Matio 20 - Kịrịkẹnị Baịbụl

Vaịn Chịnmgbọlụ Ozu Ḅie Fịrịnwẹngịapụ Ma

¹ “Soḅie Amanyanakiri mị mịn anị sime ọkụ-ẹ, gbọrịsịkị gbọrị owuḅọ dede ḅie pakamun owuapụ ọkọ mẹ oria irumịẹ chịnmgbọlụ ozu mị ḅie fịrịnwẹngịḅịa ẹrẹchị.

² Ori ini na ḅịpị ọkịamẹ na gbọrị kọbọ mị ò se enetịḅị ḅụ ḅọḅọ gbẹịnḅịaye-ẹ, se ini so oria irumịẹ chịnmgbọlụ ozu mị ḅie mun mẹ, fịrịnwẹngịḅịa ẹrẹchị.

³ Esenia-a so ḅiri ḅụ ọ̀ pịkị paka fẹchiri mun se fịrị nyanaka jịn owuapụ nwọ ọrịmẹ.

⁴ Se ọ̀ nwọse ini ḅẹmẹ, ‘Ómine sọnị ó mun irumịẹ chịnmgbọlụ ozu mị ḅie fịrịnwẹngị, se ọ́ gbẹịn na iḅi ḅara à nwọse ọ́ gbẹịnḅịa.’

⁵ Anị ini mun ye-ẹ. Oyimaịn so fịnjị ḅiri ḅụ na, pịkị tẹrẹ-a so ḅiri ḅụ na, ori anị gbọrị ḅara mị nwọ mịẹmẹ.

⁶ Anị sọnọ-a so ḅiri nwọ la-ẹ tọn aḅẹ, se ọ̀ pịkị fẹchiri mị nwọ mun mẹ, se pịkị tọn-a owuapụ nwọ ọrịmẹ, anị nyọ chịẹ sime waraḅẹ. Ọ̀ nwọse ini gbelamẹ, ‘Nde ó gose mịanga ḅụ bebe ene mịmgba nwọ famarịye, gbọrịye sọ mịẹka ḅụ?’

⁷ Ini nwọ pẹkẹrẹmẹ, ‘Gbọrịḅọ sọnị fịrị ḅụ mine ọkọkẹ.’ Ọ̀ nwọse ini ḅẹmẹ, ‘Iḅimẹ, anị-ẹ ḅẹḅẹ, ómine sọnị ó mun irumịẹ chịnmgbọlụ ozu mị ḅie fịrịnwẹngị.’

⁸ “Saso sọ sịkị, ozu mị nyanaḅọ ḅe nwọse oria fịrịtịḅịnị ḅọ ḅe ḅẹmẹ, ‘Fịrịnwẹngịapụma chịn, se inia gbẹịnye se ini pịrị, ọḅụkulumaḅụ wa ọkọapụma ḅụ sakị, se wa tatarị ọkọapụma ḅụ kuluma.’

⁹ Sọnọ-a so ḅiri ḅụ sakị fịrịnwẹngịapụma gbọrị kọbọ ḅọḅọ nwọ ọkịmẹ.

¹⁰ Se ini tatarị ọkọapụma inia igbiki ḅo nwọ ọkịḅịa sịkị, ini nwọ chịnmẹ na inia igbiki ḅakatẹịnḅịa; ọkụma ini sọnị gbọrịḅọ gbọrị kọbọ ḅọḅọ ini nwọse ini pịrịmẹ.

¹¹ Ini inia igbiki ma ọkị, se sakị fịrị ḅụ ini ọkọ ḅọ ḅe se mukumukuma ọkwẹịnmẹ se nwọ ḅẹmẹ.

¹² ‘Mịna tomonima, ini ọḅụkuluma ọkọapụma kala sịkị kẹngẹ nwọse fịrịnwẹngịmẹ, mine bebe ene mị mgba nwọse ọfịrị ịrụa mị ḅie fịrịnwẹngịmẹ—anị sọnị gbọrị ḅara mị ị́ se mine mgba gbẹịnye-ẹ.’

¹³ Ozu nyanaḅọ ḅe nwọse inia ḅụ gbọrịḅọ pẹkẹrẹmẹ, ‘Poki, ikiaḅọ, àrị ị́ inumakẹ. Anị sime ḅara, ị́ ḅerenimẹ, gbọrị ene ḅe fịrị nwọ nwẹngị, gbọrị kọbọ ḅụ.

¹⁴ Mịọkụ, ị́ya gbẹịnye ọkị, se so warị mun. À ḅimẹ à se ị́ pịrị ọkụ mị à pịkị nwọse kuluma àrị ọkọ ḅọ ḅe sọ pịrị.

¹⁵ À kụrọ nyanaka ị̀ya igbiki nwọse ị̀ ḅụḅẹlẹ ḅara nwọ mịẹ? Anịkanịka à mịẹ iḅi mị ị́ ḅụ siye sọ?’”

¹⁶ “Se anịẹrẹchị, ọḅụkulumapụma ḅo tatarịapụ nwọ sọḅịa, tatarịapụma pịkịḅo ọḅụkulumapụ sọḅịa.”

Jizọs Ḅe Tẹrẹ-a Sịkị Karamaye Nwọse Oria Fị Ḅẹrẹ Ḍukomẹ

¹⁷ Jizọs Ḅe so Jerusalẹm nwọ mun-arịogbo, ori oyimaịn ọḅụḍukoapụ fịnjịma nwọ ọkị ọḅụpaka se ḅọịma ọkwẹịn kọn ini pịrịmẹ.

