmịẹye ḅụ chu gbẹịn aye ma-ẹ, ísíaye ma ḅụḅarasinka ḅụ.

²⁴ Tọrụmgbọlụpụn ateli ḍieapụ! Ómine ọ́mịna iru ḅie kala ọmụmụ ḅe ọkẹ pakụmaḅomẹ, ọkụma ike-nambulo na gbasị nama ọ́ nwọse chụa mịnịmẹ!

²⁵ “Sifụla sime ọ́ pịrị, Oloko ḍieapụ na Farisiapụ na! Epekelepepe-a tomoni! Ọ́mịna ọmọngọma na ẹfẹrẹma na ọḅụma ọ́ nwọ mịẹfịafịamamẹ, ọkụma ọ́ kụrọ ḅara na ịmụkụ na ḅụ ọkị ayema arịa ḅie ḅein waraḅẹ.

²⁶ Tọrụmgbọlụpụn Farisiapụ! Ọ́ tatarị ọmọngọ mị ḅie sime ayema nwọ mịẹfịafịama, anịsịkị ọḅụ mị sọnị fịafịaḅịa!

²⁷ “Sifụla sime ọ́ pịrị, ómine Oloko ḍieapụ na Farisiapụ na! Epekelepepe-a tomoni! Ḅịaḅịa agba se ọmbị iḍupu simeọkụ anị ó simeọkụ-ẹ, ọgọnọ mị ḍikitọrụgbẹịn ọkụ nwọ simemẹ, ọkụma arịa ḅie mgba fịapụ imgbe na ḅụrụsa ojumịnị na ḅein waraḅẹ.

²⁸ Anị gbọrị ḅara mị ḅụ, ḍikitọrụ ḅụ ómine mgba tọrụ ḅụ karakara waraḅẹ, ọkụma ọ́mịna ḅieju ḅụ epekelepepe ḍumo, na si-a mịẹmịẹye na ḅein waraḅẹ.

Jizọs Ḅe Ọḅụḍukoapụma Ọrịḅịa Ḅụfụka Ịkịan Nwọ Koromẹ

²⁹ “Sifụla sime ọ́ pịrị, ómine Oloko ḍieapụ na Farisiapụ na! Epekelepepe-a tomoni! Ómine iḅi iḍupu mịẹ ịkịankoroapụma pịrịmẹ pịkị karakaraye mịẹapụma, se ḅiekoromaḅịa iḍupuma nwọ ḅirimamẹ;

³⁰ ọ́ nwọ ḅẹmẹ na, nemikase mịna ḅieju-aḍapụma sịkị ḅụ wa pakaḅo ọkụma wa iniaḅụ sọ se ịkịankoroapụma nwọ ḅaa-ẹkẹ.

³¹ Anị ḅụ ó ḅereni ọkịsam na ómine ma ịkịankoroapụma ḅaa apụma awọ-ẹ!

³² Ọ́ mịẹ karama ọ́mịna ḅieju-aḍapụma mịẹ kọnma ayema!

³³ Ómine si oruwu na oruwuawọ na! Nde ọ́ tọrụseḍiki ọkụ na ḅẹrẹḅarasi ọ́ gbarị, se ọ́ kọrịfịnị mị ḅie sọẹkẹ nwọ ḅẹ ọkụ?

³⁴ Anị gose à ḍuko ọ́ pịrị aḅẹ, àrị ịkịankoroapụ na yenemiapụ na, yeḍieapụ na nwọse ọ́ fịrịmaḅịa, ómine inia ḅie tọn apụ nwọ ḅaaḅịa, se ísíapụma ḅakụḅaaḅịa mgbẹsẹchịn ọgọnọ, inia ḅie tọn apụ ọ́ nwọ fomuḅịa ọ́mịna tẹkẹwarịma ḅie se amama ḅie ini dema-dema ḅọrọḅịa.

³⁵ Mịẹso sịkị ḅẹrẹtịḅị nemika se ini ḅaa sa apụ mamgba ḅe ḅụfụka, ọ́mịna ọgọnọ gbanaḅịa ọkụ, ḅẹrẹtịḅị nemika Ebẹl ḅe fị ḅụ ọkịmun Zẹkaraya ḅe la, Bẹrakaya yaḅe, Oputẹkẹwarị mị na agbamịẹ ẹbẹ mị na ogboku ḅụ ó niniḅọ ḅe.

³⁶ Kọkọmaye à nwọ ḍuko ọ́ pịrịaḅẹ: mịna apụ mamgba tịḅị ḅụfụka mị, mịmgba ene ḅie apụma ọgọnọ gbanaḅịa!

Jizọs Ḅe Nyana Jerusalẹm Pịrị Ḅẹlẹma

³⁷ “Jerusalẹm, Jerusalẹm! Ị́rị́ ịkịankoroapụma nwọ ḅaa, pịkị ḍụparị se Tamụnọ Ḅe se ị́ fịrịma okunwẹngịapụma nwọ gbinmẹ! Nda sịkị na gbasịye à nwọse ị́ya tomonima koḅiri ḅe, ọḅọkọ pamba finji oria awọ nwọ jụ ḅara à nwọse ị́ jụmẹ, ọkụma ị́ ḅereni ị̀ pịrịkẹ!

³⁸ Mịọkụ ini gbọtụḅara ị́ya Oputẹkẹwarị mị kankoroma pịkị anị sịkịsam.

³⁹ Mịọkụ ọkịmun ị́ ḅarị ngịsị ị̀ ọrị ẹkẹ, ọkịmun ị́ nwọ ḅẹḅịa sịkị la, na ‘Boma sime Nyanaḅọ Ḅe ẹrẹ ḅụ ḅo ḅọ Ḅe pịrị.’”