¹⁸ Ọ̀ nwọse ini ḅẹmẹ, “Ó poki, wa so Jerusalẹm mun aḅẹ, Tomoniḅọ Tọkụ Ḅe ini ọ̀ ḅọrọma tịḅịnị agbamịẹapụma na Oloko ḍieapụma na pịrịḅịa. Ini fị ḅẹrẹḅarasi nwọ pẹlẹ ọ̀ pịrịḅịa

¹⁹ anịsịkị ini ọ̀ ḅọrọma Jịnsẹapụma pịrị se ini ò kombo, ò fomu se ọ̀ ḅakụḅaaḅịa mgbẹsẹchịn ọgọnọ, se tẹrẹ-a ḍin karama ene ḅụ ọ̀ fịḅụsịsẹḅịa.”

Gbọrị Nyengiḅọ Ḅi Ye

²⁰ Anịsịkị Zẹbidi ḅe tarọ ma árịa mama owuapụ awọma se Jizọs ḅe damaḅomẹ, tịḅịtu Ọ̀ pịrị, se Ọ̀ ḅara ḅarachụa ḅimẹ.

²¹ Jizọs ḅe nwọse á gbelamẹ, “Cheye ị́ nwọ ḅi?” À nwọse ọ̀ ḅẹmẹ, “Ḅereni ị̀ pịrị na mà ị̀ya mama owuapụ awọma gbọrịḅọ ị́ya amaḅara anga sime, ísí ḅọ ḅe pịkị ị́ya ereḅara anga ḅụ sime, ị́ya Amanyanakiri mị ḅie.”

²² Ọkụma Jizọs Ḅe owuapụ awọma pẹkẹrẹ se nwọ ḅẹmẹ, “Ó ḅiarịye tịḅị ó nemikẹ. À ḅu-ẹ tọn àrị tọrụsiọrị ọmọngọ mị ómine ineda ḅu ḅe?” “Wa inedaḅịa,” ini nwọ pẹkẹrẹmẹ.

²³ “Ọ́ kọkọma ị̀ya ọmọngọ mị ḅie simeye mị nwọ ḅuḅịa,” Jizọs Ḅe nwọse ini ḅẹmẹ, “Ọkụma à kụrọ nyanakẹ, ị̀ya amaḅara anga na ereḅara anga na ḅụ simeḅịa apụ nwọ sẹlẹ. Mà kirima àrị sime ị̀ Ḍa Ḅe àrị karakarama koroma pịrị apụma nwọ pịrịmẹ.”

²⁴ Ísí oyi-a ọḅụḍukoapụma mịn mị naa sịkị inia ḅie ḅarị ḅẹlẹkẹ, mama mịnapụma ḅụ.

²⁵ Ọkụma Jizọs Ḅe inimgba chịn gboloma se nwọ ḅẹmẹ, “Ó nemimẹ na jịnsẹ ḅe ḅẹrẹtọn apụma ini tomonima ḅụ kụrọ kọnkọnmẹ, inia tịḅịnịma pịkị ḅẹrẹtọn ini pịrịpịrịmẹ.

²⁶ Mịn ḅara mị anị nwọsime ẹkẹ ọ́mịna ogboku ḅụ. Opusọ ḅiarị ḅọ omi-ẹ ḅẹḅẹ, ò kirikọn apụma ḅe fịrịnwẹngịḅọ nwọ sọḅịa.

²⁷ Pịkị ọ́mịna ḅie ḅụ tatarị ḅọ sọ ḅiarịḅọ omi-ẹ ḅẹḅẹ, ori ọ́mịna fịrịnwẹngịḅọ nwọ sọḅịa.

²⁸ Tomoniḅọ Tọkụ Ḅe ini fịrịnwẹngị ọ̀ pịrị-ẹ nwọḅẹ ye gose ò ḅokẹ, ọkụma ori re mị fịrịnwẹngị jịn apụ pịrịḅịaye-ẹ, pịkị ò ḍumo mị pịrị, se tọn apụ pẹkẹrẹḅoḅịa ẹrẹchị.”

Jizọs Ḅe Mama Tọrụmgbọlụpụn Owuapụ Gwọmẹ

²⁹ Jizọs Ḅe na oria ọḅụḍukoapụma na Jẹriko wẹrịsoarị sịkị ḅụ, ḅaka tomonikpo ini ḍukoaḅẹ.

³⁰ Ateli aka kpọnjị sime àrị mama tọrụmgbọlụpụn owuapụ ḅo naamẹ, na Jizọs Ḅe ọ̀ ḅọrọaḅẹ, nwọḅẹ sịkị ini sakị olokumẹ, “Devid Tọkụ! Wa ḍikiḅụgerere!”

³¹ Tomonikpo mị ini ḍiki ịganị se nwọse ini ḅẹmẹ, na ini deinma sime. Ọkụma ini gelema pịkị oloku tẹịnmẹ, “Devid Tọkụ! Wa ḍikiḅụgerere!”

³² Jizọs Ḅe dachịẹ se ini chịnmẹ. Ori ini gbelamẹ, “Cheye à nwọ mịẹ ọ́ pịrị ọ́ nwọ ḅi?”

³³ Ini nwọ se ọ̀ ḅẹmẹ, “Nyanaḅọ, wa ḅimẹ ị́ mịna tọrụmgbọlụma nwọ finji!”

³⁴ Jizọs Ḅe ini ḍikiḅụgereremẹ, se ḅara se inia tọrụmgbọlụma nwọ lamamẹ, kirikiri inia tọrụmgbọlụma finjimẹ, se ini ò ḍuko nwẹngịmẹ.